Amoji
1 Mu izuwa ya Uziya sobha ya Judá, ni mu izuwa ya Jelobowamu mon’a Jowaji sobha ya Izalayele, Amoji* o mubhidi wa jimbudi mukwa Tekowa, wamono kisumwa kyalungu ni akwa Izalayele. Kiki kyabhiti mivu iyadi ande dya kubhita o kitungutu kya ixi. 2 Mwene wambe, wixi:
“Jihova wanda zuma mu Ziyone, kala kizuma o hoji.
Wanda dikola ni dízwi dyaswina tunde ku Jeluzaleme.
Mu ididi ya abhidi mwene mudila o ibhaku mwanda kala mukondo.
Ku thala dya mulundu wa Kalumelu kwanda kukuta.”
3 “Kiki kyene kyambe Jihova:
‘“Mukonda dya Damasku ku ngibhukumukina lutatu ni mukonda dya ku ngibhukumukina mu luwana, eme ki nganda lungulula o kibanzelu kyami kya kwa akastikala.
Mukonda Ngiliyade a mutalesa hadi.*
4 Mukonda dya ima yiyi, o inzo ya Hazayele nganda ita túbhya,
O túbhya twanda bwika o jisabhalalu jakatunda ja Bene-Hadade.
5 Jihova wambe, wixi: Nganda bula o jiphapha ja mabhitu a Damasku.
Nganda bwika o athu atungu ku Bikyate-Avene,
Nganda bwika we yó utumina* ku Bete-Edene.
O mundu wa Sídya anda ubalakala mu mbanza ya Kili.’
6 Jihova wambe kiki:
‘“Mukonda dya Ngaza ku ngibhukumukina lutatu, ni mukonda dya ku ngibhukumukina mu luwana, eme ki nganda lungulula o kibanzelu kyami kya ku akastikala.
Mukonda ene ambata athu avulu a abalakalele phala kwabhakula bhu maku a akwa Idomo.
7 Mukyenyiki, o ilumbu ya Ngaza nganda ita túbhya,
O túbhya, twanda bwika o jisabhalalu jakatunda.
8 Ngana Jihova, Sukeku, wambe kiki: Nganda bwika o athu atungu ku Ajidode.
Ni yó utumina ku Axikilone.
Akwa Ekolone nganda ku akastikala,
O yó anda subhuka ku akwa Fidíxa anda fwa.”
9 Jihova wambe kiki:
‘Mukonda dya akwa Tilu ku ngibhukumukina lutatu, ni mukonda dya ku ngibhukumukina mu luwana, eme ki nganda lungulula o kibanzelu kyami kya ku akastikala.
Mukonda ene ambata athu avulu a abalakalele, phala kwabhakula ku akwa Idomo.
Mukonda ene kalembalala o kikutu kyate ni jiphange jâ.
10 O ilumbu ya Tilu, nganda ita túbhya,
O túbhya twenyutu twanda bwika o jisabhalalu jakatunda.’
11 Jihova wambe kiki:
‘Mukonda dya Idomo ku ngibhukumukina lutatu ni mukonda dya ku ngibhukumukina mu luwana, eme ki nganda lungulula o kibanzelu kyami kya ku mu kastikala.
Mukonda mwene walandameka* phang’yê ni xibhata bhu maku.
Waditunu kukwatela henda kwa phang’yê.
Mukonda dya njinda yê, mwene wajiji ni ku abwikisa,
Mwene wasuluka ni ku akwatela njinda.
12 Mukonda dya kyenyiki, o mbanza ya Tamane nganda ita túbhya,
O túbhya twanda bwika o jisabhalalu jakatunda ja Bozela.
13 Kiki kyene kyambe Jihova:
‘“Mukonda dya akwa Amone ku ngibhukumukina lutatu, ni mukonda dya ku ngibhukumukina luwana eme ki nganda lungulula o kibanzelu kyami kya kwa akastikala.
Mukonda ene atandula o mala a ahatu emitine, atungile ku Ngiliyade, phala kusanzumuna o ixi yâ.
14 Mukyenyiki, o ilumbu ya Labá nganda ita túbhya.
O túbhya twanda bwika o jisabhalalu jakatunda.
Mu kizuwa kyenyokyo kya ita, kwanda kala nzongo ya ita,
Kizuwa kya mvula yadikota ni kitembu kya kibhungu.
15 Jihova wambe we wixi: O sobha yê, kumoxi ni ilamba yê, anda ku a ambata phala ku akwika.”