Obadiya
1 Kisumwa kya Obadiya:*
Kiki kyene kyambe Ngana Jihova Sukeku yalungu ni Idomo:
“Twevu njimbu yatundu kwa Jihova,
Atumikisa mukunji phala kwambela o ifuxi:
‘Balumukenu, tudisokejekyenu phala kulwa ita ni Idomo.’”*
2 Nzambi wambe: “Talesa! Nga kutolesa mwaxaxi ka ifuxi,
A kusebhulula kyavulu.
3 O muxima wé wa kunganala mukonda dya ukumbu,
Eye wala mu mabanda a matadi,
Watungu mu ididi yadileka, wambe ku muxima wé:
‘Nanyi wanda ngibhangesa kutuluka bhoxi?’”
4 Jihova wambe dingi: “Né mwene se watungile mu kididi kyadileka* kala u holokoko,
Mba uta o kikalanga kyé kwala o jithéthembwa,
Ngeji kutulula-ku.”
5 “Se mu usuku kwa kumonekene miyi,
Keji kwambata ngo o ima yeji mesena?
Se akwa kubhongolola o jiuva ejile kokwé,
Keji xisa jiuva phala kujibhongolola?
Maji eye, anda ku bwika ku jinguma jé kate kya kujima o mbutu.*
6 Ene asange o jimbote joso ja Izawú,
Ya ajambata!
7 A kujijidika kuya bhu mbambe bhwa suku o ixi.
Oso atele o kikutu n’eye a kunganala.
O athu u wexile mudibhana-nawu kyambote a kutolola.
O yó adya o mbolo kumoxi n’eye anda kutela mubhetu phala ku kukwata,
Maji eye kwanda kijiya.”
8 Jihova wambe: “Mu kizuwa kiki,
Nganda jikinisa o jinjimu ja Idomo,
Ni athu atongoloka ala ku mbandu ya milundu ya mbutu ya Izawú.
9 Eye Temane, o masoladi mé anda kala ni wôma wavulu,
Mukonda oso ala ku mbandu ya milundu ya mbutu ya Izawú anda kwabwika.
10 Mukonda dya usweya u wabhange kwa phang’yé Jakobo,
Jisonyi janda kukwata,
Wanda jikinina kate ku hádya ni hádya.
11 Mu kizuwa ki wexile mutalé ngo,
Kyoso akwa ixi yengi kyambata o kifuxi kya Jakobo phala ku akwika,
Kyoso akwa ixi yengi kyabhitila bhu mwelu wé ya ate jisolote phala kudiwanena o jimbote ja Jeluzaleme,
Eye we wexile bhukaxi kâ.
12 Kutokalele kusanguluka mu kizuwa kyeza o wíndwa wa phang’yé,
Kutokalele kusanguluka mukonda dya wíndwa weza ku thandu a mundu wa Judá,
Kutokalele we kuzwela ni undanda mu kizuwa kya kutata kwâ.
13 Kutokalele kubhitila bhu mwelu wa mundu wami, mu kizuwa kyeza o kutata kwâ,
Kutokalele kusanguluka ni wíndwa wa mundu wami mu kizuwa kya dilamba dyâ,
Kutokalele we kutambula o jimbote jâ mu kizuwa kya divuwa dyâ.
14 Kutokalele kwimana bhu jiphambu phala kujibha yó alengele kya.
O yó asubhuka, kutokalele ku abhakula ku jinguma jâ mu kizuwa kya kutata kwâ.
15 Mukonda o kizuwa kya Jihova kya kukastikala o ifuxi yoso kyazukama.
O kima ki wabhange, kyene we kyanda kubhanga.
O ukexilu u watalatala-nawu akwenu, wene we wanda kutalatala-nawu.*
16 Mukonda, kala ki mwexile munwa o vinyu ku mulundu wami ukôla,
O ifuxi yandaya ni kunwa o njinda yami kala kyanwa o vinyu.
Ene anda nwa, anda minya mwene o njinda yami,
Anda jimuka kala nuka akexile-ku.
17 Maji-phe, o yó anda bhuluka anda kala ku mulundu wa Ziyone,
Wene wanda kala mulundu ukôla.
O dibhata dya Jakobo dyanda tambula dingi o ima ya atokala.
18 O inzo ya Jakobo yanda kala mukwa ni túbhya,
O inzo ya Zuze yanda kala mukwa ni mulengu,
O inzo ya Izawú yanda kala mukwa ni yangu ya kukuta.
Anda ibwika ni túbhya,
Kikwanda subhuka muthu mu dibhata dya Izawú,
Mukonda Jihova mwéne wakitange.
19 Ene anda lundula o mbandu ya Nengebe ni ya milundu ya mbutu ya Izawú,
Ya Sefelá ni ixi ya akwa Fidíxa.
Anda lundula o mbambe ya akwa Efalayíme ni mbambe ya akwa Samadiya.
Bejamí wanda lundula o mbandu ya Ngiliyade.
20 O yó atokalele mu ilumbu yiyi ya akwikile, kifwa, o mundu wa Izalayele,
Anda lundula o ixi ya akwa Kanana kate ku Salefá,
O yó a akwikile mu Jeluzaleme, exile ku Sefalade, anda lundula o jimbanza jala ku Nengebe.
21 O yó anda bhulula o mundu, anda banda ku mulundu wa Ziyone,
Phala kufundisa o athu atungu ku mbandu ya milundu ya mbutu ya Izawú,
O utuminu-phe wanda tokala kwa Jihova.”