Zakadiya

3 Mwene wa ngilondekesa o mukunji wa dikota Jozuwé, wemanene bhu pholo ya anju ya Jihova. Satanaji wemanene we bhu mbandu ya kadilu ka Jozuwé phala ku muzukutisa. 2 O anju ya Jihova yambela Satanaji, ixi: “Jihova akubazele éye Satanaji, kyene mwene, Jihova yó wasolo Jeluzaleme, a kubazele! O diyala didi kikixinji kyawama kyokatule bhu jiku?”

3 Jozuwé wazwatele izwatu yaxidi, mwene wemanene bhu pholo ya anju. 4 O anju yambela o athu emanene bhu pholo yê, wixi: “Mukatulyenu o izwatu yaxidi.” Mwene anga wambela Jozuwé: “Tala, ngajimuna o kikuma kyé, anda kuzwika izwatu ya makembu.”

5 Kyenyiki eme ngambe: “Mutyenu kitundu kyazele ku mútwe.” Ene anga amuta o kitundu kyazele ku mútwe, ya a muzwika we o izwatu. O anju ya Jihova yexile ku mbandu yê. 6 O anju ya Jihova yambela Jozuwé: 7 “Jihova dya ifuxi wambe kiki: ‘Se wenda mu jinjila jami, anga ubhanga kyambote o kikalakalu ki nga kubhana, wanda kala u mufundixi wa mundu wami, wanda langa we o inzo yami. Eme-phe, nganda kwehela kubhixila kokwami kala yá, ala bhabha.’

8 “‘Ngakudyondo, ivwa, éye u mukunji wadikota Jozuwé, ni oso ala kumoxi n’eye, yó axikama ku pholo yé, mukonda o mayala yá anda kala kijimbwete kya kwila: Nganda bheka o selevende yami amwixana Luthangu Lwasabhuka. 9 Talenu o ditadi di ngatula ku pholo ya Jozuwé! Ku ditadi dimoxi didi, kwala sambwadi dya mesu, nganda taku kijimbwete. Nganda jima o kikuma kya ixi yiyi mu kizuwa kimoxi ngo.’ Kiki kyene kyambe Jihova dya Ifuxi.

10 Jihova dya ifuxi wambe kiki: “Mu kizuwa kiki, kala muthu mudyenu, wanda kwixana mukwa phala kuxikama bhoxi dya muxi wê wa muvidi ni bhoxi dya muxi wê wa mufiku.”