Zakadiya

5 Ngabhetula dingi o mesu bhulu, éme ngamono mukanda wexile mubhita bhulu. 2 O anju ya ngibhula: “Ihi i wa mumona?”

Nga mutambwijila: “Nga mumona mukanda wa mubhita bhulu, wene wala ni makwinyi ayadi a jikovadu mu kulebha ni dikwinyi dya jikovadu* mu kuzanza.”

3 Mwene wa ngambela, wixi: “Didi dyene o dibhebhu dyanda kwiza ku thandu dya athu oso mu ngongo. Mukonda, sumbala o kunyana kituxi, kala kyosoneke mu mbandu imoxi ya mukanda, maji o yó anyana, kene mu abhanga kima. Sumbala o kuloka mu makutu kituxi, kala kyosoneke mu mbandu yamukwa ya mukanda, maji o yó aloka mu makutu, kene mu abhanga kima. 4 Jihova dya ifuxi wambe, wixi: ‘Éme nganda tumikisa o dibhebhu. Dyene dyanda bokona mu inzo ya mwiyi ni mu inzo ya yó uloka mu makutu mu dijina dyami. O dibhebhu dyanda xala mwenyomo, kate ki dyanda bwikisa o inzo yoso, kikale o mabaya a inzo, kikale o matadi.’”

5 O anju yakexile muzwela n’eme, ya ngizukama, ya ngambela dingi: “Ngakudyondo, bhetula o mesu bhulu, umone o kima kya mukwiza.”

6 Kyenyiki, eme nga mwibhwidisa: “Kiki kima kyahi?”

Mwene wa ngitambwijila: “O kisambu* kya kuzongela, kya mukwiza.” Mwene wambe dingi: “Kiki kyene o kifwa kya athu mu ngongo yoso.” 7 Bhenyobho, ngamono kwila, o tamba ya xumbu yakexile ku thandu a kisambu, a ikatula. Moxi a kisambu mwaxikamene muhatu. 8 O anju ya ngambela, ixi: “O muhatu yú, ulombolola o Kuyibha.” Mukiki, wa mulundula dingi moxi a kisambu, yu wakixiti ni nguzu yoso ni tamba ya xumbu.

9 Bhenyobho ngabhetula o mesu bhulu, ngamono ahatu ayadi akexile muzukama, o kitembwe kyexile mwabhangesa kudileka dingi bhulu. O mabhabha mâ edile kala a nyange. Ene azangula o kisambu bhulu,* ya a kyambata. 10 Eme ngebhula o anju yakexile muzwela n’eme: “O kisambu kiki a mukyambata kwebhi?”

11 Mwene wa ngitambwijila: “A mukyambata ku ixi ya Xinale.* Kwenyoko, o muhatu anda mutungila inzo. Kyoso kyanda zubha kutunga o inzo, anda mutula mwenyomo, mu kididi kyê kya mutokala.”