Zakadiya
6 Ngabhetula dingi o mesu, ngamono makalu awana a ita exile mutunda bhukaxi ka milundu iyadi, o milundu yexile ya ngondo. 2 O dikalu dya dyanga exile mudisunga ku jikabalu jakusuka, o dikalu dya kayadi exile mudisunga ku jikabalu ja xikatela. 3 O dikalu dya katatu exile mudisunga ku jikabalu jazele, o dikalu dya kawana exile mudisunga ku jikabalu jala ni mixinda ni mabaka.
4 Ngebhwidisa o anju yexile muzwela n’eme, ngixi: “Ngana yami, o makalu yâ alombolola ihi?”
5 O anju ya ngitambwijila, ixi: “Jiji o jianju jiwana ja dyulu, ja mutunda bhu pholo ya Ngana wavu o ngongo yoso. 6 O dikalu a mudisunga ku jikabalu ja xikatela, dya muya ku mbandu ya ixi ya thunda. O jikabalu jazele, ja muya ku mbandu kufwila o dikumbi. O jikabalu jala ni mabaka, ja muya ku mbandu ya ixi ya lwiji. 7 O jikabalu jala ni mixinda jakexile ni hanji yavulu ya kutunda phala kunyunga o ixi.” Mukyenyiki, mwene wambe: “Ndenu munyunge o ixi.” Jene jamateka kunyunga o ixi.
8 Mukusuluka mwene wa ngixana, yu wambe: “Talesa, o jikabalu jamuya ku ixi ya thunda jabhangesa kwila o njinda yexile-nayu Jihova ku ixi ya thunda, isosoloka.”
9 Jihova wa ngambela dingi, wixi: 10 “Tambula o ima yabheka, Heledayi, Tobiya ni Jadaya, yabhana o mundu a ukwika ku Babilonya. Mukusuluka, nde mu inzo ya Joziya mon’a Sofoniya kumoxi ni mayala yá atundu ku Babilonya. 11 Watokala kutambula o phalata ni ulu anga ubhanga-nayu kitundu. O kitundu ukita ku mútwe wa mukunji wadikota Jozuwé, mon’a Jehozadake. 12 U mwambela:
“Jihova dya ifuxi wambe kiki: “Yú mwéne o diyala amwixana Luthangu Lwasabhuka. Mwene wanda sabhukila bhu kididi kyê, wanda tunga o tembulu ya Jihova. 13 Mwéne wanda tunga o tembulu ya Jihova, mwéne we wanda tambula o unene. Mwene wanda xikama ku kyandu kyê kya ungana, wanda tumina, wanda kala we mukunji. Wanda bhanga o ikalakalu iyadi yiyi.* 14 O kitundu* kiki, atokala kukitula mu tembulu ya Jihova phala kulembalala yabhange Helema, Tobiya, Jadaya ni Heme, mon’a Sofoniya. 15 O athu atungu dikanga anda kwiza phala kukwatekesa kutunga o tembulu ya Jihova.” Enu mwanda kwijiya kwila Jihova dya ifuxi mwene wa ngitumu kokwenu. Kiki kyanda bhita ngo, se mubelesela o dízwi dya Jihova Nzambi yenu.’”