Zakadiya
7 Ku muvu wa kawana wa utuminu wa sobha Dályu, mu kizuwa kya kawana kya mbeji ya kavwa, kifwa o mbeji ya kijilewu,* Zakadiya watambula o njimbu ya Jihova. 2 O mundu watungile ku Betele, watumikisa Salezele, Lejemeleke ni mayala mê, phala kudyondela Jihova. 3 Ene ebhula o akunji akexile mu inzo ya Jihova dya ifuxi ni jipolofeta, exi: “O kwila twatokala kudila ni kujejuwala mu mbeji ya katanu kala kitwene mubhanga mu mivu yoso yiyi?”
4 Jihova dya ifuxi wa ngambela, wixi: 5 “O mundu woso wa ixi yiyi ni akunji wa atangela kiki: ‘Kyoso kimwakexile mu jejuwala ni kukala ni malamba mu mbeji ya katanu ni mu mbeji ya kasambwadi, mu makwinyi asambwadi a mivu, o kwila mwakexile mu kibhanga phal’eme? 6 Kyoso kimwakexile mudya ni kunwa, enu kimwexile mu kibhanga ngo phala o kusanguluka kwenu? 7 Abha-phe, kimweji belesela o izwelu ya Jihova ya mitudila o jipolofeta jê m’ukulu, kyoso Jeluzaleme ni jimbanza jazukamene mwatungile hanji athu avulu ni kutululuka, ni kyoso mu Nengebe ni mu Sefelá mwatungile athu avulu?’”
8 Jihova wambela dingi Zakadiya, wixi: 9 “Jihova dya ifuxi wambe: ‘Mu kufundisa, kanenu kufundisa ni mangonya, dikwatelyenu henda mudyenu, bhangenu o mbote ku akwenu. 10 Kanenu kutanga makutu phala kunyana kima kyangene, kikale kya mutudi, kya mon’a kitungu,* kikale kya mukwa ixi yengi mba kya ngadyama. Kimuxinganeke ku mixima yenu kubhanga phulu ku akwenu.’ 11 Maji ene aditunu ku ngibhana mátwi, mu kubhukumuka kwâ, a ngibhana dikunda, axiti o mátwi mâ phala kangivwe. 12 Ene akolesa o mixima yâ kala ditadi,* kabelesela o kijila ni izwelu yatangele Jihova ku jipolofeta jê jokulu, bhukaxi ka nzumbi yê ikôla. Mukonda dya kiki, Jihova dya ifuxi wa akwatela njinda yavulu.”
13 “‘Jihova dya ifuxi wambe kiki: Kuma ene kexile mu ngibhana mátwi kyoso kingexile muzwela-nawu, eme wami kingexile mwabhana mátwi, kyoso ene kyexile mudikola kokwami mu kubhinga kikwatekesu.’ 14 ‘Kala kibhanga o kitembwe kya nguzu, nga amwange mu ifuxi yakambele kwijiya. O ixi mwatundu ene yakituka kiphulungunzu kya hatu, séku muthu watenene kubhita-mu mba kutunga-mu dingi, mukonda o ixi yawabhele, yakituka ngundu.’”