Zakadiya

12 Njimbu yatundu kwa Nzambi:

2 “Jeluzaleme nganda mubhanga kala kopho ya vinyu, ibhangesa o ifuxi yoso ya muzukama kudibhala. O jinguma janda kondoloka o mbanza ya Judá ni mbanza ya Jeluzaleme. 3 Mu kizuwa kyenyokyo, Jeluzaleme nganda mubhanga ditadi dya neme phala o ifuxi yoso. Oso abalumuna o ditadi didi anda dikwama kyavulu. O ifuxi yoso ya ngongo, yanda dibhongolola phala kubhânga-nê. 4 Jihova wambe kiki: “Mu kizuwa kyenyokyo, o jikabalu joso nganda jitandanganyesa, o yó asambela-ku, nganda kwabhangesa kukala malaji. Nganda tonginina o dibhata dya Judá, maji nganda fwisa o mesu a jikabalu joso. 5 O atwameni a Judá anda xinganeka kiki: ‘O athu atungu mu Jeluzaleme, éne o nguzu yetu itunda kwa Jihova dya ifuxi, Nzambi yâ.’ 6 Mu kizuwa kyenyokyo, o atwameni a Judá nganda kwabhanga kala makala awama koxi a jihwinyi ni dikongolo dya túbhya dyawama bhukaxi ka ita ya tiliku. Ene anda bwika o ifuxi yoso ya azukama yala ku mbandu ya kadilu ni ifuxi yoso yala ku mbandu ya kyasu. O akwa Jeluzaleme anda suluka ni kutunga mu mbanza yâ, kifwa, mu Jeluzaleme.

7 “Jihova wanda dyanga kubhulula o jibalaka ja Judá, phala o fuma ya dibhata dya Davidi ni fuma ya athu atungu mu Jeluzaleme ki ikale kota, o fuma ya Judá ndenge. 8 Mu kizuwa kyenyokyo, Jihova wanda zokela o mundu woso wa Jeluzaleme. Mu kizuwa kyenyokyo, o yó wazoza wanda swina kala Davidi, o inzo ya Davidi yanda kala ni kutena kala Nzambi, kala o anju ya Jihova ya atwamenena ku pholo. 9 Mu kizuwa kyenyokyo, nganda bwikisa o ifuxi yoso yanda kwiza mulwa ita ni Jeluzaleme.

10 “Nganda lundulula o nzumbi ya ngalasa ni ya kudyonda ku inzo ya Davidi ni ku athu oso atungu mu Jeluzaleme. Ene anda tala kwa yó a mukubula ni sosa, anda mudila kala kyadila o mon’a umoxi-élele wafu. Anda dila kyavulu, kala kyadila o mona wa phande-kumbi wafu. 11 Mu kizuwa kyenyokyo, o akwa Jeluzaleme anda ditenda kyavulu kala kyaditende o athu ku Hadademono mu honga ya Mejidu. 12 O athu mu ixi yenyiyi, anda dila. Kala mwiji wanda dila ubheka wê. O akwa dibhata dya Davidi anda dila ubheka wâ, o ahatu atokala ku dibhata didi anda dila we ubheka wâ. O mwiji wa Natane, wanda dila ubheka wê, o ahatu atokala ku mwiji wenyú, anda dila ubheka wâ. 13 O akwa dibhata dya Levi anda dila ubheka wâ, o ahatu atokala ku dibhata didi anda dila ubheka wâ. O mwiji wa Ximeyi, wanda dila ubheka wê, o ahatu atokala ku mwiji wenyú anda dila we ubheka wâ. 14 O miji yoso ya mukwa, yanda dila ubheka wâ. O ahatu atokala ku miji yiyi, anda dila ubheka wâ.