Kala Kyasoneka Máluku

16 Kyabhiti o kizuwa kya Sábhalu, Madiya dya Manda ni Madiya many’â Tiyaku ni Salomé, asumbu ima i nuha kyambote, phala kuwaya ku kimbi kya Jezú. 2 Mu kizuwa kya dyanga kya semana,* ene adimeneka ku mbila, o dikumbi dya bandele kyá. 3 Ene akexile mu dizwelesa mudyâ, exi: “Nanyi wanda tu lundumwina o ditadi dyala bhu mwelu wa mbila?” 4 Maji kyoso ene kyatale bhu mwelu wa mbila, a mono kwila o ditadi a di setula-bhu, sumbala dyexile dyonene. 5 Kyoso ene kyabokona mu mbila, amono munzangala waxikama bhu mbandu ya kadilu, wate kizwatu kyalebha, kyazele. Ene anga asasumuka. 6 Mwene wa atangela, wixi: “Ki mu sasumuke! Enu mwa mu sota Jezú dya Nazalé, yó a mu phaphele ku taka?* Mwene kala bhabha, wa fukunuka. Talenu, kiki kyene o kididi bhwa mu tudile. 7 Ndenu mwa kà tangele o maxibulu mê ni Phetele, kwila: ‘Mwene wa mi twamenena ku Ngalileya. Kwene ku mwanda mu sanga, kala kya mi tangelele mwene.’” 8 Mu kiki, atundu mu mbila ni kulenga, ni kuteketa ni kudiwana. Ene kazwela kima ku muthu woso-woso, mukonda akexile ni wôma.*