Kala Kyasoneka Máluku
3 Lwa mukwá dingi, mwene wabokona mu dilombe,* anga mu kala diyala dya kexile ni lukwaku lwakate.* 2 Kyenyiki, o Jifalizewu akexile ku mu tonginina, phala kumona se wanda saka o diyala mu kizuwa kya Sábhalu, n’a mu tatele. 3 Mwene wambela o diyala wakexile ni lukwaku lwakate,* wixi: “Balumuka, zá bhukaxi bhabha.” 4 Jezú-phe wa a ebhwidisa: “O kwila kifwama kubhanga o mbote mu kizuwa kya Sábhalu, inga kubhanga kyayibha? Kubhulula mwenyu inga kujibha?” Ene adixibha. 5 Kyoso kyatale ku athu a mu kondolokele, mwene wa luwala kyavulu anga ukala ni njinda, mukonda dya kukola kwa mixima yâ, anga wambela o diyala, wixi: “Sununa o lukwaku lwé.” Mwene wa lu sununa, anga lu disanza. 6 Kyenyiki, o Jifalizewu jatundu. Mu kithangana kyenyókyo amateka ku dizwelesa ni akayedi a Helode, phala kusanga ndunge ya kujibha Jezú.
7 Jezú phe, wayi ku mbandu ya Kalunga ka Ngalileya kumoxi ni maxibulu mê, mundu wavulu watundu mu Ngalileya ni mu Judeya, anga a mu kayela. 8 Mu kwívwa o ima yakexile mu bhanga, mundu wavulu, katé mwene o athu a tundu ku Jeluzaleme, ku Idumeya ni ku sámbwa dya Njolodá, ni mu jimbandu ja Tilu ni Sidónya, eza mu disanga n’ê. 9 Mwene anga utangela o maxibulu mê, n’a mu bhekele ulungu, phala o mundu ka mu xine. 10 Kuma mwene wakexile mu saka athu avulu, oso akexile ni mauhaxi abhonzo, akexile mu bhongolokela kwa mwene, phala ku mu kwata. 11 Katé mwene ni athu akexile ni jinzumbi jayibha, kyakexile mu mu mona, akexile mu fukama bhu pholo yê ni kudikola, exi: “Eye u Mon’a Nzambi.” 12 Mu ithangana yavulu Jezú wakexile mwa tendelesa phala katangele o athu se mwene nanyi.
13 Mwene wabande ku mulundu, yu wexana amoxi ku maxibulu mê, ene anga a mu sanga. 14 Anga usola kibuka kya kwinyi ni kiyadi, yu wa aluku jipoxolo. Enyâ eji kala nê kumoxi. Ku pholo dya kwenda, weji kwa tumikisa phala kuboka, 15 ni kwa bhana o kutena kwa kukaya o madimonyo.
16 O akexile mu kibuka kya kwinyi ni kiyadi kyasolo mwene, enyá: Ximá, yó wa mu luku o dijina dya Phetele, 17 Tiyaku mon’a Nzebedewu, ni Nzwá phang’ya Tiyaku, (mwene wa aluku we o dijina dya Beneleje, dilombolola “An’a Kinuminu kya Nzaji”) 18 ni Mandele, ni Filipe, ni Matulu,* ni Matesu, ni Tomé, ni Tiyaku mon’a Lufewu, ni Tadewu, ni Ximá mukwa Kanana,* 19 ni Juda dya Kadyota, yó ku pholo dya kwenda wa mu sumbisa.
Mwene phe wabokona monzo. 20 Lwa mukwá dingi o mundu wa bhongoloka. Mukonda dya kiki, mwene ni maxibulu mê, katenene né ngó kudya. 21 Maji o jindandu ja Jezú kyevu o ima yakexile mu bhita, ayi phala ku mu kwata, mukonda akexile mu zwela: “Mwene kalé ni kilunji.” 22 O jimesene ja kulonga o Kitumu jatundu mu Jeluzaleme, azwela, exi: “Mwene ubhanga kiki bhukaxi ka Belezebú.* Wene mu tundisa o madimonyo ni kutena kwa mutwameni wa madimonyo.”* 23 Kyenyiki, mwene wa a exana, anga wa atela kifika, wixi: “Kyebhi Satanaji kyatena kukaya Satanaji? 24 Se utuminu u di wanuna mudyê, o utuminu yú ki utena kunangenena, 25 se mwiji u di wanuna mudyê, o mwiji yú ki utena kunangenena. 26 Se Satanaji u di lungulukila anga u di wanuna mudyê, mwene katena kunangenena, maji o dizubhilu dyê dya zukama. 27 Mu kidi, sé-ku muthu utena kubokona mu inzo ya dizonda phala kunyana o jimbote jê, se ka dyangela hanji kukuta o dizonda, anga unyana o jimbote jê m’onzo. 28 Ngi mi tangela o kidi kwila, an’a athu, ikuma yoso anda kwa lolokayu, ni kixongwenu kyoso-kyoso mba kituxi kyata, anda kwa loloka nakyu. 29 Maji woso uxongwena o nzumbi ikôla ya Nzambi, sé-ku dingi muloloki, o kituxi kyê ki nangenena. 30 Jezú wazwela kiki, mukonda ene akexile mu zwela, exi: “Mwene wala ni nzumbi yayibha.”
31 Many’â ni jiphange jê abhixila, emana bhu kanga, ya a tumu ku mwixana. 32 O mundu waxikama bhu mbandu yê, anga a mwambela, exi: “Talesa! Mam’enu ni jiphange jé ala bhu kanga, a mu kusota.” 33 Maji mwene wa atangela, wixi: “Mam’etu ni jiphange jami, ananyi?” 34 Kyenyiki, mwene watale swí athu oso a mu kondoloka, yu wa atangela, wixi: “Talenu mam’etu ni jiphange jami! 35 Woso ubhanga o vondadi ya Nzambi, mwéne phang’yami ya diyala, mwéne phang’yami ya muhatu, mwéne mam’etu.”