Mukanda wa Dyanga ku Akwa Kolindu
1 Eme Phawulu, a ngisolo phala kukala poxolo ya Jezú Kidistu mu vondadi ya Nzambi, ni phang’yetu Sosetene. 2 Ngamusoneka o mukanda yú phala o kilunga kya Nzambi kyala mu Kolindu, kumoxi ni enyoso ala mu ididi yengi axikana mu dijina dya Ngana yetu Jezú Kidistu. Nzambi wamisolo phala mukale kumoxi ni Kidistu Jezú, yu wa m’ixana phala mukale mu mundu wê.*
3 Mukale ni ngalasa ni kutululuka kutunda kwa Nzambi Tat’etu, ni kwa Ngana Jezú Kidistu.
4 Ngi sakidila jinga Nzambi yami mukonda dyenu, kuma mwene wa mi londekesa o ngalasa yê bhukaxi ka Kidistu Jezú, 5 mukonda mwa mwene, Nzambi wa mi bhangesa kukala mu jimvwama mu ima yoso, yu wa mizalesa ni uhete wa kuzwela ni wa kwijiya. 6 Ni kidi kyoso, enu mwaxikina o ulongelu wa Kidistu, 7 phala ki ku mikambe ujitu woso-woso, kyoso ki muya ni kukinga o kutukuluka kwa Ngana yetu Jezú Kidistu. 8 Mwene we wanda mi kolokotesa katé ku dizubhilu, phala kibhukale muthu u mitatela kima kyayibha mu kizuwa kya Ngana yetu Jezú Kidistu. 9 Nzambi fiyele, mwene wa m’ixana phala mukale kumoxi* ni Mon’ê Jezú Kidistu, Ngana yetu.
10 Phange jami, mu dijina dya Ngana yetu Jezú Kidistu ngi mitangela kwila, o ima i muzwela ikale yene imoxi, phala ki mu diwanune mudyenu, mukale ni kibanzelu kimoxi ni ukexilu umoxi wa kuxinganeka. 11 Jiphange jami, sayi athu atokala ku dibhata dya Kolowe, a ngyambela yalungu ni enu kwila, mwa muzoka mudyenu. 12 Nga muzwela kiki, mukonda sayi athu mudyenu amba: “Eme ngi mukayedi wa Phawulu,” amukwá exi, “eme ngi mukayedi wa Apolo,” o yá exi, “eme ngi mukayedi wa Sefa,”* o amukwá hanji exi, “eme ngi mukayedi wa Kidistu.” 13 O kwila Kidistu wa diwanuna? O kwila Phawulu a mu jibhila ku taka* phala o mbote yenu? Inga a mi batizala mu dijina dya Phawulu? 14 Ngisakidila Nzambi, mukonda mwaxaxi kenu ki ngi batizala-mu muthu, kikale ngó Kidispu ni Ngayu, 15 phala kibhukale muthu uzwela kwila a mu batizala mu dijina dyami. 16 Nga batizala we akwa dibhata dya Setefanu. O amukwá, manyi se nga batizala-ku dingi muthu. 17 Mu kidi, Kidistu ka ngi tumikisa phala kubatizala, maji phala kuboka o njimbu yambote. Kana mu ku iboka mu unjimu wa athu, phala o kufwa kwa Kidistu ku taka* ki kukale kwa kingoho.
18 Mukonda phala yó ala mu njila ya kufwa, o maka alungu ni kufwa kwa Kidistu ku taka* wôwa, maji phala etu a mu tubhulula, éne o kutena kwa Nzambi. 19 Kuma kyósoneke kwila: “Nganda bhwisa o unjimu wa athu ala jinjimu, ni kudituna o kwijiya kwa athu abanza kwila ala jinjimu.” 20 Kwebhi kwala o njimu? Kwebhi kwala o mesene ya kulonga o Kijila? Kwebhi kwala o muthu* wa wabhela kuzoka yalungu ni mundu yú? O unjimu wa mundu yú,* Nzambi wa ukitula wôwa. 21 O athu a mundu yú adyelela mu unjimu wâ, kyenyiki ene kejiya Nzambi. Sayi athu amona o njimbu i tuboka kala wôwa, maji bhukaxi ka njimbu yiyi, Nzambi wasolo kubhulula yó axikana. Mu kubhanga kiki, Nzambi walondekesa o unjimu wê.
22 O Jijudé amesena kumona isumwa, o Jingeleku a musota unjimu, 23 maji etu twa mubokela Kidistu a mu jibhila ku taka.* O Jijudé amona o njimbu yiyi kala ditadi dya kudibhukana. O njimbu yiyi phala akwa jixi jengi, wôwa. 24 Maji phala yó a exana kwa Nzambi, kikale Jijudé mba Jingeleku, Kidistu mwéne o kutena kwa Nzambi ni unjimu wa Nzambi. 25 O ima ya Nzambi a imona kala wôwa ku athu, ya betakota kukala ni unjimu o athu ndenge. O ima ya Nzambi a imona kala ya kambe nguzu, ya betakota kukala ni nguzu o athu ndenge.
26 Jiphange jami, enu mwejiya kwila, kyoso Nzambi kya m’ixana, avulu mudyenu kexile mwamona ku athu kala jinjimu, kexile mwamona ni ungana, mba kwamona kala an’â jingana.* 27 Maji Nzambi wasolo o ima a imona kwala o mundu kala wôwa, phala kukwatesa jisonyi ku jinjimu. Nzambi wasolo we o ima a imona ku mundu kala yakambe nguzu, phala kukwatesa jisonyi ku ima yala ni nguzu. 28 Nzambi wasolo o ima yakambe valolo, a itobhesa kwala o mundu, a imona ku athu kala kingoho, phala kutolesa o ima a imona kwila yala ni valolo. 29 Phala kibhukale muthu udizangeleka bhu pholo ya Nzambi. 30 Maji bhukaxi ka Nzambi, enu mwala kumoxi ni Kidistu Jezú, mwene wa tulondekesa o unjimu ni kuyuka kwa Nzambi. Bhukaxi ka Jezú, etu tutena kuzela,* ni kubhuluka mukonda dya kukúla. 31 Phala kikale kala kyósoneke mu Mikanda Ikôla, exi: “Woso udizangeleka, a dizangeleke mwa Jihova.”