Jihova Utudyelelesa Kwila Wandabhangesa o Ixi Kukituka Palayizu

1. Yebhi yexile o njimbu ya polofeta Izaya phala akwa Izalayele?

POLOFETA Izaya watumbula Jihova kala ‘Nzambi ya kidi.’ O kizwelu kyolungulule “kidi,” kilombolola “amém.” (Iza. 65:16) O kizwelu “Amém” kilombolola “kyene,” mba “kidi mwene.” Mu Bibidya kyoso kyatumbula o kizwelu amém phala kuzwela yalungu ni Jihova mba Jezú, kilombolola kwila o kima kyamuzwela kya kidi mwene. Kyenyiki o njimbu ya Izaya phala akwa Izalayele yeniyi: Kabasa kima kikanena Jihova, kidikumbidila. Jihova wene mulondekesa o kidi mu kukumbidila jinga o ikanenu ye yoso.

2. Mukonda dyahi tutena kudyelela mu ikanenu ya Jihova yalungu ni hadya, ni ibhwidisu yebhi itwanda tambwijila?

² O kwila tutena we kudyelela kwila o ikanenu ya Jihova yalungu ni hadya yanda dikumbidila? Mu kubhita 800 amivu tunde mu kithangana kya Izaya, poxolo Phawulu wajimbulula se mukonda dyahi tutena kudyelela kwila o ikanenu ya Nzambi yanda dikumbidila jinga. Phawulu wambe: ‘Nzambi katena kutanga makutu.’ (Jih. 6:18) Xinganeka hanji: O kwila mu ngiji mutena we kutunda menya a mongwa, kala o menya a musanza wa kalunga? Kyene kimoxi we, kuma Jihova mwene o Nzambi ya kidi, mwene katena kutanga makutu. Kyenyiki, tutena kudyelela ni muxima woso mu yoso izwela Jihova, ni ku ikanenu ye yoso yalungu ni hadya. Mu milongi yiyi twanda tambwijila o ibhwidisu yiyi: Ihi yakanena kutubhana Jihova ku hadya? Ni kyebhi Jihova kyatudyelelesa kwila wanda kumbidila o kikanenu kye?

IHI YAKANENA JIHOVA?

3. (a) Kikanenu kyebhi kyala ni valolo yavulu phala o jiselevende ja Nzambi? (Dijingunwinu 21:​3, 4) (b) Amoxi adivwa kyebhi kyoso kituzwela nawu yalungu ni kikanenu kiki?

³ O kikanenu kitwandazwela kyala ni valolo yavulu phala o jiselevende ja Nzambi ku mundu woso. (Tanga Dijingunwinu 21:​3, 4.) Jihova wakanena kithangana kya kwila “kikwanda kala dingi kufwa, né ngó mukôndo, né kudila, né ndolo.” Avulu mudyetu mu kuboka, twene mutanga o jivelusu jiji phala kuswinisa o athu, ni kwa alondekesa kyebhi kyandakala o mwenyu mu palayizu. Kyebhi amoxi kyene mudivwa kyoso kitwatudila o njimbu yiyi? Amoxi amba: “Yiyi njimbu yambote mwene, maji kingixikina kwila yanda dikumbidila.”

4. (a) Kyoso Jihova kyabhange o kikanenu kya Palayizu, ihi yejidile kya mwene, kwila yejibhita mu izuwa yetu? (b) Katuku o kubhanga o kikanenu, ihi dingi yabhange Jihova?

⁴ Kyoso Jihova kyabhangesa poxolo Nzwá kusoneka o kikanenu kiki kyalungu ni Palayizu, mwene wejidile kwila etu twejizwela ni akwetu yalungu ni kidyelelu kiki mu kuboka o njimbu ya Utuminu. Jihova wejidile we kwila kyejibhonza phala athu avulu kuxikina kwila o ima yiyi ku hadya yejibhita mwene. (Iza. 42:9; 60:2; 2 Ko. 4:​3, 4) Kyenyiki phe, kyebhi kitutena kukwatekesa akwetu—ni etu mwene —kudyelela kwila o mabesá otumbule mu Dijingunwinu 21:​3, 4, anda dikumbidila? Jihova walondekesa ni kidi kyoso se mukonda dyahi tutena kudyelela kwila mwene wanda kumbidila o kikanenu kiki. Kyebhi mwene kyalondekesa o kidi kiki?

JIHOVA UTUDYELELESA KWILA WANDA KUMBIDILA O KIKANENU KYE

5. Ima yebhi itudyelelesa mu kikanenu kya Nzambi kyalungu ni Palayizu, ni kwebhi kutusanga o ima yenyiyi?

⁵ Mu jivelusu ja kayela tusangamu milongi ilondekesa kwila tutena kudyelela mu kikanenu kya Jihova kyalungu ni Palayizu. Jene jamba: “O Yó waxikama ku kyandu wa ng’ambela: “Talesa! O ima yoso nga mu ibhanga ya ubhe.” Wa ng’ambela we: “Soneka o ima yiyi, mukonda o maka yâ, afiyele, a kidi.” Mwene wa ng’ambela dingi: “O maka yá a dikumbidila kyá! Eme ngi Álafa ni Omeka, ngi dimatekenu ni disukilu.”—Dij. 21:​5, 6a.

6. Mukonda dyahi o maka osoneke mu Dijingunwinu 21:​5, 6 a kolesa o kidyelelu kyetu ku kikanenu kya Nzambi?

⁶ Mukonda dyahi o izwelu yiyi ikolesa o kidyelelu kyetu ku kikanenu kya Nzambi? Mu jivelesu jiji, o yamubhanga Jihova tutena ku isokesa ni kusinala dukumendu ditudyelelesa kwila sé phata mwene wanda kumbidila o kikanenu kye. O kikanenu kya Nzambi kyala mu divulu dya Dijingunwinu 21:​3, 4. Mu kusuluka, mu jivelusu 5 ni 6, tusangamu o izwelu ilondekesa kwila mwene wasinala o dukumendu phala kutudyelelesa kwila wanda kumbidila yakanena. Tutonginine dingi kyambote phala kumona kyebhi Jihova kyalondekesa kwila tutena kumudyelela.

7. Nanyi wamateka mu kuzwela mu velesu 5, ni mukonda dyahi kiki kima kyakatunda?

⁷ O velusu 5 imateka mukwamba kiki: “O Yó waxikama ku kyandu wa ng’ambela.” (Dij. 21:5a) O izwelu yiyi yakatunda mukonda mu divulu dya Dijingunwinu Jihova uzwela ngo veji jitatu, o yiyi o veji yadyanga. Kyenyiki tutena kumona kwila, o kidyelelu kiki ka kibhana bhukaxi ka anju, ne ngo bhukaxi ka Jezú, maji Jihova mwene wakibhana! O kidi kiki kilondekesa kwila tutena kudyelela mu ima yazwela mwene ku pholo. Mukonda dyahi? Mukonda Jihova “kene mutanga makutu.” (Tit. 1:2) Kyenyiki, o izwelu itusanga mu divulu dya Dijingunwinu 21:​5, 6 yanda dikumbidila ni kidi kyoso.

“TALESA! IMA YOSO NGA MU IBHANGA YA UBHE”

8. Ihi yazwela Jihova phala kulondekesa kwila se phata o kikanenu kye kyanda dikumbidila? (Izaya 46:10)

⁸ Mukusuluka Jihova wambe, “Talesa!” (Dij. 21:5) O kizwelu mu dimi dya Ngeleku kyolungulule “talesa!” akitumbula mu veji javulu mu divulu dya Dijingunwinu. Sayi divulu dyamba kwila “o kizwelu kiki a kitumbula phala kukwatekesa o mutangi kumona kwila watokala kutonginina ni kutala dingi kyambote o ima yanda zwela ku pholo.” Ihi yazwela Nzambi ku pholo? Mwene wambe: “Ima yoso nga mu ibhanga ya ubhe.” Jihova wanda bhanga ngo o ima yiyi ku hadya. Maji kuma mwene kala ni phata kwila wanda kumbidila o kikanenu kye, kyene kya mubhangesa kuzwela kwila o ima yiyi wamuyibhanga kya. —Tanga Izaya 46:10.

9. (a) O izwelu “ima yoso nga mu ibhanga ya ubhe” yalungu ni ihi? (b) Ihi yandabhita ni “dyulu” ni “ixi” yalaku lelu?

⁹ Tutonginine o izwelu mu divulu dya Dijingunwinu 21:​5, Jihova wambe: “Ima yoso nga mu ibhanga ya ubhe.” Kiki kilombolola ihi? Mu kibatulu kiki, o izwelu yiyi yalungu ni ikalakalu iyadi yamubhanga Jihova—kubhinganesa ni kutungulula. Kyadyanga, ihi yanda bhinganesa Jihova? O divulu dya Dijingunwinu 21:​1, dizwela: “O dyulu dyo’kulu ni ixi yokulu ki ya kexile-ku dingi.” “O dyulu dyo’kulu” dilombolola o jinguvulu ja mundu yu amujifwinyisa kwala Satanaji ni madimonyo me. (Mat. 4:​8, 9; 1 Nz. 5:19) Kala kilondekesa o Bibidya, o “ixi” itena kulombolola o athu atungu mu ixi. (Dim. 11:1; Jisá. 96:1) Kyenyiki, o “ixi yokulu” ilombolola o athu ayibha ala mu ngongo lelu. Jihova kanda yudika ngo o “dyulu” ni “ixi” yazanganya kya; muveji dya kiki, mwene wanda bhanga kikalakalu kya kuzelesa, mu ku ibhinganesa. O dyulu ni ixi ya lelu, Jihova wanda ibhinganesa ni “dyulu dya ubhe ni ixi ya ubhe”—kifwa, unguvulu wa ubhe ni athu ayuka.

10. Ima yahi yanda bhangesa Jihova kwila ikala ya ubhe?

¹⁰ Mu ukexilu webhi wamukwa dingi, Jihova wanda bhangesa o ima yoso kukala ya ubhe? (Dij. 21:5) Jihova wanda yukisa o ixi ni kubhangesa we o athu kukala athu ayuka. Kala kya kanena bhukaxi ka polofeta Izaya, Jihova wanda bhangesa o ixi yoso kukala kididi kyafwama, kala kyexile o njaludim ya Edene. Mwene we wanda tukitula tu athu a ubhe, mu kusaka kala muthu mudyetu mu ukexilu watenena. O inema, ifofo, ni maxilu anda ku asaka, kate mwene ni athu afu andavutuka ku mwenyu.—Iza. 25:8; 35:​1-7.

‘O MAKA YÂ, AFIYELE, A KIDI. . . . ENE A DIKUMBIDILA KYÁ!’

11. Ihi yatendelesa Jihova kwa Nzwá phala kubhanga ni mukonda dyahi?

¹¹ Ihi dingi yazwela Nzambi phala kulondekesa kwila tutena kumudyelela? Jihova watangela Nzwá, wixi: “Soneka o ima yiyi, mukonda o maka yâ, afiyele, a kidi.” (Dij. 21:5) Jihova ka tumina ngo Nzwá ‘kusoneka.’ Mwene wazwela we se mukonda dyahi. Mwene wambe: “Mukonda o maka yâ, afiyele, a kidi.” Etu tusakidila kyavulu mukonda Nzwá wabelesela o kitumu kya ‘kusoneka’ kyamubhanene. Mukonda dya kiki, twamutena kutanga o kikanenu kya Nzambi kyalungu ni Palayizu ni kuxinganeka mu mabesá akatunda utwandatambula ku hadya.

12. Mukonda dyahi Jihova wambe: “O maka yá a dikumbidila kyá!”

¹² Mu kusuluka, ihi dingi yambe Nzambi? Mwene wambe: “O maka yá a dikumbidila kyá!” (Dij. 21:6) Bhabha Jihova wazwela kala o ima yoso yotumbule kudima yalungu ni Palayizu, yadikumbidila kya. Mukonda dyahi mwene wazwela mu ukexilu yu? Mukonda seku kima kitena kumufidisa kukumbidila o vondadi ye. Mu kusuluka Jihova wazwela dingi kima kyamukwa kitudyelelesa kwila o kikanenu kye se phata kyanda dikumbidila. Kima kyahi kyazwela?

“ÉME NGI ÁLAFA NI OMEKA”

13. Mukonda dyahi Jihova wambe: “Eme ngi Álafa ni Omeka”?

¹³ Kala kitwamono kya kudima, mu kisumwa kyabhana kwa Nzwá, Jihova wazwela mu veji jitatu. (Dij. 1:8; 21:​5, 6; 22:13) Mu veji jitatu jenyiji, Jihova wambe: “Éme ngi Álafa ni Omeka.” O Álafa kyene o kisoneku mba letala yadyanga mu alfabetu ya dimi dya Ngeleku, Omeka kyene o kisoneku kyasukina. Kyenyiki, mu kuzwela kwila “Éme ngi Álafa ni Omeka,” Jihova wamutukwatekesa kutendela kwila kyoso kyamateka kima, kala ukizubha.

14. (a) Bhana phangu ilondekesa se mu ukexilu webhi Jihova wazwela “Álafa” ni mu ukexilu webhi wandazwela “Omeka.” (b) Kidyelelu kyahi kitubhana o izwelu yosoneke mu divulu dya Dimatekenu 2:​1-3?

¹⁴ Kyoso Jihova kyabhange Adá ni Eva, Mwene wa atangela yebhi yexile o vondadi ye phala o athu ni ixi. O Bibidya yamba: “Nzambi anga wa abesowala wixi: ‘Vwalenu mu sokoloke, izalesenu o ixi ni ku itumina.’” (Dim. 1:28) Mu kithangana kyenyokyo, Jihova wazwela yebhi yexile o vondadi ye phala o athu ni ixi. Didi dyexile o dimatekenu mba “Álafa.” Kyoso kyandazubha kukumbidila o vondadi ye, ni kyoso o mbutu ya Adá ni Eva (o athu a belesela) kyandazalesa o ixi ni ku ikitula Palayizu, o kithangana kyenyokyo kyandakala o disukilu mba “Omeka.” Kyoso kyazubha kubhanga “o dyulu, o ixi ni ima yoso yala-mu,” Jihova wazwela kima phala kulondekesa kwila o vondadi ye se phata yandadikumbidila. O kima kiki tukisanga mu divulu dya Dimatekenu 2:​1-3. (Tanga.) Jihova wambe kwila o kizuwa kya kasambwadi kyexile kizuwa kikola. Kiki kilombolola ihi? Kiki kilombolola kwila, se phata Jihova wejikumbidila o kikanenu kye kyalungu ni athu ni ixi. Kiki kyejizubha kudikumbila kudisukilu dya kizuwa kya kasambwadi.

15. Mukonda dyahi Satanaji nange wabanzele kwila mwene wejitena kufidisa o vondadi ya Jihova kudikumbidila?

¹⁵ Kyoso Adá ni Eva kyabhukumukina Nzambi, ene akituka akwa ituxi ya asambukisa o kituxi ni kalunga ku twana twa. (Lom. 5:12) Mukonda dya kiki, kyedile kala Satanaji watenene kufidisa o vondadi ya Nzambi ya kwizalesa o ixi ni athu ayuka, amubelesela. O kwila Satanaji wejitena mwene kufidisa Jihova kukumbidila o kikanenu kye? Satanaji nange waxinganekene kwila ki kwexile dingi ima yavulu yejitena kubhanga Jihova phala kubatula o maka. Satanaji nange wabanzele kwila Nzambi weji jibha Adá ni Eva n’a bhange dikaza dyengi dyayuka phala kukumbidila o vondadi Ye phala o athu. Maji se Nzambi wabhangele kiki, Dyabhu weji mutatela kwila Mwene mukwa makutu. Mukonda dyahi? Mukonda kala kyosoneke mu divulu dya Dimatekenu 1:​28, Jihova wambele kwila Adá ni Eva, ene eji kwizalesa o ixi ni twana twa.

16. Mukonda dyahi nange Satanaji waxinganeka kuma wejitena kutatela Jihova kwila katena kubhanga o kima kyakanena?

¹⁶ Nange Satanaji wabanzele kwila Jihova wejibhanga dingi ihi? Nange Satanaji waxinganekene kwila Jihova weji kwehela Adá ni Eva kuvwala twana, maji o twana tutu nuka ejitena kukala athu ayuka. (Ndo. 7:20; Lom. 3:23) Kyenyiki, Satanaji wejitatela Jihova kwila mwene walweza mukukumbidila o vondadi ye. Mukonda dyahi? Mukonda mukubhanga kiki, o vondadi ya Jihova ya kwila o Palayizu izala ni ana a Adá ni Eva, —ana ayuka, a belesela —ki yeji dikumbidila.

17. Kyebhi Jihova kyabatula o maka alungu ni kubhukumuka kwa Satanaji ni kwa dikaza dya dyanga, ni ihi yandabhita kudisukilu? (Tala we ofoto.)

¹⁷ Mu kidi Jihova wejibhanga kima, maji Satanaji ka kijidile. Jihova wejidile ukexilu wambote wakubatula o maka sumbala Satanaji ni Adá ni Eva amubhukumukine. (Jisá. 92:5) Jihova wehela Adá ni Eva kuvwala twana, mukubhnanga kiki walondekesa kwila wazwela o kidi. Mwene kimukwa makutu. Ku mbandu yamukwa, Jihova walondekesa we kwila se wakanena kubhanga kima, se phata wanda kikumbidila mwene. Mwene wabhangesa kwila o vondadi ye isuluka mu kudikumbidila, mu kukanena kwila weji tumikisa “mbutu” yejibhulula o ana a belesela a Adá ni Eva. (Dim. 3:15; 22:18) O muthu yu mba mbutu, wejibhana o mwenyu we kala sata phala kubhulula o mundu woso. Satanji nuka wabanzele kwila Jihova wejibatula o maka mu ukexilu yu. Mukonda dyahi? Mukonda o sata ya kukula ilondekesa o henda yakidi. (Mat. 20:28; Nzw. 3:16) Satanaji kala ni kidifwa kiki. Mwene ubanza ngo mu mbote ye. Maji, mbote yahi yandabheka o sata ya kukula? Ku disukilu dya 1.000 ya mivu ya Utuminu wa Kidistu, o ana abelesela, a Adá ni Eva, anda tunga mu Palayizu mu ixi—kala kyamesenene Nzambi tunde kudimatekenu. Mu kithangana kyenyokyo, o izwelu ya Jihova ya kwila eme ngi “Omeka,” yanda dikumbidila.

KYEBHI KITUTENA KUKOLESA O KIDYELELU KYETU KU KIKANENU KYA JIHOVA KYALUNGU NI PALAYIZU

18. Ima yebhi itatu itudyelelesa mu kikanenu kya Jihova? (Tala we o kaxa “Ima Itatu Itudyelelesa ku Kikanenu Kya Jihova.”)

¹⁸ Mu milongi yiyi twadilongo ima yatukwatekesa kumona se mukonda dyahi tutena kudyelela kwila, o ixi yandakituka Palayizu. Kyenyiki, ihi itutena kutangela kwa akwetu phala kwadyelelesa kwila kiki kyanda dikumbidila mwene? Kyadyanga, Jihova mwene wabhange o kikanenu. O divulu dya Dijingunwinu, dyamba: “Yó waxikama ku kyandu wa ng’ambela: ‘Talesa! O ima yoso nga mu ibhanga ya ubhe.’” Mwene wala ni unjimu, kutena, ni hanji ya kukumbidila o kikanenu kye. Kyakayadi, Jihova kala ni phata kwila o kikanenu kye kyanda dikumbidila, mukonda dya kiki mwene ukimona kala kyabhiti kya. Kiki kyene kyamubhangesa kuzwela: “O maka yâ, afiyele, a kidi. . . . A dikumbidila kyá.” Katatu, kyoso Jihova kyamateka kima, mwene usuluka mu kukibhanga kate kyanda kukizubha. Kiki kyene kyamubhangesa kuzwela: “Eme ngi Álafa ni Omeka.” Jihova wandalondekesa kwila Satanaji mukwa makutu, ni kwila mwene katena kufidisa Jihova kukumbidila o vondadi Ye.

19. Kyoso athu kya abhonza kuxikina mu kikanenu kya Nzambi kyalungu ni Palayizu, ihi itutena o kubhanga?

¹⁹ Lembalala kwila, kyoso ki utangela o athu o ima yazwela Jihova phala kutudyelelesa kwila wanda kumbidila o ikanenu ye, o kidyelelelu kye kwa mwene kikola dingi. Kyenyiki, ku pholo dya kwenda kyoso kiwanda tanga o kikanenu kyala mu divulu dya Dijingunwinu 21:4 anga kumoneka muthu wamba, “Yiyi njimbu yambote mwene, maji kibhonza kuxikina kwila yanda dikumbidila,” ihi iwanda bhanga? Eye utena kutanga o jivelusu 5 ni 6 ni kumujimbulwilaju. Londekesa kyebhi Jihova kyatudyelesa kwila o kikanenu kye kyanda dikumbidila. Mwene wabhange kiki mu kukisoneka, kifwa, kala wamusinala dukumendu phala tumone kwila yoso yazwela yakidi mwene.—Iza. 65:16.