O Utuminu ua Nzambi Ihi?

“O Njimbu iíi Iambote ia Utuminu . . . ”—MATESU 24:14.

KU MULUNDU, Jezú ua longo o musambu iú, ua bhingi kua Nzambi: “Utuminu ué uize.” Kuene athu avulu ejiia kiambote o musambu iú, ene mu u tumbula mu ithangana ioso mu misambu iâ. Saí divulu, dizuela kuila, “o musambu iú uene ua beta-kota ku u bhanga ku Jikidistá, mu ubhezelu uâ.” Maji né kiki, o athu ene mu bhanga o musambu iú, kejiia se o Utuminu ua Nzambi ihi, mba se ihi ia-nda bhanga ku hádia kioso ki ua-nda kuíza.—Matesu 6:9, 10.

Ki kima kia ku diuana. O atuameni a Kidistándade, kene mu tena ku jimbulula kiambote se o Utuminu ua Nzambi ihi. Saí muthu ua soneka kuila o Utuminu ua Nzambi “kima kia madiuanu, . . . kima ki kala moxi, kia lungu ni Nzambi . . . , kima kia Nzambi ki bhangesa kuila ki kala diiala, mba muhatu a bhuluka.” Saí mukuá, ua jimbulula kuila o milongi ia Utuminu ua Nzambi, o “ulongelu ua lungu ni ngeleja.” O Catecismo ka Ngeleja ia Katolika, kambe kuila: “O utuminu ua Nzambi, [o] kuiuka, kutululuka, ni kisangusangu mu Nzumbi Ikôla.”

Ua-nda sanga dingi ilomboluelu iambote, mu mbandu 2, mu kadivulu kaka. Tua-nda di longa, kuila: “O Utuminu ua Nzambi, unguvulu ua diulu, ua-nda zubha o kuiibha kuoso, ua-nda bhanga o ixi palaízu.” Tua-nda di longa ué kiebhi o Bibidia kijimbulula kiambote o maka enhá.

O Jisobha ja-nda Tumina o Ixi Ioso

O utuminu, unguvulu a u tumina kuala sobha. O Sobha ia Utuminu ua Nzambi, Jezú Kristu, a mu fukununa. O usobha ué ku diulu a u tange mu kisuma kia polofeta Daniiele, ua soneka: “Eme-phe ki nga kuata muene kutala, mu isuma iami ia usuku, nga mono ku matuta ma diulu kua-lu tuluka kala Mon’a muthu [Jezú] ua mu kuiza; iú ua bhixila kua Mukula-ua-Ndamba, [Jihova Nzambi] anga a mu bhixidisa bhu pholo iê. Anga a mu bhana o kutumina, ni kijingo, ni ungana, phala miji ioso, ni ifuxi, ni madimi moso ende ni ku mu bhikila muene. O kutumina kuê kua miaka, ki kuene dizubhilu, o ungana uê uene ngó, ka tena ku u bhuisa-ku.”—Daniiele 7:13, 14.

O divulu dia Daniiele dilondekesa ué kuila, o Utuminu ua Nzambi ueji nangenena katé ku hádia, ua-nda buika o jinguvulu joso jene ku mundu, uene nuka a-nda u buika. O Kibatulu 2, kijimbulula o nzoji ia sobha ia Babilonha, muéne ua monene o kiteka kia dikota, kilombolola o ji potência mundial jeji kaiela. O polofeta Daniiele ua jimbulula o nzoji. Muéne ua soneka, “mu izuua isukidila-ku” “o Nzambi ia diulu ua kà bheka-ku o utuminu ki u xikina dingi ku ujikinisa; o utuminu iú kà u ehela ku bhita dingi bhu maku ma miji iengi; uene kiá ua kà sasujula o mautuminu moso’ama anga a-bhua-ku, maji o uene ua kà xalela ni kutumina mu thembu joso katé ku hádia ni hádia.”—Daniiele 2:28, 44.

O Sobha ia Utuminu ua Nzambi, ka-nda tumina ubheka uê. Mu ukunji uê mu ixi, Jezú ua kanena ku jipoxolo jê, ja fiiele kuila ene ni akuâ, eji banda ku diulu, ni ku xikama ku iandu. (Luka 22:28-30) Muéne ka kexile mu zuela o iandu ia kidi, ku mundu iú, Jezú ua kexile mu londekesa kuila o Utuminu ua Nzambi, ueji kala ku diulu. O Bibidia ilondekesa kuila o jisobha jiji eji tunda, “ku miji ioso, ni ku madimi moso, ni ku madiembu moso, ni mu ifuxi ioso.” Ene eji kala “ku usobha, ni ungana ua Nzambi ietu, ene hinu à kala mù tumina [o] ngongo.”—Dijingunuinu 5:9, 10.

Mukonda Diahi o Njimbu ia Utuminu, Njimbu Iambote?

Ejiia kuila Jezú ua mesena ku bhana o unguvulu uê “ku miji ioso, ni ku madimi moso, ni ku madiembu moso,” ni ió a-nda ‘tumina né kala jisobha mu ngongo.’ A nanhi a-nda ku a tumina ku Utuminu ua Nzambi? Oso ene mu xikina o njimbu iambote, ene mu i boka lelu. Ni ió afú kiá, a-nda ku a fukununa phala ku kala ku muenhu ua kalelaku mu ixi.

O Bibidia izuela o mabesá a-nda tambula o athu, a-nda kala ku Utuminu ua Nzambi. O mabesá enhá:

O “ita ua i sukika katé ku maxokololo a’xi; uta ua mufula ua u bukula, dionga ua di batula mu kaxi; o makalu a ita ua oha mu túbhia.”—Jisálamu 46:9.

“Ene-phe a kà tunga jinzo, anga a kala-mu; a kà dima milenga ia mivide, anga a kà dia idima iê. Ene ka kà tunga phala akuâ engi kukala-mu; ka kà phapha phala athu engi ku i dia.”—Izaia 65:21, 22.

“[Nzambi] u a kondona masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata. Mukonda ima ia diangèle-ku, ia bhiti.”—Dijingunuinu 21:3, 4.

“Bhenhobho-phe o mesu a ifofo a kà jikuka, ni mátui a maxilu a kà xitunuka. Kizuua’ okio-phe, inema ia kà tuka-tuka, kala jimbambi; o dimi dia mabubu dia k’emba.”—Izaia 35:5, 6.

“Kuma kumbi dí diza, dia oso ala mu jimbila kuívua o dízui diê [Jezú] ni kutunda-mu. Oso a bhange kiambote, a kà fukunuka mu kutambula o muenhu ki uàbhua.”—Nzuá 5:28, 29.

“Oso-phe alenduka, ene a lundula o ixi; A kala ku ngalasa ni kutuluka kuavulu.”—Jisálamu 37:11.

Íii iene o njimbu iambote! Saí dingi ikanenu ia Bibidia, ia-nda dikumbidila, ilondekesa kuila o kizuua kia zukama phala o Utuminu ua Nzambi, ku tumina ni unguvulu ué ua iuka mu ixi ioso.

O Njimbu Iambote Ihi?

“O Njimbu iíi Iambote . . . ”—MATESU 24:14.

O JIKIDISTÁ a mu boka “o Njimbu Iambote ia Utuminu ua Nzambi,” mu ku i tangela ku akuâ, ni ku a jimbuluila kuila, o Utuminu ua-nda tumina o ngongo ioso ku hádia, ua-nda tumina mu ixi ioso ni ku iuka. O kizuelu “Njimbu Iambote,” a kijimbulula ué mu Bibidia mu ukexilu uéngi. Mu kifika tu sanga o kizuelu “tangenu o ubhulukilu uê” (Jisálamu 96:2); “O Njimbu Iambote ia Nzambi” (Loma 15:16); “O njimbu iambote ia Jezú Kristu.”—Marku 1:1.

O njimbu iambote, ia lungu ni kidi kioso kia longo Jezú, ni ioso ia soneka o maxibulu mê. Ande dia kuia ku diulu, Jezú uambela o akaiedi’ê: “Enu-phe ndenu, mua ka longe jixibulu ku akua jixi joso, ni ku a batizala mu dijina dia Tata, ni dia Mona, ni dia Nzumbi Ikôla; ni ku a longa kualuka ima ioso kiá i nga mi tumu eme.” (Matesu 28:19, 20) Kienhiki o sidivisu ia Jikidistá, ki ku tula ngó o njimbu ia Utuminu; a tokala ué ku bhanga ioso phala ku bhanga maxibulu.

Kiebhi kiene mu belesela o jingeleja o kitumu kiki? O athu kejiia se o Utuminu ua Nzambi ihi—ka tena ku longa kiambote akuâ ia lungu ni Utuminu. Ene a longa kiambote o maka alungu ni ku di loloka o ituxi, ni ku kala ni kixikanu kua Jezú. Ene ué a bhanga ima iambote phala ku a ximana kuala athu, kála o ku tunga jinzo ja ku saka, ji xikola, ni jinzo phala o jingadiama. Sumbala o ima iambote ia bhanga, i bhangesa athu avulu kuia mu jingeleja, maji kiki, ki kia a bhangesa ku kala Jikidistá ja kidi, a belesela o itumu ia longo Jezú.

Saí mulongexi ua filosofia ua soneka: “Eie ki ua-nda sanga athu avulu a di longo, mba atuameni a jingeleja mu kaxi ka Jikidistá, a xikina kuila a tena ku bhanga maxibulu a Jezú, ni ku a longa ku bhanga o ima ioso ia longo Jezú. . . . O milongi ia Jezú ia lungu ni maka enhá, ka moneka phata. Etu ki tu kambe ngó ku bhanga ia zuela muéne. Maji ki tua mu bhana valolo mu sidivisu íii. Ki tuejiia se kiebhi ki tu bhanga o sidivisu íii.”

Kiene kimoxi ué, o akuâ Katolika mu ixi ia Estados Unidos, alondekesa kuila 95 porcento, a xikina kuila, o kuboka o njimbu iambote kijimbuete kilondekesa o kixikanu kiâ. Maji né kiki, ene a mona kuila ka tokala kuboka, maji a tokala ngó ku bhana phangu iambote ku akuâ, ni ku kala ni ukexilu uambote ku muenhu uâ. Saí diiala uambe: “O kuboka o njimbu iambote, ki kiene ngó kia beta-kota. Mu veji dia kiki, tua tokala ku kala ni ukexilu uambote, phala ku tula o Njimbu Iambote.” Saí divulu mu ixi ia Estados Unidos, dia zuela maka alungu ni akua Katolika, diambe kuila, athu avulu ka tena kuboka ku akuâ, mukonda dia “ima ia iibha ia mu bhita mu ngeleja íii, kála o maka a atuameni ku bhanga ufusa, ni milongi iene mu longa mu ngeleja íii.”

Saí bispu mukua Metódista uambe ué kuila, o ngeleja iê, ia diuanuna, muala kavuanza kavulu, kiki kia mu ku a fidisa ku bhanga o kikalakalu kiâ, ni kuila ene mu kaiela o ijila ia bhanga akuâ mundu. Muéne uebhula ni ku luuala kuoso: “Nanhi ua tokala kuboka o Utuminu?”

O bispu ka tambuijila o kibhuidisu kiê. Maji saí kitambuijilu. Ua-nda ki sanga mu milongi ia kaiela.

[Kilombuelelu ku bandu 6]

O njimbu iambote ia lungu ni Utuminu ua Nzambi, ni ku bhuluka mu kaxi ka kixikanu ka Jezú Kristu