UENDELU UA UKIDISTÁ

Milongi ia Ubhe Phala o Iônge ia Semana

Tundé mu mbeji ia Katatu ka muvu ua 2018, mu iônge ia semana a-nda bandekesa-mu milongi ni diambu: Milongi phala kutokuesa, mua-nda moneka jividiu ni jifikula, ja-nda tunda mu Tradução do Novo Mundo da Bíblia Sagrada, (nwtsty) iala mu kijimbuete kietu, (online) né muene se milongi phala kutokuesa, ki iala luua mu dimi dienu. Sé-ku phata kuila, o milongi íii ia-nda mi kuatekesa kioso ki mua-ndaia ni kusokejeka o milongi ia kiônge. O kia beta dingi o kota, ia-nda tu zukamesa dingi kua Tata ietu ia kazola, Jihova!

MILONGI PHALA KUTOKUESA

O mbandu íii ia-nda zuela ia lungu ni ijila, ididi, ni izuelu ia bhonzo ku i tendela, mu jivelusu javulu ja Bibidia.

Matesu 12:20

O muanga u xongota: O kandeia ka dibhata kexile kima kia difu ni kambia ka mavu, kezalele ni maji. Muanga mba kaditele ka linhu akexile mu ka ta mu maji enhó, phala ku vudisa o mulengu. O kizuelu “muanga u xongota” mu Ngeleku, ki lombolola muanga ua mu tunda dixi, mukonda moxi muala hanji túbhia, maji o mulengu ki ua mu muika dingi kiambote mba ua mu jima. O divulu dia Izaia 42:3, dia kanena o henda ieji londekesa Jezú; muene keji jima o kidielelu kiofelefele kiala mu mixima ia athu a lenduka ni ió a toloka o mixima.

Matesu 26:13

Kidi kiene: O kizuelu Amén mu Ngeleku, mu ku ki lungulula mu Hebalaiku, ki lombolola “kiene” mba “kidi kiene.” Jezú ua tumbula kiavulu o kizuelu kiki phala kulondekesa kuila, o kima kia kexile mu zuela kiexile kidi; uexile ue mu ki tumbula phala kubhanga kikanenu mba ku kuatekesa o athu kudielela mu kikanenu kia kexile mu zuela. Jezú muene ngó ua tumbula o kizuelu “kidi kiene” mba “amén,” mu ukexilu iú, mu Mikanda Ikola. Kioso kia ki tumbula luiadi, (amén amén), kala ki tu mona mu divulu dia Nzuá, o kizuelu kia Jezú kilombolola ‘ni kidi kioso.’—Nz 1:51.

JIVIDIU NI JIFIKULA

O jifikula ni jividiu ki ji tunda dízui, ni jividiu ji jimbulula kiambote ima iavulu io tange mu Bibidia.

Betefaje, Mulundu ua Midiva ni Jeluzaleme

O kavidiu kaka, ka londekesa njila iia ku Jeluzaleme,—tundé ku diembu dia Et-Tur, dia lungu ni Betefaje dio tange mu Bibidia—katé ku mbandu ia dileka ia Mulundu ua Midiva. Betaniia ia kala ku mutundila kumbi ia Betefaje ni ku mbandu ia mutundila kumbi ua Mulundu ua Midiva. Kioso kia kexile mu Jeluzaleme, Jezú ni maxibulu mê akexile mu zeka ku Betaniia; lelu a ixana diembu dia el-Azariyeh mba (El ʽEizariya), dijina di lombolola “Kididi Kia Lázalu” mu dimi dia Árabe. Sé phata, Jezú uexile mu tudila mu dibhata dia Malata, Madiia, ni Lázalu. (Mat 21:17; Mar 11:11; Lu 21:37; Nz 11:1) Kioso Jezú kia tundu kubhata diâ phala kuia ku Jeluzaleme, nange muene ua bhitile mu njila ia londekesa mu vidiu. Mu kizuua kia 9, kia 33 K .K., kioso Jezú kia tundu ku Mulundu ua Midiva phala kuia ku Jeluzaleme kuthandu a ka jumendu, nange muene ua bhiti ku Betefaje phala kubhixila ku Jeluzame.

Njila i tunda ku Betaniia ndu ku Betefaje
Betefaje
Mulundu ua Midiva
Kahonga ka Kidelone
Tembulu

Pheleku ku Kifuba Kia Kasende

Iii kopia ia foto ia kifuba kia kasende ka muthu ka phaphela-ku pheleku ia kexile ni 11, 5 cm. O kifuba kia kidi a ki sange ku muvu ua 1968, kioso kia kexile mu kanda mu mbandu ia thunda ia Jeluzaleme. Athu a xikina kuila, kia thembu ia akua Loma. O kifuba kiki, ki londekesa kuila o kibanzelu kia akua kutokuesa kia kuila, athu a kexile mu a phaphela ku taka, kidi. O pheleku iii nange ia difu ni pheleku ia phaphele naiu Jezú Kristu ku taka ku masoladi akua Loma. O kifuba kiki a ki sange mu kitutu kia matadi, a kixana ossuário; kioso o kimbi kia kexile mu bola, o ifuba akexile mu i ta mu kitutu kiki. Kiki ki londekesa kuila, o muthu a mu jibhile ku taka, a tokalele ku mu funda.—Mat 27:35.