Mukonda diahi saí athu mu Bibidia o majina mâ ka a tumbula?

Mu Bibidia, mu divulu dia Lute, saí diiala ua ditunu ku kumbidila o kikalakalu kiê kala kia londekesele o kitumu kia Mozé, a mu tumbula ngó kala “ngânji” (Lute 4:1-12) O kuila tua tokala kuzuela kuila, o athu ka a tumbula o majina mâ mu Bibidia, exile athu a iibha mba ka kexile ni valolo?

Kana. Xinganeka mu musoso iú. Phala ku bhanga o Phasu iê ia sukina, Jezú ua tumina o maxibulu mê, uixi: “Ndenu mu mbanza, kua nganji,” mu pelepalala o ima m’onzo iê. (Matesu 26:18) O kuila tua mu londekesa kuila o muthu a mu tumbula mu velusu íii kala nganji, uexile muthu ua iibha mba kexile ni valolo? Kana; o “nganji” a mu tumbula bhabha sé phata uexile xibulu dia Jezú. Ka mu tumbula o dijina mu velusu íii, mukonda ki ku bhingile ku di tumbula.

O Bibidia i tumbula majina avulu a athu akexile ni ukexilu ua iibha; saí ué selevende javulu ja Nzambi, ka a tumbula o majina mâ. Mu kifika, o dijina dia muhatu ua dianga, Eva, a dijiia ku athu avulu. Maji o luímbi luê ni ku bhukumuka kuê, kua bhangesa Adá ku ta kituxi ni ku tu bhekela hadi iavulu lelu. (Loma 5:12) O muhatu ua Noué, ka mu tumbula ué o dijina diê mu Mikanda Ikola, maji tua tokala ku sakidila kiavulu mukonda dia ukexilu uê ua henda ni ua ku belesela mu ku kuatekesa muadi uê mu kikalakalu kia mu bhanene Nzambi. Sumbala o dijina diê, ka di tumbula mu Bibidia, kiki ki kilondekesa kuila muéne kexile ni valolo bhu pholo ia Nzambi.

Saí athu a bhange o vondadi ia Jihova m’ukulu, ka a tumbula o majina mâ mu Bibidia. Xinganeka o kilumba mukua Izalaiele uexile mubhika mu dibhata dia Naamane, o kabhitangu ka masoladi ka akua Sídia. Muéne ni ku suína kuoso, ua zuela ni muhatu ua Naamane, maka alungu ni polofeta ia Nzambi mu mbanza ia Izalaiele. Mukonda dia kiki, kua bhiti madiuanu a dikota. (2 Jisobha 5:1-14) O mon’a mufundixi ua Izalaiele, Jefete, ua bhana phangu iambote ia kixikanu. Mu vondadi iê, muéne ka kazala phala ku kumbidila o kikutu kia bhangele tat’ê. (Afundixi 11:30-40) Kiene kimoxi uê, 40 ndenge a athu a soneka o divulu dia Jisalamu, ka a tumbula o majina mâ mu Bibidia ni jipolofeta ja mukuá.—1 Jisobha 20:37-43.

O phangu ia beta-kota, ia ji-anju ja fiiele ku diulu. Kuala jimidi ja jimidi ja ji-anju ku diulu, maji anju jiiadi ngó a a tumbula o majina mâ mu Bibidia—Ngabidiiele ni Mingedi. (Daniiele 7:10; Luka 1:19; Juda 9) O ja mukuá ka a tumbula o majina mâ mu Bibidia. Mu kifika, saí anju a mu ibhuidisa kua Manoua, o tata ia Sansau: ‘Dijina diê, eie nanhi, mbe kizuua kioso ki bhita o kizuelu kiê tu ku bhange ujitu?’ Kiebhi kia tambuijila o anju? O anju ia tambuijila: “U ng’i-bhuila-ihi dijina diami?” Ni kulenduka kuoso, o anju ia ditunu ku tambula o kijingu kia tokalele ngó kua Nzambi.—Afundixi 13:17, 18.

O Bibidia ki i jimbulula se mukonda diahi, saí athu m’ukulu a a tumbula o majina mâ mu Bibidia, a mukuá kana. Maji tu tena ku di longa ima iavulu ku jiselevende ja Nzambi akexile mu sidivila sé ku sota fuma phala ene mba kijingu.