Ihi Iwatokala o Kubhanga Phala Kutunga ku Mundu Wobhe

O milongi yatundumu yalondekesa kwila kwakambe ngó, Nzambi wandazubha o maka oso, wandabwika we o athu ayibha. Tutena kudyelela kwila o kiki kyandabhita mwene. Mukonda dyahi? Mukonda o Mak’â Nzambi, o Bibidya, yatukanena kiki:

“O mundu-phe u bwila.”—1 Nzwá 2:17.

Tutena kudyelela kwila kwandakala athu andabhuluka, mukonda o velusu ya Bibidya yakanena we kwila:

“Wosophe u bhanga o vondadi ya Nzambi, yó mwène o muthu u nangenena.”

Mukinyikiphe, se twamesena kubhuluka twabhingi kubhanga o vondadi ya Nzambi. Phala kwijiya se yebhi o vondadi ya Nzambi, kya dyanga twatokala kumwijiya.

BHULUKA KUDIZUBHILU DYA MUNDU YÚ MU ‘KWIJIYA’ NZAMBI

Jifoto: 1. Musaki waxikima bhoxi mu inzo yakusaka, watohoka, wabhwila. 2. Mwene ukatula kakithangana phala kunwa kafwe ni kutala koleka yê wamutanga kadivulu ni kusanguluka kwoso. 3. O koleka utanga ne velusu ya Bibidya anga umubhana kalata ka jw.org.

Jezú wambe: “O mwenyu ki wábhwa wenyú: Kwila oso a ku ijiye eye u Nzambi ya kidi imoxi-èlele.” (Nzwá 17:3) Phala kubhuluka kudizubhilu dya mundu ni kutambula o mwenyu wakaleleku, twabhingi ‘kwijiya’ Nzambi. Kiki kikilombolola ngó kuxikina kwila sayiku Nzambi mba kwijiya ima yofele yalungu ni mwene. Twabhingi kubhanga ukamba ni mwene. Se twamesena kukala ni ukamba ni muthu twabhingi kubhita ne kithangana. Kyene kimoxi we ni Nzambi. Tala jivelusu ja Bibidya jitukwatekesa kukala ni ukamba wambote ni kunangenena mu ukamba yú ni Nzambi.

O Kidi Kitudilonga mu Mak’â Nzambi

Tudilonga kwila Nzambi wamesenene kuma tutunga mu Palayizu.

Mwene wabhange o athu a dyanga, Adá ni Eva, yu watudile bhukididi kyafwama, akixanene njaludi ya Edene. Ene exile athu ayuka, Nzambi wa abhanene o ima yoso yabhindamene phala kusanguluka kumwenyu. Ene eji tena kukala ni mwenyu wakalelaku. Se asulukile mu ukamba wambote ni Nzambi, ene nuka eji fwa. Maji ene asolo kubhukumukina Nzambi, mukitumu kikyabhonzele kukibelesela kyabhanene Nzambi.

Etu twadilongo se mukonda dyahi twene mutala hádi.

Mukonda dyakubhukumukina Nzambi, o diyala dya dyanga, Adá, watexi o ujitu wakukala ni mwenyu wakalelaku phala mwene ni athu oso mu ngongo. O Bibidya ijimbulula: “Mukwâ ni kya bokona o ituxi mu ngongo ku muthu umoxi, o kufwa kù kwejila mu ituxi; kyene we kya bhiti o kufwa ku thandu dya athu oso.” (Loma 5:12) Kala o muthu kyamusambukila o uhaxi kwala o jitata jê, o twana twoso twa Adá asambukila o kukamba o kuyuka kwê. Mukonda dya kiki etu tukuka anga tufwa.

Etu twadilongo o ima yabhange kyá Nzambi phala kutukwatekesa.

O Bibidya yamba: “Nzambi wa zola o mundu, katé kya suku mu kubhana Mon’ê umoxi-èlele, phala woso u mu xikana mwène, káfwe, maji a kale ni mwenyu ki wábhwa.” (Nzwá 3:16) Nzambi watumikisa Jezú mu ixi, phala kubhana o mwenyu wê phala kutubhulula. Yalungu ni henda yalondekesa Nzambi, sayi diyala twandamwixina mu dijina dya Prabhakar wala 86 amivu wambe: “Kiki kilondekesa kwila Jihovaa wangizolo kyavulu. O henda yê yene yangibhana o kidyelelu kya kukala ni mwenyu wakalelaku”

Etu twadilongo kyebhi kitutena kulondekesa o kisakidilu kyetu muyoso yatubhangela Nzambi.

O Bibidya yamba kwila, tutena kulondekesa o kisakidilu kyetu muyoso yabhange Nzambi, “se tu aluka o ijila yê.” (1 Nzwá 2:3) Ni henda yoso, Jihova Nzambi utulondekesa itwatokala kubhanga phala kusanguluka kumwenyu kindala. (Izaya 48:17, 18) Nzambi kamesena kwila tutala hadi. Mwene wakanena kwila, se tukayela o itendelesu yê kitwandasanguluka ngó lelu maji twandakala ni ujitu wa kukala ni mwenyu wakalelaku.

TANGA O MAK’Â NZAMBI, O BIBIDYA, IZUWA YOSO

O musaki utala kudyulu kyoso kyazubha o kutanga o Bibidya mu kithangana kyê kya kudya. — Eye utena kubhuluka kudizubhilu dya mundu yú mukubhinga kikwatekesu kwa Nzambi bhukaxi kamusambu ni kubhanga o vondadi yê

Phala kukala kumwenyu, etu twabhingi kudya izuwa yoso. Maji Jezú wambe: “O muthu ki ku mbolo ngó kwa mwena o mwenyu, maji ku maka moso ma tunda ku dikanu dya Nzambi.”—Matesu 4:4.

Lelu, o izwelu ya Jihova tu isanga mu Bibidya. Mukutanga o Bibidya, wandadilonga yabhange Nzambi mukulu, yamubhanga lelu ni yandabhanga kuhádya.

BHINGA O KIKWATEKESU KYA NZAMBI BHUKAXI KAMUSAMBU

Ihi iwatokala o kubhanga se iwamesena kubelesela Nzambi maji kyamutubhonza kweha kubhanga kima kyamu ibhila? Se kiki kyamubhita, o kwijiya kyambote Nzambi kitena kukukwatekesa kyavulu.

Tala o phangu ya muhatu twandamwixana mudijina dya Sakura, wexile mukwa undumbu. Kyoso mwene kyamateka kudilonga o Bibidya, wadilongo yalungu ni kitumu, “undumbu lengenu-u!” (1 Kolindu 6:18) Sakura wabhingi nguzu bhukaxi kamusambu yu watena kweha o kifwa kiki kyayibha. Maji mwene wakexile hanji mubhânga ni jitendasá. Mwene wambe: “Se o ixinganeku yayibha yingiza mukilunji, ngizwela ni Jihova bhukaxi kamusambu, mukonda ngejiya kwila ubheka wami kingitena kutolola o ixinganeku yiyi. O kutena kwamusambu kwangizukamesa dingi kwa Jihova.” Kala Sakura, mazunda a athu amukwijiya Jihova. Mwene wa abhana o nguzu yabhindamena phala kulungulula o ukexilu wamwenyu wâ ni kukala ni ukexilu umusangulukisa.—Filipe 4:13.

Kyoso ki uya ni kwijiya kyambote Nzambi eye anda ‘kukwijiya kwala Nzambi’ kala dikamba dyakazola. (Ngalásya 4:9; Jisálamu 25:14) Mukusuluka, wandatena kubhuluka ni kubokona kumundu wobhe wa Nzambi. Maji kyebhi kyandakala o mundu wobhe? O milongi yakayela yandajimbulula o maka yá.

a Jihova o dijina dya Nzambi, kala kilondekesa o Bibidya.