DISÁ 37
Ihi Yamba o Bibidya ya Lungu ni Salu ni Kitadi?
O kwila eye wa thandanganyele kya mukonda dya salu mba kitadi? Nange kubhonza kudikila o mwiji ni kukatula kithangana kya soko phala kubheza Jihova mu ukexilu watokala. Maji o Bibidya itubhana itendelesu itena kutukwatekesa.
1. Ihi yamba o Bibidya ya lungu ni salu?
Nzambi wamesena kwila tusanguluka ni ikalakalu itubhanga. O Bibidya yamba: ‘Manyi kikima kyambote mwene o muthu . . . kukemba mu mbote ya kikalakalu kye?’ (Ndongixi 2:24) Jihova ukalakala kyavulu. Twamesena kukayela o phangu ya Jihova mukukala tu akalakadi ambote. Se kiki tukibhanga, twanda musagulukisa etu we twanda sanguluka.
Kima kyambote o kukalakala. Maji kitutokala kwehela o salu kufunyisa o ubhezelu wetu kwa Jihova. (Nzwá 6:27) Jihova watukanena kwila, setuta ubhezelu we kupholo mwene wandatubhana yoso itwabhindamena phala kukala kumwenyu.
2. Webhi o ukexilu watokala wakutala o kitadi?
O Bibidya yamba “kitadi ki vungina kala kilembeketa.” (Ndongixi 7:12) Maji yene we itudimuna kwila, o kitadi kikitena kutusangulukisa. Mukonda dya kiki, o Bibidya itutendelesa phala kituzole o kitadi maji ituswinisa ‘kusanguluka ni ima i twala nayu.’ (Tanga Jihebelewu 13:5.) Se kiki tukibhanga, kitwandaluwala mukonda dya kukamba kukala ni ima yavulu. Kitwandata we makongo avulu. (Jisabhu 22:7) Kitwandadita we mu kilwezu kya jijoko jakunganyala kitadi ni kumesena kukala nvwama ni lusolo.
3. Kyebhi kitutena kukwatesa akwetu ni kitadi kyetu?
Jihova Nzambi mukwa kubhana, etu tukayela o phangu yê kyoso ‘kitubhana ni kyoso kitukwatekesa akwetu abhindama.’ (1 Timote 6:18) Tutena kubhanga kiki mu kukwatekesa o kilunga ni yó abhindama, benge benge o jiphange jetu mu nzumbi. Jihova kathandanganya se tubhana ima yofele mba yavulu, maji ubhana valolo kyoso kitubhana ni muxima woso. Se tukala ni ukexilu wakubhana twanda sanguluka, twanda sangulukisa we Jihova.—Tanga Ikalakalu 20:35.
DILONGE DINGI
Tala se mukonda dyahi kima kyambote kuta o salu mu kididi kyê ni kusanguluka ni ima itwala nayu.
4. O ukexilu wé wakukalakala utena kubhana kijingu kwa Jihova
O ukamba wetu ni Jihova watokala kutukwatekesa kutala o salu mu ukexilu watokala. Tala OVIDYU, mukusuluka bhanga o ibhwidisu ya kayela.
Mu vidyu, twamono kwila Jona waditundu kyambote ku salu. Ihi ya kubhangesa dingi kudiwana?
Ihi ya bhange mwene phala kuta o salu mu kididi kye?
Tanga Kolose 3:23, 24, mukusuluka bhanga o kibhwidisu kya kayela:
Mukonda dyahi twatokala kutala o salu mu ukexilu watokala?
Kima kyambote o kukalakala. Maji kitutokala kwehela o salu kufunyisa o ubhezelu wetu kwa Jihova
5. Kusanguluka ni ima itwala nayu kutubhekela mbote
Kala kizuwa kibhita athu avulu asota kunganyala dingi kitadi. Maji o Bibidya ki itutendelesa kubhanga kiki. Tanga 1 Timote 6:6-8, mukusuluka bhanga o kibhwidisu kya kayela:
O Bibidya ituswinisa kubhanga ihi?
Né mwene twala ni ima yofele, tutena kusanguluka. Tala OVIDYU, mukusuluka bhanga o kibhwidisu kya kayela.
Sumbala ni kitadi kyofele, ihi yexile musangulukisa o miji yiyi?
Abha se twala kya ni ima yavulu maji né kiki twamesena dingi? Jezú wate kifika kilondekesa o ibhidi ijila mu kumesena kukala ni ima yavulu. Tanga Luka 12:15-21, mukusuluka bhanga o kibhwidisu kya kayela:
Ihi iwadilongo mu kifika kyate Jezú?—Tala o velusu 15.
Tanga anga sokelesa Jisabhu 10:22 ni 1 Timote 6:10. Mukusuluka bhanga o ibhwidisu ya kayela:
Mudyé, ihi dingi yabetakota? Kukala dikamba dya Jihova inga kukala ni kitadi kyavulu? Mukonda dyahi?
Kyoso muthu kya mesena kukala ni kitadi kyavulu, ibhidi yebhi itena kudibhana nayu?
6. Jihova wanda dikila o ibhindamu yetu
Kuthandanganya ni kitadi ni salu kutena kulola o kixikanu kyetu kwa Jihova. Tala OVIDYU phala kumona kyebhi kitutena kudibhana ni kibhidi kiki, mukusuluka bhanga o ibhwidisu ya kayela.
Mu vidyu, maka ebhi exile mudibhana nawu phangyetu?
Ihi yabhange mwene phala kudibhana ni maka ya?
Tanga Matesu 6:25-34, mukusuluka bhanga o kibhwidisu kya kayela:
Ihi ya kanena Jihova kwa yó ata o ubhezelu wê ku pholo?
ATHU AVULU AMBA: “Eme ngatokala kukalakala phala kudikila o mwiji wami. Kingitena kuya mu yônge semana joso.”
Ibatulu yebhi ya Bibidya ikuxikinisa kwila o kuta o ubhezelu wa Jihova kupholo kyene o kima kya beta kota ki utena kusola?
IHI IWADILONGO
Kima kyambote o kukalakala ni kukala ni kitadi, maji kitutokala kwehela o ima yiyi kufunyisa o ubhezelu wetu kwa Jihova.
Kubhitulula
Ihi itena kukukwatekesa kutala o salu mu ukexilu watokala?
Kyebhi o kusanguluka ni ima iwala nayu kutena kukukwatekesa?
Kyebhi ki utena kulondekesa kwila udyelela mu kikanenu kya Jihova kya lungu ni kulanga o mundu wê?
TOKWESA DINGI
O kwila o Bibidya yamba kuma kima kyayibha kukala ni kitadi?
“O Kwila o Kitadi Lwene o Lundânji Lwa Ima Yoso Yayibha?” (Milongi ya jw.org)
Tala kyebhi o kukala tu akwa kubhana kusangulukisa Nzambi.
“Ihi Yamba o Bibidya ya Lungu ni Ukexilu Wakubhana?” (Milongi ya jw.org)
O kwila kujokala jijoko jakunganyala kitadi kutonoka ngó?
“Ihi Yamba o Bibidya ya Lungu ni—Jijoko Jakunganyala Kitadi” (Despertai!, Março de 2015)
Ihi ya kwatekesa diyala kweha kujokala jijoko jakunganyala kitadi ni kunyana.
“Eme Nga Wabhelele Kyavulu o Jijoko ja Kulenga ni Kabalu” (O Mulangidi, 1 wa Kamoxi wa 2011)