DISÁ 07
Ihi Itwejiya Yalungu ni Jihova?
Mudyé, ihi i ubanza ya lungu ni Jihova? Phala eye o kwila mwene wala ni kutena kwavulu, wa kukala dikanga kala o jithethembwa ku dyulu? Inga ubanza kwila, mwene kimuthu wa kidi, kima kyoso kyoso ngó kyala ni kutena, kala o kinuminu? Mu kidi, Jihova nanyi? O Bibidya itutangela o idifwa ya Nzambi, itutangela we kwila, mwene wa kusuwu.
1. Mukonda dyahi kitutena kumona Nzambi?
“Nzambi Nzumbi.” (Nzwá 4:24) Jihova kala ni mukutu wa xitu kala etu. Mwene Nzumbi, wala ku dyulu mu kididi kitutena ku kimona.
2. Idifwa yebhi yala nayu Jihova?
Kyoso kituya ni kudilonga dingi ya lungu ni Jihova, tumona kwila mwene Muthu wa kidi, wala ni idifwa yambote sumbala kitutena kumumona. O Bibidya yamba: “Kuma Jihova kya mu wabhela o kubatula mu kidi; a di tuma-nê ka ehelela.” (Jisálamu 37:28) Mwene we “wa vula o kukwatela henda ni kulendukila” benge benge o athu amutala hadi. (Tiyaku 5:11) “Jihova wa zukama kwa yá a toloka mixima, u bhulula oso a talamana mu nzumbi.” (Jisálamu 34:18) Eye wa kijidile kwila, o ibhangelu yetu itena kuluwalesa mba kusangulukisa Jihova? O muthu kyoso kya bhanga ima ya yibha, kimuluwalesa. (Jisálamu 78:40, 41) Maji mwene usanguluka kyoso muthu kya bhanga ima yambote.—Tanga Jisabhu 27:11.
3. Kyebhi Jihova kya londekesa kwila mwene wa tuzolo?
O kidifwa kya beta kota kya Jihova o henda. Mu kidi, “Nzambi henda.” (1 Nzwá 4:8) Jihova katulondekesa ngó o henda yê bhukaxi ka Bibidya kana, utulondekesayu we bhukaxi ka ibhangelu yê. (Tanga Ikalakalu 14:17.) Mu kifika, xinganeka kyebhi mwene kya tubhange. Mwene wa tubhana o uhete wa kumona jikolo javulu jayuka, kwivwa mimbu, ni kwivwa o kutowala kwa kudya. Mwene wa mesena kwila tusanguluka ku mwenyu.
DILONGE DINGI
Dilonge kyebhi Jihova kyene mubhanga ima itubhangesa kudiwana. Ijiya we kyebhi Jihova kyene mutulondekesa o idifwa yê.
4. O nzumbi ikôla o kutena kwa Nzambi
Kala kitwene mu kalakala ni maku metu phala kubhanga o ima, Jihova ubhanga o ima bhu kaxi ka nzumbi ikôla. O Bibidya ilondekesa kwila, o nzumbi ikôla kimuthu, maji o nguzu mba kutena kwa Nzambi phala kubhanga o ima ya mesena mwene. Tanga Luka 11:13 ni Ikalakalu 2:17, mukusuluka bhanga o ibhwidisu ya kayela:
Nzambi “wandabhana” o nzumbi ikôla kwa yó a mu bhinganayu. Ihi i ubanza, o nzumbi ikôla muthu inga o kutena kwa Nzambi? Mukonda dyahi wazwela kiki?
Jihova ukalakala ni nzumbi yê ikôla phala kubhanga ima itubhangesa kudiwana. Tanga Jisálamu 33:6 ni 2 Phetele 1:20, 21, mukusuluka bhanga o kibhwidisu kya kayela:
Jihova walondekesa kya o kutena kwa Nzumbiikôla mu maukexilu ebhi
5. Jihova wala ni idifwa yambote
Mozé wexile selevende ya fiyele ya Nzambi, maji nekiki mwene wa mesenene hanji kwijiya kyambote o Mubhangi wê. Mu kiki, Mozé wa mwambela: ‘Ng’idikise jinjila jé ja kudituma ni athu, phala ng’ijiye wendelu wé.’ (Makatukilu 33:13) Mu kiki, Jihova wa tangela o idifwa Yê kwa Mozé. Tanga Makatukilu 34:4-6, mukusuluka bhanga o ibhwidisu ya kayela:
Yebhi o idiwa ya Jihova ya dilongo Mozé?
Idifwa yebhi ya Jihova iwawabhela dingi?
6. Jihova usuwa o athu
O mundu wa Nzambi, o Jihebelewu, exile abhika ku Ijitu. Kyebhi Jihova kyexile mudivwa, kyoso kyexile mutala o mundu wê kutala hadi? Ivwa o milongi yongalavale mba AUDYU ha ukayela o kitangelu mba tanga Makatukilu 3:1-10. Mukusuluka bhanga o ibhwidisu ya kayela.
Ihi ikulonga o musoso yú, yalungu ni kyebhi kya divwa Jihova kyoso athu kyatala hadi?—Tala o velusu 7 ni 8.
Uxikina kwila, Jihova wa mesena mwene kukwatekesa o athu? Uxikina kwila, mwene wala ni kutena kwa kubhanga kiki? Mukonda dyahi uzwela kiki?
7. Tutena kudilonga o idifwa ya Jihova mukutala o ima ya bhange mwene
Jihova ulondekesa o idifwa yê bhu kaxi ka ibhangelu yê. Tala OVIDYU. Anga tanga Loma 1:20, mukusuluka bhanga o kibhwidisu kya kayela.
Idifwa yebhi ya Jihova iwene mumona mu ima ya bhange?
ATHU AVULU AMBA: “Nzambi kimuthu, mwene kutena ngó kwala mu ididi yoso.”
O kwila kyene we ki ubanza?
Mukonda dyahi?
IHI IWADILONGO
Kitutena kumona Jihova mukonda mwene Nzumbi. Mwene wala ni idifwa yavulu, o kidifwa kya beta kota o henda.
Kubhitulula
Mukonda dyahi kitutena kumona Jihova?
O nzumbi ikôla ihi?
Yebhi o idifwa ya Jihova?
TOKWESA DINGI
Bandekesa o kwijiya kwê kwa lungu ni Jihova mu kudilonga o idifwa yê iwana yabeta o kota.
Tala ima ilondekesa kwila, Jihova kala mu ididi yoso.
“O Kwila Jihova Wala mu Ididi Yoso mu Kithangana Kimoxi?” (Milongi ya jw.org)
Ijiya se mukonda dyahi o Bibidya isokesa o nzumbi ikôla ni maku a Nzambi.
Juliu, kifofo. Kwa mu bhonzele kuxikina kwila, Nzambi wa musuwu. Ihi ya bhangesa Juliu kulungulula o kibanzelu kyê.
“Ngi Tena Kiá ku Kuatekesa o Athu” (O Mulangidi, wa 1 wa Kamusasadi ka 2015)