DISÁ 53
Kyebhi ki Utena Kusola Kyambote o Itonokenu?
Jihova ‘Nzambi ya sanguluka.’ (1 Timote 1:11) Mwene wamesena kwila tusanguluka, tukatula mbote ku mwenyu. Mwene usanguluka kyoso kitukatula kithangana phala kunyoha. Mu disá didi, twandamona kyebhi kitutena kukatula mbote mu kithangana kitwala nakyu, sé kudijimba kusangulukisa Jihova.
1. Ihi itwabhingi kuxinganeka ande dya kusola itonokenu?
Mu kunyoha ihi iwawabhela o kubhanga? Amoxi asola kukala kubhata mu kutanga divulu, kwivwa mimbu, kutala filime mba kubokona mu internete. Amukwa kawabhela kukala mu kididi kimoxi, asola kubhanga njila, kuya muzowa mba kujokala ni makamba. Kabasa kima kitusola o kubhanga, twabhingi kwijiya ni kidi kyoso kwila o itonokenu yetu ‘isangulukisa Ngana.’ (Efezu 5:10) Kima kyambote kuxinganeka mumaka ya mukonda ima yavulu yene musola o athu phala kutonoka, ya lungu ni ima ya zembe Jihova kala o usweya, undumbu ni ima ya lungu ni wanga. (Tanga Jisálamu 11:5.) Ihi yanda tukwatekesa kusola kyambote o itonokenu yetu?
Se o makamba metu azola Jihova, anda tukwatekesa kusola kyambote o itonokenu yetu. Kala kitwadilongo mu disá dya 48, “woso wenda ni jinjimu, u biluka njimu.” Kumbandu yamukwa, se tudilunga ni athu kazolo o itumu ya Jihova, tutena “kukituka kala ene.”—Jisabhu 13:20.
2. Mukonda dyahi kima kyambote kumona o kithangana kitwene mu ngastala ni itonokenu?
Né mwene se twasolo kyambote o itonokenu yetu, twabhingi kudilanga phala kitungastale kitangana kyavulu ni itunokenu. Se kyene kibhita, etu nange kitwandakala ni kithangana kya kubhanga o ima yabeta kota. O Bibidya ituswinisa kungastala kyambote ‘o kithangana kitwala nakyu.’—Tanga Efezu 5:15, 16.
DILONGE DINGI
Tala kyebhi ki utena kusola kyambote o itonokenu yé.
3. Lenga o ima iluwalesa Jihova
Mukonda dyahi twatokala kusola kyambote o itonokenu yetu? Tala OVIDYU, mukusuluka bhanga o ibhwidisu ya kayela.
Kyebhi o jijoko ja ujibhangana jexile mubhangaku Loma jadifu ni itonokenu yalelu?
Mu vidyu, ihi yadilongo Daniyele ya lungu ni itonokenu?
Tanga Loma 12:9, mukusuluka bhanga o kibhwidisu kya kayela:
Kyebhi o velusu yiyi itena kukukwatekesa kusola kyambote o itonokenu yé?
Yebhi o ima yazembe Jihova? Tanga Jisabhu 6:16, 17 ni Ngalásya 5:19-21. Koso kiwanda zubha kutanga kala kibatulu, bhanga o kibhwidisu kya kayela:
Ima yebhi yotumbule mu jivelusu jiji, itwene mumona mu itonokenu ya lelu?
Kyebhi kitutena kusola kyambote o itonokenu yetu?
Xinganeka mu ibhwidisu ya kayela:
Ihi? O kwila o itonokenu yiyi yala ni ima yazembe Jihova?
Thembu kuxi? O kwila o itonokenu yiyi yanda thandanganyesa o ikalakalu yami yabeta kota?
Nanyi? O kwila o itonokenu yiyi yanda ngibhangesa jinga kudilunga ni athu kazolo Jihova?
O kima kyabeta kota o kulenga o ilwezu yiyi. Mukiki, se twala ni phata yakwila se o itonokenu yawabha mba yayibha, kima kyambote o kulenga o itonokenu yiyi
4. Kalakala kyambote ni kithangana kyé
Tala OVIDYU, mukusuluka bhanga o kibhwidisu kya kayela.
O phange mu vidyu kexile mutala kima kyayibha. Maji maka ebhi adibhana nawu?
Tanga Filipe 1:10, mukusuluka bhanga o kibhwidisu kya kayela:
O velusu yiyi itena kutukwatekesa kyebhi mu maka alungu ni kusola o kithangana kitwanda ngastala ni itonokenu?
5. Sola o itonokenu yé ni unjimu
Twejiya kwila sayi itonokenu yavulu ki isangulukisa Jihova, maji kwene we ima yavulu yambote itutena o kubhanga phala kutonoka. Tanga Ndongixi 8:15 ni Filipe 4:8, mukusuluka bhanga o kibhwidisu kya kayela:
Itonokenu yebhi iwawabhela?
Kwene ima yavulu yambotephala kutonoka
ATHU AVULU AMBA: “Kikima kyayibha kutala filimi mba kutanga divulu dizwela ya lungu ni usweya, ufusa mba ima ya lungu ni wanga. O kyabeta kota o kwijiya kwila kingene mubhanga o ima yiyi.”
Ihi iweji zwela?
IHI IWADILONGO
Jihova wamesena kwila tusola kyambote o itonokenu yetu ni kwila tutonoka ni ima yambote.
Kubhitulula
Itonokenu yebhi yatokala kulenga o Jikidistá?
Mukonda dyahi twabhingi kudilanga ni kithangana ki tungastala ni itonokenu?
Eye wamesena kusola itonokenu isangulukisa Jihova? Mukonda dyahi?
TOKWESA DINGI
Tala se nanyi watokala kusola o itonokenu yé.
“O Kwila o Jimbangi ja Jihova Ene Mufidisa Jifilimi, Mimbu Mba Madivulu?” (Milongi ya jw.org)
Tala ihi i utena o kubhanga phala kusola kyambote o itonokenu yé.
“O Kuila Uene mu Sola Itonokenu Iambote?” (O Mulangidi, 1 wa Kamusasadi wa 2011)
Phala kumona se mukonda dyahi diyala walungulula o ukexilu wê wakusola o itonokenu, tanga o musoso “Eme Ngatolola o Katombo”.
“O Bibidya Ilungulula o Myenyu ya Athu” (O Mulangidi, 1 wa Kawana wa 2010)
Tala kyebhi o mama kyasolo kyambote mumaka alungu ni kutala jifilimi jalungu ni wanga.