‘Kalenu Mu Abhika a Jihova’

1. Ihi i banza o athu ia lungu ni ubhika ni kiebhi o ibanzelu iâ, ki i difu ni ubhika ua tange mu divulu dia Loma 12:11?

O UBHIKA ua Kidistá, ki u difu ni ubhika uene mu banza o athu. Mu ibanzelu iâ, o ubhika o ku zukutisa o muthu, mba ku mu jijidika, ni ku mu talatala kia iibha. Maji o Mak’â Nzambi, a zuela o ubhika ua ku sidivila o Ngana, mukuá henda. Kioso o poxolo Phaulu kia tendelesa o Jikidistá ku hama ia dianga, ‘ku kala abhika a Jihova,’ muéne ua kexile mu ku a suínisa ku bhanga o sidivisu ia bhingi o Nzambi ia henda. (Loma 12:11) Ihi i lombolola o ubhika iú? Kiebhi ki tu tena ku lenga ku kala tu abhika a Satanaji ni mundu ué? Kisakidilu kiahi ki tu tambula mu ku kala tu abhika a Jihova?

“NGANA IAMI NGA MU ZOLO”

2. (a) Ihi ia tokalele o ku bhanga se mubhika mukua Izalaiele ua mesenene ku suluka ku kala mubhika ua ngana iê (b) Ihi ia kexile mu lombolola o ku tubula o ditui dia mubhika?

² Mu Kitumu kia bhanene Nzambi ku akua Izalaiele, ki tu kuatekesa kuijiia ihi ia bhingi phala ku kala mubhika ua Jihova. O mubhika a tokalele ku mu bhana ufôlo, kioso kieji tenesa sambuadi dia mivu. (Mak. 21:2) Jihova ua bhanene kitumu kia lungu ni kisakidilu ku abhika a zolele kiavulu o jingana jâ, ka mesenene ku xisa o jingana jâ. O ngana iê ueji bheka o mubhika bhu muelu, ia inzo ia Jihova ku akunji phala ku mu tubhula ditui ni sovela. (Mak. 21:5, 6) Mukonda diahi ua tokalele ku bhanga kiki? Mukonda mu Hebalaiku o kizuelu ku belesela, a ku sokesa ni kuívua. O ku xikina o ku mu tubula o ditui, kueji lombolola kuila o mubhika ua mesenene ku kala ni ngana iê ni ku mu belesela. Kiki kia sokela ni ku di bhakula kuetu kua Jihova. Kiki kilombolola kuila kioso ki tu di bhakula kua Jihova—tua mesena ku belesela, mukonda tua zolo Nzambi.

3. Mukonda diahi tu di bhakula kua Nzambi?

³ Ande dia ku tu batizala etu tua solo ku sidivila Jihova, ni ku kala tu abhik’ê. Kioso ki tua di bhakula kua muéne, tua mu kanena kuila tueji mu belesela, ni ku bhanga o vondadi iê. Se-ku muthu ua tu jijidika ku bhanga kiki. Né muene o minzangala, kioso kia di batizala, ene a bhanga kiki mu vondadi iâ, ka ki bhange ngó mukonda a mesena ku sangulukisa o jitata jâ. O kima kia dianga ki tu bhangesa o ku di bhakula, o henda ietu ku Ngana ietu ia diulu, Jihova. ‘Kuma o henda ia kuzola Nzambi inhi’íi, o kualuka o ijila iê. O ijila iê-phe ki i bhonzo ku i aluka.’—1 Nzu. 5:3.

TUALA NI UFÔLO MAJI TU ABHIKA

4. Ihi ia bhingi phala tu kale tu “abhika a kuiuka kua Nzambi?”

⁴ Tu sakidila kiavulu Jihova mu ku tu bhana o ima i tua bhindamena, phala ku kala tu abhik’ê! O kixikanu mu sata ia kukula kua Kristu, ki tu fidisa ku ubhika ua kituxi, ni kuila o kituxi ki ki tena ku tu tumina. Sumbala tu akua ituxi maji tu tena ku sola ku belesela Jihova ni Jezú. Phaulu ua jimbulula mu mukanda ua soneka: ‘Mu di xinganeka jinga kuma, mu ituxi muafu kiá, maji-phe muala ku muenhu phala Nzambi mua Kristu Jezú, Ngana ietu.’ Muéne ua tendelesa ué: ‘Mua k’ijiia kuma kuoso ku mua di bhakula mu ubhika, muala mu abhika a muthu muen’ió uoso mua mu belesela. Kiene enu ué, ki kale ituxi, mua tambula kufuá, mba ki kale o ku tumaka Nzambi, ni a mi xikine ni mu kale mu athu mua iuka. Maji tu sakidilienu-phe Nzambi, mukonda sumbala mua kexile mu abhika a ituxi, o kiki mua tumaka ni muxima uoso o phangu ia ulongelu iú u mua tambula kunu ku mua sambuka. O kiki mua jituka ku ituxi, enu mua bhiluka mu abhika a kuiuka kua Nzambi.’ (Loma 6:11, 16-18) O poxolo ua tumbula o kizuelu ‘ku belesela ni muxima uoso.’ Mu kidi o ku di bhakula kua Jihova ku tu bhangesa ku kala tu “abhika a kuiuka kua Nzambi.”

5. Kima kiahi ki tua tokala ku bhânga na-kiu etu enioso, ni mukonda diahi?

⁵ Mukonda dia ku di bhakula kua Nzambi, tu bhânga ni ima iiadi. Kia dianga, o ku kamba o kuiuka. Phaulu ua di bhanene ué ni maka enhá, muéne uambe: “Ngejiia kuma moxi diami nga sangulukila o Kitumu kia Nzambi. Maji nga mono kuila Kitumu kiéngi kia mu tumina mu idiandu iami, kiala ku di lua ni kitumu kia ngi kala mu kilunji kiami, kiene kí kiala ku ngi kutila mu ubhika ua kitumu kia ituxi kia ngi kala mu idiandu iami.” (Loma 7:22, 23) Mukonda tu akua ituxi tua tokala ku bhânga ni jihanji ja xitu ji tu fidisa ku kala ni ibanzelu ia Nzambi. O poxolo Phetele ua tu tendelesa: ‘Kale-nu ni ufôlo, maji o ufôlo uenu ki u kale divunga dia ku sueka usuéia, maji mu kala-phe mu abhika a ngene a Nzambi.’—1 Phe. 2:16.

6, 7. Kiebhi Satanaji kia bhangesa o mundu ku moneka kála kima kiambote?

⁶ O kima kia mukuá ki tua tokala o ku bhânga na-kiu, o mundu iú ua mu tumina Satanaji. Satanaji o nguvulu ia mundu iú, ua mesena ku tu kuata mu ibhetu iê, phala tu texi o ukamba uetu ni Jihova ni Jezú. Satanaji ua mesena tu kala tu abhik’ê mu ku bhanga mbandu ia mundu uê. (Tanga Efezo 6:11, 12.) Muéne u bhangesa kuila, o mundu u moneka kála kima kiambote. O poxolo Nzuá ua soneka: “Kuma enu se mu zola o mundu, Nzambi Tata ki mua mu zolo. Kuma o ima ioso iene ku mundu, ki ima ia tundu kua Tata. O jihânji jaiibha ja luimbi lua xitu, o vondadi ia luimbi lua kumesena ima ioso i mona o mesu, ni izala mu ima ioso iene ku muenhu—ima ioso íii ia mundu.”—1 Nzu. 2:15, 16.

⁷ O athu ku mundu ezala ni vondadi ia ku kala ni jimbongo javulu. Satanaji u suínisa o athu ku banza kuila, o kitadi kia sokela ni ku zediua ku muenhu. Itanda ia makota mu ididi ioso. O athu a bhanga jingolokela ja ku suínisa o athu ku sumba imbamba iavulu, ni ku tonoka. Athu a suínisa kuia mu ididi ni athu a banza ngó mu ima ia mundu. O ima ioso ia tu kondoloka i moneka kála ia “fuama,” maji ilondekesa ngó o ibanzelu ia mundu.

8, 9. Kibhetu kiahi kia kidi, ni mukonda diahi kiluezu?

⁸ Ku hama ia dianga, Phetele ua tendelesa o Jikidistá, ku aluka ni ió mu kilunga, a matekene ku kala ni ibanzelu ia mundu. Muéne ua a dimuna: “Kuma ene a tanga maka ma ku di kaka, a zuela izala ioso, o mu hânji jâ ja xitu ni mu ufusa, a bhomba athu ió oso ambe kiá kubhuluka mu akuâ a nanga mu kutondala. A dielelesa ufolo ku akuá, manhi ene ala abhika a ifua iabólo. Kuma muthu kioso ki mu lenda, kiene kima ki mu bhikisa. Athu a a uabhela kubhanga o isunji ia jivondadi jâ ja bôlo mu muanha uatu! O kioso ki mu kala mu kudia-nâ mu fesa jenu, a bhekesa jisonhi, edi kala mabaka ku kizuatu. O ima ioso a i bhanga ni kádia.”—2 Phe. 2:13, 18, 19.

⁹ Se tu sota ku bhanga ‘o jivondadi ja mesu,’ o ku mesena ku kala ni ima ioso i tu mona, ki tua-nda kala ni ufôlo. Tua-nda kituka tu abhika a Satanaji o Diabhu, o ngana ia di sueka ia mundu iú. (1 Nzu. 5:19) O kibhetu kia ku kala tu abhika a jimbongo kia kidi. Se ki tu kuata, kia-nda tu bhonza o ku ki lenga.

KIKALAKALU KI SANGULUKISA

10, 11. A nanhi a beta-o-kota ku a kuata kua Satanaji, ni kiebhi o ku di longa mu ji xikola ja katunda ku tena ku a bhonzesa?

¹⁰ Kála kia bhangele ni Adá ni Eva, Satanaji lelu ué, u kuata ió kala ni unjimu ua soko, bhenge-bhenge o minzangala. Satanji ka sanguluka kioso kia mona minzangala a mu sidivila Jihova mu vondadi iâ. Satanaji ua mesena kuila oso a di bhakula kua Jihova, a lueza mu kixikanu kiâ kua Nzambi.

¹¹ Tu xinganeke o mubhika ua xikinine ku mu tubula o ditui. Nange o mubhika iú, uevu o ndolo mu kithangana kieniokio; maji o ndolo, ia xisa kidimbu kia kuila muéne uexile mu bhika. Nange ki bhonza ku munzangala ku sola ufunu ki u difu ni ua minzangala ni akuâ. Satanaji u longesa o athu kuila o ku di bhakula ku ufunu ku mundu iú, ku bhekela kisangusangu ku muthu, maji phala o Jikidistá, o kisangusangu kia dikota, kijila ngó mu ku ta Jihova ku pholo dia mienhu iâ. Jezú uambe: ‘A zediua evua o mak’â Nzambi, mukonda o Utuminu ua Diulu uâ ene.’ (Mat. 5:3) O Jikidistá ja kidi a di bhakula, a bhanga ngó o vondadi ia Jihova, ia Satanaji kana. Ene a zolo o itumu ia Jihova, ene a xinganeka mu itumu iê suku ni muanha. (Tanga Jisálamu 1:1-3.) O kuijiia kua katunda, kuene mu bhangesa o jiselevende ja Jihova ku kamba ku kala ni kithangana kia ku xinganeka ni ku dikila o ibhindamu iâ mu nzumbi.

12. Ihi ia tokala ku sola o minzangala lelu?

¹² Ki bhonza kiavulu o Kidistá ku sidivila ngana ku mundu iú. Mu mukanda uê ua sonekena akua Kolindo Phaulu uebhula: “A ku ixana u mubhika?’ Muéne ua a tendelesa: ‘Ki ki bhange kima. Maji se ua tena ku tambula ufôlo-phe, kia uabha, bhanduluka.’ (1 Kol. 7:21) O abhika a mesenene kiavulu o ufôlo. Lelu saí jixi a jijidika o athu ku di longa mu xikola katé o kitala kia tendelesa o ixi íii. O a dilongi ene a sola se a mesena ku di longa katé o kitala kieniókio mba kana. O ku sola ku di longa kiavulu mu xikola, ki tena ku fidisa o muthu ku bokona mu sidivisu ia thembu ioso.—Tanga 1 Kolindo 7:23.

O KUIJIIA—KUA KATUNDA, ANGA O KUIJIIA KUA BETA O KOTA?

13. Kuijiia kuahi kua beta-o-kota ku kuatekesa o jiselevende ja Jihova?

¹³ Phaulu ua dimuna o Jikidistá ja tungile mu Kolose: “Alukenu! Ki bhu kale muthu u mi tobhesa, anga u mi bhûnda kala kingûmba, ni uanji uê ni makutu, ua kaiela mu malunda ma ulongelu ua athu, ni mu jindonda ja mu ngong’umu, o kua Kristu ki kiala-ku.” (Kol. 2:8) Se o “uanji uê ni makutu, ua kaiela mu malunda ma ulongelu ua athu,” lelu ene mu u longa mu ji xikola. O ji xikola lelu kene mu longa maufunu ku maxibulu mâ. Mukonda dia kiki, ene kia bhonza ku di bhana ni ibhidi i moneka mu kizuua ni kizuua. Maji o jiselevende ja Jihova, a sola milongi i tena ku a kuatekesa ku kala ni ima ia bhindamena ku muenhu, phala ku bhanga o sidivisu ia Nzambi, ene a bhana valolo ku kitendelesu kia Phaulu kia bhana kua Timote kioso kiambe: “Kuma kia kidi kiene, o kuxila Nzambi-phe ni kutululuka kuê, nganhu muene ia dikota, kabasa muthu ua tena kusanguluka ni kioso kiala na-kiu. Kala kiki, se tua mono-phe kia kudia ni kia kudivunga, ima ienhi’ii i tu soke.” (1 Tim. 6:6, 8) Mu veji dia ku sota ku di longa mu ji xikola ja katunda, o Jikidistá a suína phala ku ‘kala ni mikanda ia ku a ximana,’ mu ku bhanga kia soko mu sidivisu ia ukunji.—Tanga 2 Kolindo 3:1-3.

14. Kala ki tua tange mu divulu dia Filipe 3:8, kiebhi kia monene Phaulu o ujitu ua ku kala mubhika ua Nzambi ni ua Kristu?

¹⁴ Xinganeka ia bhitile ni poxolo Phaulu. Muéne a mu longo ku mesene ia túndu mu izuua iê, dijina diê Ngamaliele. O milongi ia di longo Phaulu, a tena ku i sokesa ni iene mu tambula o maxibulu mu jixikola ja katunda lelu. Maji ihi iambe Phaulu kioso kia i sokesa ni ujitu ua ku kala mubhika ua Nzambi ni ua Kristu? Muéne ua soneka: “Ima iosololo ngi i kita kingoho mu ujitu ua kuijiia Kristu Jezú, Ngana iami,” Muéne uambe ué: “O mukonda dia muène, ima i nga kuatele, nga i texi dikanga, ioso ia di boto. Eme-muene-phe nga i kiti dixilu, phala ngi nganhale Kristu, nda ngi kondamene kua Muène.” (Fil. 3:8) O ibanzelu ia Phaulu i tena ku kuatekesa o jitata abhezi a Jihova ni minzagala, kuijiia ku sola kiambote ia lungu ni ku di longa mu ji xikola ja katunda. (Tala o foto.)

KATULA MBOTE MU KUIJIIA KUA BETA O KOTA

15, 16. Milongi iahi iene mu bhana mu kilunga kia Jihova, ni mukonda diahi?

¹⁵ Ukexilu uahi uene mu kala mu jixikola ja katunda? O athu mu ididi íii, alondekesa kuila ala ni ufôlo ua ku bhukumukina o jinguvulu, ni kulondekesa kuila ala ni njinda ia jinguvulu ni athu amukuá ala ni ungana. (Efe. 2:2) Maji o kilunga kia Jihova ki bhana o milongi ia beta-o-kota mu kididi kia tululuka mu ilunga ia Jikidistá. Etu enioso tu tena ku katula mbote mu milongi i tu tambula mu sukilu dia senama ni milongi i tu tambula mu Xikola ia Akunji. Saí hanji ji xikola ja mukuá. Mu kifika, tuala ni ji xikola phala o minzangala aboki a thembu ioso, akudi a ixana Xikola Phala o Jiphange Akudi, phala o makaza aboki a thembu ioso, kuala o Xikola Phala o Makaza a Jikidistá. O milongi ia tambula ku kimbadi, ia a kuatekesa ku belesela Jihova, o Ngana ietu ia Diulu.

¹⁶ Tu tena ku sanga milongi iavulu mu Índice das Publicações da Torre de Vigia, mba mu Biblioteca da Torre de Vigia mu CD-ROM. O milongi íii, phala ku tu kuatekesa ku bheza Jihova. I tu longa ué kiebhi ki tu tena ku kuatekesa akuetu ku kala makamba a Nzambi. Ia-nda ku a kuatekesa uê phala n’a tene ku longa akuâ.—2 Kol. 5:20.

O KISAKIDILU KI TAMBULA O MUBHIKA

17. Kisakidilu kiahi ki tambula ió a sola o kuijiia kua beta-o-kota?

¹⁷ Mu kifika kia bhangele Jezú kia lungu ni ji talendu, o kiiadi kia abhika exile jifiiele, a a ximanene i a sangulukile ni ngana iâ, mukonda dia kiki, ua a bhana dingi kikalakalu. (Tanga Matesu 25:21, 23.) Etu ué tu tena ku sanguluka ku muenhu, se tu sola o kuijiia kua beta-o-kota. Xinganeka o phangu ia Michael. Muéne ua di tundu kiambote bhu xikola, o alongex’iê a mu ixana phala kuzuela nê, ia lungu ni kuia mu xikola ia katunda, ene a sasumuka kioso kia mono kuila muéne ka mesenene ku di longa mu xikola ia katunda. Maji ua solo ufunu uegi mu kuatekesa ku kala muboki ua thembu ioso. O kuila muéne ua banze kuila ka solele kiambote? Muéne uambe: “O milongi i nga di longo mu Bibidia, tundé ki nga kituka kafunga, iene mu ngi kuatekesa kiavulu. O mabesá u ngene mu tambula ni ujitu u ngala nau, a beta-kota o kitadi kioso ki ngeji nganhala ndenge, nga sanguluka kiavulu mukonda ki ngi solo kuia mu xikola ia katunda.”

18. Ihi i ku bhangesa ku sola o kuijiia kua beta-o-kota?

¹⁸ O kuijiia kua beta-o-kota, ku tu longa ku bhanga o vondadi ia Nzambi, ni ku kala tu abhika a Jihova. Kiki ki tu bhana o ujitu ua ku “jituka ku ubhika ua kubôla,” ni ku “bokona mu ufôlo ua fuma, ua an’ a Nzambi.” (Loma 8:21) O kia beta-o-kota o kuijiia kuila, tua di longo kiebhi ki tu tena ku londekesa kuila tua zolo o Ngana ietu ia diulu, Jihova.—Mak. 21:5.