DISÁ 35
Kyebhi Kitutena Kusola Kyambote o Ima ku Mwenyu Wetu?
Etwenyoso twabhingi kusola ima. Sayi ima itusola itena kufunyisa o mwenyu wetu ni ukamba wetu ni Jihova. Mu kifika, nange twabhingi kusola kwebhi ku twandatunga, kyebhi ki twanda didikila, se twandakazala mba kana. Kyoso kitusola kyambote, o mwenyu utena kusanguluka dingi, tusangulukisa we Jihova.
1. Kyebhi o Bibidya itena kukukwatekesa kusola kyambote?
Ande dyakusola kima, bhinga kikwatekesu kwa Jihova bhukaxi kamusambu, tala we ihi izwela o Bibidya ya lungu ni kima kiwandasola. (Tanga Jisabhu 2:3-6.) Sayi ithangana Jihova ubhana kitumu. Mu kithangana kiki, o kima kyabeta kota ki utena o kubhanga o kubelesela o kitumu kiki.
Abha se mu Bibidya kimwale kitumu kizwela ihi iwatokala o kubhanga? Né kiki, Jihova wandakukwendesa “mu njila iwafwama kwenda mu kuditela.” (Izaya 48:17) Kiki kibhita kyebhi? Mu Bibidya mwala itumu itena kukukwatekesa. O itumu, ilongesu ya Bibidya itulonga ihi ibanza Jihova ni kyebhi mwene kyadivwa. Sayi bhabha, twijiya ihi ibanza Jihova kyoso kitutanga musoso wa Bibidya. Kyoso kitutendela kyebhi Jihova kyadivwa, tusola kyambote o ima imusangulukisa.
2. Ihi iwatokala o kuxinganeka ande dyakusola kima?
O Bibidya yamba: “Yó wa sunguluka-phe mba njimu, u zonga kyambote kyoso kyenda.” (Jisabhu 14:15) Kiki kilombolola kwila, ande dyakusola kima twabhingi kwimana ni kuxinganeka mu yoso ya lungu ni kima ki wandasola. Dibhwidise: ‘Kibatulu kyebhi kya Bibidya kya lungu ni maka ya? Kima kyebhi kiwatokala o kubhanga? Kyebhi o ima ingisola itena kufunyisa akwetu? O kyabeta dingi kota, o kwila o kima kingasolo kisangulukisa Jihova?’—Matendelelu 32:29.
Jihova mwene ngó wala ni kutena kwakututangela ihi yawabha ni yayibha. Kyoso kitwijiya kyambote o ijila ni itumu ya Jihova anga tusota ku ibelesela, twandalonga kyambote o kitongolwelu kyetu. O kitongolwelu, o kutena kutwala naku kwakwijiya se kima kyawabha mba kyayibha. (Loma 2:14, 15) O kitongolwelu kyolonge kyambote kyanda tukwatekesa kusola kyambote o ima.
DILONGE DINGI
Tala kyebhi o itumu ya Bibidya ni kitongolwelu kyetu kitena kutukwatekesa kusola kyambote o ima.
3. Ehela o Bibidya kukwendesa
Kyebhi o itumu ya Bibidya itena kutwendesa kyoso kitusola kima? Tala OVIDYU, mukusuluka bhanga o ibhwidisu ya kayela.
O kizwelu ufolo kilombolola ihi?
Mukonda dyahi Jihova watubhana o ufolo?
Ihi ya tubhana Jihova phala kutukwatekesa kusola kyambote o ima?
Phala kumona phangu imoxi ya kitumu kya Bibidya, tanga Efezu 5:15, 16. Mukusuluka dizwelesyenu kyebhi ki utena “kungastala kyambote o kithangana kyé” phala . . .
kutanga o Bibidya izuwa yoso.
kukituka munumi mba muhatu, tata, mama, mba twana twambote.
phala kutala o yônge ni kilunga.
4. Longa o kitongolwelu kyé phala kusola kyambote o ima
Kyoso o Bibidya ibhana kitendelesu kya lungu ni kima kitwandasola kikwanda tubhonza kwijiya ihi itwatokala o kubhanga. Abha se o Bibidya ki ibhana itendelesu ya lungu ni kima kitwandasola? Tala OVIDYU, mukusuluka bhanga o ibhwidisu ya kayela.
Mu vidyu, ihi yabhange phange yamuhatu phala kulonga o kitongolwelu kyê ni kusola o kima kisangulukisa Jihova?
Mukonda dyahi kitutokala kubhinga ku akwetu phala kusola o ima mu kididi kyetu? Tanga Jihebelewu 5:14, mukusuluka bhanga o ibhwidisu ya kayela:
Ki kubhonzo kubhinga ku akwetu phala kusola o ima mu kididi kyetu. Maji kala muthu mudyetu watokala kwijiya ihi?
Ihi itena kukukwatekesa kulonga kyambote o kitongolwelu kyê ni kusola kyambote o ima?
Kala o muthu utala ku mapa phala kwijiya o njila ya tokala, o kitongolwelu kyetu kitukwatekesa kusola o njila ya tokala kumwenyu wetu
5. Xila o kitongolwelu kya akwenu
O athu kadifu, mukiki atena kusola ima ki idifu. Kyenyiki, kyebhi kitutena kulondekesa kwila twamuxila o kitongolwelu kya akwetu? Tala ifika iyadi:
Kifika kya 1: Phange yamuhatu wawabhela kubatula o ndemba, uya mu kilunga kyengi mwala jiphage jamukwa ja ahatu adivwa kyayibha mu kumona phange yamuhatu wabatula o ndemba.
Tanga Loma 15:1 ni 1 Kolindu 10:23, 24, mukusuluka bhanga o ibhwidisu ya kayela:
Kala kitwatange mu jivelusu jiji, kyebhi o kima kyatokala kubhanga o phange mwenyu? Kyebhi ki utena kukumbidila o jivelusu jiji se ukala ni muthu uxinganeka kwila, o kima kiwamubhanga kyayibha maji phala o kitongolwelu kyé kikima kyayibha?
Kifika kya 2: Phange yadiyala wejiya kwila o Bibidya kiyamba kwila kituxi o kunwa, maji né kiki udituna kunwa uhôlwa. Mwene amwixana phala kujandala kudibhata dya phange yamukwa. Mu jandale yiyi mwene umona kwila athu amukwa amunwa.
Tanga Ndongixi 7:16 ni Loma 14:1, 10. Mukusuluka bhanga o ibhwidisu ya kayela:
Kala kitwatange mu jivelusu jiji, kyebhi o kima kyatokala kubhanga o phange mwenyu? Kyebhi kiweji kumbidila o jivelusu jiji, se udilunga ni muthu ubhanga kima kithandanganyesa o kilunji kyé?
Ihi iwabhingi o kubhanga phala kusola o ima yambote?
1. Bhinga kikwatekesu kya Jihova bhukaxi kamusambu kyoso kiwandasola kubhanga kima.—Tiyaku 1:5.
2. Tokwesa mu Bibidya ni mu madivulu metu phala kusanga kitumu kyanda kukwatekesa. Utena we kuzwela ni Jikidistá jakulu mu nzumbi.
3. Banza we se o kima kiwandasola kyandafunyisa o kitongolwelu kyé ni kya akwenu.
ATHU AVULU AMBA: “Eme ngejiya inganda bhanga kumwenyu wami. Phala eme o ima ibanza akwetu kiyala ni valolo.”
Mukonda dyahi twatokala kuxinganeka kyebhi Nzambi kyadivwa, ni kyebhi o athu kyadivwa?
IHI IWADILONGO
Phala kusola kyambote o ima twabhingi kwijiya ihi ibanza Jihova ya lungu ni maka enya, ni kumona kyebhi o kima kitwandasola kyandafunyisa akwetu.
Kubhitulula
Kyebhi ki utena kusola o ima isangulukisa Jihova?
Kyebhi ki utena kulonga o kitongolwelu kyé?
Kyebhi ki utena kulondeksa kwila uxila o kitongolwelu kya akwenu?
TOKWESA DINGI
Kyebhi ki utena kusola o ima ikolesa o ukamba we ni Nzambi?
“Sola Ima I Ximanesa Nzambi” (O Mulangidi, 15 wa Kasamanu wa 2011)
Dilonge dingi ya lungu ni kyebhi Jihova kyene mu tubhana itendelesu.
Tala ihi ya kwatekesa diyala kubatula maka amubhonzele.
Ihi iwatokala o kubhanga se Jihova kabhana itendelesu mu Bibidya ya lungu ni kima kiwamusola.