‘Jihova Imoxi-élele,’ Uongeka o Muiji uê
‘Nga mi bhingi muenda kia fuama kála kia mi exana ku nzumbi.’ —EFE. 4:1, 3.
KIEBHI KI UEJI JIMBULULA?
Ihi ia mu bhanga o mbonge ia Nzambi ku ibhangelu iê?
Kiebhi ki tua tokala kulondekesa o ‘kuongeka kua tu bhana o nzumbi?’
Ihi ia-nda tu kuatekesa ‘ku di londekesa henda mudietu?’
1, 2. Iebhi o vondadi ia Jihova ia lungu ni ixi ni athu?
MUIJI. Ihi i u banza kioso ki uivua o kizuelu kiki? O kuila henda? Ku zediua? O kuila muiji u kalakala ni disukilu dimoxi? Kididi kia kondama, mua di longa ni ku xila o ibanzelu? Nange u banza mu ima íii se ua tokala ku muiji. Jihova muéne o Mubhangi ua muiji. (Efe. 3:14, 15) Muéne ua mesenene kuila o ibhangelu iê ioso i kale muiji umoxi ua sanguluka, u kala kiambote u dixila ni ku di zola.
2 Kioso Adá ni Eva kia te o kituxi, o athu ka tokalele dingi ku muiji ua Nzambi, maji o vondadi ia Jihova ka i zange kana. Muéne ua-nda bhangesa kuila o Palaízu mu ixi izale dingi ni mbutu ia Adá ni Eva. (Dim. 1:28; Iza. 45:18) Muéne ua mu iudika o ima ioso phala ku kumbidila o vondadi iê. Saí ima ia mu bhanga tua ijiia, mukonda tu i sanga mu Bibidia mu divulu dia Efezo, i zuela o maka alungu ni kuongeka o muiji. Tua-nda di longa jivelusu mu divulu didi, ni ku mona kiebhi ki tu tena ku kuatekesa o vondadi ia Jihova ia kuongeka o muiji uê.
MBONGE PHALA KUENDESA O KIKALAKALU KIÊ
3. Kikalakalu kiahi kia Nzambi ko tumbule mu divulu dia Efezo 1:10, ni thembu kuxi kia mateka o kikalakalu kia dianga?
3 Mozé uambela akua Izalaiele: ‘Jihova Nzambi ietu, muéne ngó Jihova.’ (Mate. 6:4) O ikalakalu ia Jihova, ia di lungu ni vondadi iê. Kienhiki, ‘mu kithangana kia tokala,’ Nzambi ua bhange “mbonge” phala kuongeka o athu—o ibhangelu iê ia unjimu. (Tanga Efezo 1:8-10.) Nzambi ua mateka kuongeka o ima ioso ku diulu ni mu ixi phala ioso i kala kumoxi, o kikalakalu kiki ua ki ixana, mbonge. Kia dianga, o ku pelepalala o kilunga kia Jikidistá a a undu phala ku kala ku diulu ni Jezú Kristu, o Mutuameni uâ mu nzumbi. O kikalakalu kiki kia mateka mu kizuua kia Pendekoxi kia 33 K.K., kioso Jihova kia mateka o kuongeka ió a-nda tumina ni Kristu ku diulu. (Ika. 2:1-4) O athu a a undu, a tambula o ujitu ua ku kala athu a iuka, ni ku kala ni muenhu mu ku dielela mu kukula kua Kristu, ene ejiia kuila a a solo kála “an’a Nzambi.”—Lom. 3:23, 24; 5:1; 8:15-17.
4, 5. Kikalakalu kiebhi kia kaiiadi kia mu bhanga Nzambi?
4 Kaiiadi, o kikalakalu kia kuongeka ió a-nda kala mu Palaízu mu ixi mu Utuminu ua Kristu. O “mundu uavulu,” o mundu ua-nda bhuluka, a-nda dianga ku kala mu palaízu. (Dij. 7:9, 13-17; 21:1-5) Mu Midi ia Mivu, ene a-nda kala kumoxi ni ió a-nda ku a fukununa. (Dij. 20:12, 13) Xinganeka ngó, kiebhi kia-nda kala o difukunukinu, dia-nda kala kithangana kia tokala phala kulondekesa kuila tu muiji umoxi ngó! O mundu uavulu ni ió a-nda fukunuka, ene ‘o ima mu ngongo’ ia ka bhita mu polova ia sukina ku disukilu dia midi ia mivu. O ió a ka kala jifiiele, a-nda ku a exana “an’a Nzambi” mu ixi.—Lom. 8:21; Dij. 20:7, 8.
5 Lelu, Nzambi ua mu kuongeka o ibuka iiadi íii—o athu a a undu phala ku kala ku diulu, ni jimbudi ja mukuá phala ku kala mu ixi. Kiebhi ki tu tena ku kuatekesa o kikalakalu kiki kia Nzambi?
‘KUONGEKA KU BHANA O NZUMBI’
6. Kiebhi o Mikanda Ikola ilondekesa kuila o Jikidistá a tokala ku kala kumoxi mudiâ?
6 O Mikanda Ikola, ilondekesa kuila o Jikidistá a tokala ku kala kumoxi mudiâ mu ku diongeka kumoxi. (1 Kol. 14:23; Jihe. 10:24, 25) Kiki, mu ku diongeka kumoxi, ki ki bhingi ngó ku kala kumoxi mu iônge, kála kia bhanga o athu mu itanda, mba mu ididi ia ku jokala bola. O ku kala kumoxi ku bhinga dingi kima. Tu tena ku kala kumoxi kioso ki tu belesela o itendelesu ia Jihova ni kioso ki tuehela ku tu umba ku nzumbi ikôla ia Nzambi.
7. Ihi ilombolola o ‘kuongeka ku tu bhana o nzumbi?’
7 Sumbala Jihova uexana o athu a a undu, kala an’ê, o jimbudi ja mukuá, ua ji exana makamba mê mukonda dia kukula kua Kristu, saí ithangana kua-nda moneka maka alungu ni ku dibhana kiambote bhu kaxi kâ ku mundu iú ua iibha. (Lom. 5:9; Tiia. 2:23) Mukonda dia kiki, kua bhingi itendelesu phala tu kolokote mu ‘ku di kuatekesa mudietu.’ Ihi i tua tokala o ku bhanga phala tu dibhane kiambote ni phange jetu? Tua tokala tu ‘di tulula, ni ku belesela.’ Phaulu ua tu suínisa ku kolokota mu ‘kuongeka ku tu bhana o nzumbi, mu dijikita diê dia paze.’ (Tanga Efezo 4:1-3.) O ku kumbidila o kitendelesu kiki, ku bhinga kuehela o nzumbi ikôla ia Nzambi ku tuendesa ni ku tu bhangesa ku kala ni ídifua iambote. O ídifua íii i bhangesa o athu ku kala kumoxi mudiâ, mu veji dia kulondekesa o imbamba i bhanga o xitu i uanuna o athu.
8. Mu ukexilu uebhi o imbamba i bhanga o xitu, i uanuna o athu?
8 Tala kiebhi o ‘imbamba i bhanga o xitu’ i uanuna o athu. (Tanga Ngalásia 5:19-21.) O undumbu u bhangesa o muthu ku batula o ukamba ni Jihova ni kilunga kiê, ku ta o phánda ku uanuna o tuana ku jitata, ni ku dikaza kala ni kikuma. O ufusa, u bhangesa ku zanga o ukamba ua muthu ni Nzambi ni ió a mu zolo. O muthu ua mesena ku lunjika ima iiadi i kola, kala kima kia tokala kizela ande dia ku ilunjika kumoxi. O ku bhanga uhabhu kulondekesa ku kamba ku xila o itumu ia Nzambi. O imbamba ia mukua i bhanga o xitu, i bhangesa o muthu ku batula o ukamba ni akuá, ni Nzambi. Jihova ua zembe o ukexilu iú.
9. Ibhuidisu iebhi i tua tokala o ku bhanga phala kuijiia se tua mu di suínisa ku dibhana kiambote ni jiphange jetu mu paze?
9 Kienhiki kala muthu ua tokala u dibhula: ‘O kuila nga mu di suínisa ku dibhana kiambote ni jiphange jami mu paze?’ Ihi i ngi bhanga kioso ki ku moneka maka? O kuila ngi zuela o maka ku makamb’ami, ni ku a bhangesa ku xikina kuila eme nga lungu? O kuila ngi kingila kuma o tufunga ene a zuela bhu kididi kiami, mu veji dia eme kuzuela ni muthu phala tu kale dingi ni ku tululuka? Se ngejiia kuila akuetu ala ni maka n’eme, o kuila ngene mu dixibha, phala ki nga lembalese dengi ku ima ia bhiti mu veji dia ku zuela-nau? Se tu bhanga kiki, o kuila tua mu londekesa kuma tua mu kuenda mu vondadi ia Jihova ia kuongeka o ima ioso mua Kristu?
10, 11. (a) Mukonda diahi tua tokala ku kala mu ku tululuka ni phange jetu? (b) Ihi i bhekela kutululuka, ni ku dibhana kiambote ni phange jetu mu nzumbi?
10 Jezú uambe: “Kienhiki, se u kala mu bhana ujitu ué bhu kalatódio kua Nzambi, anga u tukumuka [bhenhobho] kuma mukuenu ua ku luualela, ujitu ué xe-u bhu kalatódio, uie hanji [u di bhange ji paze] ni mukuenu, uize [kiá] u bhane o ujitu ué kua Nzambi. Lenguluka ku di tambula ni nguma ié.” (Mat. 5:23-25) Tiiaku ua soneka kuma “o ibundu ima ku mbutu ja kunu ni kutululuka kuala athu ka moneka mvunda.” (Tiia. 3:17, 18) Kienhiki, ki tu tena ku kala ni ukexilu uambote sé ki tuala ni kutululuka.
11 Mu kifika, mu jixi mua bhiti o ita, 35 a ji pursentu ndenge a ididi, eji ku i dima sé o athu ka kexile ni uôma ua jimina jo sueke mu mavu. Kioso ki ku baza mina, o adimakaji a xisa o mábhia, o jisanzala ni jimbanza ji xala sé kudia. Kiene kimoxi ué, ki tu tena ku kula mu nzumbi se tu kala ni maka alungu ni ku dibhana kiambote ni phange jetu ni ku tululuka. Se tu loloka ni lusolo ni ku bhanga ima iambote ku akuetu, tu tena ku kala ni kutululuka kua kidi bhu kaxi k’etu.
12. Kiebhi o tufunga kia tena o ku tu kuatekesa mu ku dibhana kiambote mudietu?
12 Mu kiki ‘o tufunga’ a tena ku kuatekesa o jiphange mu kilunga. Ene a tena ku tu kuatekesa phala ‘tuongeka mu kixikanu kietu.’ (Efe. 4:8, 13) Kioso o tufunga kia tu kuatekesa, a bhana milongi i tunda mu Mak’â Nzambi, ene a tu kuatekesa ku kula mu nzumbi, ni tu kale ni ukexilu ua uobhe mu nzumbi. (Efe. 4:22-24) O kuila eie u xikina kuila o milongi ia bhana, i tunda kua Jihova phala ku u pelepalala ku kala ku mundu uobhe mu utuminu ua Mon’ê? Tufunga, o kuila muene mu bhanga ioso phala ku kuatekesa o jiphange mu ukexilu uambote?—Nga. 6:1.
‘LONDEKESE-NU HENDA MUDIENU’
13. Ihi ieji bhita se ki tu belesela o kitendelesu mu divulu dia Efezo 4:25-32?
13 O divulu dia Efezo 4:25-29, dilondekesa o maukexilu a iibha u tua tokala o kueha. O maukexilu enhá, alungu ni ku tanga makutu, ku kala ni njinda mba umonha, ni izuelu ia bolo mu veji dia kuzuela ima iambote i suínisa. Se muthu u xibhaka o itendelesu íii, u fidisa o nzumbi ia Nzambi, o nzumbi ikôla i bhekela o ku tululuka. (Efe. 4:30) O ku kumbidila o izuelu íii ia soneka Phaulu, ku bhekela ué kutululuka mudietu, muéne uambe: “Ni kulula kuoso, ‘ni njinda, ni ku tema, ehenu-ku. Kana ku kuata ku hoia-hoia’ ni kulokalala. Kana kukala ni unguma. Inda kota o ku di ‘londekesa henda mudienu,’ ni ku di xinganeka. Muenda ni ku di loloka, kala Nzambi kia mi loloka enu mukonda dia Kristu.”—Efe. 4:31, 32.
14. (a) Ihi ilombolola o izuelu, ‘ku di londekesa henda mudienu?’ (b) Ihi ia-nda tu kuatekesa o kulondekesa o henda?
14 O izuelu, ‘ku di londekesa henda mudienu’ ilondekesa kuila se saí ithangana ki tu londekesa henda, tua tokala tu suína phala ku ilondekesa. Kima kiambote se tu suína ku dianga ku xila o ibanzelu ia akuetu! (Fil. 2:4) Nange tu zuela kima ki bhangesa akuetu kuelela, tu banza kuila unjimu, maji se ki kizuelu kia fuama, o kuila o ku bhanga kiki, kieji londekesa henda? Se tu banza ande dia kuzuela, tua-nda tena ku kala ni ukexilu ua ‘ku di londekesa henda mudietu.’
DI LONGE O KULONDEKESA HENDA NI KU XILA O MUIJI
15. Ihi ia zuela Phaulu mu divulu dia Efezo 5:28 ia lungu ni Kristu ku dibhana ni kilunga?
15 O Bibidia i sokesa o ukamba ua Kristu ni kilunga, ni ukamba ua diiala ni muhatu uê. O phangu ia Kristu i kuatekesa o diiala kuijiia kuila muéne ua tokala ku zola ni ku langa o muhatu uê, ni ku tumina mu ukexilu uambote— phala o muhatu n’a belesele—mu ukaza. (Efe. 5:22-33) Phaulu ua soneka: ‘Kiene ué, o anumi a tokala a zola o ahatu’â, kála kia zolo o mikutu iâ.’ Phangu ia nanhi ia kexile mu tendelesa o maiala kioso kiambe, “kiene ué?” (Efe. 5:28) Mu izuelu iê ia mukuá, ia londekesa o ukexilu ua ‘Kristu kia zola o kilunga, ni ku di bhakula bhu kididi kiê, . . . mu ku ki sukula ni menha, ni ku ki zelesa bhu kaxi ka menha a maka mê.’ Kienhiki, o ku kuatekesa ku kumbidila o vondadi ia Jihova mu kuongeka o ima ioso mua Kristu, o diiala ua tokala u aluka mu ku dikila o muiji uê mu nzumbi.
16. Ihi i bhita kioso o jitata kia kumbidila o itendelesu ia Mikanda Ikola kubhata?
16 O jitata a tokala ejiia kuila ene a tokala ku kumbidila o kikalakalu kiâ, kia a bhana Jihova. Maji ku mundu lelu, athu avulu “ka moneka henda ia muthu.” (2 Tim. 3:1, 3) Saí jitata a lenga o kikalakalu kiâ—phala ku bhangesa o tuana tuâ ku tala hadi. Maji Phaulu ua tendelesa o jitata ja Jikidistá: “Enu uenu mu jitata, kana kuthathamesa an’enu ni ku a kuatesa njinda. Maji mu a sasa ni ku a beta, ni ku a longa kioso kia tumu Ngana.” (Efe. 6:4) O tuana a tokala a di longa kuebhi, o ku zola ni ku xila a a kala ku pholo? O jitata a longa kiambote o tuana tuâ, ene mu kuatekesa ku kumbidila o vondadi ia Jihova mu kuongeka oso. Se tu bhanga o inzo ietu kididi kia henda, sé-ku muthu u kala ni njinda, uzuela ima ia bolo, se tu bhanga kiki tua mu longa o tuana tuetu, kiebhi kia tokala kulondekesa henda ni ku xila ió a a kala ku pholo. Kiki kia-nda kuatekesa o tuana ku kala ku mundu uobhe ua Nzambi.
17. Ihi i tua tokala o ku bhanga phala Diabhu ka tu tolole?
17 Tua tokala kuijiia kuila o Diabhu, muéne ua katula o ku tululuka mu ngongo, muéne ua-nda bhanga ioso phala ku tu fidisa ku bhanga o vondadi ia Nzambi. Se-ku phata, kuila Satanaji ua mesena ku bhangesa o makaza ku di xisa, ku kala kumoxi sé ku kazala, ni ku bhangesa o mala ku zeka ni mala ni akuâ. Etu ki tu kaiela o ukexilu ua iibha ua mundu iú. Kristu muéne phangu ietu. (Efe. 4:17-21) Mukonda dia kiki, a tu tendelesa, ‘ku zuata o kibhakatu kia tu bhana Nzambi’ phala Diabhu ni madimonho mê ka tu tolole.—Tanga Efezo 6:10-13.
“ENDENU JINGA MU HENDA”
18. Iebhi o sabhi i tu bhangesa ku kala kumoxi mudietu?
18 O sabhi ia kidi i tu bhangesa ku kala kumoxi mudietu, o henda. Ni muxima uezala ni ku zola o ‘Ngana ietu imoxi ngó,’ ni ku zola ué o ‘Nzambi ietu imoxi ngó,’ ni ku di zola mudietu, phala ku mona o ‘kuongeka kua tu bhana o nzumbi, mu dijikita dia paze.’ (Efe. 4:3-6) Jezú ua sambe ia lungu ni henda íii: “Ki nga mu bhingila ngó iâ u ua ngi bhana, maji ué oso a-nda ngi xikana bhu kaxi ka maka mê, phala enioso a kale kumoxi, kala eie u tata iami, uala kumoxi n’eme, eme ngala kumoxi n’eie, phala ene n’a kale uá kumoxi n’etu phala o athu ku mundu ejiie kuma eie ua ngi tumu, . . . eme ngene mu a bhana o kuijiia o dijina diê, eme nga mu kuenda ni ku d’ijidisa, phala o henda i ua ngi zolo na-iu, i kale ni ene, eme ngi di lunjika nau.”—Nzu. 17:20, 21, 26, NW.
19. Ihi i ua-nda bhanga tundé lelu, katé ku hádia?
19 Se tu mona kuila tua mu kala ni maka mukonda dia ukexilu uetu ua ituxi, o henda ia tokala i tu suínisa ku samba kala kia bhange o mukua jisalamu: ‘Endesa o muxima uami, ngi kale jinge ni uôma ua dijina diê.’ (Jisá. 86:11) Tua tokala tu kolokota ku dituna o jindunge ja Diabhu ua mesena ku batula o ukamba uetu ni Tat’etu ia henda, ni ukamba ua phange jetu. Se tu bhanga ioso ni ku suína kuoso, tua-nda ‘kuenda-phe ni ku fikisa Nzambi, kala tu an’ê a muxima’—ku muiji, mu ukunji ni mu kilunga.—Efe. 5:1, 2.
[Jifoto ku mbandu 29]
Xa hanji o ujitu uê bhu kalatódio, uie mu bhanga paze ni phang’ê
[Jifoto ku mbandu 31]
Jitata, longenu an’enu ku xila o adiakime