Ihi Yamba o Bibidya ya Lungu ni Kudijiya Mba Kuzeka Kumoxi?

Athu avulu kadivu kyambote mu kuzwela ya lungu ni kudijiya. O Bibidya ki ibhana jihonda mu kuzwela o maka ya, maji yene izwela ni kuxila kwoso. O ima izwela o Bibidya phala o mbote yetu. Kiki kidi, mukonda Jihova mwene o Mubhangi wetu, wejiya o kima kyabeta kota phala etu. Mwene ututangela ihi itwatokala o kubhanga phala ku mu sangulukisa ni ihi yandatukwatekesa kusanguluka kate kuhádya ni hádya.

1. Kyebhi Jihova kyatala o kudijiya mba kuzeka kumoxi?

O kudijiya ujitu wa Jihova. Mwene wamesena kwila o kudijiya kukala ngó ku diyala ni muhatu akazala. O ujitu yu ki ukwatekesa ngó o makaza kukala ni twana, maji ukwatekesa we kudilondekesa henda ni kudixila mudyâ. O Mak’â Nzambi amba: “Eye enda ni kusanguluka jinga ni muhatu’é wa tundu nê undenge.” (Jisabhu 5:18, 19) Jihova wamesena kwila o diyala ni muhatu akala jifiyele mudyâ. Mu kiki, o Kidistá katokala kuta phanda.—Tanga Jihebelewu 13:4.

2. O undumbu ihi?

O Bibidya yamba “o jindumbu . . . kà tena kubhingana mu Utuminu wa Nzambi.” (1 Kolindu 6:9, 10) Mu dimi dya Ngeleku o Bibidya itumbula o kizwelu porneía phala kulombolola o undumbu. O kizwelu kiki kya lungu ni (1) kudijiya mba kuzeka ni muthu kikaza dyêa, (2) diyala uzeka ni diyala ni mukwa, ni (3) muthu uzeka ni kyama. Kyoso kitulenga “o undumbu” tusangulukisa Jihova, tukalawe ni sawidi yambote.—1 Tesalonika 4:3.

DILONGE DINGI

3. Lenga o undumbu

Sayi diyala dya fiyele amwixana Zuze, wabhânge phala kukala ni kilunji kyazele. Tanga Dimatekenu 39:1-12, mukusuluka bhanga o ibhwidisu ya kayela:

• Ihi yabhangesa Zuze kulenga?—Tala o velusu 9.

• Mudyé, o kwila o kima kyasolo Zuze kyatokala mwene? Mukonda dyahi?

VIDYU: Lenga o Undumbu (5:06)

Jihova wamesena kwila tulenga o undumbu. Tanga 1 Kolindu 6:18, mukusuluka bhanga o ibhwidisu ya kayela:

• Ima yebhi yeji bhangesa o muthu kubhanga o undumbu?

• Kyebhi ki utena kulenga o undumbu?

4. Eye utena kutolola o jitendasá

VIDYU: Tolola o Jitendasá mu Kutanga o Bibidya Izuwa Yoso (3:02)

• Mu vidyu, sayi phange wamono kwila o ixinganeku ni ibhangelu yê yeji mu bhangesa kukamba ufiyele kwa muhatwê. Ihi yabhange mwene mukumona o kilwezu kiki?

Sayi ithangana, kate mwene o Jikidistá ja fiyele ene mubhânga ni ixinganeku yayibha. Ihi yanda kukwatekesa phala ki uxinganeke mu ima ya ufusa? Tanga Filipe 4:8, mukusuluka bhanga o ibhwidisu ya kayela:

• Mu ima yebhi itwatokala o kubanza?

• Kyebhi o kutanga o Bibidya ni kubhanga dingi mu sidivisu ya Jihova kwanda tukwatekesa kutolola o jitendasá?

5. O itumu ya Jihova phala o mbote yetu

VIDYU: Kala ni Kilunji Kyambote (9:31)

• Kyebhi o munzangala a mu tumbula mu jivelusu jiji wadite mukilwesu?—Tala Jisabhu 7:8, 9.

• Kala kilondekesa Jisabhu 7:23, 26, o undumbu ubhekela ibhidi yavulu. Se tukala ni kilunji kyazele, kitwanda dibhana ni ibhidi yebhi?

• Kyebhi o kukala ni kilunji kyazele kwanda tukwatekesa kukala ni mwenyu wakalelaku?

Sayi athu abanza kwila o ima izwela o Bibidya ya lungu ni diyala kuzeka ni diyala ni mukwa kikilondekesu kya henda. Maji Jihova, o Nzambi ya henda, wamesena kwila athu oso asanguluka ku mwenyu kate kuhádya ni hádya. Maji phala kukala ni mwenyu yu, twabhingi kukumbidila o itumu yê ku mwenyu wetu. Tanga 1 Kolindu 6:9-11, mukusuluka bhanga o kibhwidisu kya kayela:

• O kwila phala Nzambi, o diyala kuzeka ni diyala ni mukwa kyene ngó o kituxi?

Phala kusangulukisa Nzambi, etwenyoso twabhingi kulungulula ima ku mwenyu wetu. O kwila twandakatula mbote mu nguzu itubhanga? Tanga Jisálamu 19:8, 11, mukusuluka bhanga o ibhwidisu ya kayela:

• Mudyé, o kwila o itumu ya Jihova ya bhonzo ku ibelesela? Mukonda dyahi?

IHI IWADILONGO

O kudijiya ujitu wa Jihova phala o munumi ni muhatu.

Kubhitulula

• Ima yebhi yalungu ni undumbu?

• Ihi yanda tukwatekesa kulenga o undumbu?

• Mbote yahi itukatula mu kubelesela o itumu ya Jihova?

TOKWESA DINGI

Tala se mukonda dyahi phala Nzambi kima kyambote o diyala ni muhatu atungu kumoxi kukazala.

“Ihi Yamba o Bibidya ya Lungu ni Kutunga Kumoxi se Kukazala?” (Milongi ya jw.org)

O Bibidya ilonga kwila o diyala udijiya ni diyala ni mukwâ mba muhatu udijiya ni muhatu ni mukwâ kituxi. Maji kiki kikilombolola kwila twatokala kuzemba o athu yâ.

“O Kwila Kituxi Diyala Kudijiya ni Diyala ni Mukwâ, Mba Muhatu Kudijiya ni Muhatu ni Mukwá?” (Milongi ya jw.org)

Dilonge kyebhi o itumu ya Nzambi itulanga mu maka alungu ni kudijiya.

“O Kwila Kuta o Uyala Mudikanu Dya Muhatu Mba Diyala Kulesa o Kidyandu Kya Ujitu Kya Muhatu Kulombolola Kudijiya?” (Milongi ya jw.org)

Tala ihi ya kwatekesa diyala wexile mudijiya ni diyala ni mukwâ kulungulula o mwenyu we phala kusangulukisa Nzambi. Tanga o musoso “Ene Angitalatala ni Henda ni Kuxila.”

“O Bibidya Ilungulula o Myenyu ya Athu” (O Mulangidi, 1 wa Kasamunu wa 2011)