KIBATULU 4

Mukonda Diahi Tua Tokala ku Xila Ala ku Maungana?

“Mu xila athu oso.”—1 PHETELE 2:17.

1, 2. (a) Mukonda diahi o ku belesela o maungana a mu tu tumina kiene mu bhonza kiavulu? (b) Ibhuidisu iahi i tua-nda di longa?

UA MONO kiá kiebhi kia kala o mona, kioso tat’ê kia mu tumina ku bhanga kima, ka mesena ku ki bhanga? Maka a dikota phala muéne, muéne u kilondekesa ku pholo iê. O mona uivua o dízui dia tata, uejiia kuila muéne ua tokala ku belesela o ungana ua tat’ê. Maji mu kithangana kiki, muéne ka mesena ku belesela. O kifika kiki, kilondekesa o maka u tuene mu bhita nau.

² Saí ithangana o ku xila o maungana, ku tu bhonza kiavulu. O kuila kiene mu ku bhonza o ku xila o maungana ene mu ku tumina? Se kiene mu ku bhonza, ijiia na-kiu kuila k’eie ngó. Lelu o ukexilu ua ku kamba o ku xila o maungana, ua di bandekesa dingi. Maji, o Bibidia i tu tendelela ku xila o maungana a mu tumina. (Jisabhu 24:21) Tua tokala ku belesela o kitendelesu kiki, se tua mesena ku kala mu henda ia Nzambi. Mukonda dia kiki, ku moneka ibhuidisu. Mukonda diahi o ku belesela o maungana a mu tu tumina, kiene mu bhonza kiavulu? Mukonda diahi Jihova u tu tumina ku xila o maungana? Ihi ia-nda tu kuatekesa ku belesela? Mu kusuka-ku, kiebhi ki tu tena ku xila o maungana a mu tumina?

MUKONDA DIAHI KIENE MU BHONZA KU XILA O MAUNGANA

3, 4. Kiebhi kia mateka o kituxi ni ku kamba kuiuka, ni mukonda diahi o ku kala tu akua ituxi ki tu bhonzesa ku xila o maungana?

³ Tua-nda di longa pondo jiiadi, ji londekesa se mukonda diahi kiene mu bhonza ku xila o maungana a mu tumina. Kia dianga, tu akua ituxi; kaiiadi, o maungana ué a mu tumina, akua ituxi. O kituxi kia mateka mu jaludim ia Edene, kioso Adá, ni Eva kia bhukumukina o ungana ua Nzambi. kienhiki, o kituxi kia bheka o bhukumuka. Mukonda dia kiki, etu lelu tuala ni ukexilu ua ku bhukumukina o maungana.—Dimatekenu 2:15-17; 3:1-7; Jisálamu 51:5; Loma 5:12.

⁴ Mukonda dia ku lundula o kituxi, ki ki bhonzo o muthu ku kala ni luímbi, ni ku dizangeleka, kienhiki tua tokala ku bhanga ioso phala ku kala ni kídifua ki kiene mu moneka kiavulu, o ku lenduka. Né muene se tua mu sidivila kiá Jihova tundé ukulu, tu tena ku kala ni ukexilu ua ku kala ni luímbi, ni ku dizangeleka. Mu kifika, xinganeka Kola, muéne ua tale hadi iavulu kumoxi ni mundu ua Nzambi, maji né kiki, muéne ua mesenene ué ku tumina, iu ua bhukumukina Mozé, o diiala dia betele-kota mu ku lenduka, mu izuua ienioió. (Dialuilu 12:3; 16:1-3) Xinganeka ué mu phangu ia Uziia, mukonda dia luímbi, muéne ua bokona mu tembulu ia Nzambi, phala ku bhana sata, o kikalakalu kiki, kia tokalele ngó ku mukunji ua dikota. (2 Malunda 26:16-21) O mala enhá, a tambula kaxtiku konene, mukonda dia ku bhukumuka. O phangu ia athu enhá a bhukumuka, i sidivila phala ku tu dimuna. Tua tokala kueha o ukexilu ua luímbi, u tu bhonzesa ku xila o maungana a mu tumina.

5. Kiebhi o athu kiene mu zangata o ungana?

⁵ Maji o maungana a mu tumina, ene mu bhangesa ué athu ku kamba ku a xila. Saí maungana a tumina ni undanda, ka xila muthu uoso-uoso. O misoso ia mundu ilondekesa kuila o maungana ene mu tumina ni undanda. (Tanga Ndongixi 8:9.) Mu kifika, Saúlu uexile diiala diambote dia lenduka, kioso kia mu solo kua Jihova phala ku kala sobha. Maji Saúlu ua mateka ku kala ni luímbi, ni difuba, kiki kia mu bhangesa ku zukutisa Davidi. (1 Samuuele 9:20, 21; 10:20-22; 18:7-11) Mu ku bhita kithangana, Davidi ua kituka sobha ia Izalaiele, mu ku mona kuila muéne sobha, ua nhana o muhatu ua ngene ua Udiia, mukua Hitita, iu ua tumikisa Udiia mu ita phala ku mu jibha. (2 Samuuele 11:1-17) Kiki ki tu longa kuila, mukonda dia ku kala athu a ituxi, kia a bhonzo ku tumina kiambote. Se o maungana ka mu belesela Jihova, ki beta ku bhonza. O mukua Grã-Bretanha, kioso kia mono o kizukutisu, kia kexile mu bhanga o jibispu ja Katolika, muéne ua soneka kuila “o ungana u bhangesa athu ku bhanga ima ia iibha.” Mu kuijiia o kidi kiki, tua tokala ku di ibhuidisa se mukonda diahi tua tokala ku xila o maungana?

MUKONDA DIAHI TUA TOKALA KU XILA ALA KU MAUNGANA?

6, 7. (a) O henda ietu kua Jihova, i tu suinisa ku bhanga ihi, ni mukonda diahi? (b) Mukonda diahi tua tokala o ku belesela, ni kiebhi ki tu bhanga kiki?

⁶ O kima kia dianga ki tu bhangesa ku xila o maungana—o ku zola Jihova, ni ku zola athu, ni ku di zola mudietu. Mukonda dia ku zola Jihova, tua mesena ku sangulukisa o muxima uê. (Tanga Jisabhu 27:11; Marku 12:29, 30.) Tuejiia kuila athu kene mu xila o Ungana ua Jihova, tundé kia bhukumuka Adá, ni Eva, mu Jaludim ia Edene, o mundu ua solo ku a tumina kua Satanaji, ka mesena ku a tumina kua Jihova. Tua sanguluka mukonda tua solo ku tu tumina kuala Jihova. Kioso ki tu tanga o izuelu iala mu divulu dia Dijingunuinu 4:11, tu sanguluka kiavulu. Tuijiia kuila Jihova, muéne ua tokala ku Tumina o Ngongo! Tuala ku mbandu ia utuminu ua Jihova, etu tua xikina o ku tu tumina ku muenhu uetu.

⁷ O ku xila o ungana ua Jihova, ki kulombolola ngó ku belesela, kua bhingi dingi kima. Tu mu belesela mukonda tua mu zolo. Maji saí ithangana ki bhonza kiavulu o ku mu belesela. Se tu mona kuila kia bhonzo o ku belesela, tua tokala ku xikina, kála ki tua mono mu kifika kia mona mu dimatekenu dia kibatulu kiki. Tuijiia kuila Jezú, ua xikina ku bhanga o vondadi ia Tat’ê, né muene kia mono kuila kia bhonzole ku belesela. Muéne uambela Tat’ê: ‘Ki ngidi kuila ki bhita mu vondadi iami, ki kale ngó o vondadi ié.’—Luka 22:42.

8. (a) O ku xila o ungana ua Jihova lelu, ku lombolola ihi? Ni kiebhi ki tu tena kuijiia ihi iene mu banza Jihova? (b) Ihi i tu kuatekesa ku xikana o milongi, ni kioso kia tu bazela? (Tanga o kaxa mu jimbandu ja 46-47.)

⁸ Tuijiia kuila Jihova lelu, kene mu zuela ni athu kála kia kexile mu bhanga m’ukulu; muéne u zuela ni etu mu kaxi ka Bibidia, ni jiselevende jê ala ku pholo mu ixi. Etu tu xikina o ungana ua Jihova, kioso ki tu xila, ni ku belesela ala ku maungana a mu tumina. Se tu bhukumukina athu iá—mu ku xibhaka o milongi iâ, ni kioso kia tu bazela mu kaxi ka Bibidia—tua mu xibhaka, mba ku xinga Nzambi. Kioso akua Izalaiele kia kexile mu longolola Mozé, Jihova uambe kuma a mu longolola muéne.—Dialuilu 14:26, 27.

9. Mukonda diahi o ku zola athu, kua-nda tu bhangesa ku xila o maungana a mu tumina? Bhana phangu.

⁹ Tu xila ué o maungana mukonda tua zolo o athu. Kiebhi ki tu tena ku bhanga kiki? Xinganeka kuila eie u disoladi. Phala o kifuxi kia masoladi ku di tunda kiambote mu ita, ni ku bhuluka, kala disoladi ua tokala ku belesela, ni ku xila o mutuameni ua kifuxi. Se eie u kamba ku belesela, ni ku xila o mutuameni ua kifuxi, eie u tena ku ta o kifuxi kioso kia masoladi mu kiluezu. Tuejiia kuila o kifuxi kia masoladi, ene mu buikisa o mundu iú. Maji o kifuxi kia Jihova kia mesena ngó o mbote ia athu. O Bibidia i tumbula veji javulu kuma Nzambi, “Jihova dia ifuxi.” (1 Samuuele 1:3) Muéne mutuameni ua kifuxi kia beta-kota kia ji-anju, ja tenena. Mu veji javulu, Jihova uene mu sokesa o jiselevende jê mu ixi, kála kifuxi kia masoladi. (Jisálamu 68:11; Izekiiele 37:1-10) Se tu bhukumukina o maungana a mu tu tumina, ki tua-nda bhalesa ió a mu sidivila ué kála masoladi, mu ukexilu ua nzumbi? Se Kidistá u bhukumukina o atuameni, mba o tufunga mu kilunga, o kilunga kioso ki kala mu ibhidi. (1 Kolindo 12:14, 25, 26) Se mona u bhukumuka, o muiji uoso u kala mu ibhidi. Kienhiki, tu londekesa kuila tua zolo athu, mu ku kala ni ukexilu ua ku xila, ni ku kuatekesa o kilunga.

10, 11. Kiebhi o vondadi ia ku katula mbote, i tu kuatekesa ku belesela o maungana?

¹⁰ Tu xila ué o maungana, mukonda etu tu katula-ku mbote. Kioso Jihova kia tu bhinga ku belesela o maungana, muéne u tu tangela o mbote i tu katula mu ku bhanga kiki. Mu kifika, muéne u tumina o ana ku belesela o jitata phala ku zediua, ni ku kola muenhu mu ngongo. (Matendelelu 5:16; Efezo 6:2, 3) Muéne u tu tumina ku xila o tufunga, o ku kamba ku bhanga kiki, kieji ku tu zozesa mu nzumbi. (Jihebeleu 13:7, 17) Muéne u tu tumina ku belesela o maungana a ngongo, phala ku tu langa.—Loma 13:4.

¹¹ Ku xikina kuila, o kuijiia se mukonda diahi Jihova u tu bhinga ku belesela, ku tu kuatekesa ku xila o maungana? Tu di longe o maukexilu atatu, a-nda tu londekesa se mukonda diahi tua tokala o ku belesela o maungana ku muenhu uetu.

LONDEKESA KU XILA KU MUIJI

12. Kikalakalu kiahi kia bhana Jihova ku diiala, mba tata, ni kiebhi muéne kia tena ku kumbidila o kikalakalu kiki?

¹² Jihova muéne ua bhange o muiji. Mu kuijiia kuila muéne ki Nzambi ia kanvuanza, ua iudika o muiji mu ukexilu uambote. (1 Kolindo 14:33) Muéne ua bhana ku diiala o ujitu ua ku kala ku pholo ia muiji. O diiala u xila o Mutuameni uê, Jezú Kristu, mu ku kaiela o phangu iê, ia ku tumina kiambote o kilunga. (Efezo 5:23) Kienhiki, o diiala ka tokala ku bhanga phoko ia kikalakalu kia mu bhana, kia ku kala ku pholo ia muiji; ka tokala ku tumina o muiji ni undanda, maji ua tokala ku zola o muiji uê, ni ku lenduka. O diiala uejiia kuila, Jihova muéne o mutuameni uê.

Tata ua mu langa o muiji uê, kála Kristu kia langa o kilunga kiê

13. Kiebhi o muhatu, mba mama, u tena ku kumbidila o kikalakalu kiê ku muiji kála kia mesena Jihova?

¹³ O muhatu, mba mama, ua tokala ku kuatekesa o muadi uê. Muéne ué, ua tambula kikalakalu ku muiji, mukonda o Bibidia i zuela ia lungu ni “ijila ia mam’enu.” (Jisabhu 1:8) Maji o kikalakalu kiki kia muhatu, ki ki sokela ni kia muadi uê. O muhatu Kidistá ulondekesa kuila ua xila muadi uê, mu ku mu kuatekesa mu kikalakalu kia ku kala ku pholo ia muiji. Muéne ka sebhulula muadi uê, mba ku mu bhita ku pholo. Mu veji dia kiki, muéne u mu kuatekesa. Se o muhatu ka xikina o kima kia solo muadi uê ku bhanga, ni ku xila kuoso, muéne u zuela kiebhi kia banze, maji u kolokota ku belesela muadi uê. Se o diiala ki kidistá, nange muéne u kala ni ithangana ia bhonzo, maji se muéne u kolokota ku mu belesela, saí kizuua muéne u tena ku kala mubhezi ua Jihova.—Tanga 1 Phetele 3:1.

Tata ua mu bazela ni henda ioso mon’ê ua xidisa o’nzo

14. Kiebhi o ana a tena ku sangulukisa o jitata, ni Jihova?

¹⁴ Kioso ana kia belesela o tata, ni mama, a sangulukisa o muxima ua Jihova. A sangulukisa ué o muxima ua jitata jâ. (Jisabhu 10:1) O muiji uala ngó ni tata, mba mama, o ana a kaiela o kitumu kia ku belesela o jitata, mu kuijiia kuila o mama, mba o tata, ua bhingi dingi kiavulu o kikuatekesu kiá. Kioso athu oso ku muiji a kumbidila o kikalakalu kia a bhana Nzambi, o muiji uoso u sanguluka. Kiki ki bhana kijingu kua Jihova Nzambi, o mubhangi ua muiji.—Efezo 3:14, 15.

LONDEKESA KU XILA MU KILUNGA

15. (a) Kiebhi mu kilunga, tu kulondekesa kuila tua mu xila o ungana ua Jihova? (b) Itumu iebhi i tu kuatekesa ku xila o jiphange ala ku pholo mu kilunga? (Tanga o Kaxa mu jimbandu ja 48-49.)

¹⁵ Jihova ua bhana kua mon‘ê o kikalakalu kia ku tumina o kilunga. (Kolose 1:13) Jezú ua bhana ué o kikalakalu kiki, ku “kimbadi kia fiiele” phala ku langa o kilunga kia Nzambi mu ixi. (Matesu 24:45-47, NW) O Kibuka kia Utuminu kia Jimbangi ja Jihova, kiene o ‘kimbadi kia fiiele.’ Kála kiexile mu hama ia dianga, o Jikidistá lelu, a tambula o milongi ku Kibuka kia Utuminu, mba ku tufunga tua ilunga. Kioso ki tu belesela o tufunga mu kilunga, tua mu belesela Jihova.—Tanga 1 Tesalonika 5:12; Jihebeleu 13:17.

16. Kiebhi kiene mu sola o tufunga mu kaxi ka nzumbi ikôla?

¹⁶ O tufunga ni akuatekexi a tufunga, ka iuka, akua ituxi ué. Ene a lueza ué kála ki tuene mu lueza. Maji né kiki, o tufunga ‘ujitu ua tu bhana’ Jihova, phala ku kuatekesa o kilunga ku kula mu nzumbi. (Efezo 4:8) O tufunga a sola bhu kaxi ka nzumbi ikôla. (Ikalakalu 20:28) Kiebhi? Ande dia ku a bhana o kikalakalu kiki, o mala enhá a tokala ku kumbidila o itumu i tu sanga mu Maka a Nzambi, a isoneka mu kaxi ka nzumbi ikôla. (1 Timote 3:1-7, 12; Tito 1:5-9) O tufunga kioso kia sola phange, phala ku mu bhana o kikalakalu kiki, a samba mu ku bhinga o kikuatekesu kia nzumbi ikôla ia Jihova.

17. Mukonda diahi o ahatu Jikidistá, a tokala ku ta dilesu ku mutué kioso kia bhanga kikalakalu mu kilunga, kia tokala ku mala?

¹⁷ Saí ithangana ki bhuala tufunga, mba akuatekexi a tufunga mu kilunga, phala ku bhanga o ikalakalu iene mu bhanga, kála o ku bhanga o kiônge phala o sidivisu ia kuboka. Mu ithangana íii, se bhu kala jiphange a a batizala kiá a tokala ku bhanga o kikalakalu kiki. Se ki bhu kala jiphange ja mala, o jiphange ja ahatu, a tena ku bhanga o sidivisu íii. Maji se phange ia muhatu muéne ua mu bhanga o kikalakalu kiki, ua tokala ku ta dilesu ku mutué. a (1 Kolindo 11:3-10) O kitendelesu kiki, ki kilombolola kuila o muhatu kala ni valolo. Mu veji dia kiki, a a bhana kikalakalu kia ku xila o a tuameni mu kilunga, ni ku muiji, ni ku belesela o itumu ia Jihova, ia lungu ni ku belesela o maungana mu kilunga.

LONDEKESA KU XILA O MAUNGANA A MU TUMINA

18, 19. (a) Kiebhi ki ueji lombolola o kitumu ki tu sanga mu divulu dia Loma 13:1-7? (b) Kiebhi ki tu tena kulondekesa kuila tua xila o maungana?

¹⁸ O Jikidistá ja kidi, a belesela o kitumu ki tu sanga mu divulu dia Loma 13:1-7. (Tanga.) Mu ku tanga o kibatulu kiki, ua-nda mona kuila “o maungana” enhá, o jinguvulu ja ngongo. O thembu íii ia ehela Jihova ku tumina, o jinguvulu jiji, a mu bhanga ikalakalu iambote, kála o ku langa athu. Tu londekesa kuila tua xila o maungana enhá, kioso ki tu belesela o itumu ia bhana. Tua tokala ku futa o madijimu, ni ima ia makuá i bhinga o jinguvulu ia lungu ni madukumendu, ni ku belesela o itumu ia mukuá ia lungu ni muiji uetu, ni uenji, ni ima ioso ia tu tokala. Maji ki tu belesela o maungana enhá, kioso kia tu bhinga ku xisa o ubhezelu uetu kua Nzambi. Mu kithangana kienhiki, tu zuela kála kia zuelele o jipoxolo “tua bhingi tu tumaka Nzambi kana athu.”—Ikalakalu 5:28, 29; tanga o kaxa “Ungana ua Nanhi u Nga Tokala ku Xikina?” mu mbandu 42.

¹⁹ Tu londekesa ué ku xila o maungana, mu ku xila ió ene mu tuma. Saí ithangana, ku bhinga ku belesela o jiselevende ja jinguvulu. O poxolo Phaulu uai ku jinguvulu kála o Sobha Helode ia Ngilipa, ni Nguvulu Festu. O mala enhá akexile ni ukexilu ua iibha, maji Phaulu ua xila o athu enhá. (Ikalakalu 26:2, 25) Tua tokala ku kaiela o phangu ia Phaulu, ki kala o muthu nguvulu, mba xiku dia ngoji. O minzangala mu kilunga a tokala ku xila ué o alongexi mu ji xikola jâ, ni maungana a kamúkua. Ki tu tokala ngó ku xila ió, a xila o milongi ietu; tu xila ué ió, kene mu xikina o milongi ia Jimbangi ja Jihova. Mu kidi, athu oso kene mu bheza ni etu, a tokala kuijiia kuila etu tuene mu xila athu oso.—Tanga Loma 12:17, 18; 1 Phetele 3:15.

20, 21. Mabesá ahi a tu bhekela o ku belesela o maungana?

²⁰ Tua tokala ku xila athu oso mu ithangana ioso. O poxolo Phetele ua soneka: “Mu xila athu oso.” (1 Phetele 2:17) Kioso athu kia mona kuila tua mu a xila, ene a divua kiambote. Lembalala kuila, o ku xila, kima kia bhonzo mu izuua ietu. Kienhiki o ku kala ni kídifua kiki, kilondekesa kuila tua mu belesela o kitumu kia Jezú, kiambe: “O mukengeji uenu u muikine bhu pholo ia athu, ene a mone ima iambote i mu bhanga, ni a ximane Tata ienu uala mu diulu.”—Matesu 5:16.

²¹ O mundu iú uala mua vundu, o athu ambote a mesena kuijiia o kidi kia Nzambi. Kienhiki, o ku xila athu ku muiji, ni mu kilunga, ni ku maungana a mu tumina, ki tena ku bhangesa athu ku tu kaiela mu njila ia kidi. Iá mabesá a dikota! Né muene kiki, se ki ki bhita, maji tuijiia kuila, o ku xila athu ki uabhela Jihova, ki tu kuatekesa ué ku kala mu henda iê. O kuila saí mabesá a beta-kota, kála iá?

a Phala kuijiia dingi maka alungu ni kitumu kiki, tanga o Kibandekesu mu jimbandu ja 209-212.

“ÍVUA O MILONGI, NI U XIKINE O KIBAZELU”

O nzumbi ia Satanaji—ni ukexilu uê ua ku bhukumuka, ni jinvunda—uene ku mundu uoso. Kienhiki, o Bibidia i zuela Satanaji kála ‘nguvulu ia utuminu mu dimbinza’ i zuela kuila o ‘nzumbi iala moxi dia ana abhukumuka.’ (Efezo 2:2) Athu avulu lelu ka mesena kua a tumina. Saí jiphange mu kilunga, ene mu londekesa ué o ukexilu iú ua ku bhukumuka. Mu kifika, O kafunga nange u bhana milongi ia henda ia lungu ni iluezu ijila mu itonokenu ia ufusa, ni ua ujibhangânga, maji saí jiphange ka xikina o milongi íii, katé muene a luuala. Kala muthu ua tokala ku belesela o milongi i tu sanga mu divulu dia Jisabhu 19:20 NW, diambe: “Xikina o milongi ni kioso kia ku bazela, phala ni u kale u njimu ku hádia iê.”

Ihi i tena ku tu kuatekesa ku bhanga kiki? Tua-nda di longa pondo jitatu ji londekesa se mukonda diahi o athu ka xikina o milongi, mba kibazelu, ni kuijiia se ihi i zuela o Bibidia ia lungu ni maka enhá.

“O milongi íii ki ngi i xikina.” Tu tena ku mona kuila o milongi ki i tu tokala, mba o muthu ua tu bhana o milongi íii kejiia ioso ia bhiti. Nange ku dimatekenu tu mona kuila o milongi íii ki i uabha. (Jihebeleu 12:5) Kuijiia kuila etu enioso tu akua ituxi, o kuila o ibanzelu ietu ki iene i tua tokala ku i lungulula? (Jisabhu 19:3) O kuila ki kuene kima kia bhangesa ku tu bhana o milongi íii? Se kuala, kuene ku tua tokala o ku xinganeka. O Maka a Nzambi a tu tendelesa: ‘O ulongelu ua ku bazela, ku uehe; bhaka-u muene, kuma uene o muenhu uê.’—Jisabhu 4:13.
“Ki ngi uabhela o ukexilu mua ngi bhana o milongi.” Mu kidi, o Bibidia i tanga se kiebhi kia tokala ku bhana o milongi. (Ngalásia 6:1) Maji o Bibidia i zuela ué: ‘Mukonda athu oso a te ituxi, o bhu fuma ia Nzambi i bhulula, ka tena-bhu.’ (Loma 3:23) Tueji kala ni ukexilu umoxi ua ku tambula milongi ia iuka, se o muthu ua tu bhana-iu, muthu ua iuka. (Tiiaku 3:2) Jihova u tu bhana milongi mu kaxi ka athu a ituxi, mu kiki, ki tu tokala ku xinganeka mu ukexilu mua tu bhana o milongi. Mu veji dia kiki, tua tokala ku xinganeka mu ioso ia zuela ni ku samba mu ku bhinga itendelesu phala ku belesela o milongi íii.
“Muene nanhi phala ku ngi bhana milongi!” Se tu mona kuila o ituxi ia muthu i bhangesa o milongi iê ku kala sé valolo, tua tokala ku lembalala ku jipondo ji tua di longo kiá ku dima. Né muene kiki, se tu mona kuila ki tu bhingi dingi ku tu bhana milongi mukonda tu adiakimi kiá, ni ikalakalu i tua bhange kiá ku muenhu, mba o phangu ia ikalakalu ietu mu kilunga, tua tokala ku lungulula o ibanzelu ietu. Mu Izalaiele io’kulu, o sobha ua kexile ni ikalakalu ia dikota, maji né kiki, muene ua tokalele ku xikina o milongi ia ji polofeta, akunji, ni athu a mukuá. (2 Samuuele 12:1-13; 2 Malunda 26:16-20) Lelu, o kilunga kia Jihova ki sola athu a ituxi phala ku bhana milongi, o Jikidistá a kulu mu nzumbi a xikina kiambote o milongi íii. Se tuala ni ikalakalu ia dikota, mba ikalakalu i tua bhange kiá ku muenhu, tua tokala ku di tonginina phala tu bhane phangu iambote, kála tu muthu ua bhebhuluka, tua lenduka mu ku xikina o milongi.—1 Timote 3:2, 3; Tito 3:2.

Mu kidi, ki bhuale muthu ka tokala ku mu bhana milongi. Kienhiki, tua tokala ku xikina o milongi ni lusolo kioso kia tu bhana na-iu, mu ku i belesela, ni ku sakidila Jihova ni muxima uoso, mu ku tu bhana o ujitu u bhulula o mienhu. O Milongi ilondekesa o henda ia Jihova ko kuetu.—Jihebeleu 12:6-11.

“BELESELA OSO A MI KALA KU PHOLO”

Mu Izalaiele iokulu mua kexile maka alungu ni ku tambula konda ia mundu. Mozé ka tenene ku tambula konda ia mundu uoso ua kexile mu kuenda nê ubheka uê, mu kikangalakata. Ihi ia bhangele? “Mozé anga u sola adiakimi akua kilunji mu kaxaxi ka Izalaiele ioso, u a ta ku pholo mu tambula konda ia mundu, o iá jimidi, o iá jihama, o iá makuinhi atanu, o iá dikuinhi-dikuinhi.”—Makatukilu 18:25.

Lelu, mu kilunga kia Jikidistá kua bhingi ué athu, a kala ku pholo mu ku tambula konda ia mundu uoso. Mukonda dia kiki, o kibuka kia sidivisu ia kuboka, ki kala ni muthu u kala ku pholo, kilunga ki kala ni tufunga a kala ku pholo, o ilunga, i kala ni kafunga ka ilunga u kala ku pholo, mu ixi mu kala filiiale mu kala ué athu ku pholo. Mukonda dia ukexilu iú, kala muthu uala ku pholo, u bhanga o sidivisu ia ku tambula o konda ia jimbudi ja mu bhana Jihova. O abhidi enhá, a-nda ku a bhinga konda kua Jihova, ni Kristu.—Ikalakalu 20:28.

O ukexilu iú, ua ku iudika o ima, u bhinga kuila athu oso a belesela, ni ku tumaka. Ki tu mesena ku kala ni kifua kia Diiotelefo, ka mesenene ku belesela ió akexile ku pholo mu izuua iê. (3 Nzuá 9, 10) Mu veji dia kiki, tua mesena ku belesela o kitendelesu kia poxolo Phaulu, ua soneka: ‘Belesele-nu oso a mi kala ku pholo, mu bhanga ioso ia mi mesena ku bhanga. Kuma ene a mi langa o mienhu ienu, mukonda ene a-nda kua bhinga ji konda kua Nzambi. Se enu mu a tumaka, ene a kalakala ni ngalasa, kuma se o kikalakalu a ki bhanga ni malamba, mukonda kiki ki mi bhekesa kuxixima.’ (Jihebeleu 13:17) Saí iá, a belesele kioso kia xikina o itendelesu ijila kua ió ala ku pholo, maji a dituna ku belesela kioso ene kia kala ni phata, mba kioso ene ka tendela kiambote o itendelesu ia a bhana. Ijiia-nakiu kuila o ku belesela, ku bhinga ku xikina kima, né muene se ki tua mesena ku ki bhanga. Kienhiki, kala muthu ua tokala u dibhudisa: ‘O kuila eme ngene mu belesela, ni ku tumaka, ió a ngi kala ku pholo?’

Sumbala o Mak’â Nzambi, ka tange o ima ioso ia bhingi phala o muthu ku kuatekesa o kilunga kuenda kiambote. Maji o Bibidia izuela: “Kala kiki, ima ioso-phe mu i bhanga mu ujitu, ni mu uiukilu uê.” (1 Kolindo 14:40) O Kibuka kia Utuminu, ki belesela o itendelesu ioso phala o ima ioso mu kilunga kuenda kiambote. O athu ala ku pholo ene a dianga ku bhanga kiki. Ene ué athu a ‘lenduka, ala polondo phala ku belesela’ ió a a kala ku pholo. (Tiiaku 3:17) Mukonda dia kiki, o ibuka, ki kale o kilunga, o ilunga, kibuka kia ilunga, o ixi, a a besoala mu ku kala ni jiphange ala ku pholo, a lenduka akua kixikanu, a mu ximana kiambote o Nzambi ia ku sanguluka.—1 Kolindo 14:33;1 Timote 1:11.

O izuelu ia Phaulu, i tu sanga mu divulu dia Jihebeleu 13:17, ilondekesa kiambote se mukonda diahi o ku kala ni kifua kia ku bhukumuka, kiluezu kia dikota. Ki tena ku bhangesa kuila ió ala ku pholo, a bhanga o kikalakalu kia a bhana ni “malamba.” O kima kia tokala ku i mona kala ujitu, sidivisu ikola, a ki mona kála kimbamba kia neme kiavulu, mukonda dia phange u kala ni ukexilu ua ku bhukumuka, ni ku kamba o ku belesela mu kilunga. Kiki ué, kieji kala “kima kia kuxixima kuenu,” kilombolola kuila, o kilunga kioso kieji xixima. Kiene kimoxi ué, se o muthu iú u dituna ku belesela o itendelesu ia Nzambi, ki mu bhekela ué maka a mukuá. O muthu u kala ni ukexilu ua ku di zangeleka, ni ku dituna ku belesela, u zanga ué o ukamba uê ni Nzambi, u kala dikanga dia Tata iê ia diulu. (Jisálamu 138:6) Kienhiki-phe, etu oso, tua tokala tu kala ni ukexilu ua ku belesela, ni ku tumaka oso a tu kala ku pholo.