O Bibidia, Pesito Siríaca Ia tu Kuatekesa Kuijiia Kiebhi Kia Lungulula o ji Bibidia ja Dianga

ANDE dia ku vutuka ku diulu, Jezú ua tendelesa o maxibulu mê ku bhana umbangi ua lungu ni muéne “mu Jeluzaleme, ni mu Judeia ioso, ni mu Samádia katé ni ku maxokololo ma jixi.” (Ikalakalu 1:8) O maxibulu a bhange kala kia a tendelesa ni ku suína kuoso. Maji o umbangi a bhana mu Jeluzaleme ua a bhekela kizukutisu kia dikota, o dixibulu Xitevá a mu jibha. Maxibulu avulu a lengela mu mbanza ia Andiioka, mu Sídia, iexile mbanza ia dikota ia mbonge ia Loma, phala ku bhixila-mu ku bhinga kuenda 550 a ji kilómetulu tundé ku mbanza ia Jeluzaleme.—Ikalakalu 11:19.

Mu mbanza ia Andiioka, o maxibulu a suluka ni kuboka o “Njimbu Iambote,” ia lungu ni Jezú, athu avulu kexile ji Judé a xikina a kituka Jikidistá. (Ikalakalu 11:20, 21) Sumbala mu mbanza ia Andiioka akexile mu zuela o dimi dia Ngeleku, maji mu madiembu a mukua, o athu akexile mu zuele o dimi dia Siríaco.

O “NJIMBU IAMBOTE” A I LUNGULULA MU DIMI DIA SIRÍACO

Kioso o Jikidistá akexile mu zuela o dimi dia Siríaco, kia mateka ku di bandekesa mu hama ia kaiadi, kua bhingile ku lungulula o “njimbu iambote” mu dimi diâ. Kienhiki, o dimi dia dianga mua lungulula o Mikanda ia Ngeleku, o dimi dia Siríaco, kana o dimi dia Latini.

Ku muvu ua 170 K.K., o musoneki Tatian, mukua Asídia a mu vuala ku muvu ua 120 iu ua fu ku muvu ua 173 K.K., ua bandeka o madivulu a uana mu Ngeleku iu ua a lungulula mu dimi dia Siríaco, o kikalakalu kiki a ki ixana Diatessarão mu phutu, mu Ngeleku o kizuelu kilombolola “[bhu kaxi] ka madivulu a uana, a tanga o musoso ua Jezú.” Mu ku bhita kithangana, Ephraem mukua Asídia (310-373 K.K.) uambe kima kia lungu ni Diatessarão, mu kulondekesa kuila o Jikidistá mu Asídia akexile muene mu tanga o Diatessarão.

Kima kiambote etu lelu kuijiia maka a lungu ni Diatessarão. Mukonda diahi? Mukonda saí jingijiie akua ku tokuesa, amba kuila o divulu dia Matesu, Marku, Luka ni Nzuá a a soneka ku hama ia kaiadi, ku muvu ua 130 K.K. ndu 170 K.K., mukonda dia kiki, o musoso ua lungu ni muenhu ua Jezú ki ua kidi. Maji, o mikanda iokulu ia Diatessarão, iéza mu bhana mukengeji, kiki-phe kia londekesa kuila o madivulu a uana enhá, Matesu, Marku, Luka ni Nzuá, akexile kiá mu a tanga ku hama ia kaiiadi. Nange a a sonekene kiá ukulu. Kienhiki tundé kia soneka Tatian o Diatessarão, ka kaiela o madivulu a makutu akexile mu zuela o athu kuila a tanga uá o misoso ia Jezú kioso kia kexile mu ixi, kala kia bhange ni madivulu a Matesu, Marku, Luka ni Nzuá; mu ku bhanga kiki, muéne ua londekesa kuila o athu ka xikinine o madivulu a makutu akexile mu zuela o athu kuila a tanga uá o misoso ia Jezú kioso kia kexile mu ixi.

Ku hama ia katanu, o Bibidia mu dimi dia Siríaco a mateka ku i tanga mu ixi ioso ia Mesopotamia. Nange a i soneka ku hama ia kaiadi ni ku hama ia katatu K.K., o Bibidia io lungulule mu dimi dia Siríaco, muala o madivulu oso a Bibidia, katu-ko o divulu dia 2 Phetele ni dia 2 ni 3 dia Nzuá, Juda ni Dijingunuinu. O Bibidia íii a ixana Pesito, kilombolola “kia bhebhuluka,” “kia zele.” O Pesito, o mbangi ia beta-kota ia dianga ia Bibidia.

Saí mukanda ua Pesito, ó soneka ku muvu ua 459/460 K.K., ulondekesa kuila o Bibidia íii io kulu-kulu. Ku muvu ua 508 K.K., a tonginina kiambote o Pesito, ia a bandekesa-ku o madivulu atanu a jimbidile. Kiki a ki ijiia mu dijina dia Philoxenian Version.

A SANGE DINGI MIKANDA IA MUKUÁ MU DIMI DIA SIRÍACO

Katé ku hama 19, o mikanda ioso mu Ngeleku, a i sonekene ku hama itanu. Mukonda dia kiki, o akua ku tokuesa o Bibidia, a mesenene o Bibidia ia dianga kala o Vulgata Latina, ni Pesito Siríaco. Mu kithangana kieniókio, sai athu a xikinine kuila o Pesito, mukanda a u lunguluile ku ubhe, mukonda uexile o mukanda uokulu ua akua Asídia. Maji o mukanda iu ka uijidile. Mukonda o Bibidia ia Asídia a i sonekene ku hama ia kaiadi, o Bibidia íii ieji kuatekesa ku tendela o milongi ia Bibidia ia dianga ku soneka, kiki kieji kuatekesa kiavulu o akua ku tokuesa o Bibidia! O kuila kuexile muene Bibidia mu dimi dia Siríaco? O kuila eji i sanga muene?

Sé phata! Mukonda a sange kiá mikanda iiadi mu dimi dia Asídia.O mukanda ua dianga a u soneka ku hama itanu. A i sange bhu kaxi ka mikanda ia mukua mu dimi dia Siríaco. O inzo ia ku bhaka o madivulu mu ixi ia Bretanha ia sumbu o mikanda íii ku muvu ua 1842, ku ngeleja ia kexile mu Kikangalakata kia Nitrian mu ixi ia Ijitu. Akexile mu i xana Curetoniano Siríaco, mukonda o diiala ua i sangele iu ua i londekesa ku athu, dijina diê William Cureton, ua kexile mu kuatekesa ku bhaka o mikanda kála íii mu inzo ia ku bhaka madivulu. O mikanda íii iala ni valolo, tu sanga-mu o madivulu a Matesu Marku Nzuá ni Luka.

O mukanda ua kaiadi ua bhuluka katé mu izuua ietu o Sinaítico Siríaco. O ku sanga o mikanda íii ia lungu ni Jingongo jiiadi ja ahatu, u tua tange ku dimatekenu dia milongi íii. Sumbala Agnes, ka bhiti mu xikola ia katunda, maji muéne ua di longo dinake dia madimi a jixi jengi, kala o dimi dia Siríaco. Ku muvu 1892, Agnes ua sange kima kia valolo mu ngeleja ia Santa Catarina mu ixi ia Ijitu.

Kuenhoko ua sange mu kaxa, mukanda mu dimi dia Siríaco. Kala kia tange muéne, “nga kexile ni uôma ua ku u tala, mukonda ua xidile kiavulu, o mafue a di kuatele mukonda kua bhitile kiá” hama ja mivu. O mikanda ia dianga a i jimuine, ia a sonekene dingi mu dimi dia Siríaco kuala o ji sanda. Mu kiki o Agnes ua soneka izuelu ku luiji lua mukanda; o izuelu “dia Matesu,” “dia Marku” ni “dia Luka ua i soneka ku thandu.” O ia kuatele bhu maku mê, o madivulu a uana mu dimi dia Siríaco! Lelu o akua ku tokuesa o Bibidia a xikina kuila o madivulu enhá mba mikanda, a i soneka ku hama ia kauana.

O athu amba kuila o mikanda ia Sinaítico Siríaco, o mikanda ia beta-o-kota ia sange kiá o athu katé lelu, kumoxi ni mikanda mu Ngeleku kála o mikanda ia Vaticano ni mikanda ia Sinaítico. Lelu athu avulu a xikina kuila ki kala o Curetoniano mba o mikanda ia Sinaítico, jikopia ja madivulu a uana, Matesu, Marku, Luka, ni Nzuá, a soneka ku hama ia kaiadi, ni ku dimatekenu dia hama ia katatu.

‘O MAKA A NZAMBI IETU MA XALELA-KU KATÉ KU HADIA NI HADIA’

O kuila o mikanda íii i tena ku kuatekesa o adilongi a Bibidia lelu? Kiene, i tena. Mu kifika, tala o izuelu i tu sanga mu disukilu dia divulu dia Marku, saí ji Bibidia o izuelu isukidila-ku i kaiela o divulu dia Marku 16:8. Kiki ki moneka mu mikanda ia Alexandrino mu dimi dia Ngeleku ua i soneka ku hama ia katanu, o Vulgata Latina ni mikanda ia mukuá dingi. Maji o mikanda iiadi mu dimi dia Ngeleku a i soneka mu hama ia kauana​—Mukanda ua Sinaítico ni mukanda ua Vaticano—mu mikanda iiadi íii o divulu dia Marku di suka ni kibatulu kia 16 velusu ia 8. O Sinaítico ia Asídia ki i suka ni izuelu iavulu mu kulondekesa kuila, saí ji Bibidia a bandekesa-mu o izuelu phala iene i vule ni kuila mu dimatekenu o izuelu íii ki i bhangele mbandu ku divulu dia Marku.

Xinganeka ku phangu ia mukua. Ku hama 19, ji Bibidia javulu a ji lunguluile mu kithangana kieniókio, ja londekesa o ulongelu ua makutu ua Tilindade mu divulu dia 1 Nzuá 5:7. Mu kiki, mbandu ia bandekesa ki i moneka mu mukanda uokulu ua Ngeleku. Ki i moneka ué mu Pesito, ilondekesa kuila o mbandu ia bandekesa mu divulu dia 1 Nzuá 5:7, ki milongi ia kidi ia Bibidia.

Kala kia ki kanena, Jihova Nzambi ua lange o Mikanda Ikola. Tua dielela mu kidi kiki: “Iangu ilela, o itulu ilalumuka, maji o maka ma Nzambi ietu-phe, ma xalela-ku, kuma ene a kale kiá, katé ku hadia ni hadia.” (Izaia 40:8; 1 Phetele 1:25) O Bibidia a ixana Pesito, iala ni valolo ia dikota mu ku jimbulula o njimbu ia Bibidia ku athu oso.