Milongi Phala o Yônge, Ukexilu wa Ukidistá ni Ukunji Wetu

3-9 YA KAYADI

O VALOLO YA MAK’Â NZAMBI | IKALAKALU 9-11

“O Mukwá Kuzukutisa, u Kituka Muboki wa Swina”

(Ikalakalu 9:1, 2) Sawúlu-phe hanji u zumina jixibulu ja Ngana, ni ku a kusa, ni ku a jibha. Anga u bhixila ku mukunji wa dikota, ² u mu bhinga mikanda ya kuya na-yu ku malombe mwa mu sambela o Jijudé mu Damásku, phala ni mikanda yiyi, ki a sanga-ku athu a tokala ku wendelu yú, mba mala mba ahatu, u a bheka mu Jeluzaleme ku mikolo.

Testemunho Cabal Cap. 8 pág. 60 parág. 1-2

O Kilunga ‘ki Kala ni Kutululuka’

O diyala dya thathamana u zukama mu Damasku, phala kubhanga kima kyayibha. O maxibulu a Jezú a a zembe, a-nda kwa katula mu jinzo jâ ni kwa sebhulula, ni kwa koka katé mu Jeluzaleme, phala kusanga-mu athu a futuluka mu inzo ya kufundisa.

² O mutwameni wa kibuka kya athu ayibha, a mwixana Sawúlu, wexile kya ni kikuma kya manyinga. Ki ku bhitile ithangana yavulu, mwéne wa xikina kumoxi ni akwá kububa ni matadi Xitevá, o dixibulu dya fiyele dya Jezú, katé kya fú. (Ikalakalu 7:57–8:1) Kuma ka sanguluka né mwéne ni kuzukutisa o akayedi a Jezú a tungile mu Jeluzaleme, Sawúlu wa kituka kala mwanga wa túbhya wa mu mwanga o mulengu wa kizukutisu. Mwene wa mesena kuzubha o kibuka kiki, a kijidile kala “njila.”—Ikalakalu 9:1, 2.

(Ikalakalu 9:15, 16) Maji Ngana u ambela Ananiya, wixi: Katuka ngó! Kuma mwène mukwa sedivisu yami, Eme nga mu solo phala kubheka o dijina dyami ku akwa jixi jengi, ni ku jisobha, ni ku an’a Izalayele. ¹⁶ Eme-mwène ngi mu longesa o jiphaxi javulu ja bhingi kwila mwène u ji bhita mukonda dia dijina dyami.

Mulangidi 06/16 difwe 4 kaxi 4

Sakidila Jihova, mu Kukala Ngumbi Yetu

⁴ Jihova ka mono o athu kála ki twene mu mona etu. Mu veji dya kiki, mwène u mona o muxima, anga u tonginina o ukexilu wetu wa muxima. (Tanga 1 Samuwele 16:7b.) Nzambi wa londekesa o ukexilu yú, kyoso kya bhange o kilunga kya Jikidistá. Mwene wa bhangesa athu avulu a kexile mu a mona kala athu a kambele valolo, ku mu zukama ni kuzukama kwa Mon’ê. (Nzwá 6:44) Mu kifika, o Falizewu a mwixanene Sawúlu wa kexile mu longolola, ni ‘kuzukutisa, ni kusombola’ o athu. (1Ti 1:13) Maji Jihova wa tonginina o muxima wa Sawúlu, yu wa mono kwila, mwéne kexile kitutu kya kambe valolo. (Ji 17:3) Mu veji dya kiki, Jihova wa mono kwila, weji k’umba Sawúlu, phala kukala kitutu kyo sole, phala kuboka ku “akwa jixi jengi, ni ku jisobha, ni ku [an’â] Izalayele.” (Ikalakalu 9:15) Nzambi wa solo we athu a tena ku a umba, phala kukala itutu ‘ya beta ujitu,’ kala yó exile jihôlwa, jindumbu, ni miyi. (Lo 9:21; 1Ko 6:9-11) Kyoso kya dilonga o Mikanda Ikôla, ene a kolesa o kixikanu kyâ kwa Jihova, ni ku mu ehela ku a umba.

(Ikalakalu 9:20-22) Mwene kithangan’okyo, mu malombe ma Jijudé, u kwata kulonga o njimbu ya Jezú, kuma: Mwène Mon’a Nzambi! ²¹ Oso a mu ivwa jinga anga a diwana, exi: Ki mwen’yú mu Jeluzaleme wa jibha-mu ni kuhama oso a bheza mu dijina didi dya Jezú? O kunu ki kyene kya mu bheka, kuta athu yá ku mikolo, n’aye-nâ ku akunji a makota? ²² Sawúlu-phe u swina dingi kyavulu mu kuzwela ni kutena. O Jijudé ja akwa Damásku anga u ji belesa ku maka, mukonda mwène wa edikiza ima yavulu kuma Jezú mwène Kidistu kidi, katé Jijudé a lémbwa kuzwela.

Testemunho Cabal Cap. 8 pág. 64 parág. 15

O Kilunga ‘ki Kala ni Kutululuka’

¹⁵ U tena kuxinganeka kyebhi kya divwile o mundu, ni njinda ya kexile na-yu, kyoso kya mono Sawúlu wa mu boka o njimbu ya lungu ni Jezú mu malombe? Ene a dibhwidisa: “Ki mwen’yú mu Jeluzaleme wa jibha-mu ni kuhama oso a bheza mu dijina didi dya Jezú?” (Ikalakalu 9:21) Mu kulombolola mukonda dyahi wa lungulula o ibanzelu yê ya lungu ni Jezú, Sawúlu wa londekesa o kidi kya kwila, Jezú mwéne Kidistu. (Ikalakalu 9:22) Maji o kidi kya londekesele, ki ki tenene kukatula o ibanzelu yá yayibha ni mixima yezalele ni lwimbi. Né kiki, Sawúlu ká bhwila.

Tokwesa o Milongi ya Nzambi

(Ikalakalu 9:4) Mwene wa di bhale bhoxi, anga u ivwa dizwi dya mu ambela, dixi: Sawúlu, Sawúlu, eme walù ngi zukutisila-hi?

Testemunho Cabal Cap. 8 pág. 60 parág. 5-6

Kilunga ‘ki Kala ni Kutululuka’

⁵ Kyoso Jezú kya zwela ni Sawúlu mu kikoka kya Damasku, Mwéne kebhwidisa: “Mukonda dyahi wa mu zukutisa o maxibulu ami?” Kala ki twa ki tange kyá. Mwene wambe: “eme walù ngi zukutisila-hi?” (Ikalakalu 9:4) Kiki kilondesa kwila, Jezú u divwa kyaibha kyoso kya mu zukutisa o akayedi’ê—Mat. 25:34-40, 45.

⁶ Se a mu ku zukutisa mukonda dya kixikanu kyê kwa Kidistu, ejiya kwila, Jihova ni Jezú a mu mona yoso ya mu bhita n’eye. (Mat. 10:22, 28-31) Nange, o ibhidi i wa mu bhita na-yu, ki ya mu bhwa mu kithangana ki wa mesena. Lembalala kwila, Jezú wa mono o kikwatekesu kya bhana Sawúlu, kyoso kya jibha Xitevá. Wa mono we, Sawúlu kukatula o maxibulu a fiyele mu jinzo jâ mu Jeluzaleme. (Ikalakalu 8:3) Né kiki, Jezú ka bhange kima mu kithangana kyenyókyo. Maji, bhu kaxi ka Kidistu, Jihova wa bhana nguzu kwa Xitevá ni maxibulu a mukwá, phala kukolokota mu ufiyele wâ.

(Ikalakalu 10:6) Mwène a mu langeka kwala Ximá dya muteki a ibha, wavu inzu yê yala bhu mbandu ya kalunga. Mwène wa kà ku tangela kyoso ki wa fwama kubhanga

milongi phala kutokwesa Ik 10:6

Ximá dya muteki a íbha: O muteki a íbha wexile mukalakadi wa íbha ya yama; mwene wexile mu kalakala ni hala phala kukatula ndemba, xitu mba banya ya naminine ku íbha. Mu kusuluka, mwene wa kexile mu sukula o íbha ni walende, n’a tene kubhanga na-yu ima yavulu. O íbha yiyi ya kexile ni dizumba dya yibha, mu kiki kwa bhingile menya avulu; nange kiki kyene kya bhangesa Ximá kutunga bhu mbandu a menya a kalunga, nange kwa zukamene ni mbanza ya Jopa. Mu Kijila kya Mozé, o muthu u kalakala ni ikalakasa ya yama, exile mu mu mona kala wa xidi mba wa kasana. (Ij 5:2; 11:39) Mukonda dya kiki, o Jijudé kexile mu bhana valolo ku ateki a íbha; ka xikinine we kwa tambulula mu jinzo jâ. Mu kidi, mu kubhita thembu, o Talmude yambe kwila, o kikalakalu kya kubhongolola o matobe a yama kya betele kota, o ufunu wa ateki a íbha ndenge. Maji, Phetele kehela kwila, o katombo ka mu fidisa kukala m’onzo ya Ximá. O ukexilu wa Phetele wa kumona o ima, wa mu kwatekesa kubhanga o kikalakalu kya tambula ku pholo, kya kukunda muthu mukwá ixi yengi. Sayi jingijye amba kwila, o kizwelu kiki “ muteki a íbha” (byr·seusʹ) mu Ngeleku, kilombolola dijina dya mwiji wa Ximá.

Kitangelu Kya Bibidya

(Ikalakalu 9:10-22) Mu Damásku-phe mu kala xibulu ya Jezú, dijina dyê Ananiya, Ngana anga u mu ixana ku nzoji wixi: Ananiya! Mwène wetaya, wixi: Em’yú Ngana. ¹¹ Kwala Ngana: Balumuka, uye mu luwa i exana ku Luwa Iayuka, k’onzo ya Juda, u ibhule-ku muthu dijina dyê Sawúlu, mukwa Talasu. Kyen’iki yú samba, ¹² o mu kusamba wa mono muthu dijina dyê Ananiya, u bokona, hé u mu tula maku phala ku mu tonesa o mesu. ¹³ Ananiya-phe u kumbulula, wixi: Ngana, muthu yó nga mu ivu ku mundu; athu é angene mu Jeluzaleme wa a bhange usweya wavulu. ¹⁴ O kiki wa mu kwiza kunu ku Damásku mukonda wa tambula kuswina ku akunji a makota, kwa kukuta oso a bheza mu dijina dyé. ¹⁵ Maji Ngana u ambela Ananiya, wixi: Katuka ngó! Kuma mwène mukwa sedivisu yami, Eme nga mu solo phala kubheka o dijina dyami ku akwa jixi jengi, ni ku jisobha, ni ku an’a Izalayele. ¹⁶ Eme-mwène ngi mu longesa o jiphaxi javulu ja bhingi kwila mwène u ji bhita mukonda dya dijina dyami. ¹⁷ Ananiya anga u katuka, hé u bokona m’onzo ya Juda, o kya tula maku ku thandu dya Sawúlu, wixi: Phange’ami Sawúlu, o Ngana yetu Jezú wa ku tukulukila mu njila ya Damásku mu wejila, mwène wa ngi tumu ku ku tonesa o mesu, phala wende ni kumona dingi lwamukwâ, u izale we ni nzumbi ikôla. ¹⁸ Kithangan’okyo ku mesu ma Sawúlu kwa lawuka kala ibheletete, anga u mona dingi. Bhenyobho u balumuka, anga a mu batizala. ¹⁹ Bhenyobho, kya tambula kudya, mu mukutu mwiza dingi nguzu, kala kya kexi. Sawúlu anga u bhanga izuwa ni jixibulu mu Damásku. ²⁰ Mwene kithangan’okyo, mu malombe ma Jijudé, u kwata kulonga o njimbu ya Jezú, kuma: Mwène Mon’a Nzambi! ²¹ Oso a mu ivwa jinga anga a diwana, exi: Ki mwen’yú mu Jeluzaleme wa jibha-mu ni kuhama oso bheza mu dijina didi dya Jezú? O kunu ki kyene kya mu bheka, kuta athu yá ku mikolo, n’aye-nâ ku akunji a makota? ²² Sawúlu-phe u swina dingi kyavulu mu kuzwela ni kutena. O Jijudé ja akwa Damásku anga u ji belesa ku maka, mukonda mwène wa edikiza ima yavulu kuma Jezú mwène Kidistu kidi, katé Jijudé a lémbwa kuzwela.

10-16 YA KAYADI

O VALOLO YA MAK’Â NZAMBI | IKALAKALU 12-14

“Barnabé ni Phawulu a Bhanga Maxibulu ku Jixi ja Makanga”

(Ikalakalu 13:2, 3) Ku kala athu ku Judeya a kulumuka kwenyoko, ku Andiyoka, hé a kala mu longa Jiphange, exi: Se mu kamba ku mi saya, wila kya-xi Mozé o kijila, mu Kitumu, ki mu tena kubhuluka. ² Anga ki bhekela Phawulu ni Barnabé kukwata jiphata ni mala en’yó, hé ku kala kufunda kwavulu. Bhenyobho, o Jiphange anga a sola Phawulu ni Barnabé, ni akwâ dingi, phala a bande ku Jeluzaleme ku Jipoxolo ni adyakime, phala a tetulule o mak’ama.

Testemunho Cabal Cap. 11 pág. 86 parág. 4

“Ezala ni Ngalasa ni Nzumbi Ikôla”

⁴ Mukonda dyahi o nzumbi ikôla, ya tendelesa kusola Barnabé ni Sawulu phala “o sidivisu”? (Ikalakalu 13:2) O Bibidya ki i zwela. Maji twejiya kwila o nzumbi ikôla ya tendelesa kusola o mayala yá. Ki kwala kima kilondekesa kwila, o jipolofeta ni alongexi a ditunu o kitendelesu kiki. Mu veji dya kiki, ene a kwatekesa. Xinganeka kyebhi kya divu Barnabé ni Sawúlu, kyoso o jiphange mu veji dya kwa kwatela lwimbi, ‘kya zubha kujila ni kusamba, a tula maku kuthandu dyá, anga a a sulula.’ (Ikalakalu 13:3) Etu we twa tokala kukwatekesa yó a tambula mawujitu mu kilunga, katé mwene ni jiphange a a sola kála tufunga mu ilunga. Mu veji dya kukala ni lwímbi lwâ, mukonda dya mawujitu a tambula, twa tokala ku “a xila kyavulu mwene, ni ku a edikisa jinga o henda, mukonda dya kukalakala kwâ.”—1 Tes. 5:13.

(Ikalakalu 13:12) O nguvulu-phe kya mono kyoso kya bhange, u xikana, kuma wa diwana o ulongelu wa Ngana.

(Ikalakalu 13:48) Akwa’xi jengi ki evu kiki, a kala ni ngalasa yavulu, hé a ximana o maka ma Nzambi. Oso-phe a a sola, a fwamena o mwenyu ki wabhwa, anga a xikana.

(Ikalakalu 14:1) Anga kibhita dingi mu Ikônyo, kala ki kya bhiti kwa tundu. Kuma a bokona kiyadi kyâ mu dilombe dya Jijudé, o mu kutanga kwâ anga a bhangesa mundu wavulu wa Jijudé ni Jingeleku kuxikana.

Testemunho Cabal Cap. 12 pág. 95 parág. 5

‘A Bhwa Wôma ni Kutanga o Maka ma Jihova’

⁵ Ku dimatekenu, Phawulu ni Barnabé, a tula mu mbanza ya Ikônyo, yexile we o mbanza ya dikota ya kibatu kya Loma kya Ngalásya. O mbanza yiyi, ki i difwile ni jimbanza ja mukwa, mukonda o athu mu mbanza yiyi, exile ni ifwa ya akwá Ngeleku. Mu mbanza yiyi, mwexile we mundu wavulu akwa Judeya, ni athu avulu akwa jixi jengi, a kitukile Jijudé. Kuma kyexile kya kifwa kyá, Phawulu ni Barnabé a bokona mu dilombe, anga a mateka kulonga. (Ikalakalu 13:5, 14) Mu kutanga kwâ, ene “a bhangesa mundu wavulu wa Jijudé ni Jingeleku kuxikana.”—Ikalakalu 14:1.

(Ikalakalu 14:21, 22) O kya zubha kulonga o Maka Mambote mu mbonge’omo, ni kubhanga jixibulu javulu, a vutukila ku Listra, ni ku Ikônyo, ni ku Andiyoka dya Pizidya. ²² Ene anga a kala mu kukolesa o mixima ya jixibulu ni ku a longesa kujijila o kuxikana. A kala we mu longa kuma tu bhinga tu bokona mu Utuminu wa Dyulu mu kubhita ni malebhu mavulu

Mulangidi 15/09/14 difwe 10 kaxi 4-5

‘Sidivila Nzambi ni Ufiyele Woso né Mwene ni ‘Izukutisu Yavulu’

⁴ Kyoso kya zubha kukunda o mbanza ya Derbe, Phawulu ni Barnabé a “vutukila ku Listra, ni ku Ikônyo, ni ku Andiyoka. Ene anga a kala mu ku swinisa o mixima ya Jixibulu ni ku a longesa kujijila o kuxikina. A kala we mu longa kuma, ‘twa bhingi tu bokona mu Utuminu wa Nzambi mu kubhita ni izukutisu yavulu.’” (Ikalakalu 14:21, 22) O izwelu kubhita ni ‘izukutisu yavulu,’ ki i swinisa. Maji kyebhi Phawulu ni Barnabé kya “swinisa o maxibulu,” mu ku a tangela kwila, eji di bhana ni izukutisu yavulu?

⁵ O kitambwijilu tu ki sanga mu izwelu ya Phawulu. Mwéne wambe: ‘Tu bhinga tu bokona mu Utuminu wa Nzambi mu kubhita ni izukutisu yavulu.’ Mwene ka zwela ngó kwila, ‘twa tokala kudibhana ni izukutisu yavulu.’ Mu kiki, Phawulu wa londekesa ni kidi kyoso, o mabesá a-nda tambula oso a kolokota mu ufiyele wâ kwa Nzambi. O mabesá yá a kidi, mukonda Jezú wambe: ‘Woso-phe u kolokota katé bhu dizubhilu, mwéne wa ka bhuluka.’—Mat. 10:22.

Tokwesa o Milongi ya Nzambi

(Ikalakalu 12:21-23) Helode anga u a xindila o kizuwa kya ku di mona-nâ. Ku tula bhu kizuwa kya tokala, Helode u zwata, hé u di lumbila ijingu ya ungana, u xikama bhu kyandu, u a tela maka. ²² O mundu anga a di kola, exi: Yú mu zwela, Nzambi, ki muthu kana! ²³ Mu kithangan’okyo, anju ya Ngana ya mu kwama, mukonda wa kambe kujingisa Nzambi; anga a mu dya ku mabhuka, u zubhidisa.

Sentinela 15/05/08 pág. 32 parág. 7

Kilombolwelu Kya Divulu Dya Ikalakalu

12:21-23; 14:14-18. Helode wa xikina kutambula kijingu kya tokalele kwa Nzambi. Kiki, ki kyene kya bhitile ni Phawulu ni Barnabé, mukonda ene a ditunu ni lusolo lwoso kutambula kijingu kya tokalele kwa Nzambi! Etu ki tu tokala kuxikina kijingu, mukonda dya kikalakalu kyoso-kyoso ki tu bhanga mu sidivisu ya Jihova.

(Ikalakalu 13:9) Sawúlu-phe, a mu ixana we Phawulu, wezala ni nzumbi ikôla anga u mu toka mesu.

milongi phala kutokwesa Ik 13:9

Sawúlu-phe, a mu ixana we Phawulu: Tunde bhu kithangana kyenyókyo, Sawúlu a mateka ku mwixana Phawulu. Poxolo Phawulu mukwa Hebelewu, maji tundé kya mu vwala, mwene wa tokalele we ku Loma. (Ik 22:27, 28; Fi 3:5) Mu kiki, nange tundé mu undenge we, wa kexile ni majina ayadi: Sawúlu, o dijina dya Hebelewu, o dijina dya Loma, Phawulu. Mu thembu yenyóyo, o Jijudé akexile ni kifwa kya kukala ni majina ayadi, benge-benge yó ka tungile mu Izalayele. (Ik 12:12; 13:1) Sayi jindandu ja Phawulu, a kexile we ni dijina dya Loma ni dya Ngeleku. (Lo 16:7, 21) Kuma “poxolo ya akwa jixi jengi,” Phawulu wa tambula o kikalakalu kya kutula o njimbu yambote kwa yó kexile Jijudé. (Lo 11:13) Nange mwene wa solo ku mwixana mu dijina dyê dya Loma, mu kubanza kwila, o athu eji mwivwa dingi. (Ik 9:15; Ng 2:7, 8) Sayi athu amba kwila, mwene wa dibhana o dijina didi, phala kujingisa Serju Phawulu. Maji tu mona kwila, kiki ki kidi, mukonda né mwene kyoso kya tundu mu Chipre, a suluka ni ku mwixana mu dijina didi. Amukwá a zwela kwila, Phawulu ka mesenene ku mwixana mu dijina dyê dya Hebalayiku, mukonda kyoso kya kexile mu tumbula o dijina didi mu Ngeleku, o athu akexile mu kwívwa kala a mu tumbula kizwelu mu Ngeleku, kya lungile ni muthu wenda ni kudinanza (mba kyama) kyenda ni kudinanza.—milongi phala kutokwesa Ik 7:58.

Phawulu: Mu Mikanda ya Ngeleku o dijina Pauʹlos, dya tundu mu dimi dya Latim Paulus, dilombolola “wofele,” a di tumbula 157 dya jiveji mu kwixana poxolo Phawulu, veji imoxi mu kwixana o nguvulu ya Xípele, Serju Phawulu.—Ik 13:7.

Kitangelu Kya Bibidya

(Ikalakalu 12:1-17) Kiki bhu thembu yene’oyo, sobha Helode u sununa maku mê mu kutatesa o athu a kilunga. ² Anga u tuma ku jibhisa Tiyaku, phange ya Nzwá, ku xibhata. ³ O kya mono kuma kya wabhela Jijudé, u tona kukwata Phetele. Mwenyomo mu izuwa ya Fesa ya Jimbolo ja Kambe Kithuthume, ⁴ kya zubha ku mu kwata, Helode u mu ta mu’aleya, hé u mu bhakula ku ibuka iwana ya masoladi ya kiwana-kiwana, phala ku mu inga. Oko Helode wa fika kwila ki zubha o Phasu kubhita, u mu katula n’a mu bheke bhu pholo ya mundu. ⁵ Kyen’iki Phetele a mu jikila mu’aleya, ni ku mu langa ku masoladi. Maji o Kilunga a mu sambela kwa Ngana ni kujiza. ⁶ Kutula mu usuku, wa kwila kimene kyê Helode wanda ku mu katula n’a mu bheke bhu pholo ya mundu, Phetele u kala ku kilu ni masoladi mayadi a mu bhake bhu kaxi. Mwene a mu jika malubhambu mayadi, ni alangi bhu kanga a lange o dibhitu dya kaleya. ⁷ Talesa-phe, bhu mbandu yê bhu imana anju ya Ngana, mu kaleya mu di mwika mukengeji. Anju anga i bhana Phetele huxi mu jimbanji, u mu phaphumuna wixi: Lenguluka, u balumuke! Malubhambu mê anga ma mu zuluka mu maku. ⁸ Anju anga i mu ambela, yexi: Dikute o phonda, u zwate jihayi. Phetele anga u ki bhanga. Wixi: Difute o mulele, u ngi kayele! ⁹ Phetele anga u tunda mu’aleya u kayela o anju. Maji ka k’ijiya kuma kya bhiti ku lwelu kya bhange o anju. Inda wa fika ku nzoji kwala. ¹⁰ Kya zubha ku somboka alangidi adyanga, ni akayadi, a bhixila bhu dibhitu dya felu dya kutundila mu luwa ya mbonge. Dibhitu anga di di jikula dyene, ene a tunda, anga enda luwa imoxi, mu’anzanz’omo anga anju i mu jimuka ku mesu, mwene wa xala bhobho. ¹¹ Phetele kya zubha ku phaphumuka, wixi: Kindala nga k’jiya kyá kuma ku lwelu mwene ni kidi! Ngana wa tumu o anju yê, wa ngi kudila bhu maku ma Helode, yú wa kakula mundu wa Jijudé, ku kyoso kyambele ku ngi bhanga. ¹² Phetele kya sunga kilunji, u di tela ku onzo ya Madiya, mam’â Nzwá, jina dyê dyamukwâ Marku. Kwene’oko kwa bhongoloka athu avulu ala mu samba. ¹³ Mwène kya phupha ku dibhitu dya luwa, kweza mona kilumba mu kwividila, mukalakadi mwene’omo, dijina dyê Lode. ¹⁴ O ki evu dizwi dya Phetele, dibhitu ka di jikula dingi, mukonda dya ngalasa, u vutuka m’onzo ni lusolo, u a tangela kuma Phetele wemana bhu kanga. ¹⁵ Ene a mu ambela, exi: Eye wa tekuka! Mwène-phe wa ki jijila, wixi: Kidi kyene! Exi-phe: Hé kyene, o anju yê! ¹⁶ Phetele-phe hanji yú phupha. Bhenyobho anga a jikula o dibhitu. O kya mu mono kwila Phetele mwene, a diwana! ¹⁷ Mwène wa a batela ni lúkwaku phala a di xibhe, anga u a kundila kyoso Ngana kya mu katula mu’aleya. Wixi: Im’iyi kundilenu-yu Tiyaku ni jiphange. Anga u katuka, uya kididi kyengi.

17-23 YA KAYADI

O VALOLO YA MAK’Â NZAMBI | IKALAKALU 15-16

“Bhu Kaxi ka Mak’â Nzambi, Ene a Batula o Maka Kumoxi”

(Ikalakalu 15:1, 2) Ku kala athu ku Judeya a kulumuka kwenyóko, ku Andiyoka, hé a kala mu longa Jiphange, exi: Se mu kamba ku mi saya, wila kya-xi Mozé o kijila, mu Kitumu, ki mu tena kubhuluka. ² Anga ki bhekela Phawulu ni Barnabé kukwata jiphata ni mala en’yó, hé ku kala kufunda kwavulu. Bhenyobho, o Jiphange anga a sola Phawulu ni Barnabé, ni akwâ dingi, phala a bande ku Jeluzaleme ku Jipoxolo ni adyakime, phala a tetulule o mak’ama.

Testemunho Cabal Cap. 13 pág. 102-103 parág. 8

“A funda Kyavulu”

⁸ Luka wa suluka: “Anga ki bhekela Phawulu ni Barnabé kukwata jiphata ni mala en’yó, hé ku kala kufunda kwavulu. Bhenyobho, o Jiphange anga a sola Phawulu ni Barnabé, ni akwâ dingi, phala a bande ku Jeluzaleme ku Jipoxolo ni adyakime, phala a tetulule o mak’ama.” (Ikalakalu 15:2) Ene a “kwata jiphata ni kufunda kwavulu,” mukonda akexile mu zokela o ibanzelu yâ. Mu kiki, o kilunga kya Andiyoka ka tena kubatula o maka yá. Phala kulanga o kutululuka ni ukamba mu kilunga, ni unjimu, o jiphange a solo kwambata o maka yá “ku Jeluzaleme ku Jipoxolo ni adyakime,” a tokalele ku kibuka kya utuminu. Ihi i tu tena kudilonga ku tufunga mu Andiyoka?

(Ikalakalu 15:13-20) O kya tula o mahezu, Tiyaku u kumbulula wixi: Enu akwetu, ivenu kunu: ¹⁴ Ximá wa mu jimbwila kyoso kya dyangele Nzambi kuzungila akwa jixi jengi, o mu kaxi kâ yú wa solo kukatula-mu o mundu wê wangene mu dijina dyê. ¹⁵ O maka ma jipolofeta we mu ima iyi ma lungu-mu, kya soneka exi: ¹⁶ Ngana wixi, hinu ki bhwa o izwu’oyo ngi vutukila-ku ngi soma dingi o balaka ya Davidi ya budika; ngi tunga dingi kibhela kyê, ngi i sokejeka, hé ngi imika dingi. ¹⁷ Phala athu a kamukwâ a sote Ngana, ni akwa jixi jengi oso a exana mu dijina dyami, ¹⁸ eme ngi Ngana, nga tumu kwijidisa im’iyi tunde m’okulu. ¹⁹ Wila kiki, eme nga batula kuma: Etu ki tu kale mu tatesa oso akwa jixi jengi a bhiluka kwa Nzambi. ²⁰ Inda tu a sonekena ngó mukanda kwila, kadye jinge kúdya kwa kasana, o kúdya xitu yojibhe anga a i satela itèka. Tu a tangela we kwila, a lenge undumbu, ni kúdya xitu ya kyama kyokwenye, mba we kúdya manyinga.

Mulangidi 01/01/12 difwe 9 kaxi 6-7

O Jikidistá ja Kidi a Xila o Mak’â Nzambi

⁶ O divulu dya Amoji 9:11, 12, dyene dya kwatekesa kubatula o maka. Kala kya ki tange mu divulu dya Ikalakalu 15:16, 17, Jihova wixi: ‘Ngi vutukila-ku ngi soma dingi o balaka ya Davidi ya budika; ngi tunga dingi kibhela kyê, ngi i sokejeka, hé ngi imika dingi. Phala athu a kamukwâ a sote [Jihova] ni akwa jixi jengi a exana mu dijina dyami.’

⁷ Nange muthu u xinganeka, ‘o kibatulu kya Bibidia ki kilondekesa kwila, athu akwa Jixi Jengi a kitukile Jikidistá, a tokalele ku a saya.’ Kiki kidi, maji o Jikidistá Jijudé ki kyene kya banzele. Ene ka kexile mu mona o akwa Jixi Jengi a kitukile Jikidistá a sayele kála ‘athu a jixi jengi,’ maji kála jiphange jâ. (Mak. 12:48, 49) Mu kifika, o divulu dya Estere 8:17, mu Versão Bagster ya Septuaginta, dizwela: “Athu akwa Jixi Jengi a a sayele, a kituka Jijudé.” Mukonda dya kiki, kyoso o Mikanda Ikola ki izwela ya lungu ni yó a xala mu inzo ya Izalayele (Jijudé a sayele akwa Jixi Jengi) kumoxi ni “athu a jixi joso” (akwa jixi Jengi ka a sayele) kiki kya londekesele kwila ene eji kala mundu phala o dijina dya Nzambi. Ki ku bhingile kwila, o muthu a mu saya phala ku kituka Kidistá.

(Ikalakalu 15:28, 29) Kuma ni nzumbi ikôla ya ki mono kyawabha, ni etu-ene, kwila kana ku mi xina kimbamba kya dikota, kikale ngó o ima ya kate-ku, yeni’yi: ²⁹ Kana kudya xitu ya yama yojibhe phala ku i satela iteka. Kana kudya manyinga moso-moso, mba xitu ya kyama kyokwenye. Ki mu bhange we undumbu. Ima yeni’yi se enu mwenda ni ku i lenga, mwa bhange kyambote. Twa mi menekena! Mahezu.

(Ikalakalu 16:4, 5) O ki enda ni kubhita ku madyembu, a a telekala o ijila, ya a tendelela o Jipoxolo ni Adyakime mu Jeluzaleme, phala a i kwate. ⁵ Kyen’iki ilunga a i kwatesa nguzu mu kuxikana kwâ, anga yenda ni kuvula dingi izuwa yoso.

Testemunho Cabal Cap. 15 pág. 123 parág. 18

“Kuswinisa o Ilunga”

¹⁸ Phawulu ni Timote a kalakala mivu yavulu kumoxi. Kuma exile akunji, ene a kumbidila o ikalakalu ya tumine ku kibuka kya utuminu. O Bibidya i zwela: “O ki enda ni kubhita ku madyembu, a a telekala o ijila, ya a tendelela o Jipoxolo ni Adyakime mu Jeluzaleme, phala a i kwate.” (Ikalakalu 16:4) Tu mona kwila, o ilunga ya kayela o itendelesu ya jipoxolo ni ya tufunga mu Jeluzaleme. Mukonda dya kubelesela kwâ, ‘o ilunga a i kwatesa nguzu mu kuxikana kwâ, anga yenda ni kuvula dingi izuwa yoso.’—Ikalakalu 16:5.

Tokwesa o Milongi ya Nzambi

(Ikalakalu 16:6-9) Ene anga a bhita m’oxi ya Filija, ni mu Ngalásia, nzumbi ikôla anga u a kidika kulonga maka mu Ázya. ⁷ O kya bhixila bhu mbambe ya Mixa, a mesenene kubokona mu Bitinya, maji o nzumbi ya Jezú-phe ka ehela. ⁸ Anga a somboka mu Mixa, hé a kulumuka ku ditabhu dya Tolowade. ⁹ Phawulu anga u mona kisuma mu’suku wen’yó. Wa mono kwa mu tukulukila diyala mukwa Masedonya, wemana ni ku mu dyonda, wixi: Zawuka kunu ku Masedonya, u tu kwatekesa etu!

Mulangidi 01/01/12 difwe 14 kaxi 8

Kayela o Phangu ya Jipoxolo ja Jezú ya Lungu ni ku Dilanga

⁸ Ihi i twa tokala kudilonga ku musoso yú? Twa mono kuma Nzambi wa bhangesa ngó o nzumbi ikôla kufidisa Phawulu, kyoso kyayi mu Azya. Jezú wa bhana ngó o milongi kwa Phawulu, kyoso kya zukamene mu Bitinya. Mu kusukáku, Jezú wa bhana ngó milongi kwa Phawulu kyoso kya bhixila mu Tolowade, yu wa mu londekesa o njila ya kuya ku Masedonya. Mukonda dya kukala mutwameni wa kilunga, Jezú u tena wé ku tu bhana milongi lelu. (Kol. 1:18) Mu kifika, eye u tena kubanza kukalakala kála muboki wa thembu yoso, mba kukalakala mu ididi mwa kambe aboki. Maji kyoso ki u mateka kubhanga kiki phala kusuwa o mbambe yê, Jezú ni nzumbi ikôla ya Nzambi, a-nda ku kwatekesa. Kyebhi-phe? Xinganeka o kifika kiki: O mwendexi wa dikalu u tena kuya ni dikalu ku mbandu ya kyasu mba ya kadilu, se o dikalu dya mu kwenda. Kyene kimoxi wé, Jezú u tena ku tu kwatekesa, se tu bhanga dingi mu ukunji wetu, maji twa tokala kubhanga kima—se mu kidi twa mu swína mu kubhanga o kikalakalu.

(Ikalakalu 16:37) Phawulu-phe wa ambela, wixi: Etu ki tu te kituxi kya kima, maji ene a tu bhesa jixikote bhu pholo ya mundu, né ngó ku tu fundisa, etu tu akwa Loma, yá a tu jikila mu’aleya! O kiki andala a tu kaya, mu kwomboloka? Kyokyo kana! Ki tu xikina. Inda ene eza a tu tundise.

milongi phala kutokwesa Ik 16:37

etu tu akwa Loma: Phawulu nange ni Sila akexile akwa Loma. O kukala mukwa Loma, kwa bhanene ku muthu mawufolo ni mawujitu a kuya bhwoso-bhwoso bhwa mesenene o kuya ku kibatu kya Loma. O muthu mukwa Loma wa tokalele kutumaka o kitumu kya Loma, kana o itumu ya ji mbonge. Se a mu tele milonga, o muthu wa xikinine ku mu fundisa kala ki tuma o kitumu kya mbonge, maji né kiki, mwéne wa kexile ni ufolo wa kulengela wé ku inzo ya dikota ya Loma ya ku fundisa o madimanda. Se a mu balakele o kufwa, mwéne wa kexile ni ufolo wa kubhinga kikwatekesu ku nguvulu. O poxolo Phawulu wa boko mu Kibatu kyoso kya Loma. O Bibidya i tu tangela ithangana itatu, o poxolo Phawulu wa katula mbote mu kukala mukwa Loma. Mwéne wa tangela o jisalajendu akwa Filipe kwila, akexile mu ta kituxi mu ku mu beta.

Kitangelu Kya Bibidya

(Ikalakalu 16:25-40) Mu kaxi ka usuku-phe, Phawulu ni Sila a kala mu kusamba ni kwimbila Nzambi, o jipelezu ni akwâ ji kala mu kwividila. ²⁶ Anga a tukumuka kinuminu kya mavu kya dikota, o inzu ya kaleya anga i tunguta katé ku madisesa. Kithangan’okyo o mabhitu moso ma jikuka, o jipelezu joso ji jituka ku malubhambu. ²⁷ Kasalelu-phe kya phaphumuka ku kilu, u mona mabhitu moso ma jikuka, mwene wa fonona o xibhata yê, hé u sota ku di jibha kuma wa fika jipelezu joso ja lenge ji’ja mu xyê. ²⁸ Phawulu-phe wa mu handekela, wixi: Ku di bhange kyokyo! Etu oso etu’etú! ²⁹ Kasalelu anga u ixana kwila eze ni jikandeya, hé u bokona lusolo, wa bhuwama ni wôma, anga u di bhala bhu pholo ya Phawulu ni Sila. ³⁰ Anga kiyadi kyâ u a bheka ku kanga, wixi: Enu jingana, eme ngi bhanga kyebhi mu kubhuluka? ³¹ Kwala ene: Xikana Ngana Jezú, nda u bhuluke, ni eye ni mbèle yé. ³² Anga a mu tangela Maka ma Ngana, ni mwene ni oso ala m’onzo yê. ³³ Kasalelu anga u a katula ola yenyoyo ya usuku, hé u tumba ixenge yâ. Anga a mu batizala ni akwa mbèle yê yoso kithangana kyenyokyo. ³⁴ Anga u bheka Phawulu ni Sila m’onzo yê, u a zalela meza, hé u sanguluka kyavulu ni dibhata dyê dyoso, kuma a xikana Nzambi. ³⁵ Ki kwakye mu kimene, jixefe ja tumu jisalajendu, exi: Mal’ó a ehyenu. ³⁶ Kasalelu anga u ki jimbwila Phawulu, wixi: Jixefe ja tumu ku mi eha. Ndokwenu mu suluke ni paze. ³⁷ Phawulu-phe wa ambela, wixi: Etu ki tu te kituxi kya kima, maji ene a tu bhesa jixikote bhu pholo ya mundu, né ngó ku tu fundisa, etu tu akwa Loma, yá a tu jikila mu’aleya! O kiki andala a tu kaya, mu kwomboloka? Kyokyo kana! Ki tu xikina. Inda ene eza a tu tundise. ³⁸ Jisalajendu anga a vutwila jixefe kyoso kya zwela. Ene anga a kala ni wôma, ki evu kuma o Phawulu ni Sila akwa Loma. ³⁹ Anga eza, a a dyonda, hé a a katula mu’aleya. O kya zubha ku a katula-mu, a a bhingi kutunda mu mbonge. ⁴⁰ Phawulu ni Sila anga a xa kaleya, a bokona m’onzo ya Lidya. O kya zubha ku di mona ni Jiphange, ni ku a longesa, a katuka.

24-30 YA KAYADI

O VALOLO YA MAK’Â NZAMBI | IKALAKALU 17-18

“Kayela o Phangu ya Poxolo Phawulu mu Kuboka ni mu Kulonga”

(Ikalakalu 17:2,3) Phawulu kuma kyene ki ene kubhanga, u bokona-mu jisabhalu jitatu, u zwela-nâ, ³ hé u a jingunwina o Madivulu ma Nzambi ni kwidikisa ni kulombolola kuma kya fwamane Kidistu ku bhita ku jiphaxi ni kufukunuka ku’alunga. Wixi-phe: Jezú mwen’yú nga mi tangela-nê, mwène Kidistu.

milongi phala kutokwesa Ik 17:2, 3

u zwela-nâ: Phawulu ka a tangela ngó o njimbu yambote. Mwene wa jimbulwila-yu, bhu kaxi ka Mikanda Ikôla mba o Mikanda ya Hebalayiku. Mwene ka tange ngó o Mikanda Ikôla; maji wa i jimbulula, yu wa solo kuzwela maka a lungu ni ene. O kizwelu mu Ngeleku di·a·leʹgo·mai, kilombolola “kudiswinisa; kudizwelesa; kuta maka.” Kya lungu ni kudizwelesa ni athu. O kizwelu kiki kya Ngeleku, a ki tumbula we mu divulu dya Ik 17:17; 18:4, 19; 19:8, 9; 20:7, 9.

kwidikisa ni kulombolola: Mu Ngeleku, o izwelu yiyi, ilombolola “kutula ku mbandu ya.” Nange kiki kilombolola kwila, Phawulu wa sokesa o ikanenu mu Mikanda ya Hebalayiku ya lungile ni Mexiya, ni izulukutu ya bhiti ku mwenyu wa Jezú mu kulondekesa kwila, Jezú wa kumbidila o ikanenu yiyi.

(Ikalakalu 17:17) Anga u kala mu ku di kumbulula ni Jijudé mu dilombe ni athu amukwâ ki Jijudé, akwa kubhezela Nzambi momo. Bhu kitanda we u zwela ni athu oso a takana-nâ.

milongi phala kutokwesa Ik 17:17

bhu kitanda: O kitanda kya Atena (mu Ngeleku, a·go·raʹ), kya kexile kuthunda dya Acrópole, kyexile kitanda kyonene, kya sokele ni kibhela kya 50.000 a jimetulu. O kitanda, ki kyexile ngó phala kusumba ni kusumbisa. Kyexile kididi kya dikota phala kuta maka a jinguvulu, a lungu ni kitadi, ni ima ya lungu ni ifwa ya mbanza. Akwa Atena, akexile mu dyongeka bhu kididi kyenyiki phala kuta maka a jingijiye.

(Ikalakalu 17:22, 23) Phawulu bhenyobho anga wimana mu kaxi ka Mulundu wa Hamba-dita, wixi: Enu mu akwa Atena! Ku ima yoso nga mi mono kuma mwa vula o kubheza. ²³ Kuma kyoso ki ngi kala mu kubhita mu mbonge’umu ni kutalesa ididi yenu ya kubhezela, nga sange we ni kalatodyo kwosoneke kiki: Yolumbile Nzambi twa kambe ku Mwijiya. Wila kiki, Nzambi woso mwala ku mu bheza sé ku mu ijiya, mwène nga mu mi tangela-nê.

milongi phala kutokwesa Ik 17:22, 23

Yolumbile Nzambi twa kambe ku Mwijiya: Mu Atena mwa kexile kalatódyo ni isoneku yiyi ya Ngeleku A·gnoʹstoi the·oiʹ. Akwa Atena a londekesa kwila, akexile ni wôma wa jinzambi, kyene kya a bhangesa kutunga o jitembulu ni jikalatódyu javulu, katé mwene a bhange jikalatódyu phala jinzambi ja Fuma, ja Tululuka, ja Nguzu, ja Kubhômba, ni jinzambi ja Henda. Nange a kexile ni wôma wa kujimba-ko nzambi imoxi, yeji kwa zukutisa, kiki kyene kya a bhangesa o kubhakula kalatódyo kexile ni isoneku, “Yolumbile Nzambi twa kambe ku Mwijiya.” Bhu kaxi ka kalatódyo kaka, o mundu wa londekesa kwila, kwexile Nzambi a kambele o ku mwijiya. Bhu kaxi ka kalatódyu kaka, Phawulu wa sange ndunge phala kwijidisa ku athu yó, o Nzambi ya kidi, a kambele o ku mwijiya.

Tokwesa o Milongi ya Nzambi

(Ikalakalu 18:18) Phawulu kya zubha kubhanga dingi izuwa yavulu mu Korindo, wa xalesa jiphange, anga u dilônga mu naviyu kuya ku Sídya, kumoxi ni Pidisila ni Akwila. O kwila kiluwa a dilônga mu naviyu, wa dyangele-phe kubhuta muthwe mu Sengeleya, kuma wa bhangele polomesa kwa Nzambi (wadi dikangu, wa te hasa).

Sentinela 15/05/08 pág. 32 parág. 5

Kilombolwelu Kya Divulu Dya Ikalakalu

18:18—Polomesa yahi ya bhangele Phawulu? Sayi jingijiye amba kwila, Phawulu wa bhangele polomesa ya Nazilé. (Dya 6:1-21) Maji o Bibidya ki i jimbulula o polomesa ya bhangele Phawulu. Ku mbandu ya mukwa, o Bibidya ki i zwela, se Phawulu wa bhange o polomesa ande dya kukituka kidistá mba wa kexile mu mateka mba mu zubha o polomesa. Maji né kiki, o kubhanga o polomesa yiyi, ki kyexile kituxi.

(Ikalakalu 18:20, 21) O kya mu bhingi kubhanga izuwa, mwène wa ditunu, hé u a xalesa, wixi: Nzambi se wandala hinu ngi mi sanga dingi. ²¹ Anga u dilônga mu naviyu, u katuka mu Efezo.

milongi phala kutokwesa Ik 18:20, 21

Nzambi se wandala: O kizwelu kiki, kilondekesa kwila, kyoso ki tu bhanga kima, mba tu di sokejeka phala kubhanga kima, twa tokala kwijiya yebhi o vondadi ya Nzambi. O poxolo Phawulu wejidile o kidi kiki. (1Ko 4:19; 16:7; Jih 6:3) O dixibulu Tiyaku wa swinisa o atang’yê wixi: “Ngana se wa mesena, hé tu kola mwenyu, tu ila kiki, tu ila kyokyo.” (Tyi 4:15) Woso u zwela ni muxima woso kwila, ‘se Jihova u ki mesena,’ wa tokala kubhanga nguzu phala kubhanga o ima kala kya mesena Jihova. Ki ku bhingi kuzwela kiki ni dizwí dya swina ithangana yoso, maji mu veji javulu, tu ki zwela ngó ni muxima.—Tala o Apêndice A5 mu Bibidya ya phutu

Kitangelu Kya Bibidya

(Ikalakalu 17:1-15) Kiki ki a bhitakena mu Amfipole, ni mu Apolonya, a bhixila mu Tesalonika hé a sanga mwala dilombe dya Jijudé. ² Phawulu kuma kyene ki ene kubhanga, u bokona-mu jisabhalu jitatu, u zwela-nâ, ³ hé u a jingunwina o Madivulu ma Nzambi ni kwidikisa ni kulombolola kuma kya fwamane Kidistu ku bhita ku jiphaxi ni kufukunuka ku’alunga. Wixi-phe: Jezú mwen’yú nga mi tangela-nê, mwène Kidistu. ⁴ Amoxi-mu anga etaya, a zwama kwa Phawulu ni Sila. Ni ku abhezi mu jingeleku, ni ku Jijudé mundu wa vulu ni ku ahatu a jingana, k’atolo, a di ta we kwenyuku. ⁵ Jijudé-phe kya a kwata dixinga. Anga a kasa athu ku jihabhu mu nzunga, a bhongolola mundu, mbonge yoso hé a i ta mu kavanza. Anga a balukila inzu ya Jasono, a sota ku katula Phawulu ni Sila bhu kanga bhwala o mundu. ⁶ Kya lémbwa ku a mona, a koka Jasono ni jiphange jamukwâ hé a a bheka bhu pholo ya afundixi a mbonge ni kukola, exi: Mala a bongwesa oxi yoso eza we kunu. ⁷ O Jasono mwene wa a zalela m’onzo yê. En’yâ a kitukila o jingonge ja Sezalu, wene mu Loma, exi, sayi-ku sobha yengi, yó a mu ixana Jezú. ⁸ Ni mundu ni afundixi a mbonge a kala ni hele ki evu im’iyi, hé kukala kavanza ka dikota. ⁹ Kya zubha-phe kutambula o fiyasa ni kufutisa multa kwa Jasono ni akwâ, a ehâ. ¹⁰ Kyenyokyo, jiphange ji katula Phawulu ni Sila mu usuku, hé a a tumikisa ku Beleya. O ene kya zubha kutula koko, a bokona mu dilombe dya Jijudé. ¹¹ En’yâ a beta ujitu, ka soko ni akwa Tesalonika, kuma a tambulula o maka ni kutetuluka kwoso. Izuwa yoso anga a kala mù tekula mu Madivulu ma Nzambi se o ima yiyi kya mu i tanga Phawulu, kyene ki ya tokala. ¹² Mu kwila kiki, avulu-ku a xinaka; ni ku ahatu a jingana ku Jingeleku, o mala we kà tolo. ¹³ Maji o Jijudé-phe ja akwa Tesalonika, kya k’ivu kwila maka ma Nzambi ala ku ma longa kwala Phawulu mu Beleya, ene eza we kwenyoko, hé akala mu vunza o mundu ni ku a tatesa. ¹⁴ Kithangan’okyo jiphange ji katula Phawulu, hé a mu bheka katé ku ndundu ya kalunga. Sila ni Timote a xala hanji mu Beleya mwenyomo. ¹⁵ O makamba en’yâ-phe a xinjikila Phawulu, a bhixila-nê katé ku Atena. O kya tambula lekalu ya Phawulu kwila Sila ni Timote, a lenguluke ku mu sanga, ene aluka ku Beleya.

31 YA KAYADI–6 YA KATATU

O VALOLO YA MAK’Â NZAMBI | IKALAKALU 19-20

‘Ingenu o Kilunga Kya Nzambi ni ku ki Tambula Konda’

(Ikalakalu 20:28) Dilangyenu-phe en’wenu, ni kilunga kyoso, kuma o nzumbi ikôla ya mi bhange mu abhidi a kilunga kyen’iki. Kalenu-phe mu abhidi a kilunga kya Ngana Nzambi, kuma Mwène wa ki sumbu ni manyinga ma Mon’êlele mwene.

Mulangidi 01/06/11 difwe 24 kaxi 5

‘Ingenu o Kilunga Kya Nzambi ni ku ki Tambula Konda’

⁵ O poxolo wa sonekena o tufunga akexile mu ‘kwinga o kilunga kya Nzambi, ni ku ki tambula konda.’ Ene a tokalele kwijiya kwila, o kilunga kya tokala kwa Jihova, ni Jezú Kidistu. O tufunga a tokalele kubhakula jikonda kwa Nzambi, mukonda dya ukexilu wexile mu langa o kilunga kyê. Xinganeka kamba dyê dya kazola, wa mu tunda, u ku bhinga kutambula konda ya twana twê. Kweji ku a tambula konda, ni ku a dikila? Se bhu kala mon’a u kata, hinu kweji ku mu ambata ku dotolo phala ku mu saka? Kyene kimoxi we, o tufunga mu kilunga, “[abhidi a kilunga kya] Ngana Nzambi, kuma Mwène wa ki sumbu ni manyinga ma Mon’êlele mwene.” (Ika. 20:28) Ene ejiya kwila, kala mbudi mu kilunga, a i sumbu ni manyinga a Kidistu Jezú. Mu kwijiya o kikalakalu kyâ, o tufunga ene mu dikila, kulanga, ni kutambula konda ya kilunga.

(Ikalakalu 20:31) Wila kiki di langyenu, mu xinganeke kuma, mivu itatu yosu’iyi, ni mu mwanya ni mu usuku, ki nga fulu dingi o ku mi dimuna, muthu ni muthu mudyenu, ni masoxi.

Mulangidi 15/01/13 difwe 31 kaxi 15

‘O Tufunga Twa Jikidistá ‘Akwatekexi Phala o Kisangusangu Kyetu’

¹⁵ Ku kala mubhidi, kikalakalu kya dikota. Sayi ithangana, o tufunga a bhita mawusuku sé kuzeka mu kuthandanganya ni kusamba, mukonda dya kilunga kya Nzambi mba kubhana kikwatekesu mu nzumbi. (2 Kol. 11:27, 28) Né mwene kiki, o tufunga a langa o kikalakalu kyâ ni kisangusangu kyoso, kála kya bhange Phaulu. Mwene wa soneka ku akwa Kolindo: ‘Eme ku mbandu yami, nga sanguluka kyavulu mu kukalakala phala enu mu kusota o mbote ya myenyu yenu.’ (2 Kol. 12:15) Mukonda dya myenyu ya jiphange jê, Phawulu wa di bhakula mu kwa swinisa mu nzumbi. (Tanga 2 Kolindo 2:4; Fil. 2:17; 1 Tes. 2:8) Kiki, kyene kya bhangesa o jiphange kuzola kyavulu, Phawulu!—Ikalakalu 20:31-38.

(Ikalakalu 20:35) Mu ima yoso nga m’idikiza kyoso ki mwa fwama kukalakala ni kubhindumuna mukwenu wa tate. Endenu ni kuxinganeka o kizwelu kya Ngana Jezú, ki edile wixi: O kubhana kota mu kuzediwisa, o kutambula ndenge.

Testemunho Cabal Cap. 21 pág. 172 parág. 20

‘Nga Zele ku Manyinga ma Athu Oso’

²⁰ O ukexilu wa mwenyu wa Phawulu, ki u di fwile ni wa athu yó a moneka ku pholo, a kingile kwila, o jimbudi jene ji dikila o ibhindamu yâ. Mwene wa kalakala phala kudikila o ibhindamu yê, mukonda ka mesenene kutatesa o kilunga. Mwene ka kexile mu kwatekesa o jiphange phala kunganyala kitadi. Phawulu wa swinisa o tufunga ku Efezo, kukala polondo phala kukwatekesa akwá. Mwene wa tangela: ‘Mwa tokala kubhindumuna akwenu a tate. Endenu ni kuxinganeka o kizwelu kya Ngana Jezú, ki edile wixi: O kubhana kota mu kuzediwisa, o kutambula ndenge.’—Ikalakalu 20:35.

Tokwesa o Milongi ya Nzambi

(Ikalakalu 19:9) Maji amoxi-mu-phe a kola muxima ni kuxibhaka, o Njila ya Ngana a kala mu ku i tobhesa bhu pholo ya mundu. Phawulu-phe wa di batuka-nâ, anga u di kalela, hé wambata kumoxi-nê o jixibulu jala jikidistá. Anga izuwa yoso u kala mu jingununa o Maka mu xikola ya Tilanu.

Testemunho Cabal Cap. 20 pág. 161 parág. 11

Né Mwene ni Izukutisu, ‘O Mak’â Nzambi a Kala Dingi mu Sambuka ni Kuswina’

¹¹ Phawulu wa kexile mu jimbulula o Maka mu xikola, izuwa yoso. Nange mwene wa kexile mu jimbulula o maka, tundé ku 11:00 mu kamene, katé mu 16:00. (Ikalakalu 19:9) Mu kithangana kyenyókyo, kumá kwexile mu tema kyavulu, maji kwa tululukile we, mukonda kyene o kithangana kyexile mu nyoha o athu ku salu, phala kudya kama. Xinganeka: Se Phawulu wa bhange kyenyiki ku mivu iyadi, mwene wa bhange 3.000 ja ji-ola, ni kulonga o Mak’â Nzambi. Kiki kya bhangesa we o Mak’â Nzambi kusambuka dingi ni kuswina. Phawulu wexile mukalakadi wa swina ni kwila, ka bhonzele. Mwene wa kexile mu boka mu ola ya tenene kusanga o athu mu kididi kyenyókyo. Ihi ya bhiti? ‘Oso a tungu mu Azya evu o Maka ma Ngana, ni Jijudé, ni yó ka tokala mu mwiji wa Jijudé.’ (Ikalakalu 19:10) Sé phata, mwene wa bokela o athu oso!

(Ikalakalu 19:19) Sayi we athu k’atolo, a tambwile wanga, a bheka o madivulu mâ, anga a ma ta mu tubhya ku mesu ma mundu. Hé a kwata konda kyoso kya te o madivulu, ma tena konda ya makwinyi a tanu a midi ya itadi ya phalata.

Testemunho Cabal Cap. 20 pág. 162-163 parág. 15

Né Mwene ni Izukutisu, ‘O Mak’â Nzambi a Kala Dingi mu Sambuka ni Kuswina’

¹⁵ O ima yayibha ya bhiti ni an’a Seva, ya bhangesa kwila, athu avulu a kala ni wôma wa Nzambi, anga a xisa o wanga. Mu Efezo, athu avulu akexile ni wanga. Athu avulu akexile mu bhanga o uloji, ni kuta mikolo mu mbunda ni kubhanga iphata; mu veji javulu akexile mu bhanga o ima yiyi, ni madivulu a uloji. Athu avulu mu Efezo, a solo kubheka o madivulu oso a wanga bhu pholo ya mundu, phala kwa oha, sumbala a tele midi ni jimidi a jidólale mu kitadi kya lelu. Luka wambe: “Wila kiki, o Maka ma Ngana, ma kala dingi mù sambuka ni kuswina, ma lenda yoso.” (Ikalakalu 19:17-20) Sé phata, o kidi kya tolola o makutu ni madimonyo! O athu yó a tu xila phangu yambote. Twala we ku mundu wezala ni wanga. Se tu mona kwila twala ni kima kya lungu ni wanga, twa tokala kukayela o phangu ya akwa Efezo, mu ku texi o ima yiyi ni lusolo lwoso! Twa tokala kuxisa o ima yiyi yayibha, né mwene se kubhinga kubhanga nguzu yavulu.

Kitangelu Kya Bibidya

(Ikalakalu 19:1-20) Kyoswiki ki ala Apolo mu Korindo, Phawulu kya zubha kunyunga ku madyembu ku thunda, u bhixila ku Efezo, anga u sanga-ku jixibulu. ² Anga wa ambela, wixi: Enu mwa tambula kyá nzumbi ikôla tunde ki mwa xikana? Ene exi: Kana! Etu kiluwa ngó tu k’ivwa kwila sayi-ku nzumbi ikôla. ³ Wixi: A mi batizala-phe mu dijina dyahi? Exi: Mu batizu ya Nzwá. ⁴ Kwala Phawulu: Nzwá wa mi batizala ni batizu ya yó a mu dyela-ke o ituxi yâ. Yú wa longesele o mundu kuma a xikane yó wa mu kayela ku dima dyê, mwene Jezú. ⁵ Ene kya zubha kwivwa kiki, a a batizala mu dijina dya Ngana Jezú. ⁶ O Phawulu kya a tula o maku mê ku thandu, nzumbi ikôla ya a tulukila ene oso. Anga a kwata kutanga madimi mengi, hé a kala we ni wanji wa kulombolola o Maka ma Nzambi. ⁷ En’yá ala kwinyi dya muthu ni kiyadi. ⁸ Phawulu anga u kala mu bokona mu dilombe dya Jijudé, u bhwa wôma ni kutanga o maka mu thembu ya mbeji jitatu, u jingununa ima ya tokala ku Utuminu wa Nzambi, u sota ku a xikanesa. ⁹ Maji amoxi-mu-phe a kola muxima ni kuxibhaka, o Njila ya Ngana a kala mu ku i tobhesa bhu pholo ya mundu. Phawulu-phe wa di batuka-nâ, anga u di kalela, hé wambata kumoxi-nê o jixibulu jala jikidistá. Anga izuwa yoso u kala mu jingununa o Maka mu xikola ya Tilanu. ¹⁰ Kyen’iki anga u ki jijila mu mivu iyadi, katé ene oso a tungu mu Azya ki evu o Maka ma Ngana, ni Jijudé, ni yó ka tokala mu mwiji wa Jijudé. ¹¹ Nzambi anga u bhangesa isuma yosanuke ku maku ma Phawulu. ¹² Katé se jihaxi a ji bhekela malesu, mba jiponda, ja tundu ku mukutu wê, o haxi n’a ji babata, o kukata kubhwa, o nzumbi jayibha ji tunda. ¹³ Kukala-phe ilalu ya Jijudé, a kexi mu kwila a tunda kididi eza kididi, kuma ene imbanda ya kukambêla, a teza kutumbula dijina dya Ngana Jezú, ku thandu dya yó ala ni jinzumbi jayibha, exi: Nga mi kambelêla mu dijina dya Jezú, yó a mu tange kwala Phawulu, kwila mu tunda. ¹⁴ Anga bhu kala sambuadi dya an’a a Seva mukunji wa dikota ku Jijudé, a bhanga jinga kyen’iki. ¹⁵ Maji o nzumbi yayibha-phe ya a vutwila, yexi: Jezú nga mu suwu, o Phawulu nga mu ijiya, enu-phe mu akwa-hi? ¹⁶ O diyala wala ni nzumbi yayibha moxi dyê, anga u a tukila ku thandu, u kala kota ku nguzu, u a tolola ni kibetu katé kya lenge m’onzo ni tuxi, ni mikutu yatu. ¹⁷ Kiyen’iki anga a k’ivwa kwala athu oso a tungu mu Efezo, ni Jijudé, ni Jingeleku. Anga wôma u a kwata ene oso, o dijina dya Ngana Jezú hé di fumana. ¹⁸ Kwa yá a xikana, athu avulu eza ni kufisala ni kutukulula imbamba ya kexi mu bhanga jinga m’okulu. ¹⁹ Sayi we athu k’atolo, a tambwile wanga, a bheka o madivulu mâ, anga a ma ta mu tubhya ku mesu ma mundu. Hé a kwata konda kyoso kya te o madivulu, ma tena konda ya makwinyi a tanu a midi ya itadi ya phalata. ²⁰ Wila kiki, o Maka ma Ngana, ma kala dingi mù sambuka ni kuswina, ma lenda yoso.