Jezú ua Belesele mu Ithangana Ioso

O kuila kiene mu ku bhonza ku belesela o jitata jê?— Saí ithangana kiene mu bhonza. Eie uejiia kuila Jezú ua kexile mu belesela Jihova ni jitata jê?— O phangu iê, i tena ku ku kuatekesa ku belesela o jitata jê, né muéne se ki ku bhonza. Tu di longe dingi ia lungu ni phangu iê.

Ande dia Jezú kuíza mu ixi, muéne ua kexile ni Tat’ê Jihova ku diulu. Maji Jezú ua kexile ué ni jitata jê mu ixi. O majina mâ, Zuze ni Madiia. Eie uejiia kiebhi ene kia kituka jitata jê?—

Jihova ua katula o muenhu ua Jezú ku diulu, iu ua u te mu mala dia Madiia, phala Jezú ku mu vuala mu ixi, ni ku kala mu ixi. Kiki kiexile madiuanu! Jezú ua kulu mu mala dia Madiia, kála kiene mu kula o tuana mu mala a ji mama jâ. Mu ku bhita divua dia mbeji, Jezú a mu vuala. Kiene kia kituka Madiia ni muadi’uê Zuze, jitata ja Jezú mu ixi.

Kioso kia kexile ngó ni 12 a mivu, muéne ua bhangele kima kia londekesele kuila muéne ua zolele kiavulu Tat’ê, Jihova. Kiki kia bhitile kioso Jezú ni muiji uê kiendele mu Jeluzaleme, mu fesa ia Phasu. Kioso kia kexile mu vutuka ku bhata, Zuze ni Madiia akexile mu sota Jezú, maji ka mu sange. Eie uejiia kuebhi kua kexile Jezú?—

Zuze ni Madiia, a vutuka ni lusolo mu Jeluzaleme, mu ku sota Jezú mu ididi ioso. Ene a thandanganhele kiavulu, mukonda ka tenene ku mu sanga. Maji mu ku bhita izuua itatu, a mu sange mu tembulu! Uejiia se mukonda diahi Jezú ua kexile mu tembulu?— Mukonda muenhomo, muéne ueji tena ku di longa dingi ia lungu ni Tat’ê, Jihova. Muéne ua zolele kiavulu Jihova, iu ua mesenene kuijiia kiebhi kia tokalele ku mu belesela. Né muene kioso kia kudile kiá, Jezú ua kexile mu belesela Jihova ithangana ioso. Jezú ua belesele, né muene mu ithangana ia bhonzele. O kuila Jezú ua belesele ué Zuze ni Madiia?— O Bibidia i zuela kuila muéne ua belesele.

Ihi i u tena ku di longa mu phangu ia Jezú?— Eie ua tokala ku belesela o jitata jê, né muene se ki bhonza. Eie ua-nda belesela?—