Kyebhi o Henda Itukwatekesa Kutolola o Wôma

1. Ima yebhi itena ku tukwatesa wôma?

KU JIMBANGI ja Jihova amoxi adibhana ni ibhidi. Phange Nestor ni muhat’wê Madiya, amesenene kuya mu kididi mwabhindamene dingi aboki.b Phala kubhanga kiki, ene atokalele kulungulula o ukexilu wa mwenyu wâ. Maji ene akexile ni wôma wa kwila, kejitena kusanguluka ku mwenyu se ejikala ni kitadi kyofele. Kyoso Biniam kyakituka Mbangi ya Jihova, o kikalakalu kyetu mu ixi yenyoyo a ki fidisile. Mwene wamono kwila mukonda dya kukala Mbangi ya Jihova eji muzukutisa. Kiki kya mubhekela wôma. Maji mwene wexile dingi ni wôma walungu ni kyebhi kyeji divwa o mwiji wê, mu kwijiya kwila mwene wala mu ngeleja ya ubhe. Valérie wexile ni uhaxi wabhonzo wa Cancer, kyamubhonzele kyavulu kusanga dotolo weji xila o kibanzelu kyê kya kumusaka sé manyinga kala kitendelesa o Bibidya. Tutena kutendela se mukonda dyahi mwene wexile ni wôma wa kufwa.

2. Mukonda dyahi twatokala kutolola o wôma?

² O kwila eye wexile kyá ni wôma wa ima yiyi? Avulu mudyetu twexile kyá. Se tu kamba kutolola o wôma wetu, twanda sola ima yayibha, ima itena kuta mu kilwezu o ukamba wetu ni Jihova. Kiki kyene kya mesena Satanaji. Mwene utukwatesa we wôma phala kutubhangesa kubhukumukina o itumu ya Jihova, kala o kitumu kya kuboka o njimbu yambote. (Dij. 12:17) Satanaji kifumbe, kijibhanganga, wala we ni kutena. Maji eye utena kubhânga nê. Kyebhi?

3. Ihi yanda tukwatekesa kutolola o wôma?

³ Kyoso ki tuxikina ni kidi kyoso kwila Jihova watuzolo, ni kwila wala ku mbandu yetu, ki twandakala ni wôma wa Satanaji. (Jisá. 118:6) Mu kifika, o musoneki wa Sálamu 118 wa dibhanene ni ibhidi ku mwenyu wê. Mwene wexile ni jinguma javulu, sayi yâ exile ni maungana (jivelusu 9, 10). Mu kithangana kyenyókyo, mwene wexile mu dibhana ni izukutisu yonene (velusu 13). Jihova wa mubazela we ni nguzu yoso. (velusu 18). Né kiki, mwene wembi: “Ki ngi kala dingi ni wóma.” Ihi ya mubhangesa kukamba o wôma? Sumbala Jihova wa mubazelele, mwene wejidile kwila o Tata yê yadyulu wamuzolele kyavulu. O mukwa Jisálamu waxikinine ni kidi kyoso kwila kabasa kibhidi kyejidibhana nakyu, o Tat’ê ya henda mu ithangana yoso wejikala polondo phala ku mukwatekesa.—Jisá. 118:29.

4. Wôma wahi u twandatena kutolola se tuxikina kwila Nzambi watuzolo?

⁴ Etu twabhingi kuxikina kwila Jihova watuzolo. Kiki kyanda tukwatekesa kutolola maukexilu atatu a wôma: (1) o kuxinganeka kwila kitwandatena kudikila o mwiji wetu; (2) o wôma wa athu, ni (3) wôma wa kufwa. O jiphange ji twatumbula mu kaxi ka dyanga, atena kutolola o wôma mukonda ene axikinine mu henda ya Nzambi.

O WÔMA WA KUXINGANEKA KWILA KITWANDATENA KUDIKILA O MWIJI WETU

5. Ima yebhi itena kutandanganyesa kyavulu o mutwameni wa mwiji? (Tala o foto yakapa.)

⁵ O mutwameni wa mwiji Mbangi ya Jihova, umona kwila o kikalakalu kyê kya kudikila o mwiji kikalakalu kyadikota mwene. (1 Ti. 5:8) Se u mutwameni wa mwiji, nange mu kithangana kiki kya uhaxi wa COVID-19, eye watandanganyele yalungu ni kuxala sé salu. Nange watandanganyele we yalungu ni kukamba kudikila o mwiji wê, kukamba kitadi phala kufuta o lenda mba phala kukala ni inzo. Nange wexile we ni wôma wa kwila se wejixala sé salu, kiweji tena dingi kusanga salu yengi. Mba kala phange Nestor ni Madiya, twa atumbula ku dimatekenu dya milongi yiyi, eye waxinganeka kwila kiwejitena kukala kyambote ku mwenyu se wejikala ni kitadi kyofele. Mukonda dya wôma wa ima yiyi, Satanaji wabhangesa athu avulu kweha kubheza Jihova.

6. Ihi isota kutuxikinisa Satanaji?

⁶ Satanaji usota kutuxikinisa kwila Jihova katusuwu ni kwila mwene kanda tukwatekesa kudikila ni kulanga o mwiji wetu. Mukonda dya kiki, tutena kubanza kwila twatokala kubhanga yoso itutena phala kunangenena mu salu yetu, né mwene se tubhukumukina o itumu ya Bibidya.

7. Ihi yatudyelelesa Jezú?

⁷ Jezú mwéne wabetakota kwijiya o Tata yetu, muthu wosowoso ndenge. Mwene watudyelelesa kwila Nzambi yetu “wejiya kyá o ima i [twa] bhindamena ande mwene dya ku mu bhinga.” (Mat. 6:8) Jezú wejiya we kwila Jihova wala polondo phala kulanga o ibhindamu yetu. Kuma tu Jikidistá, twala tu mwiji wa Nzambi. Tutena kudyelela kwila o mutwameni wa mwiji, Jihova, wandakumbidila o kitumu kyala mu mukanda wa 1 Timote 5:8.

8. (a) Ihi yandatukwatekesa kutolola o wôma wa kuxinganeka kwila kitwandatena kudikila o mwiji wetu? (Matesu 6:31-33) (b) Kyebhi kitutena kukayela o phangu ya dikaza amubheka kadikoka kwa phangyâ mu nzumbi?

⁸ Kyoso kituxikina kwila Jihova watuzolo, wazolo we o mwiji wetu, kikyanda tubhonza kudyelela kwila mwene wandatubhana yoso itwabhindamena. (Tanga Matesu 6:31-33.) Jihova wamesena kutubhana o ima itwabhindamena. Mwene Mubhani wa henda! Kyoso kyabhange o ixi, mwene kabhange ngó ima itwabhindamena phala kukala ku mwenyu. Ni henda yoso, wezalesa o ixi ni ima yavulu yejisangulukisa o mwenyu wetu. (Dim. 2:9) Né mwene se sayi ithangana tukala ni ima yoso itwabhindamena, tutena kulembalala kwila, o ima itwatena kukala nayu Jihova mwéne watubhanayu. (Mat. 6:11) Twabhingi kuxinganeka kwila o nguzu yoso itubhanga lelu ki isokela ni mabesá andatubhana o Nzambi yetu ya henda kikale lelu mba ku hádya. Kiki kyene kyadilongo phange Nestor ni Madiya.—Iza. 65:21, 22.

9. Ihi itutena kudilonga mu phangu ya phange Nestor ni phange Madiya?

⁹ Phange Nestor ni phange Madiya akexile ni inzo yafwama ni salu yambote mu ixi ya Colômbia. Ene ambe: “Twexile muxinganeka kusosolola o ima ku mwenyu wetu phala kusanzumuna o ukunji wetu. Twexile ni wôma wa kwila kitweji sanguluka ku mwenyu se twejikala ni kitadi kyofele.” Ihi ya akwatekesa kutolola o wôma wâ? Ene axinganeka mu maukexilu avulu a Jihova kya alondekesa o henda yê. Mu kubanza kwila Jihova wanda kwalanga jinga, ene axisa o kikalakalu kyâ mwakexile mu kwafuta kitadi kyavulu. Asumbisa o inzo yâ, ya ayi mu mbandu ya ixi mwabhindamene dingi aboki. Kyebhi kyadivu yalungu ni ima yasolo? Phange Nestor wambe: “Twamono ku mwenyu wetu o kikumbidilu kya Matesu 6:33. Nuka kwa tukambele kima kitwabhindamene. Kindala twasanguluka dingi ku mwenyu wetu.”

O KUKALA NI WÔMA WA ATHU

10. Mukonda dyahi ki tutokala kudiwana kyoso o athu kyakala ni wôma wa akwâ?

¹⁰ Tundé ukulu o athu ene mubhanga kyayibha ku akwâ. (Ndo. 8:9) Mu kifika, o jinguvulu atalatala kyayibha o athu mukonda dya kutena kwala naku, o ijibhangânga abhanga usweya ku akwâ, o athu mu xikola ene mulongolola akwâ ni kwa kwatesa wôma, sayi yá a abeta mwene ku jindandu jâ ni undanda woso. Mukonda dya kiki ki tutokala kudiwana kyoso o athu kyakala ni wôma wa akwâ! Ihi yene musota kubhanga Satanaji kokwetu mukonda dya wôma yú?

11-12. Kyebhi Satanaji kyasota kutuzukutisa bhukaxi ka wôma wa athu?

¹¹ Satanaji usota kutubhangesa kukala ni wôma wa athu phala ki twabokele mba phala twehe kusidivila Jihova. Bhukaxi ka ifunyisu ya Satanaji, o jinguvulu jene mufidisa o kikalakalu kyetu ni kutuzukutisa. (Luk. 21:12; Dij. 2:10) Ku mundu wa Satanaji, athu avulu amwanga makutu alungu ni Jimbangi ja Jihova. O athu axikina mu makutu yá atuxongwena, atubeta, mba atubhana dikunda. (Mat. 10:36) O kwila tudiwana ni mibhetu yiyi ya Satanaji? Kana. M’ukulu mwene wazukutisile kyá o Jikidistá bhukaxi ka ima yiyi!—Ika. 5:27, 28, 40.

¹² Satanaji katuzukutisa ngó bhukaxi ka wôma wa jinguvulu. Sayi athu ala ni wôma, se kyebhi o jindandu jâ andadivwa se ene akituka Jimbangi ja Jihova. Kiki kya abhangesa kukala dingi ni wôma, o kwabeta ndenge. Ene azolo kyavulu o jindandu jâ, mu kiki amesena kuma ene ejiya Jihova ni kumuzola we. Ene aluwala kyavulu mu kwivwa o jindandu jâ kuzwela kyayibha yalungu ni Nzambi yakidi ni abhezi’ê. Maji sayi bhabha o athu exile mutuzukutisa ku dimatekenu, kupholo dya kwenda akituka Jimbangi ja Jihova. Maji tuxinganeke hanji se o jindandu jetu atubhana dikunda mukonda dya kukala tu Jimbangi ja Jihova. Ihi itwandabhanga?

13. Kyebhi o kudyelela mu henda ya Nzambi kwanda tukwatekesa, né mwene se mwiji wetu utubhana dikunda? (Jisálamu 27:10)

¹³ O izwelu yala mu divulu dya Jisálamu 27:10 ituswinisa kyavulu. (Tanga.) Né mwene se o jindandu jetu atubhana dikunda, tudivwa kyambote kyoso kitulembalala kwila Jihova watuzolo kyavulu. Tudyelela kwila mwene wanda tubesowala mukonda dya kukolokota kwetu. Jihova wandabeta dingi kota mukulanga o ibhindamu yetu mu xitu ni mu nzumbi, muthu woso woso ndenge! Kiki kyene kyabhiti ni phange Biniam, twamutumbula ku dimatekenu dya milongi yiyi.

14. Ihi itutena kudilonga mu phangu ya phange Biniam?

¹⁴ Phange Biniam wakituka Mbangi ya Jihova, né mwene mu kwijiya kwila o jinguvulu eji muzukutisa lwavulu. Tala kyebhi o kwijiya kwila Jihova wamuzolo kyavulu kwakwatekesa phange Biniam kutolola o wôma wa athu. Mwene wambe: “O izukutisu yavudile, o ingakexile mubanza ndenge. Maji ngexile dingi ni wôma wa izukutisu yejitunda ku mwiji wami, o izukutisu ya jinguvulu ndenge. Ngexile ni wôma wa kwila, o kukala Mbangi ya Jihova kweji luwalesa tat’etu kuma mwene kexile phangyetu. Ni kwila o mwiji wami weji xinganeka kuma, ki nganda kwaxila dingi.” Maji phange Biniam wadyelele kwila Jihova ulanga yó oso amuzolo. Phange Biniam wambe dingi: “Ngaxinganeka kyebhi Jihova kyakwatekesa o jiphange jetu akolokota mu ibhidi yakukamba kitadi, exile mudibhana ni katombo ni yó a abeta ku athu avulu. Ngejidile kwila se ngikolokota mu ufiyele wami kwa Jihova, mwene weji ngibesowala. Kyoso kyangitele mukaleya ni kungibeta kyavulu, ngamono ni mesu mami kwila Jihova utukwatekesa jinga se tumukala fiyele.” Jihova wakituka Tata phala phange Biniam, o jiselevende Jê akituka mwiji phala mwene.

O WÔMA WA KUFWA

15. Mukonda dyahi o kukala ni wôma wa kufwa ku tukwatekesa?

¹⁵ O Bibidya yamba kuma o kufwa nguma. (1 Ko. 15:25, 26) Etu tukala ni wôma wa kufwa, kyoso kitukala ni phange mba ndandu yetu twamuzolo wamukata lwavulu. Mukonda dyahi twala ni wôma wa kufwa? Mukonda Jihova watubhange ni hanji yakukala ni mwenyu katé ku hádya ni hádya. (Ndo. 3:11) Maji sayi bhabha o kukala ni wôma wa kufwa ku tukwatekesa kulanga o mwenyu wetu. Mu kifika, o wôma yú utena kutukwatekesa kusola kyambote o ima itwandadya ni kutungutisa o mukutu wetu, ni kusota o kikwatekesu kya jidotolo ni kutambula we tu milongo se kibhana. Wene utukwatekesa we kulenga o ima yeji ta o mwenyu wetu mukilwezu.

16. Kyebhi Satanaji kyasota kutubhangesa kubhana dikunda kwa Jihova mukonda dya wôma utwala nawu wa kufwa?

¹⁶ Satanaji wejiya kwila etu tubhana valolo ku mwenyu wetu. Maji mwene wambe kuma twandabhanga yoso itutena katé mwene kweha o ukamba wetu ni Jihova, phala kulanga ngó o mwenyu wetu ku mundu yú. (Jobe 2:4, 5) Maji Satanaji wabele! Kuma mwene “wala [hanji] ni kutena kwa kubheka o kufwa,” Satanaji usota kutubhangesa kubhana dikunda kwa Jihova mukonda dya wôma utwala nawu wa kufwa. (Jih. 2:14, 15) Sayi bhabha o athu ene mwafunyisa kwa Satanaji, amba kwila andatujibha se kitweha o kixikanu kyetu. Mu ithangana ya mukwá, Satanaji umona kwila twala ni uhaxi wabhonzo, mwene utena ku tukwatesa wôma phala tubhane dikunda kwa Jihova. Nange o jidotolo mba o jindandu jetu ki Jimbangi ja Jihova, atujijidika kutambula manyinga. O kubhanga kiki kubhukumukina o kitumu kya Nzambi. Mba atubhana ndunge phala kuxikina kutusaka mu ukexilu wengi utena kubhukumukina o itumu ya Nzambi.

17. Kala kilondekesa Loma 8:37-39, mukonda dyahi kitwatokala kukala ni wôma wa kufwa?

¹⁷ Sumbala etu kitwamesena kufwa, maji twejiya kwila Jihova wandasuluka mu kutuzola né mwene se tufwa. (Tanga Loma 8:37-39.) Kyoso ki kufwa kamba dya Jihova, Jihova usuluka ku mulembalala kala wala hanji ku mwenyu. (Luk. 20:37, 38) Mwene wamesena kyavulu ku mubheka dingi ku mwenyu. (Jobe 14:15) Jihova wafutu kima kyala ni valolo yadikota phala tutene kutambula o “mwenyu wakalelaku.” (Nzw. 3:16) Twejiya kuma Jihova watuzolo kyavulu, mwene utulanga. Kyoso kitwala ni uhaxi wabhonzo mba atutangela kwila twandafwa, mu veji dya kubhana dikunda kwa Jihova, tulengela kwa mwene phala kutukonda o malamba, kutubhana unjimu ni kutubhana nguzu. Kiki kyene kyabhange phange Valérie ni mwadi wê.—Jisá. 41:3.

18. Ihi itutena kudilonga mu phangu ya phange Valérie?

¹⁸ Kyoso kyexile ni 35 amivu, phange Valérie amutangela kwila wexile ni uhaxi wabhonzo wa cancer. Tala kyebhi o henda yamukwatekesa kutolola o wôma wa kufwa. Mwene wambe: “Kyoso kya ng’ambela kiki, mwenyu wami walunguluka. Abhingile ku ngibhanga pelasá yadikota. Ngadizwelesa ni jidotolo javulu, maji enyoso aditunu ku ngibhanga pelasá sé ku ngibhana manyinga. Eme ngexile ni wôma, maji mukonda dya itumu ya Nzambi, ngaditunu kutambula manyinga! Ku mwenyu wami woso, Jihova wangilondekesa henda yavulu. Kyokyo kyexile o kithangana phala kulondekesa o henda yami kwa mwene. Kyoso kingexile mutambula jinjimbu jayibha, ngexile dingi polondo phala kusangulukisa Jihova ni kulondekesa kwila Satanaji wabele. Mu kusukako, angibhange pelasá sé kutambula manyinga. Sumbala o uhaxi wami wamusuluka hanji, Jihova wene mungibhana yoso ingabhindamena. Ande dya jidotolo kungitangela webhi o uhaxi wami, mu kyônge kya disukilu dya semana, twadilongo milongi ni dyambu: ‘Ku Dibhana ni Ibhidi ia Lelu ni ku Suína.’c O milongi yiyi ya tuximbakatesa kyavulu. Twatange o milongi yiyi mu jiveji javulu. Kutanga milongi kala yiyi, kuboka ni kuya mu yônge, kwa ngikwatekesa eme ni mwadi wami kukala ni muxima wa tululuka.”

KYEBHI KITUTENA KUTOLOLA O WÔMA WETU

19. Kwakambe ngó bhofele, ihi yandabhita?

¹⁹ Ni kikwatekesu kya Jihova, o Jikidistá ku mundu woso, ene mutolola o ibhidi yâ ni kuditunda kyambote mu kuzoka ni Dyabhu. (1 Ph. 5:8, 9) Eye we utena! Kwakambe ngó bhofele, Jihova wanda tuma Jezú ni yó amutumina nê kumoxi “phala kubwikisa o ikalakalu ya Dyabhu.” (1 Nz. 3:8) Kyoso kyandabhanga kiki, o jiselevende ja Nzambi jandakala mu ixi, kanda “kala dingi ni kekenya mba wôma wa kima.” (Iza. 54:14; Mik. 4:4) Maji katé ki bhixila o kithangana kiki, twatokala hanji kubhanga nguzu phala kutolola o wôma wetu.

20. Ihi yandatukwatekesa kutolola o wôma wetu?

²⁰ Phala kutolola o wôma wetu, twatokala kusuluka mu kukolesa o kidyelelu kyetu mu kwila Jihova wazolo, ulanga o jiselevende jê. O yandatukwatekesa kubhanga kiki o kuxinganeka ni kuzwela kyebhi Jihova kyalange o jiselevende jê m’ukulu. Tutena we kulembalala kyebhi mwene kyatukwatekesa kutolola o ibhidi itwadibhele nayu. Ni kikwatekesu kya Jihova, tutena kutolola o wôma wetu!—Jisá. 34:4.