Kioso Adá ni Eva kia a kaie mu jaludim ia Edene, ene a mateka kuvuala ana avulu. O mona uâ, ua dianga Kaini, ua kituka kidimakaji, o mona ua kaiadi, Abele, ua kituka mubhidi ua jimbudi.

Sai kizuua, Kaini ni Abele a bhana jisata kua Jihova. Eie uejiia se sata ihi? Ujitu ua katunda. Jihova ua sangulukile ni ujitu ua Abele maji ka sangulukile ni ujitu ua Kaini. Kiki kia bhangesa Kaini kukala ni njinda iavulu. Jihova ua tangela Kaini kuila, o njinda iê ieji mu bhangesa kuta kituxi. Maji Kaini ka belesela kana.

Mu kiki, Kaini ua tangela Abele: ‘Tuende ku mábhia.’ Kioso kia kexile ngó kiiadi kiâ ku mábhia, Kaini ua jibha phang’ê. Ihi ieji bhanga Jihova? Jihova ua mu bhana kaxtiku iu ua mu tumikisa dikanga dia muiji uê. Kaini keji vutuka dingi kubhata.

Ihi i tua dilongo? Tu tena kukala ni njinda se tu mona kuila o ima ki ia mu bhita kala ki tua mesenene. Se tu mona kuila tua mu kala ni njinda, mba se muthu u tu tangela kuila tu akua njinda, tua tokala kubhanga ioso phala kueha o ukexilu iú uaiibha, phala ki u tu bhangese kuta kituxi.

Abele ua zolele Jihova iu ua kexile mu bhanga ima iambote. Mukonda dia kiki Jihova ka-nda mu jimba. Nzambi ua-nda bheka dingi Abele ku muenhu kioso o ixi ki ia-nda kala palaízu.

Mu kubhita thembu o ixi iezalele ni athu. Athu avulu exile aiibha. Katé muene sai jianju mu diulu ja kitukile jaiibha. Ene a xisa o kididi kiâ mu diulu, eza mu ixi. Eie uejiia se mukonda diahi a bhange kiki? Mukonda ene a mesenene kukazala ni ahatu.

O ahatu a jianju a vuala ana. O ana iá a kituka mazonda. Ene akexile mu beta o athu. Maji Jihova keji kuehela kuila, o ima íii i suluka. Mu kiki, Jihova ua banze kubuikisa o athu a iibha bhu kaxi ka dilúviu.

Maji kuexile diiala diambote. Muene ua zolele Jihova. O dijina diê diexile Noué. Muene ua kexile ni muhatu umoxi ni tuana tutatu, Seme, Hame ni Jafete, ene akexile ue ni ahatu. Jihova uambe kua Noué phala kutunga álaka ia dikota, phala Noué ni muiji uê kubhuluka ku Dilúviu. O álaka, kaxa ionene i tena kuleluka ku thandu’a menha. Jihova uambe ue kua Noué phala kuambata ibhaku iavulu moxi a álaka phala kubhuluka ue.

Sé kulaleka, Noué ua mateka kutunga o álaka. Noué ni muiji uê a bhiti 50 a mivu ndenge mu kutunga o álaka. Ene a tungu o álaka kala kia tumine Jihova. Kioso kia kexile mu tunga o álaka, Noué ua dimuna o athu ia lungu ni Dilúviu. Maji sé-ku muthu ua muívu.

Mu kusuka-ku, o kithangana kia kubokona mu álaka kia bhixila. Tu mone ihi ia bhiti.