Mu mbanza ia Ninive, mu ixi ia Asídia, o athu iaiibhile kiavulu. Jihova ua tangela polofeta Jona phala kuia mu mbanza ia Ninive ni kudimuna o athu, n’a lungulule o ukexilu uâ. Maji Jona ua ditela mu njila iengi. Muéne ua bande mu baluku, phala kulengela mu mbanza ia Talxixi.

Kioso o baluku kia kexile mu kalunga, kitembu kia dikota kia mateka, akalakadi a baluku akexile ni uôma uavulu. Ene a sambe ku jinzambi jâ, ia ebhuidisa: ‘Mukonda diahi o kitembu kiki kia moneka?’ Mu kithangana kienhokio, Jona ua a tangela uixi: ‘Eme ngi mukua kikuma. Nga mu lenga kima kia ngi tumu kuala Jihova, phala ku ki bhanga. Ngi takulienu mu kalunga, o kitembu kia-nda tululuka.’ O akalakadi a baluku, ka mesenene kutakula Jona mu kalunga, maji muéne ua a jijidika. Kioso ene kia mu takula mu kalunga, o kitembu kia tululuka.

Jona ua banze kuila, ueji fua. Kioso kia kexile mu boba mu kalunga, muéne ua sambe kua Jihova. Jihova anga u tumikisa mbiji ia dikota. O mbiji ia minha Jona, maji ki ia mu jibha. Mu mala dia mbiji, Jona ua sambe: ‘Nga-nda belesela kiá ithangana ioso.’ Jihova ua bhake Jona mu mala dia mbiji mu izuua itatu, iu ua bhangesa o mbiji kulusa Jona ku museke.

Kuma Jihova ua mu bhulula, o kuila Jona ka tokalele dingi kuia mu mbanza ia Ninive? Kana. Jihova ua tangela dingi Jona phala kuia-mu. Kindala, Jona ua belesela. Muéne uai-mu iu uambela o athu a iibha: ‘Mu 40 a izuua, o mbanza ia Ninive, a-nda i buikisa.’ Mu kusuluka, kua bhitile kima kiambote—akua Ninive evu o njimbu anga a lungululula ukexilu uâ. O sobha ia Ninive uambela o mundu uê uixi: ‘Diondelenu Nzambi, diele-nu o ituxi. Nange muéne ka-nda tu buikisa.’ Kioso Jihova kia mono kuila, o mundu ua diele o ituxi iâ, muéne ka buikisile o mbanza ia Ninive.

Jona njinda ia mu kuata, mukonda o mbanza ki i buikile. Xinganeka: Jihova ua londekesele muanhu ni henda kua Jona, maji Jona ka londekesa henda ku akua Ninive. Mu veji dia kiki, muéne ua xikama bhu kanga dia mbanza mu kilembeketa kia músala ua dinhángua, ni pholo ia futuluka. Mu kusuluka, o muxi ua kukutile, Jona njinda ia mu kuata dingi. Mu kienhiki, Jihova ua mu tangela uixi: ‘Eie ua zolo dingi o muxi iú, akua Ninive ndenge. Eme nga a kuatela henda, ia a bhuluka.’ Disá diahi dia mesenene kulonga Jihova? Akua Ninive a betele-o-kota, o muxi uoso-uoso ndenge.

O Utuminu ua Asídia, ua tambuile o dikuinhi dia miji ia utuminu ua Izalaiele. Mu kiki, Senakedibe, sobha ia Asídia ua mesenene kutambula o miji iiadi ia utuminu ua Judá. Muéne ua mateka kutambula o jimbanza ja Judá. Maji o mbanza ia mesenene dingi o kutambula, o mbanza ia Jeluzaleme. Senakedibe kejidile kuila Jihova ua kexile mu langa o mbanza ia Jeluzaleme.

Ezekiia o sobha ia Judá ua futile kitadi kiavulu kua Senakedibe phala ka tambule o mbanza ia Jeluzaleme. Sumbala Senakedibe uambata o kitadi, muéne ua tumikisa dingi o masoladi mê a nguzu phala kutambula o mbanza ia Jeluzaleme. O athu mu mbanza akexile ni uôma uavulu, mukonda evuile kuila akua Asídia akexile mu kuiza. Mu kiki Ezekiia ua a tangela, uixi: ‘Ki mu kale ni uôma. Mu kidi, akua Asídia mazonda, maji Jihova ua-nda tu bhangesa kukala kota mu kutena, ene ndenge.’

Senakedibe ua tumikisa o mukunji uê, Labesaki, mu mbanza ia Jeluzaleme phala kuxinga o mundu. Labesaki uemana bhu kanga dia mbanza iu ua dikola: ‘Jihova ka tena ku mi kuatekesa. Ki muehele Ezekiia ku mi nganala. Sé-ku nzambi u tena ku mi bhulula bhu maku metu.’

Ezekiia uebhuidisa Jihova se ihi ia tokalele o kubhanga. Jihova ua tambuijila: ‘Ki mu kale ni uôma mukonda dia izuelu ia tange Labesaki. Senakedibe ka-nda tambula o mbanza ia Jeluzaleme.’ Mu kubhita izuua, Senakedibe ua sonekena Ezekiia. O mikanda iambele kiki: ‘Dibhekienu ngó. Jihova ka-nda tena ku mi bhulula.’ Ezekiia ua sambe: ‘Jihova tua ku dióndo, tu bhulule, phala athu oso ejiie kuila eie ngó u Nzambi ia kidi imoxi-élele.’ Jihova ua mu tangela: ‘O sobha ia Asídia ka-nda tena kubokona mu mbanza ia Jeluzaleme. Nga-nda langa o mbanza iami.’

Senakedibe ua tele ku muxima uê kuila o mbanza ia Jeluzaleme ueji i tambula. Maji saí kizuua, mu usuku, Jihova ua tumikisa anju mua kexile o masoladi, bhu kanga dia mbanza. O anju ia jibha 185.000 a masoladi! O mazonda moso a sobha Senakedibe afu. Mu kiki, muéne a mu tolola anga u vutuka kubhata. Jihova ua lange Ezekiia ni mbanza ia Jeluzaleme kála kia ki tangele. Eie se ua kexile mu mbanza ia Jeluzaleme, o kuila ueji dielela kua Jihova?