Mu ithangana iavulu, o mundu ua Judá ua kexile mu bhana dikunda kua Jihova iá akexile mu bheza jinzambi ja makutu. Mu mivu iavulu, Jihova ua bhange ioso phala kua kuatekesa. Ua tumikisa polofeta javulu phala ku a dimuna maji ene ka bhele mátui. Akexile mu kuelela o ima ia kexile mu zuela o jipolofeta. Ihi ia bhange Jihova phala kuzubha ni ubhezelu uenhó ua iteka?

O sobha ia Babilonha, Nabukodonozolo ua kexile mu tambula o jixi joso. Mu veji ia dianga, kioso kia tambula o mbanza ia Jeluzaleme, muene uambata o Sobha Nzuaki, o ilamba, o masoladi ni mala a mukuá, eneoso iá ua ambata mu ixi ia Babilonha. Nabukodonozolo ua katula o imbamba ioso ia kexile mu tembulu ia Jihova iu ua iambata. Nabukodonozolo, ua solo Zedekiia kukala sobha ia Judá.

Ku dimatekenu, Zedekiia ua belesela Nabukodonozolo. O jimbanza ja zukamene ni jipolofeta ja makutu, a tangela Zedekiia phala kubhukumukina o sobha ia Babilonha. Jelemiia ua mu dimuna: ‘Se u bhukumuka, kua-nda fua mundu uavulu, kua-nda kuiza nzala ni mauhaxi moxi ia Judá.’

Kioso Zedekiia kia tumina mu dinake dia mivu, muene ua lungulukila Babilónha. Ua bhingi kikuatekesu kua akua Ijitu. Mu kiki, Nabukodonozolo ua tumina o masoladi mê kukondoloka o mbanza ia Jeluzaleme ni ku i tambula. Jelemiia ua tangela Zedekiia: ‘Jihova uambe kuila se u dibheka kua Babilonha, eie ni mundu uoso, mua-nda bhuluka. Maji se u dituna kudibheka, akua Babilonha a-nda ta túbhia mu mbanza ia Jeluzaleme, a-nda ku kuambata ku ubhika.’ Zedekiia ua tambuijila: ‘Ki nga-nda di bheka kana!’

Mu kubhita muvu umoxi ni kaxaxi, akua Babilonha a bulu o ilumbu ia Jeluzaleme iá a te túbhia mu mbanza ioso. Ene a jokotesa o tembulu, a jibha mundu uavulu iá a kutu jimidi ni jimidi ja athu.

Zedekiia ua lenge mu Jeluzaleme, maji akua Babilonha a mu kaiela. A mu kuata bhua zukamene o mbanza ia Jedikó, iá a mu ambata katé ku Nabukodonozolo. O sobha ia Babilonha ua tumu kujibha o an’â Zedekiia bhu pholo ia tat’â. Mu kusuluka, Nabukodonozolo ua tufula o mesu a Zedekiia iu ua mu te mu kaleia, ua kexile muenhomo katé kiafu. Maji Jihova ua kanena o mundu ua Judá uixi: ‘Mu kubhita 70 a mivu, nga-nda mi bheka ku dibhata dienu, mu mbanza ia Jeluzaleme.’

Ihi ieji bhita ni minzangala a a kutile iá a ambatele mu ixi ia Babilonha? O kuila eji suluka kukala fiiele kua Jihova?

Kioso Nabukodonozolo kiambata o ilamba ia Judá mu mbanza ia Babilonha, muene ua tumina kota dia jingolambole a muixanene Aspenaze phala kulanga o ilamba. Nabukodonozolo uambela Aspenaze phala kusota mu ilamba ioso, uoso o munzangala ua beta kudisanza ni kudimuka. O minzangala enhá eji ku a longa mu mivu itatu. Eji ku a longa kukala akalakadi a katunda mu ixi ia Babilonha. O minzangala a tokala kuijiia kutanga, kusoneka ni kuzuela Akadianu o dimi dia akua Babilonha. A tokalele ue kudia o kúdia kua kexile mudia o sobha ni athu oso mu mbonge iê. O majina a minzangala enhá: Daniiele, Hananiia, Mizaiele ni Azadiia. Aspenaze ua a bhana majina engi a lungu ni Babilonha: Betezazale, Sadalake, Mizake ni Abede-neko. O kuila o ulongelu iú ueji kua bhangesa kujimba Jihova?

O minzangala iuana íii ia kexile polondo phala kubelesela Jihova. Ene ejidile kuila, kua kexile kudia kua akua Babilonha, ene ka tokalele ku kúdia, mukonda o Kitumu kia Jihova kia tangele kuila, kudia koko kua xidi. Mu kiki, ene a tangela Aspenaze: ‘Tua ku dióndo kana ku tu bhana o kúdia kua sobha.’ Aspenaze ua a tangela: ‘Se ki mu di, o sobha ua-nda mi mona kuila mua bhele, muene ua-nda ngi jibha!’

Daniiele ua xinganeka kima. Muene ua mu vutuila: ‘Tua ku diondo, tu bhane ngó kudia kua mabhia ni menha mu dikunhi dia izuua. Anga u tu sokesa ni minzangala a mu dia o kúdia kua sobha.’ Aspenaze ua xikina.

Mu kubhita o dikuinhi dia izuua, Daniiele ni makamba mê a betele kuneta, minzangala ia mukuá ndenge. Jihova ua sangulukile kiavulu mukonda a mu belesele. Jihova ua bhana kua Daniiele o uhete ua kujimbulula isuma ni jinzoji.

Kioso kia zubha o kua longa, Aspenaze ua bheka o minzangala katé kua Nabukodonozolo. O sobha ua zuela-nau iu ua mono kuila Daniiele, Hananiia, Mizaiele ni Azadiia a betele kudimuka minzangala ia mukuá ndenge. Ua solo kiuana kiâ phala kukalakala mu mbonge iê. Mu ithangana iavulu, sobha ua kexile mua exana phala kua bhinga phangu phala kubatula kiambote o maka. Jihova ua a bhana unjimu uavulu, o jinganga ja sobha ndenge.

Sumbala ene akexile mu ixi ia ngene, Daniiele, Hananiia, Mizaiele ni Azadiia ka jimbile kuila ene a tokalele kua Jihova. O kuila ua-nda lembalala jinga Jihova né muene se kualé kumoxi ni jitata jé?