Saí kizuua mu usuku, o Sobha Nabukodonozolo ua loto nzoji. O nzoji ia lotele ia kexile mu mu thandanganhesa kiavulu, mukonda dia kiki, muene ka tenene kuzeka. Muene uexana jinganga jê anga ua a tangela uixi: ‘Ngi jimbuluilenu o nzoji.’ Ene a mu ambela exi: ‘Sobha, tu tangele o nzoji i ua loto.’ Maji Nabukodonozolo ua ambela uixi: ‘Kana! Ngi jimbuluilenu enu, se ki mu ngi jimbulula-mi, nga-nda mi jibha.’ O jinganga a mu ambela dingi, exi: ‘Tu tangele o nzoji i ua loto, anga tu i jimbulula kokué.’ Muene uambe: ‘Enu oso mua mesena ku ngi nganala. Ngi jimbuluilenu ihi i nga loto!’ Ene a tangela sobha exi: ‘Sé-ku muthu u tena kubhanga kiki. O kima ki ua mu bhinga, muthu uoso-uoso ka tena ku ki bhanga.’

Nabukodonozolo njinda ia mu kuata iu ua tumu kuila, jinjimu joso mu ixi iê a tokalele ku a jibha. Mu jinjimu mua kexile ue Daniiele, Sadalake, Mizake, ni Abede-neko. Daniiele ua bhingile kua sobha kithangana. Mu kienhiki, muene ni makamba mê, a sambe kua Jihova mu kubhinga kikuatekesu. Ihi ia bhangele Jihova?

Mu kisuma, Jihova ua londekesa kua Daniiele o nzoji ia Nabukodonozolo ni dilomboluelu diê. Mu kizuua kia mukuá, Daniiele uai katé ku selevende ia sobha iu ua mu ambela uixi: ‘Kana kujibha o jinjimu. Eme ngi tena kujimbulula o nzoji ia sobha.’ O selevende uambata Daniiele katé kua Nabukodonozolo. Daniiele ua tangela sobha uixi: ‘Nzambi ua ku londekesa o hádia. Nzoji iê ien’íii: Eie ua mono o kiteka kionéne kiala ni mutué ua ulu, o phetu ni maku a phalata, o mala ni matabela a ngôndo, o inama ia felu, ni makanda a inama a fungisa ni felu ni utuma. Mu suluka, sai ditadi dia tundu ku mulundu, anga dia bukujula o makanda a inama a kiteka. O kiteka a ki sasujula kia kituka ibhiate mba utokua, anga a iambata ku kitembu. O ditadi dia kituka mulundu uonéne, anga uezalesa o ixi ioso.’

Mu kienhiki Daniiele uambe uixi: ‘O dilomboluelu dia nzoji ié dienhidi: O mutué ua ulu, uene o utuminu ué. O phalata, uene o utuminu ua-nda bhingana o utuminu ué. Mu kubhita kithangana kua-nda kuíza utuminu ua difu ni ngôndo, iu ua-nda tumina o ngongo ioso. O utuminu ua-nda kaiela-ku, ua-nda kala ni nguzu kála ia felu. Mu kusuka-ku, kua-nda kuíza utuminu uo uane mu mbandu jiiadi, sai mbandu i kala ni nguzu kala felu o ia mukuá ia zoza kala utuma. O ditadi dia dibhange mulundu, dilombolola o Utuminu ua Nzambi. O utuminu iú ua-nda sasujula o mautuminu oso iá, anga ua-nda xalela-ku katé ku hádia ni hádia.’

Nabukodonozolo ua bhetama bhoxi bhu pholo ia Daniiele. Nabukodonozolo uambe: ‘Nzambi ié ua londekesa o nzoji íii kokué. Sé-ku Nzambi kála muene.’ Mu veji dia kujibha Daniiele, Nabukodonozolo ua mu tula ku pholo dia jinjimu joso ja ixi ni atuameni a kibatu kia Babilonha. U tena kumona kiebhi Jihova kia tambuijila o musambu ua Daniiele?

Mu kubhita kithangana, kioso Sobha Nabukodonozolo kia lotele o nzoji ia lungu ni kiteka, muene ua bhangele kiteka kionene kia ulu. Muene ua ki tele mu honga ia Dula, anga uexana makota oso mu ixi, kála Sadalake, Mizake, ni Abede-neko, phala kudibhongolola ku pholo dia kiteka. O sobha ua tumu: ‘Kioso kia-nda xika o jimbánza, o jikoloneta, ni ngaieta ia jiphukila, fukamenu ku kiteka! Muthu uoso-uoso ka fukama ku kiteka, a-nda ku mu takula ku kijiku kia uama túbhia.’ O kuila, o minzangala itatu Jihebeleu, eji fukama ku kiteka, inga eji bheza ngó Jihova?

Anga sobha ua tumu phala kuxika o muimbu. Mundu uoso ua fukamena o kiteka, maji Sadalake, Mizake ni Abede-neko ka ki fukamena. Sai maiala a mono kia bhiti, a tangela sobha, exi: ‘O Jihebeleu jenhiji, ka xikina kubheza o kiteka kié.’ Nabukodonozolo ua tumikisa dingi o maiala enhó kua ene, anga uambela Jihebeleu, uixi: Nga-nda mi bhana kithangana kia mukuá phala mu bheze o kiteka. Se mu dituna, nga-nda mi takula ku kijiku kia uama o túbhia. Sé-ku nzambi u tena ku mi bhulula bhu maku mami.’ Mu kienhiki, ene a mu ambela, exi: ‘Ki tu bhingi ku tu tangela dingi. Nzambi ietu u tena ku tu bhulula. Né muene se ka tu bhulula, sobha, ki tua-nda bheza o kiteka.’

Nabukodonozolo njinda ia mu kuata. Muene ua tangela o maiala, uixi: ‘Temesenu dingi o kijiku kia túbhia lusambuadi!’ Muene anga ua tumu o masolodi mê: ‘Kutienu o Jihebeleu jiji, a takulienu mu kijiku!’ O kijiku kia temenene kiavulu, kioso o masoladi kia zukama, afu mu kithangana kienhokio. O kitatu kia Jihebeleu a a takula mu kijiku. Maji, kioso Nabukodonozolo kia mono mu kijiku, mu veji dia kukala kitatu kia athu, akexile-mu kiuana kia athu. Muene uôma ua mu kuatele, iu uambe: ‘Etu ki tu takula ngó kitatu kia athu mu kijiku? Nga mu mona kiuana kia athu, muthu umoxi ua difu ni anju!’

Nabukodonozolo ua zukamene dingi ku kijiku, iu ua dikola, uixi: ‘Tundenu bhu kanga, enu mu jiselevende ja Nzambi Suke-ku!’ Athu oso a diuanene kiavulu mu kumona Sadalake, Mizake ni Abede-neko a mu tunda mu kaxi ka túbhia sé kujokota. Ene ka jokota né ku mukutu, o ndemba mba o izuatu, ka kexile ue mu nuha dixi kana.

Nabukodonozolo uixi: ‘O Nzambi ia Sadalake, Mizake ni Abede-neko, Nzambi ia dikota. Ua tumikisa anju iê phala ku a bhulula. Se-ku nzambi iéngi ia soko ni Nzambi iâ.’

O kuila ua mesena kulondekesa o ufiiele ué kua Jihova katé muene mu ithangana ia bhonzo, kála kia bhangele o minzangala itatu Jihebeleu?