Sai kizuua mu usuku, Nabukodonozolo ua loto nzoji ia mu kuatesa uôma. Muene uexana o jinganga jê phala ku mu jimbuila o nzoji. Maji sé-ku muthu ua tenene ku mu jimbuila-iu. Mu kusuka-ku, o sobha ua zuela ni Daniiele.

Nabukodonozolo uambela Daniiele: ‘Mu nzoji nga mono muxi. O muxi iú ua lebhele kiavulu, katé ku diulu. Athu oso mu ngongo a tenene kumona o muxi uenhó. Ua kexile ni mafue auabha ni ibundu iavulu. O iama ia kexile mu xikama bhu kilembeketa kiê, o jinjila ja kexile mu tunga o ikalanga iâ mu mabhanda a muxi. Anga ku diulu, kua tuluka anju. Muene ua dikola: ‘Batula o muxi ni jithangu jê. Maji o kixinji kia kixina kiê ki kale ni jindanji jê mu mavu, kiene mu ki kuikile ku isasa ia mukáu bhu lubhambu lua felu ni ngondo. O muxima ua muxi a-nda u lungulula, ki ua-nda kala dingi ni muxima ua muthu maji ua-nda kala ni muxima ua kiama, ua-nda kala kienhiki katé mu sambuadi dia jithembu. Athu oso a-nda kuijiia kuila Nzambi muéne o Nguvulu u tumina, muene u tena kubhana o utuminu ku uoso ua mua-ndala.’

Jihova ua jimbuluila Daniiele o nzoji. Kioso Daniiele kia tendela o nzoji, uôma ua mu kuata. Muene uixi: ‘Sobha, tamanu o nzoji íii ia tokalele ku jinguma jê, maji ia ku tokala eie. O muxi ua dikota, uo batule, eie-muene. O utuminu uê ua-nda texika, eie ua-nda dia iangu kala ki bhanga o kiama kia muxitu. Maji kuma o anju ia tendelesa phala kuxisa o kixinji ni jindanji, kupholo dia kuenda ua-nda kituka dingi u sobha.’

Mu kubhita muvu, Nabukodonozolo ua kexile mu kuenda ku thala dia sabhalalu iê, ua kexile mu tala ni kuximana o ixi ia Babilonha. Muene uixi: ‘Tala ngó o mbanza ia fuama i nga tungu. Ngi muthu ua dikota!’ Kioso kia kexile mu zuela, ku diulu kua tundu dízui, dixi: ‘Nabukodonozolo! Mu kiki, ua texi o utuminu ué.’

Bhenhobho, Nabukodonozolo ua kituka dilaji ua difuangana ni kiama kia muxitu. Mu kiki, ua xisa o mbonge iê iu uai mu muxitu kála kiama. O ndemba ia Nabukodonozolo ia sabhuka kiavulu kála ki sabhuka o ndemba ia holokoko, o iala iê ia dibhange kala o iala ia njila.

Mu kubhita sambuadi dia mivu, Nabukodonozolo ua disanze, Jihova ua mu bhange dingi sobha ia Babilonha. Bhenhobho, Nabukodonozolo uixi: ‘Ngi ximana Jihova, Muenexi’a diulu. Mu kiki ngejiia kuila Jihova muéne o Muenexi. Oso a dizangeleka muene u a tulula, u bhana o utuminu kua ió uoso ua muandala.’

Mu kubhita thembu, Belxazale ua kituka sobha ia Babilonha. Sai kizuua mu usuku, muene uexana jimidi ja athu a katunda mu ixi ioso, phala kuia mu fesa. Muene uexana o jiselevende jê, phala kuiza ni jikopho ja ulu, ja katuile Nabukodonozolo mu tembulu ia Jihova. Belxazale ni makamba mê, a nuina mu jikopho jenhójo, ni kusambela ku jinzambi jâ. Mu kithangana kienhokio, kua moneka lukuaku, lua mateka kusoneka isoneku ku phalelu, mu kididi mua kexile, ia bhonzele kiavulu phala ku i tendela.

Belxazale uôma ua mu kuatele. Muene uexana o imbanda iê, iu ua a tangela: ‘Se kumoneka muthu u ngi lombuelela o izuelu íii, nga-nda mu bhanga o muthu ua katatu ua beta-o-kota mu ixi ia Babilonha.’ Ene oso a fikisa, maji sé-ku muthu ua tena ku i lombolola. Mu kusuluka o nvuale ua bokona iu uambe: ‘Sai diiala a muixana Daniiele, ua kexile mu lombolola jinzoji kua Nabukodonozolo. Muene u tena ku kulomboluela o izuelu íii.’

Daniiele ua bokona m’onzo ia sobha. Belxazale ua mu tangela uixi: ‘Se u tena kutanga ni ku ngi lomboluela o izuelu íii, nga-nda ku bhana musanga ua ulu, ni ku kubhanga o muthu ua katatu ua beta-o-kota mu ixi ia Babilonha.’ Daniiele uambe: ‘Nguami o ujitu ué ua katunda, maji nga-nda ku ku tangela se ihi i lombolola o izuelu íii. Tat’enu Nabukodonozolo, uexile mukua ku dizangeleka, mu kienhiki Jihova ua mu tulula. Eie uejiia ioso ia bhiti ni muene, maji eie ku belesela Jihova, ua nuina o vinhu mu jikopho ja ulu ja tembulu Iê. Mu kienhiki Nzambi ua soneka o izuelu íii: Mene, Mene, Thekel, ni Peres. O izuelu íii, i lombolola kuila akua Mediia ni akua Pelesa, a-nda tolola o ixi ia Babilonha, eie kua-nda kala dingi u sobha.’

Kia kexile mu londekesa kuila sé-ku muthu ueji tolola o mbanza ia Babilonha. O mbanza a i kondolokele ku ilumbu ionene, ni ku ngiji ia zongo kiavulu. Maji mu usuku, akua Mediia ni akua Pelesa, a tolola o mbanza. O Sobha ia akua Pelesa Silu, ua jikula njila iengi phala o menha na sosoloka, kiki kieji kuatekesa o masoladi mê kubokona katé ku mielu ia mbanza. Kioso ene kia bhixila a sange o mabhitu a jikuka! O masoladi a bokona, a tolola o mbanza, anga a jibha o sobha. Mu kienhiki, Silu ua kituka o nguvulu ia Babilonha.

Ande dia ku tenesa muvu Silu ua bhana ngolokela: ‘Jihova ua ngi tangela phala kutunga dingi o tembulu ia Jeluzaleme. Muthu uoso uoso, ua mesena o ku kuatekesa aié phala kukalakala.’ Mu kienhiki, kala kia kanene Jihova, Jijudé javulu ja vutuka ku ixi iâ mu kubhita 70 ia mivu, kioso o mbanza ia Jeluzaleme kia i buikisile. Silu ua tumikisa o jikopho ja ulu ni ima ioso ia katunda ia katuile Nabukodonozolo mu tembulu. U tena kumona kiebhi Jihova kia kuatekesa Silu phala kubhulula o mundu Uê?