O sobha ia mukuá ia Babilonha uexile Ndala, mukuá Mediia. Ndala ua kexile mu mona Daniiele kala muthu ua katunda. Muene ua tele Daniiele kala muendexi ua maiala oso mu ixi. O maiala enhó a kexile ni luímbi, iá mesenene kujibha Daniiele. Ene ejiidile kuila, Daniiele ua kexile mu samba lutatu izuua ioso, mu kiki ambela sobha Ndala, exi: ‘Sobha, tata, kua tokala kukala kitumu kuila, mundu uoso ua tokala ku ku sambela ngó eie. Muthu uoso-uoso ka belesela o kitumu kiki, a tokala ku mu takula mu dikungu dia jihoji.’ O sobha Ndala ua uabhele o kibanzelu kiki, anga ua soneka o kitumu.

Kioso Daniiele kiévu o kitumu kia ubhe, uendele ku inzu iê. Ku pholo dia njanela iê ia jikuka, muéne ua fukama anga ua sambe kua Jihova. O maiala akua luímbi a bokona, a mu sange mu kusamba. Ene ai kua sobha Ndala ni lusolo, anga a mu ambela, exi: ‘Daniiele ka mu ku kubelesela. Muene u sambela Nzambi iê mu lutatu, izuua ioso.’ Sobha Ndala ua zolele Daniiele, muene ka mesenene kuila ufua. Kizuua kioso, ua kexile mu banza kiebhi kieji bhulula Daniiele. Maji, né muene o sobha ka tokalele kulungulula o kitumu kia soneka kiá. Muéne ua tumu o maiala enhó phala kutakula Daniiele mu dikungu dia jihoji jala ni nzala.

Mu usuku uenhó, sobha Ndala ua thandanganhele kiavulu mukonda dia Daniiele, ka tenene kuzeka. O kuma ki kuaki, muene uai katé ku dikungu anga uexana Daniiele: ‘O kuila o Nzambi ié ua ku bhulula?’

Sobha Ndala uévu mbimbi. Iexile ia Daniiele! Muene ua tambuijila sobha Ndala, uixi: ‘O anju ia Jihova ua jika o makanu a jihoji. Jene ki ja ngi kuama.’ Sobha Ndala ua sangulukile kiavulu! Muene ua tumu phala kukatula Daniiele mu dikungu. Daniiele ka kexile ni fidila ku mukutu uê. Mu kienhiki, o sobha uambe: ‘Takulenu mu dikungu o maiala a te mázui kua Daniiele.’ Kioso kia takula o maiala enhó mu dikungu, a a di kuala o jihoji.

Sobha Ndala ua tumikisa o kitumu kiki ku mundu uê: ‘Athu a tokala kukala ni uôma ua Nzambi ia Daniiele. Muene ua bhulula Daniiele ku jihoji.’

O kuila uene mu samba kua Jihova izuua ioso, kála Daniiele?

Estere uexile kilumba mukua Judá ua tungile mu ixi ia Pélesa mu mbanza ia Suzana. Mivu iavulu ku dima, muiji uê a u katuile mu mbanza ia Jeluzaleme kuala Nabukodonozolo. A mu sase kua mon’a sekulu’ê Moledekai, selevende ia Sobha ia Pélesa, ngana Asuuelu.

Sobha Asuuelu uandalele muhatu uengi mba mvuale. Jiselevende jê a mu bhekela o ilumba ioso ia betele o kuuabha mu ixi, Estere ue a mu bheka. Mu ilumba ioso, o sobha ua solo-bhu Estere phala kukala mvuale. Moledekai ua tendelesa Estere phala ka tangele muthu kuila, muene mukua Judá.

Mu izuu’omo, sai diiala mukua kudizangeleka a muixanene Hamane, uexile mutuameni ua ilamba ioso mu ixi. Muene ua mesenene kuila mundu uoso u mu fukamena. Moledekai ka xikina, mu kiki Hamane njinda ia mu kuata iu ua mesenene ku mu jibha. Kioso Hamane kiéza mu kuijiia kuila Moledekai uexile mukua Judá, muene ua funhu ndunge ia kujibha o Jijudé joso mu ixi. Muene ua tangela o sobha: ‘O Jijudé athu aiibha, ua tokala kua buikisa.’ Asuuelu ua tambuijila: ‘Bhanga kioso ki uandala,’ iu ua mu bhana o ungana ua kutuma kujibha o Jijudé. Hamane ua tumu o mundu kujibha o Jijudé joso mu kizuua kia 13 kia mbeji ia Adale. Jihova ua kexile mu tala ioso ia kexile mu bhita.

Estere kejiidilié kima kia lungu ni kitumu. Mukonda dia kiki, Moledekai ua mu tumikisa kópia ia kitumu, iu ua mu tangela uixi: ‘Ndé ka zuele ni sobha.’ Estere uixi: ‘Muthu uoso-uoso uia kua sobha sé ku muixana, a-nda mu jibha. Kua bhiti kiá 30 a izuua, sobha ka ng’ixana luua! Maji kuabhu nga-ndaia. Muene se u sununa o mbasá iê, kima kiambote, nga bhuluka. Maji se kana, ngáfu kiá.’

Estere uai katé mu mbonge ia sobha. Kioso sobha kia mu mono, ua mu sunuina o mbasá iê. Estere ua bhixila kua sobha, o sobha ua muibhula uixi: ‘Ihi i ua mesena mvuale Estere?’ Muene uambe: ‘Nga mesena ku m’ixana eie ni Hamane phala kuia mu fesa mu usuku ua lelu.’ Kioso kia kexile mu fesa íii, Estere ua exana dingi phala kuia mu fesa ia mukuá. Mu fesa ia kaiiadi, sobha uebhuidisa dingi Estere: ‘Ihi i ua mesena?’ Muene uixi: ‘Sai muthu ua mesena ku ngi jibha eme ni mundu uami. Tu bhulule nga ku dióndo.’ Sobha ua muibhula: ‘Nanhi ua mesena ku ku jibha?’ Muene ua tambuijila: ‘O diiala didi dia iibha Hamane.’ Sobha Assuelu njinda ia mu kuata, iu ua tumina kujibha Hamane mu kithangana kienhókio.

Maji sé-ku muthu ueji tena kujimuna o kitumu kia Hamane, né muene sobha keji tena. Mu kienhiki, sobha ua solo Moledekai kukala mutuameni ua ilamba ioso mu ixi, iu ua mu tumina kubhanga kitumu kia ubhe mu ixi ioso. Moledekai ua bhange kitumu kia ubhe, kia kexile mu zokela o Jijudé kioso kieji kua bhanga kima kiaiibha ku athu. Mu kizuua kia 13 kia mbeji ia Adale, o Jijudé a tolola o jinguma jâ. Mukonda dia kikoué kiki, mivu ioso ene a kexile mu bhanga fesa.