Kua bhitile kiá 70 a mivu, tundé akua Izalaiele kia vutukile mu mbanza ia Jeluzaleme, maji sai athu akua Izalaiele a kexile hanji mu jimbanza ja mukuá ja Utuminu ua Pélesa. Mu’axaxe kâ, mua kexile o mukunji a muixanene Ejidala, ua kexile mu longa o Kitumu kia Jihova. Ejidala ueza mu kuijiia kuila, o mundu mu Jeluzaleme ki u kexile mu belesela o Kitumu, iu ua mesenene kuia mua kuatekesa. Sobha Artaxexe, mukua Pélesa ua mu tangela, uixi: ‘Nzambi ua ku bhana unjimu phala eie kulonga o Kitumu kiê. Ndé, uambata muthu uoso-uoso ua mesena kuia n’eie.’ Ejidala uongeka athu oso a mesenene kuia mu Jeluzaleme. Ene a sambe kua Jihova phala ku a langa mu njila, anga a mateka kuenda.

Mu kubhita mbeji jiuana, a bhixila mu mbanza ia Jeluzaleme. O ilamba ia tangela Ejidala, exi: ‘Akua Izalaiele a bhukumukina Jihova, ia a kazala ni ahatu a kexile mu bheza jinzambi ja makutu.’ Ihi ia bhangele Ejidala? Ku pholo dia mundu uoso, Ejidala ua fukama, iu ua sambe: ‘Jihova, eie uene mu bhanga ima iavulu phal’etu, maji tua te kituxi kokué.’ O mundu ua diele o ituxi iâ, maji né kiki a kexile mu bhanga hanji ima iaiibha. Ejidala ua solo tufunga ni afundixi phala kuijiia kiambote ihi ia kexile mu bhita. Kioso kia bhiti mbeji jitatu, o athu a ditunu kubheza Jihova a a kaie mu mbanza.

Kua bhitile kuinhi ni kiiadi kia mivu. Bhu kaxi ka mivu íii, o ilumbu ia mbanza ia Jeluzaleme a i tungu dingi. Mu kienhiki, Ejidala ua bhongolola o mundu bhu dikanga dia mbanza phala kua tangela o Kitumu kia Nzambi. Kioso Ejidala kia jikula o divulu, o mundu uemanene. Muene ua ximana Jihova, anga ene a zangula o maku mâ mu kulondekesa kuila a xikina. Ejidala anga ua tange iu ua jimbulula ue o Kitumu, o mundu uexile mu kuívua kiambote. Ene a xikina kuila, a xisa dingi Jihova, anga a didi masoxi. Mu kizuua kia mukuá, Ejidala ua a tangele dingi o Kitumu. Ene a tendela kuila, a tokalele kubhanga o Fesa ia Jibalaka. Ni lusolo, ene a mateka kudisokejeka phala kubhanga o fesa.

Mu sambuadi dia izuua ia fesa, o mundu ua sangulukile kiavulu anga a sakidila Jihova, mukonda dia kubhongolola kiambote o jimbutu. Tundé mu izuua ia Josuué, nuka kua bhitile dingi Fesa ia Jibalaka, kála ióio. Kioso kia bhiti o fesa o mundu ua diongeka dingi, anga a sambe: ‘Jihova, eie ua tu bhulula ku ubhika, ua tu disa mu kikangalakata, eie ua tu bhana ue o ixi íii ia fuama. Maji mu veji javulu, ki tua ku belesela. Eie ua tumikisa jipolofeta phala ku tu dimuna, maji ki tua a bhana mátui. Né muene kiki, ua londekesele muanhu. Eie ua bhake kiambote o kikanenu kié kia lungu ni Mbalahamu. Kindala, tua kanena kuila, tua-nda ku ku belesela kiá.’ Ene a soneka o kikanenu kiâ, anga o ilamba ioso, Jilevita, ni akunji a te o kidimbu kiâ mu mukanda ua ikanenu iâ.

Tu vutuke mivu ku dima. Nehemiia, selevende ia Sobha Artaxexe, uexile mukua Izalaiele, ua tungile mu ixi ia Pélesa mu mbanza ia Suzana. Nehemiia a mu tudila njimbu iaiibha kuala phang’iê ua tundile mu ixi ia Judá uixi: ‘O mundu ua vutuka mu mbanza ia Jeluzaleme uala mu iluezu. O ilumbu ni mabhitu a budile akua Babilonha, ka a tungulula luua.’ Nehemiia ua luualele kiavulu. Muene ua mesenene kuia mu mbanza ia Jeluzaleme phala kukuatekesa, mu kiki muene ua sambe, phala Sobha ku muehela kuia.

Mu kubhita kithangana, Sobha ua mono kuila Nehemiia ua luualele kiavulu. Muene uambe: ‘Nuka nga ku muene kiki. Ihi ia mu bhita?’ Nehemiia ua tambuijiila: ‘Kiebhi ki nga-nda sanguluka se o mbanza iami, Jeluzaleme, ia xala ngundu?’ Sobha ua muibhuidisa: ‘Mu kiki, ngi bhanga ihi phala ku ku kuatekesa?’ Mu kithangana kienhókio, Nehemiia ua sambe ku muxima. Muene uambela sobha: ‘Nga ku dióndo, ng’ehele kuia mu Jeluzaleme phala kutungulula o ilumbu.’ Sobha Artaxexe, ua tangela Nehemiia phala kuia, iu ua bhange ioso phala Nehemiia ka dibhane ni ibhidi mu njila ia dikanga ieji kuenda. Sobha ua tumbika Nehemiia kala nguvulu ia ixi ia Judá, iu ua mu bhana ue mabaia, phala kuiudika o mielu ia mbanza.

Kioso Nehemiia kia bhixila mu Jeluzaleme, ua tonginina kiambote o ilumbu ia mbanza. Mu kusuluka, muene uongeka o akunji ni jinguvulu iu ua a tangela uixi: ‘O kia mu bhita ni mbanza kima kiaiibha. Tua tokala kukalakala.’ Mundu uoso ua xikina, anga a mateka kutunga o ilumbu.

Maji o jinguma akexile mu kuolela akua Izalaiele, anga ambe: ‘Katé muene ni mukenge u tena kulundumuna o ilumbu i mua mu tunga.’ O akalakadi ka bhana mátui ku jinguma, maji a suluka ni kutunga. O ilumbu ia lebhele dingi, anga ikola muene kiavulu.

O jinguma ja mesenene kubhânga na-u a tundile mu ididi iavulu, ia a mesenene kutukumukisa akua Jeluzaleme. Kioso o Jijudé kiévu o maka iá, uôma ua a kuata. Maji Nehemiia uambe: ‘Ki mu kale ni uôma. Jihova ua-nda tu kuatekesa.’ Muene ua tula alangidi phala kulanga o akalakadi, mu kiki o jinguma ka tenene kubhânga na-u.

Mu kubhita ngó 52 a izuua, o ilumbu ni mabhitu a mbanza a a zubhile kua tunga. Nehemiia uambata o Jilevita, mu Jeluzaleme phala kujikula o mbanza. Muene ua a sokejeka mu ibuka iiadi ia jingimbidi. Ene ai katé ku thandu dia ilumbu ia Muelu ua Fixi, anga a nhunga o mbanza ku mbandu ia kiasu. Ene a xiki jikoloneta, jingonge ni tumbánza, anga a kala mu kuimbila ni kusakidila Jihova. Ejidala uai ni kibuka kimoxi, anga Nehemiia uambata kia mukuá. Mundu uoso—mala, ahatu, ni ana ndenge—a bhana jisata kua Jihova, ni kisangu-sangu kioso. O athu a tungile dikanga akexile mu kuívua o mázui mâ.