Mu kubhita 400 ja mivu ndenge, tundé kia tungulula o ilumbu ia Jeluzaleme, sai mukunji a mu ixana Zakadiia ni muhatu uê, Nzebele, a tungile bhua zukamene o mbanza. Ene a kexile kiá makaza mu mivu iavulu maji ka kexile ni tuana. Sai kizuua kioso Zakadiia kia kexile mu kuoha o uasu ua dizumba mu kididi kikôla, o anju Ngabidiiele ua moneka. Zakadiia uôma ua mu kuata, maji Ngabidiiele ua muambela uixi: ‘Ku kale ni uôma. Nga ku bhekela njimbu iambote ia Jihova. Muhatu ué Nzebele, ua-nda vuala mon’a diiala, mua-nda mu luka o dijina dia Nzuá. Jihova ua solo Nzuá phala kubhanga kikalakalu kia katunda.’ Zakadiia uambe uixi: ‘Ki ngi tena kuxikina o njimbu íii. Ni mivu íii i ngala na-iu eme ni kazola kami, tu vuala dingi mona?’ Ngabidiiele uambe: ‘A ngi tumikisa kuala Nzambi phala ku ku tudila o njimbu íii. Kuma kua ngi xikina, ua-nda kala u dibubu katé o kizuua kioso muhatu ué kia-nda vuala o mona.’

Zakadiia ua xala mu kididi kikôla kithangana kiavulu. Mu kiki, kioso kia tundu-mu, o athu a kexile mu mu kingila a mesenene kuijiia o kima kia bhiti. Maji Zakadiia ua kexile mu bhanga ngó ijimbuete ni maku mê, ka tenene dingi kuzuela. Mu kienhiki, athu a tendela kuila Zakadiia ua tambula njimbu kua Nzambi.

Kioso kia bhixila o kithangana, Nzebele uemita anga u vuala mon’a diiala, kála kia zuelele o anju. O makamba ni jindandu jê endele phala kumona o kabuetele. Ene a sangulukile kiavulu. Nzebele uambe uixi: ‘O dijina dia kabuetele, dia-nda kala Nzuá.’ Ene a mu tangela: ‘Ku muiji ué sé-ku muthu a mu ixana Nzuá. Mu luke Zakadiia, o dijina dia tat’ê.’ Maji Zakadiia ua soneka uixi: ‘Nzuá diene o dijina diê.’ Mu kithangana kienhiókio, Zakadiia u mateka dingi o kuzuela! O njimbu ia lungu ni kabuetele ia di muange mu mbanza ioso ia Judeia, mundu anga ua kexile mu dibhuidisa: ‘Kiebhi kia-nda kala o muenhu ua kabuetele kaka?’

Mu kithangana kienhiókio Zakadiia anga uizala ni nzumbi ikôla. Muene ua kanena: ‘Sakidilenu Jihova. Mukonda Muene ua kanena Mbalahamu kuila ueji tumikisa mubhuludi, o Mexiia, phala ku tu bhulula. Nzuá ua-nda kala polofeta, muene ua-nda pelepalala ue o njila phala o uijilu ua Mexiia.’

Kua bhiti ue kima kia katunda ku muenhu ua Madiia, ndandu ia Nzebele. Tu mone kima kiki mu disá dia kaiela.

Nzebele ua kexile ni ndandu iê munzangala, a mu ixana Madiia, ua tungile mu sanzala ia Nazalé mu mbanza ia Ngalileia. Madiia ua kexile phala kukazala ni Zuze kalupindelu. Kioso Nzebele kia kexile ni samanu dia jimbeji ni divumu, o anju Ngabidiiele ua kundu Madiia. Muene uambe: ‘Nga ku menekena, Madiia. Jihova ua ku ximana kiavulu.’ Madiia ka tendela kiambote o izuelu ia Ngambidiiele. Muene ua mu tangela uixi: ‘Ua-nda kuimita ni kuvuala mona, ua tokala ku mu luka o dijina dia Jezú. Muene ua-nda tumina kala Sobha. O Utuminu uê ua-nda xalelaku katé ku hádia ni hádia.’

Madiia uambe: ‘Kiki ki bhita kiebhi, eme ki ngejiia luua diiala?’ Ngambidiiele uambe uixi: ‘Phala Jihova sé-ku kima kia bhonzo. Nzumbi ikôla ia-nda ku vungina ku thandu dié, ua-nda vuala mona. Ndandu ié Nzebele uemita ue.’ Mu kienhiki Madiia uambe uixi: ‘Eme ngi mubhika ua Jihova. Ki bhite muene kala ki ua zuela.’

Madiia uai mu kunda Nzebele. Kioso Madiia kia menekena Nzebele, o mona mu mala ua tuka. Kuma uezalele ni nzumbi ikôla, Nzebele uambe uixi: ‘Madiia, Jihova ua ku besoala. Ujitu ua dikota kutambula manh’â Ngana iami kubhata diami.’ Madiia uambe uixi: ‘Ngi ximana Jihova ni muxima uami uoso.’ Madiia ua kexile ni Nzebele mu mbeji jitatu, anga u vutuka kiua ku bhata diê mu sanzala ia Nazalé.

Kioso Zuze kiévu kuila Madiia uemita, muene ua mesenene ku mu senga. Maji o anju ia mu tulukila ku nzoji uixi: ‘Kana kukala ni uôma ua kukazala ni Madiia. Muene ka te kituxi.’ Mu kienhiki Zuze uambata muhatu’ê Madiia ku bhata diê.