O nguvulu ia Utuminu ua Loma, ngana Sézalu dia Nguxi, ua tumina o Jijudé joso kuila a vutuke mu jisanzala jâ phala kudisonekesa. Kuma o muiji ua Zuze ua tokalele mu sanzala ia Beleme, Zuze ni Madiia ai mu Beleme. O kithangana kia Madiia kia kuvuala, kia zukamene kiá.

Kioso kia bhixila mu sanzala ia Beleme, ene ka sange dingi kididi, mu kiki ai mu kala mu kididi kia ibhaku. Muene Madiia mua vualela mon’ê Jezú. Muene ua mu vungina ni milele iu ua mu zekesa mu kidilu kia ibhaku.

Ku mbanji ia Beleme, kuexile abhidi akexile mu kuinga o ibhaku iâ mu usuku. Bhenhobho, bhua moneka anju ku pholo iâ, kididi kioso kiezalele ni mukengeji ua fuma ia Jihova, ene akexile bhu kaxi. O abhidi akexile ni uôma, maji o anju iambe: ‘Ki mu kale ni uôma. Nga mi bhekela njimbu iambote. O Mexiia a mu vuala mu kizuua kia lelu mu sanzala ia Beleme.’ Bhenhobho, jianju javulu ja moneka ku diulu, exi: ‘Fuma i kale ia Nzambi mu diulu, o mu ngongo uembu mua’xaxi ka athu oso a mu uabhela.’ O jianju anga a tunda bhu mbandu iâ. Ihi ia bhange o abhidi?

O abhidi ambe: ‘Tuendienu mu sanzala ia Beleme kindala.’ Ai ni lusolo-luoso, a sange Zuze ni Madiia ni kamona mu kididi kia ibhaku.

Mundu uoso ua diuanene mu kuívua o ngolokela ia bhana o anju kua abhidi. Madiia ua xinganekene kiavulu mu izuelu ia anju, nuka ueji ku i jimba. O abhidi a vutuka ku ibhaku iâ, mu kiki a sakidila Jihova mu ima ioso ievuile ni ia monene.

Ku mbandu ia tundila kumbi ia ixi ia Izalaiele, mua kexile athu a xikinine kuila, o jithéthembua ji tena kua endesa. Sai usuku, o maiala akua Tundila Kumbi, a mono kima kia mu bhenha kia difu ni théthembua, kia kexile mu kuenda ku diulu, anga ene a ki kaiela. O “théthembua” ia endesa katé mu Jeluzaleme. O maiala ebhula: ‘Kuebhi kuala o kamona ka-nda kala sobha ia Jijudé? Tueza bhabha phala ku mu fukamena.’

Kioso Helode, o sobha ia Jeluzaleme, kiévu o njimbu ia lungu ni kamona keji kala sobha ia ubhe, muene ua tandanganhele kiavulu. Muene uebhula o mutuameni ua akunji: ‘Kuebhi kueji vualela o sobha?’ A mu tangela exi: ‘Mu Beleme ia Judeia kiene kia soneka o jipolofeta.’ Mu kienhiki Helode uexana o maiala enhá, iu ua a tangela uixi: ‘Ndenu mu Beleme mu sota o mona. Mu vutuka ni mu ngi tangela se kuebhi kuala. Mukonda nga mesena ue ku mu fukamena.’ Maji kiki kiexile makutu.

O “théthembua” ia mateka dingi o kuenda. O maiala iá a i kaiela katé mu Beleme. O “théthembua” ia zenzamene ku thandu dia inzo anga o maiala a bokona. Ene a sange Jezú ni manh’â, Madiia. Ene a fukamena o kamona, a mu bhana ujitu ua ulu ni uasu ua dizumba. O kuila Jihova muéne muene ua tumikisine o maiala enhó phala kusanga Jezú? Kana.

Mu usuku uenhó, Jihova uambela Zuze mu nzoji uixi: ‘Helode ua mesena kujibha Jezú. Balumuka kuata muhatu’é ni kamona, lengelenu ku ixi ia Ijitu. Kalenu koko katé ki nga-nda ku ku tangela kuila mu Beleme mua tululuka kiá.’ Ni lusolo luoso, Zuze ni muiji uê anga a lengela ku ixi ia Ijitu.

Jihova ua tangela o maiala akua Thundila-Kumbi phala ka vutuke kua sobha Helode. Kioso Helode kiéza mu kuijiia kuila ene keji vutuka dingi, muene njinda ia mu kuata. Kuma muene keji tena kusanga Jezú, ua tumina kujibha o tuana tuoso tua mala tua kexile mu kitala kia Jezú. Maji Jezú kexile dingi mu kiluezu, mu ixi ia Ijitu.

Mu kubhita kithangana, Helode uafu. Jihova ua tangela Zuze uixi: ‘Kindala eie u tena kiá kuvutuka.’ Zuze, Madiia, ni Jezú a vutuka mu ixi ia Izalaiele, anga a tunga dibhata diâ mu sanzala ia Nazalé.