Zuze ni Madiia a tungile mu sanzala ia Nazalé ni Jezú ni tuana tua mukuá tua mala ni tua ahatu. Zuze ua kexile mu dikila o muiji uê mu kukalakala ku ufunu ua kalupindelu, muene ua longo o muiji uê ia lungu ni Jihova ni Kitumu kiê. O muiji uoso ua kexile muia mu bheza mu dilombe, mivu ioso a kexile muia mu Jeluzaleme mu fesa ia Phasu.

Kioso Jezú kia kexile ni 12 kia mivu, muiji uê uendele njila ia lebha katé mu Jeluzaleme phala kubheza. O mbanza ia kexile mu kuizala ni athu akexile muia mu fesa ia Phasu. Kioso kia zubha o fesa, Zuze ni Madiia akexile kiá mu vutuka ku bhata, ene a banzele kuila Jezú ua kexile kumoxi ni akuâ. Maji kioso ene kiai ni ku mu sota mu kaxi ka muiji, ka mu sange.

Ene a vutuka mu Jeluzaleme, anga mu izuua itatu, a kala mu sota Jezú. Mu kusuka-ku, ene ai mu tembulu. Anga a sanga Jezú mu tembulu, mu kaxi ka jimesene ni kubhanga ibhuidisu ia bhonzo. O jimesene a diuanene kiavulu ni Jezú, ia a kuata ku mu bhanga ibhuidisu. Mu kiki, ene a diuanene ni itambuijilu iê. Ene a tendela kuila Jezú uejiidile kiambote o Kitumu kia Jihova.

Zuze ni Madiia a tandanganhele kiavulu. Madiia uambe: ‘Mona tata, tua kexile ku ku sota mu ididi ioso! Kuebhi ku ua kexile?’ Jezú ua tambuijiila uixi: ‘Ki mua kijiia kuma nga bhingi ngi kala bhabha m’onzo ia Tat’etu?’

Jezú ua vutuka ni jitata jê ku bhata mu sanzala ia Nazalé. Zuze ua longo Jezú kiebhi kia tokalele kubhanga o kikalakalu kia kalupindelu. Mudié idifua iahi ia kexile na-iu Jezú mu unzangala uê? Kioso kia kexile mu kula, Jezú anga u kala mu kuvula unjimu, ni ku mu uabhela kuala Nzambi ni athu.

Nzuá mon’a Zakadiia ni Nzebele, ua kituka polofeta kioso kia kulu. Jihova bhu kaxi ka Nzuá ua longo o athu kuila, o Mexiia ueji kuiza. Mu veji dia kulonga mu jimbanza, malombe mba jitembulu, Nzuá ua longo ku maxokololo. O athu akexile mu tunda mu Jeluzaleme ni mu Judeia ioso phala kudilonga ni Nzuá. Muene ua a longo kuila, phala kusangulukisa Nzambi, ene a tokalele kueha o ibhangelu iaiibha. Kioso kiévu o njimbu ia Nzuá, avulu mudiâ a diela o ituxi iâ, anga Nzuá ua a batizala mu Ngiji ia Njolodá.

Nzuá ka kexile ni ima iavulu ku muenhu uê. Muene ua kexile mu ta izuatu io tunge ni jindemba ja jikamelu, uexile mudia mahoho ni uiki ua ditutu. O athu a mesenene kuijiia Nzuá. Katé muene o Jifalizeu ni Jisaduseu akua luímbi, ai mu mu mona. Nzuá ua a ambela: ‘Mua tokala kulungulula o ukexilu ua muenhu uenu ni kudiela. Kanenu kubanza kuila enu mua beta kota, mukonda mua mu zuela kuila mu an’a a Mbalahamu. Kiki ki kilombolola kuila mu an’â a Nzambi.’

Avulu a zukamene kua Nzuá, anga ebhula: ‘Ihi i tu tena kubhanga phala kusangulukisa Nzambi?’ Nzuá uambela o Jijudé: “Uoso uala ni izuatu iiadi a uanene mukua uala ni tuxi.” Uejiia ihi ia mu bhangesa kuzuela kiki? Muene ua mesenene kuila o maxibulu ejiia kuma, phala kusangulukisa Nzambi, ene a tokalele kuzola o athu.

Nzuá uambela akua kutambula o lubhaku: ‘Kalenu mu athu a kidi, kanenu kunganala o athu.’ Muene uambela o masoladi: ‘Kanenu kuxikina ku mi nzonza mba ku mi sumba ni kitadi, mba kuzuela makutu.’

O Atuameni a jingeleja ni Jilevita ai ue kua Nzuá, anga ebhula: ‘Eie nanhi? Athu oso a mesena kuijiia.’ Nzuá uambe: “Kala kiambele Izaia dia polofeta, uixi: Eme ngi dízui dia ió u dikola mu ditutu.”

O athu a zolele o ima ia a longele Nzuá. Avulu a dibhuidisa se Nzuá muéne uexile o Mexiia. Maji muene uambe: ‘Kudima diami kua mu kuiza muthu ua ngi tundu. Eme ki ngi fuama ku mu jituna ngó o lungoji lua haii iê. Eme ngi batizala ni menha, muene-phe ua kà mi batizala ni nzumbi ikola.’