Nzuá ua kexile mu boka kuila: “Kudima diami kua mu kuiza muthu ua ngi tundu.” Kioso Jezú kia kexile ni 30 a mivu, muene ua tundu ku Ngalileia uai ku Ngiji ia Njolodá, mua kexile mu batizala Nzuá, o athu. Jezú ua mesenene kuila Nzuá u mu batizala, maji Nzuá uambe: ‘Eme ki ngi tena ku kubatizala. Eie ua tokala ku ngi batizala.’ Jezú uambela Nzuá: ‘Jihova ua mesena kuila, eie u ngi batizala.’ Mu kiki, ene ai mu Ngiji ia Njolodá, anga Nzuá ua bobesa o mukutu uoso ua Jezú mu menha.

Jezú kia zubha kuzaúka mu menha, ua sambe. Mu kithangana kienhokio o diulu dia jikuka, anga o nzumbi ia Nzambi ia mu tulukila kála diembe. Mu kusuluka Jihova tundé ku diulu uambe, uixi: ‘Muenhú Mon’ami ua kazola, nga mu uabhela kiavulu.’

Kioso o nzumbi ia Jihova ki ia tulukila Jezú, muene ua kituka Kristu mba Mexiia. Mu kithangana kienhokio, muene ua tokalele kumateka kubhanga o kikalakalu kia mu tumine Jihova mu ixi.

Kioso kia zubha ku mu batizala, Jezú uai mu kikangalakata, ua bhiti-mu 40 a izuua. Kioso kia vutuka, muene uaile mu kunda Nzuá. Kioso kia kexile mu mu zukama, Nzuá uambe: ‘Talenu! muenhó Kambudi ka Nzambi, ua-nda katula o ituxi ku mundu.’ Mu kuzuela kiki, Nzuá ua bhangesa o athu kuijiia kuila, Jezú muéne uexile o Mexiia. Uejiia ihi ia bhitile ni Jezú kioso kia kexile mu kikangalakata? Tu mone.

Kioso Jezú kia zubha ku mu batizala, o nzumbi ikola ia Nzambi ia muambata katé ku mukau ua kukuta. Muene ka dile kima mu 40 a izuua, ua kexile ni nzala iavulu. Mu kiki, Diabhu uai mu tendala Jezú, ua mu ambela, uixi: ‘Eie se u Mon’â Nzambi, tuma matadi iá a kituke jimbolo.’ Maji Jezú ua tambuijila mu kutumbula o Mikanda Ikola, uixi: ‘Kiósoneke kuma, o muthu ki ku mbolo ngó kua muena o muenhu. Maji eie ua tokala kuívua o maka oso izuela Jihova.’

Mu kusuluka, Diabhu ua tendala dingi Jezú: ‘Se mu kidi, eie u Mon’â Nzambi, laúka bhabha ku thala dia tembulu bhu kididi kia dileka kinéne. Mbata kiósoneke kuma; Nzambi u tuma o ji-anju jê ku ku inga, ni ku kuzenza.’ Maji Jezú ua tumbula dingi o Mikanda Ikôla, uixi: ‘Kiósoneke dingi kuma, kana kupolovala Jihova Nzambi ié.’

Lua mukuá dingi, Satanaji ua londekesa kua Jezú o maungana moso mu ngongo ni kufumana kuâ, anga u mu ambela uixi: ‘Ima ioso íii, ngi ku bhane-iu se u ngi fukamena ni ku ngi bheza lumoxi ngó.’ Maji Jezú ua mu tambuijila, uixi: ‘Tunda bhabha Satanaji! Mukonda kiósoneke kuma, mu kubheza ki kale u bheza ngó Jihova.’

Bhenhobho Diabhu anga u mu xisa, o ji-anju anga jiza, a bhana kudia kua Jezú. Tundé o kithangana kienhokio, Jezú ua boko o njimbu ia Utuminu. Kiki kiene o kikalakalu kia mu tumu kubhanga mu ixi. O athu a zolele ioso ia a longele Jezú, anga a mu kaiela mu ididi ioso.