Kioso kia mu batizala, Jezú ua mateka kuboka kuila: ‘O Utuminu ua Nzambi ua zukama.’ O maxibulu a mu kaiela kioso kia kexile muia mu Ngalileia ni ku Judeia. Kioso Jezú kia vutuka ku ixi iê ia uvualukilu, ku Nazalé, muene uai mu malombe mba jitembulu, ua jikula o mukanda ua Izaia, iu ua u tange ni dízui dia suína: ‘Jihova ua ngi bhana o nzumbi ikola phala kuboka o njimbu iambote.’ Kiki kilombolola ihi? Kilombolola kuila, né muene se o athu a mesenene kumona Jezú kubhanga madiuanu, o kikalakalu kia beta o kota kia mu bhangesa kutambula o nzumbi ikola, o kuboka o njimbu iambote. Mu kusuluka muene uambela o jingivuidi Jê: ‘Lelu o kikanenu kiki, kia dikumbidila.’

Kupholo dia kuenda, Jezú uai ku Kalunga ka Ngalileia, ua sange-bhu kiuana kia maxibulu mê, exile athambi a jimbiji. Muene ua ambela, uixi: ‘Ngi kaiele-nu, ngi mi bhange mu athambi a athu.’ Enhá exile, Phetele, Mandele, Tiiaku ni Nzuá. Mu kithangana kienhokio, ene a xisa o kikalakalu kiâ, a mu kaiela. Ene ai ku Ngalileia ioso, ni kuboka ia lungu ni Utuminu ua Jihova. Ene a boko mu malombe mba jitembulu, mu itanda ni mu ikoka. Mundu uavulu akexile mu a kaiela kabasa kididi kua kexile muia. Fuma ia Jezú anga i sambuka mu Sídia ioso.

Mu kubhita thembu, Jezú ua bhana ku maxibulu mê o kutena kua kusaka jihaxi ni kukaiesa madimonho. Kioso kia kexile mu boka mbanza ni mbanza, diembu ni diembu, athu amukuá akexile muia-nê kumoxi. Ahatu avulu a fiiele, kala Madiia dia Manda, Nzuana, Suzana ni ahatu amukuá, a kexile mu langa Jezú ni akaiedi’ê.

Kioso kia zubha kulonga o maxibulu mê, Jezú ua a tumikisa phala kuboka. Kioso kiai ni kuboka ku Ngalileia ioso, athu avulu a kituka maxibulu anga a a batizala. Kienhiki, avulu a mesenene kukituka maxibulu, kiene kia bhangesa Jezú ku a sokesa ni mábhia akexile polondo phala kubhongolola o jimbutu. Muene uambe: ‘Sambenu kua Jihova phala a tume dingi akalakadi mu mábhia mê.’ Kupholo dia kuenda muene ua solo 70 a maxibulu, ua a tumikisa kiiadi kiiadi phala kuboka ku Judeia ioso. Ene a zuela ni athu a maukexilu moso ia lungu ni Utuminu. Kioso o maxibulu kia vutuka, ene a kexile ni vondadi ia kujimbulula kua Jezú ioso ia bhitile. O Diabhu ki kiexile kibhidi phala kufidisa o kikalakalu kia kuboka.

Jezú ua dielele kuila, o maxibulu mê eji suluka ni kubhanga o kikalakalu kiki, kia katunda, kioso muene kieji vutuka ku diulu. Muene uambe: ‘Enu-phe ndenu mua kà longe maxibulu ku akua jixi joso. Mu longa o athu ia lungu ni Mak’â Nzambi ni ku a batizala.’

Jezú uejile mu ixi, phala kuboka o njimbu iambote ia Utuminu ua Nzambi. Phala kulondekesa ihi ia-nda bhanga Jezú mu kukala Sobha, Jihova ua mu bhana o nzumbi ikola phala kubhanga madiuanu. Muene ua kexile ni kutena kua kusaka uhaxi uoso-uoso. Mu ididi ioso mua kexile muia, o athu a katele, akexile ku mu zukama phala kua a kuatekesa, muene anga ua a sake enioso. O ifofo a tenene kumona, o maxilu akexile mu kuívua, o inema a matekene kuenda, o ió akexile ni madimonho akexile mu a kaiesa nau. Né muene se ene eji kuata ngó ku kizuatu kia Jezú, eji disanza. O athu akexile mu kaiela Jezú kuoso-kuoso kua ditela. Né muene se muéne ua mesenene kukala ubheka, Jezú ka kexile mu a vutula.

Sai kizuua, o athu a mu bhekela diiala huhi-alenge mba muthu ua kotama, mu dibhata mua kexile. Maji o dibhata diezalele kinene ni athu, ene ka tenene kubokona. Mu kiki, ene a habe kutala dia inzo anga a bhange-ku ka dikungu phala ku mu bokuesa. Mu kusuluka Jezú uambela o diiala: ‘Zangula uie ni kuenda.’ Kioso muene kia mateka kuenda o athu a diuanene kiavulu.

Mu kizuua kiéngi, kioso Jezú kia ile mu kunda diembu diéngi mba sanzala, kuinhi dia athu akexile mu kata uhaxi ua dibhute, a dikola kua muene, exi: ‘Jezú tu kuatekese!’ Mu izuua ienióio, o akua dibhute ka tokalele kukala mu ididi mua bhongolokele o athu. Jezú ua tangela o mala enhá phala kuia mu tembulu, kiki kiene kia tendelesele o Kitumu kia Jihova, kioso kieji saka mukuâ dibhute. Kioso kia kexile mu njila ia kuia mu tembulu, a mono kuila a disanze. Bhu kaxi ka dikuinhi dia akua dibhute, sai diiala dimoxi, kioso kia mono kuila ua disanze, muene ua vutuka phala kusakidila Jezú ni kuximana Nzambi. Mu kuinhi dia athu, umoxi ngó ua sakidila.

Saí muhatu ua katele mu 12 kia mivu, ua mesenene kiavulu kudisanza. Muéne uéza ku dima dia Jezú, bhu kaxi ka athu anga ua kuata ku kizuatu kiê. Kioso kia bhange kiki, muéne ua disanze. Kioso kia bhiti o ima íii, Jezú uebhula: ‘Nanhi ua ngi babata?’ O muhatu ua kexile ni uôma, maji muéne uéza ua mu tangela o kidi. Jezú ua mu tululukisa mu ku mu tangela: ‘Mon’a, ndé ni kutululuka.’

Saí disoladi a mu ixanene Jailu, ua diondela Jezú, uixi: ‘Zá ku bhata diami! Kamona kami ka muhatu ka kumbama.’ Maji ande dia Jezú kubhixila ku dibhata dia Jailu, o kamona kafu. Kioso Jezú kia bhixila, muéne ua mono kuila athu avulu akexile mu dila kumoxi ni muiji. Jezú ua a tangela, uixi: ‘Ki mu dile; muene ua zeka ngó.’ Mu kusuluka muéne ua kuata ku maku a kilumba, anga u mu ambela uixi: “Kilumba, balumuka!” Kithangan’okio o kilumba kia balumuka, Jezú ua tumu o jitata jê ku mu bhana kúdia. Xinganeka kiebhi kia divu o jitata jê!