Kioso Jezú kia boko ku muvu umoxi ni kaxaxi, muene ua kexile ni kima phala kubhanga mba kusola. A nanhi eji ku a sola phala kukalakala né? A nanhi eji ku a longa phala kukala kupholo dia kilunga kia Jikidistá? Phala kubhanga kiki, Jezú ua mesenene o kikuatekesu kia Jihova. Mu kiki, muene uai ku mulundu ubheka uê, ua sambe usuku uoso. Mu kamene Jezú uexana o maxibulu mê, iu ua solo o kuinhi ni kiiadi kia Jipoxolo. O kuila, sai iâ ua lembalala hanji o majina mâ? O majina mâ enhá: Phetele, Mandele, Tiiaku, Nzuá, Filipe, Matulu, Tomé, Matesu, Tiiaku mon’a Lufeu, Tadeu, Ximá ni Juda dia Kadiota.

O Kuinhi ni Kiiadi kia jipoxolo eji kuenda ni muene. Kioso kia a longo, ene a kexile polondo phala ku a tumikisa ni kuboka mudiâ. Jihova ua a bhana o kutena kua kukaiesa madimonho, ni kusaka athu a kate.

Jezú ua tumbula o Kuinhi ni Kiiadi kia jipoxolo kála makamba, ua a dielele ue. O Jifalizeu a banzele kuila, o jipoxolo exile akua-tutu, ka zubha kudilonga madivulu mba iôua. Maji Jezú ua a bhana o milongi ia tokalele phala kubhanga o kikalakalu kiâ. Ene eji tena kukala ni Jezú, mu ithangana ia betele kota ku muenhu uê, kala ande dia kúfua ni kioso kia fukunuka. Kála Jezú, mu kaxi ka kuinhi ni kiiadi kia jipoxolo, avulu exile akuâ Ngalileia. Sai iâ, exile makaza.

O jipoxolo exile akua ituxi. Sai iâ, a zuelele ima sé kuxinganeka, amukuá ka solele kiambote. Amukuá ka kexile ni muanhu. Sai ithangana ene a zokele ni maka a lungu se nanhi ua betele o kota mudiâ. Maji ene exile athu ambote, a zolele Jihova. Ene eji kala kupholo dia kilunga kia Jikidistá, kioso Jezú kieji vutuka ku diulu.

Kioso kia zubha kusola o 12 kia Jipoxolo, Jezú uai ku mulundu mua bhongolokele o mundu. Ene a tundile ku Ngalileia, Judeia, Tilu, Sídone, Sídia, ni mu ididi ia mukuá ia Njolodá. Ene a bhekele mba ejile ni athu akexile ni mauhaxi ni athu akexile ni madimonho. Jezú ua a sake enioso. Mu kusuluka muene ua xikama ku mulundu, anga u mateka kuzuela. Muene ua jimbuluile se ihi i tua tokala kubhanga se tua mesena kukala makamba a Nzambi. Tua tokala kuijiia kuila etu enioso tua bhindamena o kikuatekesu kia Jihova, ni ku mu zola. Maji ki tu tena kuzola Nzambi se ki tu zolo athu éngi. Tua tokala kulondekesa o henda, ni kukala tu athu ambote, né muene ni jinguma jetu.

Jezú uambe: ‘Ki mu tokala kuzola ngó o makamba menu. Enu mua tokala ué kuzola o jinguma jenu, ni kuloloka o athu ni muxima uoso. Se bhu kala muthu uala-nê ni maka, ndé uzuele nê ni ku di loloka. Talatala akuenu kála ki ua mesena kuila a ku talatala ue.’

Jezú ua bhana ue jindunge jambote ja lungu ni jimbote. Muene uambe: ‘O kia beta o kota, o kukala ni ukamba uambote ni Jihova, o jimbongo ndenge. O muii u tena kunhana o kitadi kié, maji sé-ku muthu u tena kunhana o ukamba ué ni Jihova. Kanenu kuthandanganha kiavulu se mu dia’hi, mu nua’hi, mba se mu zuata’hi. Talesenu o jinjila. Nzambi u bhanga ioso phala ku a disa. O kuthandanganha kiavulu, ki kua-nda bandekesa kizuua ku muenhu ué. Lembalalenu kuila, Jihova uejiia o ima i mua bhindamena.’

O mundu nu-ka uevuile muthu kuzuela kála Jezú. O atuameni a jingeleja jâ, ka kexile mu a longa o maka enhá. Mukonda diahi Jezú uexile mesene iambote? Mukonda ima ioso ia kexile mu longa, ia tundile kua Jihova.