DIAMBU DIA KAPA | O KUILA O ATHU AFU A TENA DINGI KUVUTUKA?
Ihi i Bhita ni Athu Kioso Kia Fua?
“Eme nga kexile mu banza kuila kua kexile ididi itatu múia o athu kioso kia fua: ku diulu, ku ifernu ni mu kididi kia kufundisa athu afu. Eme ng’ejidile kuila, ki ng’exile ngi muthu uambote phala kuia ku diulu, maji ng’ejidile ué kuila ki ng’exile ngi muthu ua iibha kiavulu phala kuia mu ifernu. Maji ki ngi kijidile kiambote se o kididi kia kufundisa o athu afu kilombolola ihi. O kizuelu kiki nuka nga ki tangele mu Bibidia. O athu ngó akexile mu tumbula o kididi kiki.”—Lionel.
“A ngi longele kuila athu oso kia fua, aia ku diulu, maji eme ki ngi xikinine o milongi íii. Nga kexile mu banza kuila, kioso muthu kia fua, ioso ia bhu kiá, se-ku dingi kidielelu phala muéne.”—Fernando.
Eie ua dibhuile kiá: ‘Ihi i bhita ni athu kioso kia fua? O kuila o athu afu ai mu kididi kiéngi ia a mu tala hadi? O kuila saí kizuua, ene a-nda vutuka dingi? Kiebhi ki tu tena o kuijiia o maka enhá?’ Tua ku dióndo, tala ihi i longa o Mikanda Ikôla. Kia dianga, tua-nda mona ihi i zuela o Bibidia ia lungu ni kufua, lua kaiadi tua-nda zuela o kidielelu ki bhana o Mak’â Nzambi kua ió afu.
Uebhi o ukexilu ua athu afu?
O BIBIDIA I ZUELA: “Kuma ió oso ala ni muenhu ejiia kuila a-nda kúfua, maji o ió afu kiá k’ejiia dingi kima kioso-kioso; né ue kisakidilu kia kima, ene kala nakiu dingi; kuma o dixinganeku diâ, athu a di bhakuila ue kiá o kijimba. Kioso kia kuiza bhu maku phala ku ki bhanga, bhanga-kiu muene katé bhuoso bhua suku o nguzu ié, mukonda o mu mbila mu ua-nda kuia, kana-mu dingi kikalakalu, mba ufunu, mba uhete, mba kuijiia kuoso-kuoso.”a—Ndongixi 9:5, 10.
O Mbila, o kididi múia o athu kioso kia fua; kilombolola kuila kioso athu kiaia mu mbila, ene ka tena dingi kubanza mba kubhanga kima kioso-kioso. Ihi ia banzele Jobe ia lungu ni Mbila? Jimbote jê joso a ji nhanene, ua xalele sé kima, tuana tuê tuoso tua fuile mu kizuua kimoxi, muéne ua katele kiavulu, mukutu uê uoso uezalele ni mabhumbu ku mutué katé bhu inama. Muéne ua bhingi kua Nzambi: “Tamanu ua ngi suekele mu mbila.” (Jobe 1:13-19; 2:7; 14:13) O izuelu íii ilondekesa kuila, Jobe ka kexile mu banza kuila o Mbila kididi kia túbhia, kididi mueji tala dingi hadi iavulu kana. Mu veji dia kiki Jobe uejidile kuila o Mbila iexile kididi kia kutululuka.
Saí dingi ukexilu uéngi ua kuijiia o ukexilu ua athu kioso kia fua. O Mikanda Ikôla i tanga dinake dia athu a fuile maji a vutukile dingi ku muenhu.—Tanga o kaxa, “O Bibidia i Tanga Dinake Dia Athu a Fukunukine.”
O athu enhó a fukunukine, ka zuela kuila akexile mu kididi kia kutululuka mba mu kididi kia túbhia kana. Se ene endele kididi kiéngi kioso kia fuile, o kuila ene keji tangela o athu? O Bibidia ki ieji tu tangela phala etu ué kuijiia? Mu Mikanda Ikôla, ki muala kima kia lungu ni maka enhá. O dinake dia athu enhó, ka zuela kima mukonda ene kexile ni kima kia kuzuela. Mukonda diahi? Mukonda ene kejidile kima, exile kála endele ku kilu kia zongo. Mu kidi, saí ithangana o Bibidia i tumbula o kizuelu kilu phala kulombolola o kufua. Mu kifika, Davidi ni Xitevá ai “ku kilu,” mba a fuile.—Ikalakalu 7:60; 13:36.
Kidielelu kiahi kiala na-kiu o athu afu? O kuila a tena dingi ku fundumuka ku kilu?
a Mu Mikanda Ikôla, o kizuelu “Mbila” mu dimi dia Hebeleu kilombolola “Sheol” o mu Ngeleku kilombolola “Hades.” Saí ji Bibidia o kizuelu kiki a ki lungulula “ifernu,” maji o Mikanda Ikôla ki iene mu longa kuila o athu kia fua aia mu kididi kia túbhia.