-
O Utuminu wa Nzambi Ihi?Sanguluka Katé Kuhádya ni Hádya!—Mbote Ijila Mukudilonga o Bibidya
-
-
DISÁ 31
O Utuminu wa Nzambi Ihi?
O njimbu ya beta kota ya Bibidya ya lungu ni Utuminu wa Nzambi. Jihova bhukaxi ka Utuminu wê wandabhangesa o ixi kukituka palayízu. Maji o Utuminu yu ulombolola ihi? Kyebhi kitwejiya kwila wamutumina kya? Ihi ya bhange kya o Utuminu yu? Ihi yandabhanga dingi kuhádya? O disá didi ni madisá akayela andatambwijila o ibhwidisu yiyi.
1. O Utuminu wa Nzambi ihi? Nanyi o Sobha ya Utuminu yu?
O Utuminu wa Nzambi unguvulu a ubhange kwa Jihova. Jezú Kidistu mwene o Sobha, wamutumina kya ku dyulu. (Matesu 4:17; Nzwá 18:36) O Bibidya yamba kwila Jezú: ‘Mwene wa ka tumina . . . katé ku hádya.’ (Luka 1:32, 33) Kuma mwéne o Sobha ya Utuminu wa Nzambi, Jezú wandatumina o athu oso mu ixi.
2. Ananyi andatumina kumoxi ni Jezú?
Jezú kamutumina ubheka. Mwene wamutumina ni athu a asolo mu “miji yoso, madimi moso, madyembu moso, ni mu ifuxi yoso . . . ene hinu à kala mù tumina mu ngongo.” (Dijingunwinu 5:9, 10) Athu akuxi andatumina ni Kidistu? Tunde kyeza Jezú mu ixi, mazunda a athu amukituka Jikidistá. O kwila o Jikidistá joso andatumina kumoxi ni mwene? Kana! O 144.000 amidi ene andaya kudyulu phala kutumina ni Jezú. (Tanga Dijingunwinu 14:1-4.) O Jikidistá jamukwa abhanga mbandu kumundu wa Nzambi andakala mu ixi.—Jisálamu 37:29.
3. Mukonda dyahi o Utuminu wa Nzambi wabeta kota o jinguvulu jamundu ndenge?
Ne mwene kyoso o jinguvulu kya sota kubhanga ima yambote, ene kala ni kutena kwa kubhanga yoso ya mesena. Sayi ithangana ene a abhinganesa ku athu engi akwa lwimbi kamesena o mbote ya athu. Maji o Sobha ya Utuminu wa Nzambi Jezú, seku muthu wandamubhingana. Nzambi “wa kà bheka-ku o utuminu ki u xikina dingi ku u jikinisa.” (Daniyele 2:44) Jezú wandatumina o ixi yoso, wandatalatala o athu oso mu ukexilu umoxi. Mwene mukwa henda, wayuka, wandalonga o athu kuditalatala ni henda ni kuyuka.—Tanga Izaya 11:9.
DILONGE DINGI
Dilonge dingi se mukonda dyahi o Utuminu wa Nzambi wabeta kota o jinguvulu ja ngongo ndenge.
4. O Utuminu wa Nzambi wene wandatumina o ngongo yoso
O kutena kwala naku Jezú kwakutumina kwabeta kota o kwa jinguvulu joso mu ngongo ndenge. Tanga Matesu 28:18, mukusuluka bhanga o kibhwidisu kya kayela:
Mu ukexilu webhi o kutena kwala naku Jezú kwa kutumina kikudifu ni kutena kwala naku o jinguvulu ja athu mu xitu?
O jinguvulu ja ngongo ene mu jilungulula ithangana yoso, kala nguvulu utumina ngó mbandu ya ixi. Abha o ya lungu ni Utuminu wa Nzambi? Tanga Daniyele 7:14, mukusuluka bhanga o ibhwidisu ya kayela:
Mudyé, mbote yebhi itukatula mu kwijiya kwila o Utuminu wa Nzambi “ka tena ku ubhwisa-ku”?
Mbote yebhi itutena o kukatula mu kwijiya kwila o Utuminu wa Nzambi wandatumina o ixi yoso?
5. O mautuminu a athu abhingi kwabhinganesa
Mukonda dyahi o Utuminu wa Nzambi wabhingi kubhingana o mautuminu oso mu ngongo? Tala OVIDYU, mukusuluka bhanga o kibhwidisu kya kayela.
Ihi yene mu bheka o unguvulu wa athu mu xitu?
Tanga Ndongixi 8:9, mukusuluka bhanga o ibhwidisu ya kayela:
Mudyé, o kwila o Utuminu wa Nzambi wabhingi mwene kubhingana o jinguvulu ja athu? Mukonda dyahi?
6. Mu Utuminu wa Nzambi mwala atumini ejiya kyambote o ima itudibhana nayu
Sobha yetu Jezú, wexile kya mu ixi kala muthu mu xitu, mu kiki mwene utena “kwivwa o malamba metu.” (Jihebelewu 4:15) Jihova wasolo 144.000 a mayala ni ahatu afiyele phala kutumina kumoxi ni Jezú, “athu ku miji yoso, madimi moso, madyembu moso, ni mu ifuxi yoso.”—Dijingunwinu 5:9.
Kyebhi ki udivwa mu kwijiya kwila, kikale Jezú ni oso andatuminanê kumoxi, ejiya kyambote kyebhi kitudivwa, ni ibhidi itudibhana nayu? Mukonda dahyi?
Jihova wasolo mayala ni ahatu a idifwa yoso phala kutumina kumoxi ni Jezú
7. O ijila ya Utuminu wa Nzambi ya beta kota ya jinguvulu ja athu muxitu ndenge
O jinguvulu jibhanga ijila phala kulanga ni kukwatekesa o athu. O Utuminu wa Nzambi wala we ni ijila. Tanga 1 Kolindu 6:9-11, mukusuluka bhanga o ibhwidisu ya kayela:
Mudyé, kyebhi kyeji kala o ixi se athu oso eji belesela o itumu ya Nzambi?a
Mudyé, o kwila o athu atokala mwene kubelesela o ijila ya lungu ni Utuminu wa Jihova? Mukonda dyahi?
Ihi ilondekesa kwila o athu kamubelesela o ijila yiyi atena kulungulula o ibanzelu yâ?—Tala o velusu ya 11.
O jinguvulu ja ngongo abhanga ijila phala kulanga ni kukwatekesa o athu. O Utuminu wa Nzambi wala we ni ijila phala kukwatekesa ni kulanga o athu, maji o itumu yê ya beta kota o ya jinguvulu ja athu muxitu ndenge
ATHU AVULU AMBA: “O Utuminu kima kyala kumuxima wetu.”
Kyebhi kiweji tambwijila?
IHI IWADILONGO
O Utuminu wa Nzambi unguvulu wakidi wala kudyulu wandatumina o ixi yoso.
Kubhitulula
Ananyi amutumina ku Utuminu wa Nzambi?
Mukonda dyahi o Utuminu wa Nzambi wabeta kota, o wa athu muxitu ndenge?
Jihova wamesena kwila o yó atokala ku Utuminu wê abhanga ihi?
TOKWESA DINGI
Tala ihi ya longo Jezú ya lungu ni kwebhi kwala o Utuminu wa Nzambi.
“O Kwila o Utuminu wa Nzambi Kima Kyala ku Muxima Wetu?” (Milongi ya jw.org)
Mukonda dyahi o Jimbangi ja Jihova axikina kwila, o kubelesela o Utuminu wa Nzambi kwabeta kota o jinguvulu muxitu ndenge?
Tala ihi izwela o Bibidya ya lungu ni 144.000 a asolo kwa Jihova phala kutumina kumoxi ni Jezú.
Ihi ya bhangesa diyala mukwa kuzokela o ufôlo wa athu kuxikina kwila, o Utuminu wa Nzambi wene ngó wandabheka o kutululuka kwakidi?
“Kwebhi ku Ngisanga o Itambwijilu ya Lungu ni Kukamba o Kuyuka” (Despertai!, Novembro 2011)
a Twandamona dingi ya lungu ni ijila yiyi mu Mbandu ya 3 ya divulu didi.
-
-
O Utuminu wa Nzambi Wamutumina Kya!Sanguluka Katé Kuhádya ni Hádya!—Mbote Ijila Mukudilonga o Bibidya
-
-
DISÁ 32
O Utuminu wa Nzambi Wamutumina Kya!
O Utuminu wa Nzambi a utumbika kudyulu kumuvu wa 1914, wene o muvu wamateka o kutumina. Tundé o muvu wenyó, kyene kya mateka o izuwa isukidilaku ya jinguvulu mu ngongo. Kyebhi kitwejiya o kidi kiki? Twandamona ihi yamba o Bibidya ya lungu ni maka enya ni kyebhi kyala o ngongo tundé kumuvu wa 1914.
1. Ihi ya kanena o Bibidya?
O divulu dya Daniyele ditukwatekesa kutendela kwila o Utuminu wa Nzambi wejimateka kutumina kudisukilu dya kithangana akixana “sambwadi dya jithembu.” (Daniyele 4:16, 17) Mu kubhita mivu yavulu, Jezú wexana we o kithangana kyokyo kala “thembu ya akwa jixi jengi.” Mwene walongo we kwila o thembu yoyó ki ya bhwile luwa. (Luka 21:24) Kala kitwamono, o sambwadi dya jithembu jabhu kumuvu wa 1914.
2. Ihi yene mubhita mu ngongo tundé kumuvu wa 1914?
O maxibulu a Jezú amesenene kwijiya se thembu kuxi kyejimateka kutumina o Utuminu wa Nzambi ni kithangana kyebhi kyejimateka o izuwa isukidilaku. Ene ebhwidisa: “Kijimbwete kyê kyahi, kya kutukuluka kwé, ni kya dizubhilu dya mundu?” (Matesu 24:3) Mu kutambwijila, Jezú wazwela ima yavulu yejibhita kyoso kyejimateka kutumina kala Sobha ya Utuminu wa Nzambi. Mu ima ya tumbula mwene kwejibhita ita, nzala, ni itungutu ya ixi. (Tanga Matesu 24:7.) O Bibidya ya kanena we kyebhi kyejikala o athu “mu izuwa isukidila-ku” mukonda dya kiki, o mwenyu weji bhonza ‘kudibhana nawu.’ (2 Timote 3:1-5) O ima yiyi yene mu dibandekesa dingi tundé kumuvu wa 1914.
3. Mukonda dyahi o kuyibha mu ngongo kwene mu dibandekesa dingi tundé kya mateka kutumina o Utuminu wa Nzambi?
Mu kubhita tu ithangana kyoso Jezú kya kituka Sobha ya Utuminu wa Nzambi, mwene waluwu ita kudyulu ni Satanaji ni madimonyo mê. Satanaji amutolola. O Bibidya yamba kwila, “a mu lundumwina mu ngongo, ni ji-anju jê a ji lundumwina-nê kumoxi.” (Dijingunwinu 12:9,10, 12) Satanaji njinda ya mukwata mukonda wejiya kwila, kwakambe ngó andakumubwika. Kyenyiki, mwene wene mubheka hadi yavulu ni ndolo mu ngongo yoso. Mukonda dya kiki, o kuyibha kwene mu dibandekesa. Maji o Utuminu wa Nzambi wandazubha o kuyibha kwoso.
DILONGE DINGI
Twandadilonga kyebhi kitwejiya kwila o Utuminu wa Nzambi wamateka kutumina kumuvu wa 1914. Twandamona kyebhi kitulondekesa kwila tuxikina kuma o Utuminu wamutumina kya.
4. Mu kukondala o ithangana, o ikanenu ya Bibidya ilondekesa kwila o Utuminu wa Nzambi wamateka kutumina kumuvu wa 1914
Nzambi wabhangesa Sobha Nabukodonozolo mukwa Babilonya kulota nzoji. Bhukaxi kanzoji yiyi Jihova walondekesa ihi yejibhita kuhádya. Daniyele wajimbulula ihi ilombolola o nzoji. O nzoji ya lungile ni sobha Nabukodonozolo ni Utuminu wa Nzambi.—Tanga Daniyele 4:17.a
Tanga Daniyele 4:20-26, mukusuluka bhanga o ibhwidisu ya kayela:
(A) Ihi ya mono sobha Nabukodonozolo mu nzoji ya loto?—Tala o velusu ya 20 ni 21.
(B) Ihi yejibhita ni muxi?—Tala o velusu ya 23.
(C) Ihi yeji bhita kudisukilu dya “sambwadi dya jithembu” mba mivu?—Tala o velusu ya 26.
Kyebhi o Nzoji ya Muxi ya Lungu ni Utuminu wa Nzambi?
KIKANENU (Daniyele 4:20-36)
Unguvulu
(A) Muxi wadikota
Kiwejitumina dingi
(B) “Muxi’ú batulenu-u,” katé kibhita o “sambwadi dya jithembu”
Wejimateka dingi o kutumina
(C) “Utuminu wé wa-nda kuxialela na-u dingi”
Mu kikumbidilu kya dyanga kya kikanenu kiki . . .
(D) O muxi wexile mu lombolola nanyi?—Tala o velusu ya 22.
(E) Weha o kutumina thembu kuxi?—Tanga Daniyele 4:29-33.
(F) Ihi ya bhiti ni sobha Nabukodonozolo kudisukilu dya “sambwadi dya jithembu”?—Tanga Daniyele 4:34-36.
KIKUMBIDILU KYA DYANGA
Unguvulu
(D) Nabukodonozolo, Sobha ya Babilonya
Kiwejitumina dingi
(E) Mu kubhita 606 A.K.K., sobha Nabukodonozolo wamateka kusaluka, mu kiki katena dingi kutumina mu sambwadi dya mivu
Wejimateka dingi o kutumina
(F) Sobha Nabukodonozolo udisanza ku uhaxi wê wakusaluka, umateka dingi o kutumina
Mu kikumbidilu kya kayadi kya kikanenu kiki . . .
(G) O muxi wexile mu lombolola nanyi?—Tanga 1 Malunda 29:23.
(H) Eha o kutumina thembu kuxi? Kyebhi kitwejiya kwila ene kasuluka ni kutumina kyoso Jezú kyexile mu ixi?—Tanga Luka 21:24.
(I) Kwebhi ni thembu kuxi kya mateka dingi o kutumina o unguvulu yu?
KIKUMBIDILU KYA KAYADI
Unguvulu
(G) Jinguvulu ja akwa Izalayele exile mu lombolola o Utuminu wa Nzambi
Kiwejitumina dingi
(H) Jeluzaleme a ibwika, o jinguvulu ja akwa Izalayele eha o kutumina mu 2.520 a mivu
Wejimateka dingi o kutumina
(I) Jezú umateka o kutumina kudyulu kala Sobha ya Utuminu wa Nzambi
O sambwadi dya jithembu itenesa mivu ikuxi?
Sayi jimbandu ja Bibidya jitukwatekesa kutendela o jimbandu jamukwa. Mu kifika, odivulu dya Dijingunwinu ditukwatekesa kutendela kwila, o jithembu jitatu ni kaxaxi kyene kimoxi ni 1.260 a izuwa. (Dijingunwinu 12:6, 14) Kiki kilombolola kwila o muvu mu ikanenu ya Bibidya ulombolola 360 a izuwa. Mu kiki “Sambwadi dya mivu” itenesa 2.520 a izuwa. Sayi ithangana mu Bibidya o kizuwa kilombolola muvu.
5. O ngongo ya lunguluka kyavulu tundé kumuvu wa 1914
Jezú wakanena kyebhi kyejikala o ixi kyoso kyejikituka Sobha. Tanga Luka 21:9-11, mukusuluka bhanga o kibhwidisu kya kayela:
Mu ima iwevu mu kibatulu kitwatange, ima yebhi iwene mumona lelu?
Poxolo Phawulu wambe kyebhi kyejikala o athu mu izuwa isukidilaku ya jinguvulu ja ixi. Tanga 2 Timote 3:1-5, mukusuluka bhanga o kibhwidisu kya kayela:
Ihi i ubanza, o kwila o athu lelu ene mubhanga o ima ya tange o jivelusu jiji?
6. Londekesa kwila uxikina kuma o Utuminu wa Nzambi wamutumina kya
Tanga Matesu 24:3, 14, mukusuluka bhanga o ibhwidisu ya kayela:
Kikalakalu kyebhi kya katunda kilondekesa kwila o Utuminu wa Nzambi wamutumina kya?
Kyebhi ki utena kubhanga mbandu mu kikalakalu kiki?
O Utuminu wa Nzambi wamutumina kya, o kizuwa phala kumateka kutumina o ixi kya zukama. Tanga Jihebelewu 10:24, 25, mukusuluka bhanga o kibhwidisu kya kayela:
Ihi itwatokala kubhanga kala muthu mu dyetu kyoso kitumona “o Kizuwa kya Ngana kí zukama”?
Se wejidile kima kitena kubhulula o myenyu ya akwenu, ihi iweji bhanga?
NANGE SAYI MUTHU WIBHULA: “Mukonda dyahi o muvu wa 1914 wala ni valolo ya dikota phala o Jimbangi ja Jihova?”
Kyebhi kiweji tambwijila?
IHI IWADILONGO
O ikanenu ya Bibidya ni ima yene mubhita kumundu, ilondekesa kwila o Utuminu wa Nzambi wamutumina kya. Kyoso kituboka ni kyoso kituya mu yônge twamulondekesa o kidi kiki.
Kubhitulula
O divulu dya Daniyele dya zwela ya lungu ni sambwadi dya jithembu. Ihi ya bhiti kudisukilu dya kithangana kiki?
Ihi ikuxikinisa kwila o Utuminu wa Nzambi wamateka kutumina kumuvu wa 1914?
Kyebhi ki utena kulondekesa kwila, uxikina kuma o Utuminu wa Nzambi wamutumina kya?
TOKWESA DINGI
Tala ihi yambe o akwa misoso ni athu engi ya lungu ni ihi yene mu bhita tunde kumuvu wa 1914.
“O Wendelu Wambote wa Texika” (Despertai!, Abril de 2007 mu Phutu)
Sayi diyala walungulula o mwenyu wé mu kutanga o kikanenu kitusanga mu divulu dya Matesu 24:14, tala kyebhi kyabhiti.
“Nga Zolele Kiavulu Kujokala Beisebol o Ima Ioso Ndenge!” (O Mulangidi No. 3 2017)
Kyebhi kitwejiya kwila o kikanenu kitusanga mu divulu dya Daniyele kibatulu wana kya lungu ni Utuminu wa Nzambi?
Kyebhi kitwejiya kwila o “sambwadi dya jithembu” jo tumbule mu divulu dya Daniyele kibatulu 4 jabhu kumuvu wa 1914?
“O Utuminu ua Nzambi ua Mateka ku Tumina Thembu Kuxi? (Mbandu 2)” (O Mulangidi, 1 wa Kamoxi wa 2014)
a Tala o milongi iyadi ya sukina mu mbandu Tokwesa Dingi mu disá didi.
-
-
Ihi yandabhanga o Utuminu wa Nzambi?Sanguluka Katé Kuhádya ni Hádya!—Mbote Ijila Mukudilonga o Bibidya
-
-
DISÁ 33
Ihi Yandabhanga o Utuminu wa Nzambi?
O Utuminu wa Nzambi wamutumina kya kudyulu. Kwakambe ngó bhofele wandatumina o ixi, o ima mu ixi yandalunguluka. Tumone o ima yambote yandabhanga o Utuminu wa Nzambi kuhádya.
1. Kyebhi o Utuminu wa Nzambi wandabheka kutululuka ni kuyuka mu ixi?
Jezú, o Sobha ya Utuminu wa Nzambi, wandabwika o athu oso a ibha ni jinguvulu ja athu mu xitu mu ita ya Alumajedone. (Dijingunwinu 16:14, 16) Kyoso kyandabhita o ima yiyi, o kikanenu kya Bibidya kyandadikumbidila: “Bhu bhita ngó kathangana, mukwa phulu-ó ubhwa athu ku mesu.” (Jisálamu 37:10) Bhukaxi ka Utuminu, Jezú wandabheka paze ni kuyuka mu ngongo yoso.—Tanga Izaya 11:4.
2. Kyebhi kyandakala o mwenyu wetu kyoso o vondadi ya Jihova kyanda ku ibhanga mu ixi?
Xinganeka kukala mu ixi mwala athu ambote ayuka, enoso azolo Jihova adizolo mudyâ. Kyene kyandakala o ima kyoso o Utuminu wa Nzambi kyandamateka kutumina o ixi, kuma “Ixi-phe i xalela ku athu yá ayuka, ene a i lundula, mwene mwa tunga, o thembu yâ ki ibhu.” (Jisálamu 37:29) Kibhwandakala dingi muthu wandakata, enoso andakala ni mwenyu wakalelaku.
3. Ihi yandabhanga o Utuminu wa Nzambi kyoso kyandabwika o athu ayibha?
Kyoso kyandabwika o athu ayibha, Jezú wandatumina mu 1.000 ya mivu. Mu kithangana kiki, mwene ni 144.000 andatuminanê kumoxi, andakwatekesa o athu mu ixi kukituka athu ayuka. Kudisukilu dya midi ya mivu, o ixi yoso yandakala palayízu, athu oso andasanguluka mukonda andaya ni kubelesela o itumu ya Jihova. Mu kusuluka Jezú wandavutula o Utuminu kwa Tat’ê, Jihova. O dijina dya Jihova anda ‘dixila.’ (Matesu 6:9, 10) Kiki kyandalondekesa kwila, Jihova Mutwaneni usuwa o athu. Jihova wandabwika Satanaji, o madimonyo ni muthu woso woso usola kubhukumukina o unguvulu Wê. (Dijingunwinu 20:7-10) Mukonda dya Utuminu wa Nzambi o mwenyu wandayuka mu maukexilu oso, kiki kyandanangenena katé kuhádya ni hádya.
DILONGE DINGI
Dilonge dingi umone se mukonda dyahi tutena kudyelela kwila, Nzambi wandakumbidila o ikanenu ya Bibidya ya lungu ni hádya bhukaxi ka Utuminu wê.
4. O Utuminu wa Nzambi wandabwika o jinguvulu joso ja ngongo
O Bibidya yamba kwila “muthu u kala mu kutumina mukwá phala ngó ku mu sengulula.” (Ndongixi 8:9) Jihova wandazubha o kuyibha kwoso bhukaxi ka Utuminu wê.
Tanga Daniyele 2:44 ni 2 Tesalonika 1:6-8, mukusuluka bhanga o ibhwidisu ya kayela:
Ihi yandabhanga Jihova ni Mon’ê Jezú, kujinguvulu ja ngongo ni yó ene mu kwatekesa o jinguvulu jiji?
Mu kuxinganeka mu ima yoso iwadilongo ya lungu ni Jihova ni Jezú, mukonda dyahi tutena kuxikina kwila ene andafundisa mu ukexilu watokala?
5. Jezú Sobha ya yuka
Kala Sobha ya Utuminu wa Nzambi, Jezú wandabhanga ima yavulu yawabha phala kukwatekesa athu oso mu ixi. Tala OVIDYU phala kumona kwila Jezú wamesena kukwatekesa o athu ni kwila, Nzambi wamubhana o kutena kwakubhanga kiki.
O ima ya bhange Jezú kyoso kyexile mu ixi, ilondekesa ihi yandabhanga mwene kala Sobha ya Utuminu wa Nzambi. Mabesá ebhi o tumbule bhabha, wamukingila kumona o kikumbidilu kye? Tanga o ibatulu ya Bibidya izwela dingi ya lungu ni mabesá enya.
KYOSO KYEXILE MU IXI, JEZÚ . . .
TUNDE KUDYULU, JEZÚ WANDA . . .
wabatamesa o kithembwe kya swina ni mabhuku.—Máluku 4:36-41.
yudika o ima yoso mu ixi.—Izaya 35:1, 2.
wadisa mazunda ni mazunda a athu mu ixi.—Matesu 14:17-21.
zubha o nzala mu ngongo yoso.—Jisálamu 72:16.
wasake mauhaxi avulu.—Luka 18:35-43.
bhangesa o athu oso kukala ni sawidi yambote.—Izaya 33:24.
wafukununa athu.—Luka 8:49-55.
fukununa o athu, wandabwika o kalunga.—Dijingunwinu 21:3, 4.
6. O Utuminu wa Nzambi wandabheka ima yambote kuhádya
O Utuminu wa Nzambi wandabhana o mwenyu ku athu wamesenene Jihova phala ene. O athu andakala mu palayízu mu ixi katé kuhádya ni hádya. Tala OVIDYU umone kyebhi Jihova kyandakalakala kumoxi ni Mon’ê Jezú, phala kukumbidila o vondadi Yê.
Tanga Jisálamu 145:16 mukusuluka bhanga o kibhwidisu kya kayela:
“Myenyu yoso idya, ikuta ni ima yambote.” Kyebhi ki udivwa mu kwijiya kwila Jihova wandakumbidila o kikanenu kiki”?
ATHU AVULU AMBA: “Maka etu oso andabatuka, se tukala ni nguvulu yambote.”
Maka ebhi andabatula o Utuminu wa Nzambi, kene mu tena kwabatula ku jinguvulu ja athu mu xitu?
IHI IWADILONGO
O Utuminu wa Nzambi wandabhanga o ima yoso kala kya mesenene Nzambi kwila a ibhanga. Wandabhanga o ixi kukituka palayízu, kwandakwizala ni athu ambote andabheza Jihova katé kuhádya ni hádya.
Kubhitulula
O Utuminu wa Nzambi wandazelesa kyebhi o dijina dya Jihova?
Mukonda dyahi tutena kudyelela kwila, o Utuminu wa Nzambi wandakumbidila o ikanenu yoso ya Bibidya?
Mu ima yoso yambote yandabhanga o Utuminu, ima yebhi dingi iwamesena kumona o kudikumbidila?
TOKWESA DINGI
Tokwesa dingi phala kwijiya se Alumajedone ihi.
Tanga phala kwijiya dingi ihi yandabhita mu kithangana kya “hadi yadikota.”— Matesu 24:21.
Tala kyebhi o miji kya tena kudixinganeka mu palayízu.
Mu milongi “Ibhwidisu Yavulu Yexile mu Ngi Thandanganyesa,” tala kyebhi diyala wabhukumukine, wexile mu dita mu maka a jinguvulu, kya sange o kikwatekesu kya bhindamene.
“O Bibidya Ilungulula o Myenyu ya Athu” (O Mulangidi, 1 wa Katatu wa 2012)
-