5 Nzambi u Xikina o Ubhezelu Uoso o Kuila Kidi?

Ihi i uene mu kuívua: “Kiene kimoxi kála o jinjila javulu, ni ikoka iia bhu kididi kimoxi, kuene ué jinjila javulu ji ku ambata kua Nzambi. Kala muthu ua tokala u sota o njila iê phala ku bhixila kua Nzambi.”

Ihi i longa o Bibidia: Tua tokala ku kala tu athu a kidi mu ubhezelu uetu, ki tu tokala ku kala tu athu a makutu. Jezú ua zuela ku atuameni a jingeleja mu izuua iê, se mukonda diahi Nzambi ua a ditunine, kioso kiambe: “Izaia kidi kiê kia mi soneka enu, uixi: Nzambi uambe kuma: ‘Athu iá a ngi xila ngó ni mizumbu iâ, maji mixima iâ-phe ia ngi kala kua lebha.’” (Marku 7:6) Kienhiki o kuzuela ngó o kidi, ki kilondekesa kuila Nzambi ua-nda xikina o ubhezelu uetu.

Jezú ua zuela o kidi kiki, mu kulondekesa o kiluezu kia atuameni a jingeleja ni akaiedi iâ mu ubhezelu uâ. Muéne ua a tangela o kizuelu kia Nzambi kiamba kuila: ‘A ngi bheza-phe ngó mu makutu ni ku longa ijila ia tumu ngó athu, kala Nzambi muéne ua i tumu.’ (Marku 7:7) O ubhezelu uâ, uexile ua “makutu,” mukonda ene akexile mu ta o ijila iâ ku pholo, o itumu ia Nzambi kana.

Mu veji dia ku xikina kuila kuene jinjila javulu ja ku bhixila kua Nzambi, o Bibidia i longa kuma, kuene ngó njila imoxi. O divulu dia Matesu 7:13, 14 dizuela: “Bokuenenu bhu dibhitu dia tolo, mbata o dibhitu dia kulu ni njila iazanze iia ku’alunga; o athu a di bokona avulu. O kadibhitu-phe katolo, ni kanjila kòfele, kaia ku muenhu; athu k’a kidi a ka sanga.”

Kiebhi o kuijiia o kidi ki ku kuatekesa: Xinganeka ngó, kiebhi ki ueji divua se ua di pelepalale mbeji javulu phala ku lenga mu joko, eie u bhixila bhu mbambe, maji ku nganhala o kikoué mukonda ku belesela o itumu ia joko. Ueji mona kuila o nguzu ioso i ua bhange, ia diboto ngó. O kuila kiki ki tena ué ku bhita ni ubhezelu uetu kua Nzambi?

Mu ku sokesa o ubhezelu uetu kála muthu u jokala, o poxolo Phaulu ua soneka: “Se muthu ue u di xina ni akuâ bhu ididi ia matonokenu, ka mu zuika kitundu, se ua kambe kualuka o ijila ia ku di xina.” (2 Timote 2:5) A tena ku tu xikina kua Nzambi, se tu mu bheza, ni “kualuka o ijila,” iê mu ukexilu u xikina muéne. Etu ki tu tokala ku sola o njila ietu kua Nzambi, kála o mukua ku lenga, ka tokala ku sola kabasa kididi phala ku lenga ni ku nganhala mu ku lenga.

Phala ku bhanga o ima ia uabhela Nzambi, tua tokala ku zelesa o ubhezelu uetu, sé ku tanga makutu alungu ni muéne. Jezú uambe: “Maji dikumbi dí diza-phe, o diene dia bhixila kiá, dia abhezi a kidi ku bheza Tata mu nzumbi ni mu kidi.” (Nzuá 4:23) Tu tena kuijiia o njila ia kidi iambata kua Nzambi, mu ku di longa o Maka mê, o Bibidia.—Nzuá 17:17.a

[Tanga mu luji]

[Kilombuelelu ku bandu 8]

O kuila o jingeleja a longa o athu ku bheza Nzambi kála kia mesena muéne?