O Kuila o Kitumu Kia Bhanene Nzambi ku Akua Izalaiele, Kia Tokalele Muene?

MIVU ku dima o jinzo ja kufundisa ku ocidente, a xikina o umbangi ua makutu ua lungu ni mala kiiadi, a a tatele kuila a jibhile, anga a a balakala o kufua. Kioso kia sange o kidi, o azokedi a bhange ioso ia a tenene ku bhulula-bhu umoxi. Maji o azokedi ka tenene ku bhulula ua mukua, mukonda a mu jibhile kiá.

Mu kuijiia kuila o afundixi a tena ku di nganala, o Bibidia i zuela: “O kubatula mu kidi, o kubatula milonga mu kidi, kuene ngó ku mu kaiela jinga.” (Matendelelu 16:20) Se afundixi a kaiela jinga o ku batula milonga mu kidi, o athu a sanguluka. O kitumu kia Nzambi kia kuatekesele o afundixi akua Izalaiele, ku fundisa sé kathombo maji ni ku iuka. Tu di longe o kitumu kiki, ni ku mona kuila, “uendelu uê uoso [Nzambi] uatetuluka.”—Matendelelu 32:4.

AFUNDIXI AKUA “UNJIMU NI KU TETULUKA”

O athu a katula mbote iavulu se o afundixi a kala athu a tenena, athu a kaiela o kidi ni ku kamba kathombo ka athu. O Kitumu kia bhanene Nzambi ku akua Izalaiele, kia bhanene valolo ia dikota ku afundixi exile ni ukexilu iú. Mu Kikangalakata, Mozé a mu tendelesa ku sota “oso athu a tena, ala ni kilunji, akua uoma ua Nzambi, akua kidi, ka xikina kudia mangonha” n’a kale afundixi. (Makatukilu 18:21, 22) Mu ku bhita makuinhi a uana a mivu, ua tono dingi kuila kua bhingile athu akua “unjimu ni ku tetuluka” phala ku fundisa o mundu.—Matendelelu 1:13-17.

Mu ku bhita hama ja mivu, o Sobha Jozafatea ia Judá ua tumina o afundixi: “Talenu kiambote; ioso i mu bhanga kuma o kufundisa kuenu ki kua tundu ku muthu, maji kua tundu kua Jihova; muene-phe uala ni enu mu uenji uen’iú ua kufundisa. O kiki-phe uoma ua Jihova u kale ni enu; alukenu-kiu mu ki bhange; kuma kua Jihova, Nzambi ietu, ki ku moneka kituxi, mba kusuua jipholo ja athu, mba ku xikina maujitu.” (2 Malunda 19:6, 7) Kienhiki, o sobha ua lembalesa o afundixi kuila se o kathombo ka athu mba luímbi lua kitadi lua funhisile o ukexilu uâ ua ku fundisa o maka, eji bhakula ji konda kua Nzambi.

Kioso o afundixi a Izalaiele a kaiele o itendelesu íii ia iuka, o kifuxi kioso kia Izalaiele kia divuile kiambote kuila a mu a langa. Maji o Kitumu kia Nzambi, kia bhanene ué milongi ieji kuatekesa o afundixi ku batula mu kidi o maka, né muene se o maka a bhonzele. Milongi iebhi ia tambuile ene?

ITUMU IA KUATEKESA O AFUNDIXI KU BATULA KIAMBOTE O MAKA

Né muene o maiala a a solele ku kala afundixi, exile ni unjimu ni kilunji, ene ka tokalele ku batula o maka mu ku dielela mu unjimu uâ. Jihova Nzambi, ua a bhanene itumu ieji ku a kuatekesa ku batula kiambote o maka. Tala o itumu ia tambuile o afundixi a Izalaiele.

Ku Tokuesa Kiambote o Maka. Bhu kaxi ka Mozé, Nzambi ua longele o afundixi a Izalaiele kuila: “Endenu ni kuvuidila jiphange jenu, kioso kia di kuata milonga, mu a batuile mu kidi o madimanda ma.” (Matendelelu 1:16) O afundixi a tena ngó ku fundisa mu kidi se ene ejiia kiambote o maka. Mukonda dia kiki, Nzambi ua tendelesa o afundixi, uixi: “Enda kiá ni kuibhula kiambote, uendesa muene; anga tongesa muene kiambote.” Kienhiki, ande dia ku batula o maka, o afundixi a tokalele kuijiia se o kitatelu kiexile “kia kidi.”—Matendelelu 13:14; 17:4.

Kuívua o Jimbangi. O izuelu ia jimbangi ia kexile mu kuatekesa kiavulu o afundixi ku tokuesa kiambote o maka. O Kitumu kia Nzambi, kiambele: “O ki bhu kala kituxi mba unzangi, mba mulonga uoso-uoso kana kuívua mbangi imoxi i balumuka mu ku tatela muthu inda mu kanu dia mbangi jiiadi mba mu kanu dia jitatu, muene mua xikikila o maka oso.” (Matendelelu 19:15) O Kitumu kia Nzambi kia tendelesele ué o jimbangi kuila: “Kana kuenda ni kabódio; kana ku ta lukuaku lué ni mukua phulu.”—Makatukilu 23:1.

O Jimbangi ka tokala ku tanga makutu. O kitumu kia dimuine oso: “O afundixi-phe a ka tokuese muene kiambote; o kia sanga kuila mbangi’ió ia zuela makutu, mukuá ua mu tuika ngó mulonga ua makutu, kioso-phe kia solele muene kubhanga kua mukuá, kiene muene ue ki mu mu bhanga na-kiu muene; mu ku bhanga kiki, mua katula kituxi mu’axaxi kenu.” (Matendelelu 19:18, 19) Kienhiki, se mua kexile muthu ua tangele makutu, o ua solele muéne ku bhanga kua mukuá, kiene ué kia tokalele ku mu bhanga na-kiu. Se muéne ua tangele makutu phala ku jibhisa mukuá ua muijidile kuila ka te kituxi, a tokalele ku mu jibha. O itendelesu íii ia suínisine o athu ku tanga o kidi.

Ku Fundisa sé Kathombo. Kioso kieji kuijiia kiambote o maka moso, o afundixi a tokalele ku batula o maka. Mu kithangana kiki, saí kitendelesu kia betele-o-kota kia tokalele ku ki kaiela: “O ki mu fundisa kana kuzamena ngadiama, mba ku suua muthu uonéne; mukuenu mu batuile mulonga uê kala kia fuama mu kidi.” (Ijila 19:15) Kienhiki, o afundixi a tokalele ku batula o maka mu ku kaiela o kidi, kana mu ku tala ku pholo mba ku mona se o muthu ngadiama mba mvuama.

O itumu íii ia bhanene Nzambi ku akua Izalaiele mu hama ja mivu ku dima, i tena ku kuatekesa katé muene o afundixi mu jinzo ja kufundisa lelu. O ku kaiela o itumu íii, ia-nda kuatekesa o afundixi phala ka fundise kia iibha.

Mu izuua ietu o afundixi evua o athu kiiadi a mu zokela muthu — O ku kaiela o itumu íii, ia-nda kuatekesa o afundixi phala ka fundise kia iibha

ATHU A KATULA MBOTE MU KU FUNDISA KUA KIDI

Mozé uebhuidisa akua Izalaiele, uixi: “Muiji ua dikota uala-ku uebhi, uala ni jingonge ni mabatuilu ma iuka kiki, kala o kitumu ki ngala ku mi bhana lelu’iki?” (Matendelelu 4:8) Mu kidi, ki mu kexile dingi muiji uéngi ua zediuile kala ene. Mu Usobha ua Solomá, ua sotele ku belesela o itumu ia Jihova mu unzangala uê, athu “a kala bhua kondama” akexile ni ku tululuka kuavulu ni jimbongo, “a kala mu kúdia ni kúnua ni ku sanguluka jinga.—1 Jisobha 4:20, 25.

Maji né muene kiki, akua Izalaiele a bhanene dikunda kua Nzambi iâ. Bhu kaxi ka polofeta Jelemiia, Nzambi uambe: “A ténde o kizuelu kia Jihova; unjimu uahi-phe ua kala na-u?” (Jelemiia 8:9) Mukonda dia kiki, Jeluzaleme ua kituka “o mbanza ia kijibhanganga” iezala ni “maufusa.” O mbanza ioio a i buikisile í ia xala kala kikangalakata kia hatu mu 70 a mivu.—Izekiiele 22:2; Jelemiia 25:11.

O polofeta Izaia ua kexile ku muenhu mu kithangana kia bhonzele kia Izalaiele. Mu ku di lembalala ia bhiti, muéne ua zuela kima kia kidi kia lungu ni Jihova Nzambi ni Kitumu Kiê: “Matetuluilu mé n’a kala mu ngongo, akua-xikulu dia mundu a di-longa o kidi.”—Izaia 26:9.

Phala ku sanguluka, Izaia a mu tumina ku soneka kuila ia lungu ni usobha ua Mexiia, Jezú Kristu, kuila: “Ka xikina ku fundisa mulonga kala kia u mono ku mesu mê, ka xikina ku bazela kima kievu ngó ku mátui mê. Maji ua kà fundisa jingadiama ni kidi kioso, oso a belesela bhoxi’abha ua kà bazela sé ngó kathungu.” (Izaia 11:3, 4) Kisangusangu kia dikota kia-nda kala na-kiu ió a-nda ku a tumina kuala o Sobha ia Utuminu ua Nzambi!—Matesu 6:10.

a O dijina Jozafate, dilombolola “Jihova Mufundixi.”

O Kuila o Kitumu Kia Nzambi Kia Suínisine o ku Vutula Phonzo?

Saí athu ene mu sota kuijiia ihi ilombolola o izuelu ia Bibidia “diesu mu diesu, dizu mu dizu.” (Makatukilu 21:24) Saí athu a xikina kuila o izuelu íii, ilondekesa kuila Nzambi u suínisa o ku vutula phonzo. Maji o ibanzelu íii, ki i difu ni kitumu kia Nzambi: “Kana ku vutula phonzo ku muthu, o an’a akua’xi ié kana ku a bhakela njinda.” (Ijila 19:18) Kiebhi ki tua-nda tendela o izuelu ia divulu didi dia Makatukilu?

O divulu dia Makatukilu 21:22, di londekesa maiala aiadi a mu bhânga, umoxi u kuama muhatu uemita u mu bhangesa ku seluka o mona. Sé o mama ni mon’ê ka fu, o diiala-phe dia muhatu iú ka tokalele ku vutula phonzo. Maji o diiala dia kuama o muhatu uemita ua tokalele u “bhana kioso kia mu xindi diala uoso uavu muhatu’ê, u bhanga kala kia mu tetuluila adiakimi.” Mu izuelu iéngi, o afundixi a tumine o diiala ua kuama ku futa kima ku diiala uávu o muhatu a mu kuama. Sé o muhatu mba o mona u fua, o afundixi eji tumina ku jibha o diiala ua jibha o muhatu mba o mona.

Mu kiki, o afundixi kana o diiala uávu o muhatu, ene a tokalele ku bhana o kitumu kia ku bhana “muenhu mu muenhu, diesu mu diesu, dizu mu dizu . . .” (Makatukilu 21:23, 24) O kitumu kiki kia kexile mu lembalesa o afundixi kuila a tokalele ku bhana kaxtiku ka soko. O ngana Richard Elliott Friedman, uambe: “O kitumu kiki kilombolola kuila, o afundixi ka tokalele ku kaxtikala kiavulu mba bhofele o muthu ua te mulonga.”

Ihi i bhangesa o athu ku xikina kuila o Kitumu kia Nzambi kia kexile mu suínisa o muthu ku vutula phonzo? Mu divulu dia Matesu 5:38, 39, Jezú uambe: “Enu muevu kuma a ki zuela, exi: Diesu mu diesu; dizu mu dizu. Eme-phe ngi mi ambela kuila: O dilebhu kana kubhânga na-diu. Uoso-phe u ku bhana huxi ku ditama dia kúdia, mu lunguluile ni diamukuá.” O izuelu íii ilondekesa kuila nange mu izuua ia Jezú saí atuameni a jingeleja mu ijila iâ akexile mu longa o athu ‘ku vutula phonzo,’ kala kima kia tokala. Maji Jezú ua longo kuila, o milongi íii ki i kexile mu Kitumu kia Nzambi kia bhanene ku akua Izalaiele.