Kiki o Kima Kia Beta-o-Kota ku Muenhu

Ihi i ua tokala o ku bhanga phala ku kala u dikamba dia Nzambi? Tua di longo ima itatu i u tena o ku bhanga phala u tene ku kala dikamba dia Nzambi. Ienii:

1. Kuijiia ni ku tumbula o dijina dia Nzambi, Jihova

2. Kuzuela ni Nzambi izuua ioso mu ku samba ni ku di longa o Maka mê, o Bibidia

3. Ku kolokota ku bhanga o ima i sangulukisa o muxima ua Jihova

Kienhiki, o kuila ua mu bhanga o ima íii phala ku zukama kua Nzambi? O kuila saí kima ku muenhu uê ua bhingi ku ki lungulula? Tuejiia kuila ku bhinga nguzu phala ku bhanga kiki. Maji xinganeka o mabesá u ua-nda tambula.

Jennifer mukua Estado unidos uambe: “Nguzu ioso i u bhanga phala ku kala ni ukamba uambote ni Nzambi, iala ni valolo ia dikota. O ukamba iú u bheka mabesá avulu, mu kifika, o kidielelu kietu kua Nzambi ki dibandekesa dingi, o kuijiia kuetu kua lungu ni muéne ni henda ietu kua muéne ivula dingi. Kiki o kima kia Beta-o-kota ku muenhu!”

Se eie ua mesena ku kala ni ukamba uambote ni Nzambi, o Jimbangi ja Jihova a tena ku ku kuatekesa. Ene a tena ku di sokejeka kiambote phala ku di longa o Bibidia n’eie sé ku futa. Eie u tena ué kuia mu iônge iâ mu Kididi kia Ubhezelu mu ua-nda sanga athu a bhana valolo ia dikota mu ukamba uâ ni Nzambi.a Mu ku bhanga kiki, ua-nda divua kála kia divu o mukua Jisálamu, uexi: “Eme-phe kia ngi uabhela ku zukama kua Nzambi.”—Jisálamu 73:28.