DIAMBU DIA KAPA | UKONDA UA TALE HADI IU UAFU?
Ukutu íii ia Bhiti Muene?
Ku muvu ua 33 K.K.,Jezú dia Nazalé, a mu jibha. Muéne a mu tatele makutu kuila ua kexile mu suínisa o athu kubhukumukina o jinguvulu, a mu bûba kála ímbua ia a mu phaphele ku taka. Muéne ua tale hadi iavulu katé kiafu. Maji Nzambi ua mu fukununa, o kia bhiti 40 a izuua, Jezú ua bande ku diulu.
O ima íii ia bhiti ni Jezú tu i sanga mu Madivulu a uana a zuela ia lungu ni Jezú, o divulu dia Matesu, Marku, Luka ni Nzuá. O madivulu enhá tu a sanga mu Mikanda ia Ngeleku, a ixana ué Kikutu Kiobhe. O kuila o izulukutu íii ia bhitile muene? Kiki kibhuidisu kia dikota. Mukonda se o ima íii ki i bhitié,mu kiki-phe o kixikanu kia Jikidistá kia kuila Nzambi ua-nda bhangesa o ixi kukala Palaízu, nzoji ngó. (1 Kolindo 15:14) Maji se o ima íii ia bhiti muene, mu kiki-phe tu tena kudielela kuila, ku hádia o athu a-nda zediua. O kuila o izulukutu i tu tanga mu madivulu a Matesu, Marku, Luka ni Nzuá ia lungu ni Jezú, kidi muene mba makutu ngó?
O MISOSO IHI ILONDEKESA?
O misoso i tu sanga mu divulu dia Matesu, Marku, Luka ni Nzuá ki i soko ni misoso ia makutu, mukonda o misoso i tu sanga mu madivulu enhá, misoso ia kidi muene, a i soneka ni kidi kioso. Mu kifika, o madivulu auana iá, a tanga majina a ididi, katé lelu athu a tena kuia hanji ku ididi íii. O madivulu enhá a tumbula uá majina a athu, o jingijiie ja mundu a xikina uá kuila o athu enhá akexile muene ku muenhu.—Luka 3:1, 2, 23.
O asoneki ku hama ia dianga ni ia kaiiadi, a soneka uá ia lungu ni Jezú.a O ukexilu ua mu jibha, kala kia ki soneka mu divulu dia Matesu, Marku, Luka ni Nzuá ua difuangana ni ukexilu ua kexile mu jibha o athu ku Loma m’ukulu. Ki kiene ngó, o izulukutu ia soneka akua mundu ia lungu ni Jezú, ia difu ni milongi iala mu Bibidia, kála o maukexilu a iibha alondekesa o maxibulu a Jezú. (Matesu 26:56; Luka 22:24-26; Nzuá 18:10, 11) O ima ioso íii ilondekesa ni kidi kioso kuila, o asoneki a divulu dia Matesu, Marku, Luka ni Nzuá a soneka muene o kidi kia lungu ni Jezú.
O KUILA JEZÚ A MU FUKUNUNA MUENE?
Sumbala avulu a xikina ni kidi kioso kuila Jezú ua kexile muene mu ixi ni kuila ua fuile muene, maji a mukuá ka xikina kuila a mu fukununa. Katé muene ni jipoxolo jê, ku dimatekenu akexile ni phata kuila Jezú ka mu fukunuine. (Luka 24:11) O ji phata joso ja bhu, kioso ene ni maxibulu a mukuá kia mono mu ithangana iavulu, Jezú ua fukunukine. Sai kizuua muéne ua moneka bhu kaxi ka 500 a maxibulu ndenge exile kumoxi.—1 Kolindo15:6.
O maxibulu ka kexile ni uôma ua ku a kuata ni ku a jibha. Ni kusuína kuoso ene a bokele o difukunukinu dia Jezú ku athu oso katé muene ku athu a mu jibhile. (Ikalakalu 4:1-3, 10, 19, 20; 5: 27-32) Se Jezú ka fukunukine, o kuila o maxibulu eji zuela ni kusuína kuoso kuila muéne ua fukunuka? Tundé ku hama ia dianga katé lelu, o difukunukinu dia Jezú di bhana nguzu mu kixikanu kia Jikidistá.
O misoso i tu sanga mu divulu dia Matesu, Marku, Luka ni Nzuá, ia lungu ni kufua ni difukunukinu dia Jezú, misoso ia kidi. Se u tanga ni kuxinganeka kiambote mu misoso íii, ua-nda mona kuila ioso ia bhiti ni Jezú kidi muene. O kuxikana kuê kua-nda kola dingi se u tendela kiambote se mukonda diahi Jezú ua tale hadi iu ua fu. O mbandu ia kaiela ia-nda lombolola o maka enhá.
a Tacitus a mu vuala ku muvu ua 55 K.K., ua soneka kuila “Kristu . . . ua tale hadi iavulu mu utuminu ua Tibéliu bhu maku a nguvulu Ponsiu Pilatu.” O ngana Suetonius (ku hama ia dianga); ni mukua musoso ngana Josefu mukua Judá (ku hama ia dianga) ni Pliny Munzangala, nguvulu ia Betaniia (ku hama ia kaiiadi), a tumbula uá Jezú mu madivulu a soneka.