Atangi A Madivulu Metu Ebhula

Kyoso kyambela Eva kwila keji fwa se wa dile o kibundu kya kwijiya kyawabha ni kyayibha, o kwila Satanaji wa kexile mu mulondekesa o ulongelu wa lelu, wa kwila o muthu kyoso kya fwa o nzumbi yé ikalé hanji ni mwenyu mu kididi kyengi?

Dyabhu kambe kwa Eva kwila se mwene wa dile ku kibundu kyo fidise kwala Nzambi, o mukutu wê weji fwa maji o nzumbi yê yeji suluka kukala ku mwenyu mu kididi kyengi. Bhu kaxi ka nyoka Satanaji wambe kwila, se Eva wa dile ku kibundu kya muxi, ‘mwene keji fwa.’ Satanaji wa bhangesa Eva kuxinganeka kwila, weji suluka ni mwenyu wa beta dingi kota mu ixi, weji sanguluka, keji bhinga kubelesela dingi Nzambi.—Dim. 2:17; 3:3-5.

Se o kixinganeku kya lelu kya kwila o muthu wala ni nzumbi i tunda kyoso kya fwa, ki kya mateka mu Edene, kya mateka kwebhi? Ki tu tena kuzwela ni kidi kyoso o kithangana kya mateka o milongi yiyi ya makutu. Nowé ni mwiji we, ene ngó a bhuluka ku Diluvyu. Ene exile abhezi a kidi. Kyenyiki-phe, ki kwexile muthu weji longa ima ya makutu.

Mu kiki, tu tena kuzwela kwila, o milongi ya makutu ya kwila o muthu wala ni nzumbi i tunda kyoso o mukutu ki ufwa, ya moneka ngó kyoso kya bhiti o Diluvyu, kyoso Nzambi kya lungulula o madimi a athu mu mbanza ya Babele, “u a mwangena mu ngongo yoso.” Sé phata, ene ambata o kixinganeku kya kwila, o muthu ufwa, maji sayi nzumbi i kamba kufwa. (Dim. 11:8, 9) Sumbala ki twejiya kyambote o kithangana kya mateka o ixinganeku yiyi, etu twejiya ni kidi kyoso kwila, Satanaji, o “tata ya makutu oso,” mwene wa mateka kulonga o kixinganeku kiki. Dyabhu wa sanguluka mu kumona kwila, o makutu-mê a di mwange mu ngongo yoso.—Nzwá 8:44.