Atangi A Madivulu Metu Ebhula

O Bibidya yamba kwila kwa bhingile mbangi jiyadi phala kubatula o maka. (Dya. 35:30; Mate. 17:6; 19:15; Mat. 18:16; 1 Tim. 5:19) Maji mu Kijila kya Moze, se diyala u sanga muhatu “mu mukáwu” a mu lembe kyá anga u mu jijidika kuzeka-ne, se o muhatu u di kola kala ni kikuma kya undumbu, maji o diyala wala. Se ki kwakexile athu a mono kyoso o muhatu kya mu jijidika, mukonda dyahi o muhatu kexile ni kikuma maji o diyala wexile ni kikuma?

O maka mu divulu dya Matendelelu 22:25-27 exile mu belesa o diyala, mukonda mu musoso yú, o diyala a mu mono kyá kwila, wexile ni kikuma. O kijila kiki, kyexile mu lungisa o muhatu. Tala o dimatekenu dya maka.

O jivelusu ja 23 ni 24 ji zwela yalungu ni diyala dya bhange undumbu ni muhatu a mu lembele kyá “mu sanzala.” Mu kubhanga kiki mwene wexile ni kikuma kya undumbu, mukonda o muhatu a mu lembele a mu monene kala wa kazala kyá. O yalungu ni muhatu? ‘Mwene kadikola.’ Se mwene wa dikolele, o akwa mu sanzala eji ku mwivwa, eji mu zokela. Maji mwene ka dikolo. Kifwa mwene wa bhangele mbandu ya undumbu. Mu kiki, kiyadi kyá eji kala ni kikuma.—Mate. 22:23, 24.

Mu jivelu ja kayela, o Kijila kizwela maka engi kyá: “Maji se bhu kala diyala dyala kunyungina mu mukáwu, anga di sanga-mu mon’a kilumba, a mu solo kyá, anga dyal’idi di mu lundamena bhoxi, di mu zeka; diyal’odyo mu jibhyenu mwene ngó ubheka wê mukonda dya kuzeka-nê; maji o kilumba kana ku mu bhanga kima; kilumba k’alé ni mulonga kyasoko ni kifumbe u balumuka mu ku jibha muthu ni mukwá, hé u mu katula mwenyu wê; kyene kimoxi ni kiki. Mbata kilumba a mu sange mu mukáwu; o kilumba a mu solo wa dikôla, maji o wa mu kudila-phe, kamoneka.”—Mate. 22:25-27.

Mu maka yá, o afundixi exile mu dyelela o muhatu. Mu ukexilu webhi? Mu ukexilu wa kwila muhatu “wa dikôla, maji o wa mu kudila-phe, kamoneka.” Mu kiki-phe o muhatu ka bhange undumbu. O diyala wexile ni kikuma kya undumbu ni kujijidika mukonda wa kwata o muhatu a mu lembe kyá yu wa “mu lundamena bhoxi.”

Kyenyiki-phe, sumbala o kijila kisota kulungisa dingi o muhatu, o musoso u jimbulula kyambote o diyala, kala, wala ni kikuma kya kujijidika o muhatu ni kubhanga o undumbu. Tu tena kudyelela kwila o afundixi exile mu “tokwesa mwene kyambote” ni kukayele o itendelesu ya Jihova mu kubatula o maka. Nzambi wexile mu bhitulula mu veji javulu o itendelesu yiyi.—Mate. 13:14; 17:4; Mak. 20:14.