Eye Wakijidile?

Mukonda dyahi o Bibidya idibhitulula?

SAYI ithangana o asoneki a Bibidya abhitulula o ima yasoneka kizwelu mu kizwelu. Tumone ima itatu nange ya abhangesa ku soneka mu ukexilu yu:

O kithangana kya isoneka. Mu Izalayele yokulu, avulu kexile ni kopya ya kitumu mba ya Mikanda Ikola. Mu ithangana yavulu, ene exile mu kwivwa o kitangelu kya kitumu kyoso o kifuxi kyexile mudyongeka bhu Balaka. (Mate. 31:​10-12) Nange mukonda dya kudyongeka athu avulu mu kididi kimoxi, ni kwila exile mu kwimana we mu ji ola javulu, ene kexile mutendela o ima yoso yexile mutanga. (Neh. 8:​2, 3, 7) Mu ithangana yenyoyo o kubhitulula o jipondo ja betakota, kweji tena kukwatekesa o athu kulembalala o milongi ni ku ikumbidila ku mwenyu wa. O kubhitulula tu izwelu kyeji ku akwatekesa benge-benge kulembalala o jipondo ja lungu ni ijila ya abhanene Jihova.—Iji. 18:​4-22; Mate. 5:1.

O ukexilu wa kusoneka. Sayi jimbandu ja Bibidya, a jisonekene kala mimbu—mu kifika o divulu dya Jisálamu, Mukumbi wa Mikumbi, ni dya Kuditenda. Sayi ithangana o mimbu yexile ni izwelu yexile mubhitulula. Kiki kyexile mukwatekesa kulembalala o dyambu dya mimbu. Mu kifika, tala o izwelu itusanga mu divulu dya Jisálamu 115:​9-11: “Eye Izalayele, dyelela kwa Jihova; mwene dikwatekesu dyâ, ngubu yâ. Enu dibhata dya Alá, dyelelenu kwa Jihova; mwene dikwatekesu dyâ, ngubu yâ. Enu mu akwa woma wa Jihova, dyelelenu kwa Jihova; Mwene dikwatekesu dyâ, ngubu yâ.” O kubhitulula o izwelu yoyo kyeji kwatekesa o jingimbidi kulunda o milongi ya mimbu ku mixima ni ilunji ya.

Mukonda dyahi a isoneka. O asoneki a Bibidya sayi ithangana exile mubhitulula jipondo ja katunda. Mu kifika, kyoso Jihova kya tendelesa o akwa Izalayele phala kadye manyinga, mwene wabhangesa Mozé kubhitulula mu veji ja vulu, se mukonda dyahi katokalele kubhanga kiki. Nzambi wamesenene kwabhangesa kutendela kwila o mwenyu wa xitu wala mu manyinga, kifwa, o manyinga alombolola o mwenyu. (Iji. 17:​11, 14) Ku pholo dya kwenda, kyoso o jipoxolo ni tufunga mu Jeluzaleme kya tendelesa o Jikidistá ya lungu ni ima ya tokalele kweha phala kusangulukisa Nzambi, ene abhitulula dingi o kitumu kya manyinga.—Ika. 15:​20, 29.

Sumbala o Bibidya idibhitulula, kiki ki kilombolola kwila Jihova wa mesenene kwila o athu akala ni kifwa kya kubhitulula o izwelu ya Bibidya. Mu kifika, Jezú wambe: “Mu kusamba, kana kutumbula o izwelu imoxi mu ithangana yoso.” (Mat 6:7) Mwene watubhana jindunge jalungu ni kyebhi ki tutena kusamba. (Mat. 6:​9-13) Kyenyiki, sumbala kitwene mubhitulula izwelu imoxi ngo mu misambu yetu, maji, tutena kubhitulula o maka utwamuzwela mu musambu mu veji javulu.—Mat. 7:​7-11.

Mu kiki, tutena kumona kwila, kwexile ima yambote ya bhangesa o Mak’a Nzambi kubhitulula o izwelu. Yu ukexilu wamukwa wa Mulongexi wetu Wadikotelele, kutulonga kukatula mbote mu Maka me.—Iza. 48:​17, 18.