Jihova Wala Jinga Netu

1-2. (a) Mukonda dyahi tutena kuzwela kwila kyoso ki twamudibhana ni ibhidi kitwala ubheka? (b) Ihi itwanda dilonga mu milongi yiyi?

KYOSO ki tubhita ni ibhidi tudimona kwila twala ubheka, kyedi kala twala mukididi bwamunoka kyavulu ni kuvusa we kyavulu, maji kikwala kididi phala kulengelaku. Maji mu kidi kitwala ubheka. O Tat’etu ya henda Jihova umona o ibhidi yetu. Maji ki kyene ngo, mwene we utukwatekesa kudibhana ni ibhidi. Ni henda mwene utukanena: ‘Nganda Kukwatekesa.’—Iza. 41:10.

² Mu milongi yiyi twanda mona maukexilu awana ilondekesa se kyebhi Jihova kyatukwatekesa (1) mwene utwendesa, (2) mwene utubhana itwabhindamena, (3) mwene utulanga (4) utukonda o malamba. Kibhidi kyoso-kyoso kitudibhana nakyu ku mwenyu Jihova utukanena kwila nuka wanda tujimba. Mwene nuka wanda tubwazeka. Kyenyiki etu nuka twala ubheka.

JIHOVA UTWENDESA

3-4. Kyebhi Jihova kyatwendesa? (Jisá. 48:14)

³ Tanga Jisálamu 48:14. Jihova wejiya kwila kitwala ni kutena kwakudyendesa mudyetu ni kwila twabhindamena o kikwatekesu kyê. Kyebhi mwene kyendesa o mundu we lelu? Ukexilu umoxi bhukaxi ka Bibidya. (Jisá. 119:105) Mwene utulonga bhukaxi ka maka mê, kusola kyambote, kukala ni idifwa yambote itukwatekesa kusanguluka kindala ni kukala ni mwenyu wakalelaku ku hádya.a Mukifika, mwene utulonga kukamba kubhaka bhonzo, kuzwela jinga o kidi ni kuzola akwetu ni muxima woso. (Jisá. 37:8; Jih. 13:18; 1 Ph. 1:22) Kyoso ki tubhanga kiki, tukituka tu jitata jambote, anumi ambote, ahatu ambote ni makamba ambote.

⁴ Ku mbandu yamukwa, Jihova watumu kusoneka misoso ya athu adibhanene we ni ibhidi kala etu. (1 Ko. 10:13; Tiy. 5:17) O kutanga o misoso yiyi ni kukumbidila itwadilongo, mbote phala etu. Tumone ima iyadi itubhangesa kuzwela kiki. (1 Ph. 5:9) Kyadyanga tumona kwila kitwala ubheka, mukonda athu avulu a dibhanene we ni ibhidi yiyi kala o ibhidi itwamu dibhana nayu, maji akolokota mukonda Jihova wa akwatekesa. (1 Ph. 5:9) Kyakayadi tudilonga kudibhana ni ibhidi yetu—Lom. 15:4.

5. Jihova wasolo ananyi phala kutwendesa?

⁵ Jihova utwendesa we bhukaxi kajiphange.b Mukifika, o tufunga twa ilunga ene mukunda jinga o ilunga phala kutuswinisa. O madiskulusu mâ yene mutuswinisa, mukolesa o kixikanu kyetu ni kutukwatekesa kusuluka mu kukala ni kutululuka. (Ika. 15:40–16:5) O tufunga mu ilunga ene we mubhanga nguzu yavulu phala kukwatekesa o aboki kudikwatenena mu kixikanu dyâ. (1 Ph. 5:​2, 3) O jitata alonga o twana twâ kuzola Jihova, kusola kyambote ku mwenyu ni kukala ni maukexilu ambote. (Jisa. 22:6) O adyakime a ahatu akwatekesa o minzangala a ahatu mu kwabhana phangu, kwatendelesa ni kwaswinisa.—Tit. 2:​3-5.

6. Kyebhi kitutena kulondekesa o kisakidilu kyetu kwa Jihova mu yoso yene mubhanga phala kutwendesa?

⁶ Jihova ubhanga o mbandu ye phala kutwendesa. Kyebhi kitutena kulondekesa o kisakidilu kyetu mu yoso yene mubhanga phala kutwendesa? O divulu dya Jisabhu 3:​5, 6 dyamba: “Dyelela kwa Jihova ni muxima wé woso; kana kudyelela ngó o kilunji kyé.” Se tubhanga kiki, “mwene wanda yukisa o ji njila jetu joso,” kiki kilombolola kwila mwene wanda tukwatekesa kukamba kudita mu jimvunda ni kukala ni mwenyu wasanguluka. Tusakidila kyavulu Jihova mu kwijiya kyambote muthu ni muthu ni kutubhana itendelesu ni henda yoso!—Jisá. 32:8.

JIHOVA UTUBHANA O IMA YOSO ITWABHINDAMENA

7. Kyebhi Jihova kyatubhana o ima itwabhindamena? (Filipe 4:19)

⁷ Tanga Filipe 4:19. Jihova kene ngo mutwendesa kana, maji utubhana we o ima itwabhindamena. Kyebhi? Mwene ubesowala o nguzu itubhanga phala kukala ni kudya, izwatu ni kididi phala kuzekamu. (Mat. 6:33; 2 Te. 3:12) Ki kituxi kutandanganya ni ima yiyi, maji Jihova ututangela phala kitukale ni hele yavulu. (Tanga o nota de estudo mu divulu dya Matesu 6:​25, mu Bibidya ya phutu.) Mwene ukanena kwila nuka wanda bwazeka o jiselevende jê jafiyele benge-benge mu ithangana yoyo yabhindamena dingi. (Mat. 6:8; Jih. 13:5) Kyoso mwene kyamba kwila wanda dikila o ibhindamu yetu, etu tutena kumudyelela ni kidi kyoso.

8. Kyebhi Jihova kyakwatekesa Davidi?

⁸ Tala kyebhi Jihova kyakwatekesa Davidi. Davidi wabhiti mivu yayulu mu kulenga sobha Sawulu. Mu kithangana kiki kyabhonzo, Jihova wabhana kwa mwene ni kumayala mê yoso yabhindamene phala kukala ku mwenyu. Mu kuxinganeka kyebhi Jihova kya alange mu mivu yoso yiyi, Davidi wasoneka: “Tunde mu undenge, o kiki nga kuka; kiluwa ngi mona mukwa kidi a mu ehelela, mba mbutu yê yenda ni kubhinga jimola.” (Jisá. 37:25) Eye we wamono kya o henda ya Jihova kyoso mwene kyakukwatekesa mba kyakwatekesa o jiphange jengi mu ithangana ya ibhidi.

9. Kyoso kikubhita divuwa, kyebhi Jihova kyatubhana yoso itwabhindamena? (Tala we o jifoto.)

⁹ Jihova utubhana we yoso itwabhindamena kyoso ki kubhita mavuwa. Mu kifika, ku hama yadyanga mu Jeluzaleme kwexile nzala yavulu, o jikidistá atungile mu ididi yengi abhana kikwatekesu ku jiphange atungile ku Jeluzaleme. (Ika. 11:​27-30; Lom. 15:​25, 26) Lelu we o mundu wa Jihova alondekesa o ukexilu wa kubhana. Kyoso kikubhita divuwa, Jihova ukwatekesa yo atungu mu ididi mwabhiti o divuwa bhu kaxi ka jiphange mu kwa abhana kudya, menya, izwatu, milongo ni ima ya mukwa. O kibuka kya kutunga akwatekesa kutungulula o jinzo ni ididi ya ubhezelu yazanganya. Ku mbandu yengi o jiselevende ja Jihova kene mulaleka mu kubhana kikwatekesu ni kukonda o malamba ni kukwatekesa mu nzumbi yo o jinzo jâ jabudika ni yo afundu muthu wakazola.c

10-11. Ihi i wadilongo ni ima yabhiti ni manu Borys?

¹⁰ Jihova mukwa kubhana, mwene ulangidila kate mwene o ibhindamu ya yo kamu musidivila luwa. Mu kukayela o phangu yê, etu tusota maukexilu akubhanga mbote kate mwene kwa yo ki jiphange jetu. (Nga. 6:10) Mu ithangana yavulu o ukexilu yu wene mubhana umbangi wambote. Tala yabhiti ni diyala amwixana Borys, mutwameni wa xikola mu ixi ya Ucrânia. Sumbala mwene kexile mbangi ya Jihova, maji ne kiki mwene wexile mutalatala kyambote o maxibulu mê exile jimbangi ja Jihova ni kuxila o ijila yá. Kyoso mu ixi ya manu Borys kwexile ita, mwene wasolo kulenga mu kididi kyatululukile, o jiphange jetu amukwatekesa. Mu kusuluka mwene wayile mulembalasa ya kufwa kwa Jezú Kidistu. Kyoso kyaxinganeka mu yoso yabhange o jiphange kokwê, manu Borys wambe: “O jimbangi ja Jihova angikwatekesa kyavulu, eme ngasakidila kyavulu.”

¹¹ Etu we tutena kukayela o phangu ya Jihova mu kulondekesa henda ku athu oso kate mwene kwa yo kamusidivila luwa Jihova. (Luk. 6:​31, 36) Twamesena kyavulu kwila o ukexilu wetu wa henda ukwatekesa o athu kuzukama kwa Nzambi. (1 Ph. 2:12) Ne mwene se kukamba kubhita o ima yiyi, twanda sanguluka kyavulu mukukwatekesa akwetu, mukonda “o kubhana kusangulukisa dingi.”—Ika. 20:35.

JIHOVA UTULANGA

12. Jihova ukanena kulanga o mundu we mu maukexilu ebhi? (Jisálamu 91:​1, 2, 14)

¹² Tanga Jisálamu 91:​1, 2, 14. Lelo Jihova ukanena kulanga o mundu we mu nzumbi mba kwa akwatekesa kusuluka mu kukala ni ukamba wambote ni mwene. Jihova nuka wanda kwehela Satanaji kubwikisa o ubhezelu wa kidi. (Nzw. 17:15) Tu tena kudyelela ni kidi kyoso kwila mu kithangana kya “hádi ya dikota” Jihova wanda kumbidila o kikanenu kyê kya kulanga o mundu we ki mu ukexilu wa nzumbi ngo kana maji mu ukexilu wa xitu we.—Dij. 7:​9, 14.

13. Kyebhi Jihova kyalanga o jiselevende jê kala muthu ni muthu?

¹³ Kyebhi Jihova kyalanga o jiselevende jê kala muthu ni muthu? Bhukaxi ka Bibidya Jihova utukwatekesa kutungula o ima ya yibha ni ima yambote. (Jih. 5:14) Kyoso kitukumbidila o itumu ya Bibidya mwene utulanga mu nzumbi ni mu xitu. (Jisá. 91:4) Jihova utulanga we bhukaxi ka kilunga kyê. (Iza. 32:​1, 2) O jiphange jetu azolo Jihova, ya akumbidila o itumu ye ku myenyu yâ. Kyoso kitukala ni ene, tutambula o kiswinisu ni nguzu itwabhindamena phala kitudilunge ni athu ayibha.—Jisa. 13:20.

14. (a) Mukonda dyahi Jihova wehela o jiselevende jê kutala hadi? (b) Kidyelelu kyebhi kitusanga mu divulu dya Jisálamu 9:10? (Tala we kulwiji.)

¹⁴ Kidi kwila mu ukulu sayi jiselevende jê, Jihova wa alange mu ukexilu wa xitu. Maji avulu atale hadi ya afu mukonda dya ima yavulu yabhiti nayu. Lelu we muthu woso-woso mudyetu utena kutala hadi mukonda dya kukala mu kididi ni kithangana ki kitokala. (Ndo. 9:11) Ku mbandu yamukwa, amoxi mu jiselevende ja Jihova mu ukulu, adibhana ni izukutisu kate mwene afu. Kiki kitena we kubhita netu lelu. Jihova wehela o ima yiyi kubhita phala kulondekesa kwila Satanaji mukwa makutu. (Jobe 2:​4-6; Mat. 23:34) Nange Jihova kanda tubhulula mu maka oso utudibhana nawu, maji o Bibidya ikanena kwila Jihova nuka wanda kweha yo amuzolo.d—Jisá. 9:10.

JIHOVA UTUKONDA O MALAMBA METU

15. Kyebhi Jihova kyatukonda o malamba bhukaxi ka misambu, ka maka mê ni bhukaxi ka yonge? (2 Ko. 1:​3, 4)

¹⁵ Tanga 2 Kolindu 1:​3, 4. Sayi Bhabha tudibhana ni ndolo ya kufunda muthu, mba tudibhana ni kuluwala ni hele yavulu. Nange kindala wamudibhana ni ibhidi yavulu mukonda dya kiki ubanza kwila wala ubheka. O kwila sayi muthu wamumona kyebhi ki wamudivwa? Kyene, o muthu yu Jihova. Mwene wivwa o ndolo yetu ni kwila mwene “utukonda o malamba metu moso”. Kyebhi mwene kyabhanga kiki? Kyoso ki tusamba kwa Jihova, tumudyondela mba tumubhinga o kikwatekesu kyê. Mwene utubhana “o kutululuka kwa Nzambi kusomboka o kitongolwelu kyoso”. (Fil. 4:​6, 7) Mwene utukonda we o malamba kyoso kitutanga o maka mê mu Bibidya. O Bibidya ilondekesa kwila Jihova watuzolo, itulonga kyebhi kitutena kukala ni unjimu itubhana we o kidyelelu kya kidi. Utukonda we o malamba metu bhukaxi ka yonge. Mu ithangana yiyi tutena kumona o henda ya jiphange jetu ni kutuswinisa mu ima itwadilongo mu Bibidya.

16. Ihi itulonga o phangu ya manu Natani ni mana Pidisila?

¹⁶ Tala yabhiti ni manu Natani ni mana Pidisila, atungu mu ixi ya Estados Unidos. O phangu yâ ilondekesa kwila Jihova utukonda o malamba metu, utuswinisa bhu kaxi ka Bibidya. Mu mivu kudima, ene asolo kuya mu kididi mwabhindamene dingi aboki. Natani wambe: “Etu twadyelele kwila Jihova weji besowala o nguzu yetu.” Maji kyabhixila mu mbambe ya ubhe, mu kithangana ni mbandu ene amateka kudibhana ni ibhidi ya uhaxi ni kukamba kitadi. Mu kubhita kithangana ene avutuka kubhata, maji ne kiki o kibhidi kya kukamba o kitadi kyasulukile. Mukulembalala mu yoso yabhiti manu Natani wambe: “Jihova katubesowala kala kitwamesenene, eme ngexile mudibwidisa, ‘Mukonda dyahi? O kwila ngate kituxi?’” Maji mu kubhita kithangana, Natani ni Pidisila amono kwila ka a ehele mu kithangana kyabhindamene dingi kikwatekesu. Manu Natani wambe: “Mu kithangana kyokyo o Bibidya yedile kala Kamba dyami dya kazola, yexile mungibhana itendelesu yambote ni ku ngiswinisa. Mu veji dya kudikwatenena mu ibhidi itwexile mudibhana nayu, twamateka kudikwatenena mu ukexilu wexile mu tukwatekesa Jihova. Kiki kya tubhana kidyelelu kya kwila Jihova weji suluka ku mbandu yetu mu ibhidi itweji dibhana nayu ku hadya.”

17. Kyebhi Jihova kya kondo o malamba ya mana Elga? (Tala we ofoto.)

¹⁷ O jiphange jetu ja mala ni jahatu ene mu tukonda o malamba. Mu kifika tala o musoso wa mana Elga watungu mu ixi ya Hungria. Mu mivu yavulu mwene wadibhanene ni ibhidi yavulu wamubhangesa kutandanganya ni kumona kwila kexile ni valolo. Mu kuxinganeka mu yoso yabhiti mwene wamono kwila Jihova wexile mu mukwatekesa bhukaxi ka jiphange. Mwene wambe: “Eme ngatokalele kukalakala, kulanga o monami wakatele ni kudibhana ni ibhidi yakamukwa. Kyoso Jihova kyexile mu mona kwila kingala dingi ni nguzu, mwene wexile jinga mu ngikwatekesa. Mu 30 a mivu kikwabhitile ne ngo kizuwa kimoxi Jihova wakambele kukumbidila o kikanenu kye kyá ku ngikonda o malamba. Mu ithangana yavulu mwene wabhange kiki bhukaxi ka izwelu ya henda ya jiphange jetu. Mu ithangana ingabhindamene ngexile mutambula jinjimbu, mikanda mba iximanu kya jiphange.”

18. Kyebhi ki tutena kukonda o malamba a akwetu?

¹⁸ O kukonda malamba ya akwetu ukexilu wa kukayela o phangu ya Jihova yu ujitu phala etu. Kyebhi ki tutena kubhanga kiki? Mu kwivwa ni mwanyu woso, kuzwela mu ukexilu uswinisa ni kubhana kikwatekesu kwa yo abhindamena. (Jisa. 3:27) Etu tubhanga nguzu phala kukwatekesa yo amutala hadi kate mwene kwa yo kamusidivila hanji Nzambi. Kyoso o jivizinyu jetu kyakala ni thambi, kyoso kyamukata mba kyoso kyamu dibhana ni hele, etu twa akunda, twa abhana matwi anga tutanga nawu jimbandu ja Bibidya ja aswinisa. O kukayela o phangu ya Jihova o “Nzambi mukwa kukonda o malamba,” itubhekela mbote. Tutena kukwatekesa o jiphange jetu kukolokota ni kukwatekesa o athu kamusidivila hanji Jihova o kuxikina o njimbu yambote.—Mat. 5:16.

JIHOVA WALA JINGA KUMBANDU YETU

19. Kyebhi Jihova kyatulanga ni kyebhi ki tutena kukayela o phangu yê?

¹⁹ Jihova ukwatekesa yo amuzolo. Mwene kene mu tubwazeka kyoso kitudibhana ni ibhidi, Jihova wene mu tulanga kala o tatá kyalanga o mon’ê ni henda yoso. Mwene utwendesa, utubhana yoso itwabhindamena, utulanga ni kwila utukonda o malamba metu. Tutena kukayela o phangu ya tatetu ya henda mu kukwatekesa ni kuswinisa yo amudibhana ni ibhidi. Kuma twatungu ku mundu yu wayibha twanda dibhana ni ibhidi ku mwenyu wetu, maji tutena kudyelela kwila Jihova wala kumbandu yetu. Mwene wakanena: “Kana kukala ni wôma, kuma eme ngala bhwamoxi n’eye.” (Iza. 41:10) Kyenyiki twala ni kidyelelu kya kidi kya kwila nuka twanda kala ubheka!